Song 8 | XteSC | STEP | Kaber nerdi pepu upu Uo, ne dopkamnerem ngebo! Ne kange dipru neitamai yumadi, ‘Uo ange kupteneme’ tenen, ila di putapnere ngeda, katuai dipapu lap pepkukene. Ada, kanda ne dubo sisa kuptumtoda, kikiman kutenemepa, yuk nengdi mali upu cap, minina upu cap, men pepsetenge. Kanda na nin sisa dipapu deiamketudi, kan jen tep keca ton karepra, pio kalengamketupa, kanda konum neptumtoda, nun buteneda, tenpu nyapsilip kuteneme. Tenpu nyapsilip kuteneme teptoda, dan mutu do yuma, antapnememnyopda, nedi kan tep adipapu kan katum deiki mutupketene. Mutupkenyopda, yuk neng yuma epsetengedi, ‘Uo, anerda konum mali kupmare,’ pepra, men wenepnetenge. Nun buteneda, weite-du sisa kuteneme teptoda, kikiman kutenemepa, yuk nengdi mali upu men pepsetenge.

Song of Solomon 8

Kaber nerdi, ‘Er dopkamne,’ teneramu ngebo tep pepu

Kaber nerdi pepu upu

1 Uo, ne dopkamnerem ngebo! Ne kange dipru neitamai yumadi, ‘Uo ange kupteneme’ tenen, ila di putapnere ngeda, katuai dipapu lap pepkukene.
Ada, kanda ne dubo sisa kuptumtoda, kikiman kutenemepa, yuk nengdi mali upu cap, ^{▼▼mali upu – Anerdi aupu pepunge deiyoda, ake. Ada, er mun peramu ngebodi, aner kapul men dopka tep, ataruda, sun butene inipra antapdaramrei. Atep, ‘Uo, kandi konum dopnetumdi, kikiman pio kuteneme’ tenen, putapka tep pepu.} minina upu cap, men pepsetenge.
Kanda na nin sisa dipapu deiamketudi, kan jen tep keca ton karepra, pio kalengamketupa, kanda konum neptumtoda, nun buteneda, tenpu nyapsilip kuteneme.
Tenpu nyapsilip kuteneme teptoda, dan mutu do yuma, antapnememnyopda, nedi kan tep adipapu kan katum deiki mutupketene.
Mutupkenyopda, yuk neng yuma epsetengedi, ‘Uo, anerda konum mali kupmare,’ pepra, men wenepnetenge. Nun buteneda, weite-du sisa kuteneme teptoda, kikiman kutenemepa, yuk nengdi mali upu men pepsetenge.
2 Ange gum dingeda, kandi ne tep konum dopnetumpa, kikimanpu kuteneme teptoda, ataru-ataru yumada, nedi kan buru talepra, ne deipneu ner, na nin sisa, er ati pumbon dubeketenedi, ne pe pio tau peramre anggur du me cap, tonda, ne pe delima co du me mokon cap, karepketenepa, kandi ange yuma tali lupra jeptume. ^{▼▼jeptume – Aupuda, domon upu deiki di pepu. Aupu nong neitamai deiyoda, ‘Kandi ne tep konum dopnetumtoda, kikiman mapteneme. Tonda, ne nong yuma cap, ne kange dipru cap yumada, adipapu karepketene’ tenena tep, adomon upu pepu.}
3 Uo, ‘Kikiman maptenemedi, kan tebalal buru di, ne giso erepra talepnetume! Kan dumsisi buru di ne nong yuma talepnetumdi, iripropnetume,’ tenepnedi ila di putapnere.
4 Uo, nedi sun Yerusalem mutu neitamai kurumu kaber nerapu yuma tep, aupuda upepsene. Sunda, pedina upu deiki di, puto di pepkuserume!
Ada, ne cap, ne dopkamner ngebo cap, kikiman kunemedi, mapkamnem taruda, sun yumadi, nun butene damai pio men yakankamrume!
Kikiman kunemedi, mapmanemnyanen, konum nun kange lopsere pangeda, ipna taru konum bukronneme taruda, nun ati damai, kange di tamupra yakana telepe.

