Tit 3 | XteSC | STEP | Ne mi Tituso, sun Kerit mutu kunge nesala kankan, teka tenenung nesala tep ngeda, ‘Konum gekepi dinin, kange di lupronung’ tenen, kange di ton cap aupu peterenkamrume. “Sun pemerintah deiyo neng cap, yuk nimi ila deiyo-deiyo neng cap tep, sun adipapu sun amutarapu kupra, sun penge upu gekepra, teleppu kunkamrume. Tonda, ataru-ataru yuma, ware telep kun keca do yumada, ‘Kange deipra, pio pe deipmepedi, telep pel dopkup’ tenen, ketenem dinkamrume,” upepra peteremkamrume pepkene.

Titus 3

Allah er nyapu telep kunkameng keca tep, pepu upu

1 Ne mi Tituso, sun Kerit mutu kunge nesala kankan, teka tenenung nesala tep ngeda, ‘Konum gekepi dinin, kange di lupronung’ tenen, kange di ton cap aupu peterenkamrume. “Sun pemerintah deiyo neng cap, yuk nimi ila deiyo-deiyo neng cap tep, sun adipapu sun amutarapu kupra, sun penge upu gekepra, teleppu kunkamrume. Tonda, ataru-ataru yuma, ware telep kun keca do yumada, ‘Kange deipra, pio pe deipmepedi, telep pel dopkup’ tenen, ketenem dinkamrume,” upepra peteremkamrume pepkene. 2 Tonda, “Yuk nesala tep, yuk nengdi, ‘Anesalada, mali neng tenepkameng’ tenen, mali upu pepra, luludina gume. Tonda, upu deiki pangdana cap, nimi nong podana cap, pio men kunkamrume. Ange men kunkamrum dinin, yuk neng sun putare keca tenepra, bouna di makupra kunkamrume. Ware nesala do yuma, mawa di kuna gum dinin, dipru eremna gum di, tek sisi sun yuk neng amutarapu kurumudi, bouna di teleppu kunkamrume.” Upepra peteremkamrume.

3 Apepterepkamruma deiyoda ake. Uda, pumun taru nun peda kange douna gum di, walwal kuramepu. Ada, kika deipra nimi deiyo neng perami upu cap, Allah upu cap, pio men gekeramupu. Ware mali kun keca do, mali putana do, mali kange tenena do yuma, amali kecapu putaramseua deiki di, namdoramseudi, nun mali kunange di ateng kouamseupa, mali kun keca pio weik kuramepu. Amok keca teka teneramepudi, yuk neng tep, yu weik kupseua di, upu deiki pangdana cap, mar podana cap kuramepu. Tonda, yuk neng sun talerami keca tep, ‘Uo sun kecada, ne dipapu doproptene’ tenen, dipru engena cap kuramupudi, nun yumadi yuk nesala yuma tep, dabal kupseupa, ‘Anengda nun pio song,’ tenedaramepu. 4 Apio ukuramepupane, aneitam taruda, nun nai bo Allah, erda nun Lyemna Deiyo Ngebodi, nun putan keca tenepseudi, bicau tenepra, bouna di meliamseunge jenek kupra yaudi, erdi lyepseue.

5 Nun Lyemna Deiyo Ngebodi, lyepseua deiyoda, nun pio telep kupra dumsisi pel weik doramupka deiki di, pio gume. Ange deiki di men lyepseu dinino, nun mali kuramepu keca tep, tali lupra wenepra poptamsetu dinin, nun tep dipru karepseudi, bicaue tenepseua deiki di, er pe kange deiki dipapu wepra lyepseue. Nimidi dereng kupre keca dopra, me kuramengtopu, Allahdi nun mali kun keca daepseudi, ukupu derirameng nyapu utopu kupra deipseua deiki di, konum lyepseudi, telep kweipseue. Tonda, er Lek Sambaladi nun dipru neitamai wekra pel dopseupa, dipru ukupu neng utopu punupra deipseua deiki di lyepseudi, telep kweipseue.

6 Nun Lyemna Deiyo Ngebo Yesus Kristus pel dopseua deiki di, Allah er Lek Sambala weika di kareserepa, nun dipruai dinikseudi pel doserure. 7 Allah er Lek Sambala weika di karepseua deiyoda, nun mali kuramepupane, Allah er kange dipapu bicau tenepseudi, nun mali keca yuma gum kupra deipseudi, “Anesalada konum telep kupra deipne. Atep lengna nesala konum kununge, tenepne,” peprapudi, mali keca tenpunge peda gum, lengna telep nesala utopu konum telep kupra deipseue. Ukupseua deiki, erdi amenda taru, er nyapu yuma tep karenkamser telep keca yumada, nun peda doronkamepe. Er nyapu sisa konum keipseua deiki di, bol koptapra pio gam kuna deiyo keca kareserura cadi, im deiki pio gampu kunkamepe. Er nyapu utopu kupra deipseua tep, kange bongtona gum di, ‘Tek sisi pio gam kuna deiyo keca kareserepa, gam pio kunkamepe’ tenen, konum kael kepmupka cadi, er tep dinapu kunkamepe.

