Tit 2 | XteSC | STEP | Uda, Tituso, kandi peteremkamrum upu pepkukene. Ada, Allah er upu tek sisi akuretopu, “Allah er upu tek sisi deiyo ngeda, ake,” pepra, dumsisi ngepu moupra peteremkamrume. Yuk ton gume.

Titus 2

Allah er tek sisi upu peteremkamrum ngeda adano, pepu upu

1 Uda, Tituso, kandi peteremkamrum upu pepkukene. Ada, Allah er upu tek sisi akuretopu, “Allah er upu tek sisi deiyo ngeda, ake,” pepra, dumsisi ngepu moupra peteremkamrume. Yuk ton gume. 2 Sun wisi neng yuma tep, aupu pepra peteremkamrume. “Ware keca do yuma, yu me kange yawaramne me jena do, yuk mali kun keca do, ‘Tali lupra kupkune,’ tenena gume. Sun pe tep, pio moupra didamumdi, moupra teneprumudi, bouna di teleppu kunkamrume,” pepra, sun wisi neng yuma tep, upepra peteremkamrume.

Ukupmenge pangeda, yuk nesaladi awisi neng epmengedi, “Awisi nengda tek sisi telep neng kununge,” tenepra penkamenga tepa. Tonda, sun Allah tep teka tenenange cap, yuk neng tep, bicau tenepra makunange cap, uda, ikin keca akaprepane, pel tamna gum di, pio pe deipra, telep pel donange cap, ayumada, ‘Adipapu teleppu kunkameng’ tenen, sun wisi neng tep, “Ukupkamrume,” pepra, peteremkamrume. Atelep upu konum peterepmempa, awisi nengdi konum gekepmengopda, amenda taru Allah er tek sisi upu gekepra, teka tenepmengopda, dumsisipu kupmengedi, Allah er upu tamna gum di, pio dimpeprap, teleppu kunkamenge.

3 Ange utopu, sun wisi nerapu tep aupu pepra peteremkamrume. “Sun kunge keca neitamai yumada, ‘Allah er mambule’ tenen, mali kun keca yuma tapmumdi, pio dumsisipu kurumudi, mengne nesalapu kunkamrume. Sundi yuk nesala tep, mali upu pepra, pio men luludinkamrume. Tonda, sundi yu me, kange yawaramne me putaprepa, weika di men jenkamrume. Ayuma men kunkamrum dinin, pio telep kun kecapu tenepra, yambul kaber nerapu tep, peteremkamrume,” upepra, sun wisi nerapu tep peteremkamrume.

4 Apepmaken keca kupmenge dingeda, amenda taru sun wisi nerapudi, wisi gum nerapu, sun kaber nerapu tep, petereptenge. Peteremkameng kecada ake. “Ada, sun kaber nerapu, sun neng yapu cap, sun nyapu cap, bicau tenerumudi, dipru kareprepa makunkamrume. 5 Tonda, sun kange neitamai putarsere keca, ‘Tali lupra kupkun,’ tenena gum dipapu, ‘Mali kupkup’ tenen, sun pe kurumu keca tep, moupra didamumdi, sun pe dipru teppu, dumsisipu kunkamrume. Sun pe ati pel moupra domumdi, yuk nesala putare keca tenepra makunkamrume. Sun pe neng yapu tep, sun upu gekepra, sun amutara kupmumdi, dipru bouna di kunkamrume. Ayuma ukuprumu pangeda, yuk nesala epsengedi, sun kaber nerapu kurumu keca deiki di, Allah er upu tep, mali upu pepra, nun teka tenenup nesala, nun nong deiki ikin keca men deipsetenge,” upepra, sun kaber tupa kunge nerapu tep peteremkamrume.