Yerusalem ila ati arum doramyai kurami kaber nerapudi, “Bicau tenepra, kange deridana ngeda, puto weik kurure,” pepi upu

Kaber nerapudi pepi upu

Yerusalem mutu neitamai kurami nerapudi upepi. “Anerapo, sun amutu kurumu nerapu yumada dindeso!
Nimi gumai, pio katuai mutu neitamai di, yakanmare kaber nerda, ware ner do?
Anerdi, er tep, bicau tenepra mun peramre ngebodi, aner tep, ila di bicau tenepra, kange derirura cadi, anerda, angebo damai baripra weleryakanmar adano! Anerda, ware ner do?” pepra asimpetenmai.

Kaber nerdi, er dopkamu ngebo tep pepu upu

5 Ne kabo, kanda telep du mouramre co, er sida apel coda, aco kawai mapmamumpa, nedi bukeipkesi.
Mapmamum mutuda, tali mutu guma. Ada, kan nin sisadi mundu douamnganen, amenda taru amutu dipapu, deiamkeu mutu neitamaipu mapmumpanen, nedi bukra deiamkesi.
6 Kandi ne tep ila di bicau tenenememdi kange konum deipnemuma cadi, ukutaru pe, amenda dorkunkamre taru peda, kandi talepnemempa, kan damaipu kikiman pio akunkamne ja!
Ukupmantoda, kan kange neitamaida, ne si sekeipnememnyopda, apio akunkamre. Deiyoda, ‘Yuk nerapu yuma tep nengeda, pio tenememdi, men putapkamkerura tep pepkene.
Ukupmanto ngeda, kan buru toupne deiki di, bukep wipra kepmemnyopda, pio akurura utopu, ne tepapu kan kange derinkamnerume.
Nun butenedi, ila di bicau tenepra, tupa-tupa kange deridanapu kunememnyada, pio puto weik kurure. Ukupmantoda, nimi denada puto weik kuretopu, nundi kange deridanapu kuneme ngeda, ila puto weik kurura tep, men gum kupmanto kurure.
Tonda, nimi tuai nesaladi gam kuramenganen, pio wisi deipmengopda denapu kunkamenge. ‘Angeda men kupsetue,’ teneptepya peda, tek sisi ange kupkamser ja! Ange utopu, nun butenedi ila di bicau tenenemedi, kange deridanapu kunemnyada, pio akunkamre. Men gum kuptue tenepne.
Ukupmantonge ton, ila uku jenmarepanen, nimidi auku men tamdongoramengtopu, ila di bicau tenepnememdi, kange deridanapu kunemnyada, pio akunkamre. Men gum kuptue tenepne. Angeda, pio men gum kupkamre.
7 Ange utopu, ila embaramre me optudi, nun damai yatua peda, ila di bicau tenenemem ngeda, pio akunkamre. Ila me optua peda, adeikida, nundi, kange deridanapu kunemnyada, men gum kupra deipsetue tenepne.
Sun moupra tenepso! Nimi tenpu ngebodi, er mun peramre ner tep, “Ka nero, ne talenun keca yala-yala yuma cap, ne ati pumbon mawa deriramsi keca yuma cap, karepketenepa, adeiki di kandi ne tep, ila di bicau tenepnetumdi, kange derinkamnerum do?” pepra moroptua peda, anerdi, ‘Telepe, adeiki di kange derinkamkene,’ pepra pio men pepkamre.

Kaber ner cap, er mal neng cap, upu pepdaringe tep, pepi upu

Akaber ner, er mal nengdi pepi upu

8 Nunda aner er du yapu nengdi pepi. “Nun weit nerda, tupa kanam nerpu kurura cadi, er moumda kapul men kupmare. Atep nun weit nerda, nimi kapul men doptenge, tenepmepe,” pepi.
Atep nengeda, tenpu ngebodi, ‘Aner doptene’ tenen, putaptupa, moropsetuopda, ware kuptepe do? Ada, angebodi nun weit ner dopkure tumida, ware kuptepedi, nun weit ner meliptepe do?
9 Ukupmanto ngeda, nun weit nerda, tembok gel beilya kuptuopda, nundi kunumna weik keca er si perak dopra, agel beilya deiki di, lyom gel ati utopunge ton dopra deiptepepa, urasin pio telep kutue.
Ange gum dingeda, nun weit nerda, ati buplan kuptuopda, nundi urasin pio telep co, er sida aras co dopra, abuplan co deiki palepra doptepepa, urasin telep kuptue.