8 Apepmaken upuda, pio tek sisipu kurura cadi, teka tenepra talenkamrume. Tonda, kandi peteremkamrum nesala tep, aupupu dopra, puto di peteremkamrume. Ada, ‘Allah konum teka tenemi nesaladi, yuk tali keca yuma tamengedi, telep kun kecapu pio putarepa, moupra talengedi, pio pe deipra dumsisipu kunkameng’ tenen, pepkene. Apepmaken upu yumada, pio telep upu kurura cadi, ware nesala do yuma, angepu gekepmengedi, talepra kungopda, aupu di teleppu kemdiserure. Nimi yuma tep pepkene.

9 Aupu gekepra dombanupa deiki di, telep kudiserur dinino, ne mi Tituso, sun yuk neng pio walwal di, nong men kupkamre upu tep, upu deiki pangdaramenge cap, sun co puna nengdi dadeipdanen yakaramidi, pepdanen yakarami upu, tali-tali upu cap, Allahdi, “Ukunkamrume, angeda men kunkamrume,” peipupa, Musadi sekeiamseu mem upu yuma tep, tulum kupra pangdarameng upu cap, ayumada kandi sun kuramengtopu men kunkamrume. Sun cap upu pedana cap, pangdana cap gume. Amali kun keca yuma amnyo karikrap yuk kemdongonkamrume. Aupu utopu upu yumada, men melipsetue. Tonda aupu yumada, nong men kupkamra cadi, aupu gekena cap, yuk neng cap pedana cap pio men kunkamrume.

10 Uda, sun teka tenepra weite-du utopu kurum nesala kan-kan di, ware ngebo mali upu perya deiki di, tulum kuprepa, dipru wilimdiramser ngebo tep, “Nimi dipru wilimdana meme,” pepra, upu sekra puto di wenepkamrume. Tenpu taru konum wenepmempa, ange utopu kange di ton cap kupre pangeda, tenpu taru ton cap, er tep, “Kao, ukunada meme, yapkurume,” pepra, upu sekra wenepkamrum dinin, adinenda, yuk taru ton cap angebo tep wenemna gume. Malipu tupa kupre pangeda, angebo tapkamrume. Dipru wilimdiramser ngebo cap kikiman kuna gume.

11 Kange tenimtona gume. Ato ngeboda, er kange dipru pio gwaliprepa, mali kunange weika di kurure. Er mali kurya deiki di, er pedipapu er pe tep, pio mali kudidarure. Angebodi mali kure kecada, konum katuai kurepa, dinupa cadi, ‘Angeboda tek sisi mali ngebopu kurure’ tenen, nimi yumadi kael keptenge.

Surat gawal dangna tep, pepu upu

12 Uda, ‘Ne Nikopolis mutu bul li taru kunkamne’ tenen, konum tenipsa cadi, nedi nun kayapu Artemas cap, Tikikus cap dokotepkenepa, kan damai yarenge pangeda, kanda menmena ne damai Nikopolis mutu yakana tep, piripetepkamrume. 13 Tonda nun kabo Senas, ada nimi upu bongdina tep, upu melimna deiyo ngebo cap, tonda nun kabo Apolos cap, ‘Sun putan keca yuma doproprengedi, telep kupra keteneprengedi embankamreng’ tenen, sun putan keca yuma tep, makupra karenkamrume.

14 Nun teka tenenup nesala yumada, ware telep kun keca do yuma, akecapu putarepa, moupra pel dona tep, adipapu kael kemkamepe. Ada, ‘Allah konum teka tenenup nesaladi, yuk tali keca yuma tapmepedi, telep kun kecapu pio putarepa, moupra talemepedi, pio pe deipra, dumsisipu kunkamep’ tenen, pepkene. Ukunkamepa deiyoda, ‘Tumi-tumi yuma nun putasere keca ketenepra derina cap, yuk nesala tep melipra karena cap, kunkamepe. Tonda, ‘Nundi telep kupra men kunup’ tenen, pepsene. Tonda, tali-tali kuna gum di, pel pio telep kupra doramepyanen, ‘Telep kun keca weik kupmepya deiki di, du weik moukamser’ tenen, ne Paulusdi upepra sekeipkene.

15 Telepe ne mi Tituso, ne cap kunup nesala yumadi, kan tep “Telepe,” pepra dopra deipkenge. Ange utopu, kan damai kunge nesala teka tenengedi, nun tep dipru karesenung nesala tep, “Paulusdi telepe peipsere,” pepra peipkurume. ‘Allahdi bicau teneseredi, er kange dipapu sun pel dona tep, melipra karenkamser keca, sun tep weika di kareserepa, doronkamrum’ tenen, ne Paulusdi sun yuma tep, Allah morosenune.

Telepe ne Paulusdi pepkene.

Acapu sekra deipkene.