6 Arup pepmakentopu, kandi sun kaber neng tep nengeda, melipra peteremkamrume. Ada, sun kange neitamai putare keca, ‘Tali lupra kupkun’ tenena gum dipapu, ‘Mali kupnup’ tenen, sun pe kunge keca tep moupra didangedi, sun pe dipru teppu, dumsisipu kunkamenge. ‘Ukupra kunkameng’ tenen, kandi sun kaber neng tep apepmasen upu peteremkamrume.

7 Tonda, Titus kanda, ware kun keca do yuma, ukupmanto ngebo kunkamrume. Ada, kandi pel domempa, yuk nesala yumadi, kan kunkamrum keca epkengedi, kael kemkamenge. Atep, ‘Telep kun keca kael kemkameng’ tenen, akeca-keca yuma pio moupra, teleppu pel donkamrume. Kandi Allah upu peteremkamrum taru yumada, ‘Co bo doproptene’ tenena cap, mawa di mok upu pena cap, ‘Anengdi ne tep ware tenepnenung do?’ tenen, kwar-kwar kuna cap, esu di tali-tali upu pena cap, ayumada, kandi pio men kunkamrume. ‘Telep upu petereptene dinin, ne dipapu tenepnetopu mali kuna telepe,’ tenenada, pio gume. Kandi Allah upu peteremrum utopu, tek sisi angepu talepra kunkamrume.

8 Amali kuna gum di, pio moupra dumsisingepu peterepmem pangeda, yuk neng gekepmengedi, “Angebo Titusda, mali upu mawa di peserure,” pepra, men wenepketenge. Moupra peteremkamrum ngeda, mesum tep gume. Deiyoda, ukupmem pangeda, kan upu sengdongokengedi, yanikenung nesalada, tek sisi deiyo men kupyopda, nun teka tenenup nesala yuma tep, luludina di mali upu men pepsetengedi, alipu dangkamenge.

9 Uda, yuk neng tep peteremkamrum upu ton pepkukene. ‘Ada, pel mesum dipapu pel donkamseng’ tenen, co bo deiki kunupmengedi, ^{▼▼Co bo deiki kunumami nesalada, isomka nengdi, pio kankan kurami nesala tep, co bo deiki di kunuamipa, akankan kurami nesaladi sun isomka nesala tep, sun pel talipu pel dorami. Tonda, lap pena upuda, nomor 36 dirume.} nimi amutara deipmengedi, “Kunumna keca dorona gum di, pel tali dopserume,” pepra, ikin pel dimenge nesala tep pepkukene. Amesumpu tali pel don nesala tep, ware kun keca do yuma, sun deiyo neng amutarapu kungedi, sun upu moupra gekepmengedi, dipru bouna di kunkamenge. Tonda, sun deiyo nengdi, “Ukupkurum, ukupkurum,” pengepa, mesumpu tali pel don nesaladi, balila deipra tamupra mali upu pena gume. Sun pel donkameng taru neitamai yumada, ‘Nun deiyo nengdi kange derinkamseng’ tenen, teleppu pel donkamenge. Aupu yuma pepra peteremkamrume.

10 Tonda, isomka nengdi, co bo deiki kunupmengepa, mesumpu pel donge nesaladi, sun deiyo neng talenung bung kecada upula dorona gume. Ange gum dinin, pel dona do, co bo dorona do, upu pena do, ayumada, pio dumsisipu kupmengopda, sun deiyo neng ange epmengedi, ‘E, anesalada, sundi pengetopu dumsisipu kununge’ tenen, pio tek sisa tenepkamenge. ‘Sunda mawa di kunge nesala gume,’ tenenkamenge.

Apepmasentopu kupmenge nesalada, teleppu kupmengopda, adeiki di sun deiyo nengdi, nun Lyemna Deiyo Ngebo Allah er upu tep, ‘E, Allah er upuda pio telep upu kurure,’ tenepra, kael kemkamenga tep, aupu pepmakene.

11 NePaulusdi kan Titus tep, “Ukunkamrum, ukupra peteremkamrume, aneng adipapu ukupra kunkameng,” pepra pepmakenada, tali tep gume. Deiyo akapmare. Angeda pepkukene.

