Zechariah 1

Allah Yahwehdi er nyapu sisa tep, “Sun mali kun keca yuma taprumudi, ne damai tamupra yarume,” pepra, kong pepu upu

1Persia mutu talepra kuramu nimi deiyo ngebo Raja Darius, atara mutu taleamu taru dinin, keteng tamun butenenge, warda ban baringe (8) deiki di, Allah Yahwehdi ne Zakaria damai yana, aupu peipneu. Neda Zakaria, ne apu bo Ido, erdi deiamu ngebo, Berekhya, erda ne nai sisa kuramu. Berekhyadi deipneu ngebo, ne nabi Zakaria, Allahdi ne tep peipneu upuda ake.

2Ada, sun apu yapu neng, ne nyapu sisa sun Israel neng tep, ‘Upenkamrume,” pepra deipneu. Ada, ne Allah Yahwehda, sun apu yapudi mali weik kuramya tep, ila yu kupneupa, aneng tep pio weika di wenemamsi. 3Ange tep nengeda, kandi sun Israel yala nesala tep, upepkamrume. Neda, im deiki kunge jen talena malaitkat, sun deiyo ngebo kunedi, sun tep pepsene. Sunda mali weik kurum dinin, ukutaruda nedi sun tep pepsene. Ada, sun adipapu tamupra, im deiki kunge jen talena malaitkat, sun ila deiyo kune ngebo, ne Allah damai yankamrume. Ukupmum pangeda, ne peda, im deiki kunge jen talena malaitkat, sun deiyo ngebo kunedi, ne peda, sun damai tamupra yana kunkamne.

4Sun ukutaru kurum Israel nesalada, sun apu yapu neng menop taru kuramitopu men kunkamrume. Pumun taruda, nedi nabi-nabi neng doproipsipa, sunda, nedi ‘Ukupkamrume,’ peipsi upuda, anabi neng sun apu yapu damai bena lap perami. Ada, ‘Neda im deiki kunge jen talena malaitkat, sun ila deiyo kure ngebo, ne Allahdi pepsene. Ukutaruda sundi pio mali-mali weik kurum dinino, ange yuma taprumudi, ne Allah damai tamupra yana dumsisipu kunkamrume.’ Upeipsi dinino, sundi aupu pepra deiamsinge tep, ‘Nun songe, dakwapye,’ teneramidi, tek sisi men kurami. Ne Allah Yahwehdi pepsene.

5Dinino, nedi asipetepsene. Ada, sun moupra tenipetepso! Sun apu yapu neng cap, sun menop taru kurami nabi neng capda, ukutaruda, dan mutu kunung do? Atep sun anesala yumada, pio tupa-tupa gam men kununge. Aneng yumada, konum depra, gum kupye.

6Sun nabi neng deiki cap, ne upu peteremna neng deiki capda, nedi, ‘Angeda kunkamrume. Angeda, pio men kunkamrume,’ pepsisinge cap, ‘Telep kunada ake. Mali kuna ngeda, ake. Angeda, pio meme pena upu cap, tonda nedi, ‘Pio moupra tenepnedi ukunkameng,’ tenemsinge yumada, ne amutara pel don neng upu peiamya deiki di, sun apu yapu neng, sun damai pepra deiamsi. Aupu yuma peiamsipanen, sundi aupuda teka men tenemya deiki di ikin keca dopromi. Nedi, ‘Ukupkamsere,’ peamsitopu amenda taru tek sisi kupu.

Ukuamnga cadi, sundi, ‘Uo’ tenen, sundi teniptomidi, sun malinge tapidi, upemi. Ada, ‘Uo, im deiki kunge jen talena malaitkat, sun ila deiyo kure ngebodi, ‘Ukupkamne,’ peiamseutopu, konum kupmaser adano,’ perami. Allah Yahweh akeca-keca yuma talepra, deiki tara erepra, ila puto kure ngebodi, ‘Ukupkamne,’ tenemutopu, nun tep konum kupmasere. Ada, nunda mali kurameputopu, erdi ange utopu ila kange mun keca, menenga karenmaser deiki di, wenemserure. Ada erdi konum, ‘Ukupkamsene,’ pepra deipseu topu kunmasera cadi, walito kunmare!