Kaber nerdi er mal neng tep, pepu upu

Kaber nerdi pepu upu

10 Gume ne duyapu. Teka men di ne moumda kapul men kupneua tep, tembok gel beilya utopu, banpu mutu utopu kupneu. Dinino, ukutaruda ne moumda, konum nepsidi, weik kupneua cadi, lyom gel ati dopmengepa kuramre utopu kunerura cadi, ne tep mun penerur ngebodi, neda telep dadopnetue.
Ange tep nengeda, ukutaruda ne tep pio ila di bicau tenepneredi, mun penerur ngebodi, ne tep, ‘Anerda, urasin pio telep ner kurure’ tenen, konum kange deipra kurure.

Kaber nerdi ukupmanto upu pepu

Kaber nerdi pepu upu

11 Ukutaruda ukupmanto upu ton pepkusene.
Amutu taleramu nimi deiyo ngebo, er sida Raja Salomo, mutu si Bahal-Hamon mutu neitamaida, tenpu anggur tapu du wa taleramudi peamu.
Awa taleamu dinin, ‘Sundi melipkamneng’ tenen, keana taru tep, erdi, “Sundi melipneso!” pepra, yuk neng tep upeipupa, anengdi Salomo er wa pepra peiami.
Tonda, anggur tapuda, du weik mouramu taru yumada, sun apel melimna nengdi, Salomo tep, kunumna weik keca, er si perak dopra, gel uang utopu kupra seribu (1.000) kepra kareryakarami.

Kaber nerdi er dopkamu ngebo tep, pepu upu

Kaber nerdi pepu upu

12 Dinino, ne tek sisi pepne. Ne anggur tapu wada, ^{▼▼anggur tapu wa – Aupuda, domona utopu pepka cadi, aupu nong neitamai ngeda, er pe nong tep tenepudi pepu. Ada, ‘Ne mun penun ngebodi dopnetue,’ tenepka tep, aupuda pepu.} nengepu kunerura cadi, awa karena tep nengeda, ne dipapu tenepnetopu karepkamne.
Uo, kanda ne tep mun penerum ngebo, kanda Raja Salomo utopu kunerume. Atep nengeda, kanda akunumna weik keca seribu (1.000) perakda, kan dipapu doproptume.
Dinino, sun keana taru tep anggur du kalengna deiyo nengda, dua ratuspu (200) doproptenge.

Sun akaber ngebo cap, akaber ner capdi, sun butene pepdarei upu

Kaber ngebodi pepu upu

13 Uo, kanda ne dopkamken ner kurume! Kanda anggur wa neitamai utopu kumemdi, upu pepmemnge yumada, ne kayapu nengdi gekekenunge.
Dinino, uo, ne ila di putapnere ngeda, kandi ne damaipu yana upu pepnetumpa, ne dipapu kan perum upu yumada gekepketene,’ tenenune. Utenenuna tep, nedi kan aner tep moropkene!

Kaber nerdi er dopkamu ngebo tep, pepu upu

Kaber nerdi pepu upu

14 Uo, kan tep nengeda, ila di bicau tenekenedi, kange derikenune! Kanda sika di gum dinin, menmena di ne damai yankamrume!
Ukupmantoda, bura tara gam kuramre keca, er sida kijang bisam, pio sepdara baramretopu, kan peda, menmena di sepdara ne damai adipapu yankurume!
Ukupmanto ngeda, bura tara gam kuramre keca er sida rusa bisam jem ngeda, nimidi rempah-rempah dopra kouramipa, akeca paramu mutu-mutu dup deiki di, kwerepra sepdara yakaramretopu, kan peda ne damai, adipapu menmena sepdara yankurume!