Ada, Allah bicau teneseredi, er kange dipapu melimserya deiki di, nun mali kun keca daepseredi lyemdoserure. Ukuseryada, konum yana katuai di jenek kupra lap peipseu. Ware mutu nesala do yuma, nimi ban-ban yumada, sun peteremna nengdi, ‘Allah bicau teneramseua tep, Yesusda nun yo pununa tep depseudi, lyepseue,’ pepra, katuai lap peterepmenga deiki di, nimi yuma moupra kael kemnunge. Yesusdi er dipru karepseudi, melimserya deiki di, animi lyemna upu konum katuai kupra lap pepra deipseupa, nimi ban-ban yuma di gekepmengedi, teka tenenunge.

12 Nun nai bo Allah, er bicau teneseredi, er kange dipapu melimserya deiki di, peteremserepa kael kemnupe. Ada, Allah yanipra, kange dipru mali kuna cap, tali nengdi tuai mali keca tenepra, dipru engena cap tep, “Gume, ange pio men kunkamrume,” pepra peteremserepa, konum kael kemnupe. Tonda, ange kael kemnupe. Allah bicau teneseredi lyemserura cadi, nun dipru neitamai putasere keca, ‘Tali lupra kupkup’ tenena gum, ‘Mali kupnup’ tenen, nun pe tep moupra didankamepe.

Allah pio dumsisipu kuredi, pio telep kuretopu, nun peda, mali kun keca tenpunge peda talena gum di, dumsisipu kupmepyopda, pio telep nesalapu kunkamepe. Ukutaru peda, ange utopu dumsisipu kunkamnupe. Ange yumada, Allah bicau teneseredi, er kange dipapu melipra lyemserya deiki di, peteremserepa, ange yuma kael kemnupe.

13 Amenda yuk taruda, nun pio mambul puto weik kurur Allah, erda tek sisi nun Lyemna Deiyo Ngebo Yesus Kristus kurure. Erdi, im deiki di tamupra doryankamsere. Er doryankamserada, pio telep kupra, dirine weika di yankamre. Kapul men doryanmaser taru neitamai yumada, nun kange bongtona gum dipapu, ‘Yesus tek sisi doryankamsere’ tenen, kange deipra, pio dinapu kupedi gomnupe. Atep nengda, tuai mutu neitamai tupa gam kunkamep taruda, pio dumsisipu kunkamepe.

14 Nun Lyemna Deiyo Ngebo Yesusdi, nun lyemna tep, er pe nongpu karepseudi, nun yo pununa tep depseue. Mali kun keca neitamaipu kuramupka cadi, nun wenemna tep tali lupra konum poptapsetu dinin, ‘Anesalada kunupkamne,’ teneramudi, nun pununa tep, im deiki di tuai mutu yana depu. Ukupra kunupseua deiyoda, ‘Nimi tuai nesala, sun mali kun keca yuma daepnedi, kunupra loptapnepa, ne mawa nesala, pio mengne nesala kunkamenge. Ukupmengedi, telep kun kecapu talepra, kange deipra dumsisipu kunkamenge’ tenen, nun pununa tep, er nong deiki di kunupseudi, lyepseue.

15 Ukupseua tep nengeda, arup konum pepmaken upu yumada, yuk dakunge nesala yuma tep, pio moupra peteremkamrume. Nimi dipru kwa dimna cap, mali kun keca wenepra lepsikra peteremna cap, Allahdi pel dona deiyo keca karepkeua deiki di, puto di pel donkamrume. Yuk nengdi ‘Titusda tali ngebo kurure’ tenen, men gekepkengedi, sun amutarapu keipkengopda, kandi, ‘Uo, upu ton men pepkune’ tenen, tali dimpepra kaukemdongona pio men kunkamrume. Ange gum dinin, yuk nesaladi, kan tep yanipkengopda, sun upu sengnapu kunkamrume. Ne Paulusdi sekeipkene.