Nabi ngebo, Zakaria damai kuda bisam katuai kepupa, epunge tep, lap pepu upu

7Ada ware sebelas (11) ngeda, ware si Syebat deiki, tanggal dua puluh empat (24), Babel mutu nimi deiyo ngebo Raja Dariusdi taleamu. Ataleamu taruda, Allah, ne Zakaria damai aupu yana lap pepra deipneu. Ada, lukunda neitamai di, ken mana utopunge, deiki di yana petenkepra deipudi, aupu pepneu. Ada Allah Yahwehdi, neda nabi Zakaria, ne damai yana, ne tep pepneu. Ne Zakaria, ne apubo Ido, erdi deiamu ngebo, Berekhya, erda ne nai sisa kuramu.

8Allah Yahweh er im deiki pel don ngebo, tenpu malaikatdi bi kuda bisam deiki bukmaudi yakanmaupa, nedi epsi. Ada, co si, murad co tekamu mutu, atara bena dim pepra tekupa epsi. Bena dim pepra tekupanen, er amnyo tarada, yuk kuda bisam ware kuprap ton, yuknge kikiman tekmai. Atekmainge sun bol yala yumada, binge cap, tonda bingepu dinin, yambul yala yuknge cap, kurun nge cap, yana kikiman tekmai. 9Akuda bisam yana tekmaipa, nedi amalaikat ngebo tep asipetepsi. Ada, ‘Naio, kanda ne deiyo ngebo, ayana tekmang kuda bisam yala yumada, ware deiyo tep akunmang do?” pepra asipetepsi. Upepsipa, erdi tamupra lap pepneu. “Amenda taru kupkamre keca yuma tep nengeda, katuai di lap pepra deipkamakene,” pepneu.

10Upepneupa, murad co tekamu mutu, bena dim pepra tekmaupa, epsi ngebodi pepu. “Akuda bisam yumada, ukupmantopu tep kununge. Sunda, sun nai bo Allah Yahwehdi, “Tuai mutu neitamai yuma dipra embana tep, pio embankameng nge tep, akuda bisam dopra deipmare,” pepupa gekepsi. 11Upepupa, akuda bisam yumadi upepi. Ada, Allah Yahwehdi doproipu malaikat, er damai tekmau ngebo tep, lap pepi upuda ake. Ada, “Nun atekmap kuda bisam yumada, tuai mutu ban-ban yuma neitamai, dana-dana tara yumada, konum dipra embaramupu dinin, amutu ban-ban yuma neitamai kunge nesalada, podana gum dipapu, pio telep dim peprapu kununge,” pepi.

12Upepipa, Allah Yahwehdi doproipu malikatdi ngebodi, Allah tep pepneu. “Uo, Allah Yahweh akeca-keca yuma talepra, deiki tara erepra, ila puto kurum ngeboda, keteng tamun tujuh puluh (70) tahun deiki di, ila ati arum dominge, Yerusalem mutu cap, Yehuda tara mutu neitamai ati arum dominge cap yuma tep nengeda, ila yu kupkeupa, kan puto deiki di wenemamume. Ukuramumpane, anesala yuma tep, ware kupra taru ton cap konum kupyopda, anesala yuma tep, bicau tenepmumdi, kan kange tenepmem dipapu, kange deipmemdi, sun tep melipkamrem do? Sun mali kunange tep, walito adipapu poptum dinin, bicau tenepmemnya deiki di, dan taru sun tep bicau tenepra melipkamrem do?” amalaikatdi pepu.

13Malaikatdi upepupa, Allah Yahwehdi tamupra amalaikat tep, pio bouna di telep pena upu, ‘Dipru kwadipnedi, bicau tenepkamre,’ tenena upu deiki di pepu. 14Upepu pangeda, ne tep penmaneu malaikatdi, ne tep pepneu. Ada, “Allah Yahwehdi peipmaser upu dopra lap perbenkamrume. Ada, im deiki jen talena malaikat yuma talepra, sun deiyo ngebodi pepser upu gekepmemdi, perbenkamrume. Ada, ‘Yerusalem mutu neitamai kunge nesala cap, ne pio telep lengna mutu, Sion mutu neitamai yuma cap tep nengeda, pio bicau tenena cap, uo tenena cap, sun damai tep ware keca yana kupkamre do?’ tenena cap pio kunune,” pepu.

15Tonda, nedi sun yuk-yuk mutu nesala, pio bouna di dim pepra kunung mutu-mutu neitamai kunge nesala yuma tep nengeda, ‘Nunda pio telepe,’ tenen, salnong-nong kapra gemenunga cadi, nedi sun tep, pio mali kange doupra kunune. Deiyoda, men di ne nyapu sisa, sun Israel nesaladi mali kuraminge tep, ne yambula dipapu yu kupneupa, ‘Aneng wenepkamne,’ tenepsi dinino, ne tep teka men tenenenung nesala, yuk-yuk mutu dakunge nesaladi, ne nyapu sisa Israel nesala tep, pio ila di yu kupupa, ikin keca pio weika di dopra, sun nong deiki derirami. Ne nyapu sisa deiki di, ila kange mun keca pio weika di doupra deriramya cadi, nedi sun tep, mali kange dounune. Atep, anesala wenepkamne ja!

16Atep nengeda, ne Allah Yahwehdi pepsene. Ukutaruda, ne adipapu tamupra Yerusalem mutupu bena kunkamne. Sun amutu kunge nesala tep, bicau tenepnedi pio melimkamsene. Ukupne dingeda, nedi go karepnepa, ne si eremna atida, sun mutu, Yerusalem mutu neitamaipu dopra deipkamenge. Ukupkameng taruda, sun ati ila kael nengdi, akati-akati lepsisikra dona tep, ‘Amutu palada, ware kupra kurur do? Er lyomda, ware kupra kurur do?’ tenen, lyom tapu di, kiklipmengedi, ukur kepkamenge. Ukupkamne taruda, Yerusalem mutu yumada tamupra kange di telep kweipkamne.” Allahdi pepu.

17Upepu dingeda, Allah Yahwehdi aupu ton dukdongopra pepu. “Aupu ton, gekepmumdi lap pepkurume. Ne im deiki kunge jen malaikat yuma talepnedi, sun deiyo ngebo kunedi pepsene. Nedi talepra kune mutuda, tamupra pio telep kupra deipne pangeda, amutu neitamaida akeca yala-yala yuma cap, sun bung keca cap, sundi talenkameng keca capda, weika di telep kupkamre.

Ukupkamna deiki di, sun Yerusalem mutu neitamai kunge nesala yuma tep nengeda, sun dipru kwa dipra, melipnedi pio telep kweipkamne. Men di Sion mutu wepra deiamsitopu, kange di ton cap, ‘Acapu kepropkamne, amutu neitamai pio kunkamne,’ pepra, pedina upu deiki di peipkamne.” Allahdi pepu.

‘Sapi bisam giso deiki tengamre takke keca er si tanduk, katuai kepupa epsi,’ pepu upu.

18Ataruda, itara dinmasipa, yuk keca ton yana katuai kepra deipupa epsi. Ada, sapi bisam giso deikida, takke keca tanduk dumbari di belemunge ton epsi. 19Atep nedi aupu penmaneu malaikat tep asipetepsi. Ada, sapi bisam giso deiki tengamre tanduk urasin utopu ngeda, deiyo warya tep do?” Upepra asipetepsipa, erdi tamupra lap pepu. “Akeca sapi bisam tanduk urasin utopu ngeda, ukupmantonge kurure. Akeca deiyoda, yuk-yuk mutu nimi deiyo keami neng cap, sun tara neng capdi, Yehuda tara kurami neng cap, Israel tara kurami neng cap, ila ati arum, kota Yerusalem kurami neng cap yumada, pomipa gam tupa kurami nesala bura saka beidi dabena kurami. Atanduk ngeda, ada amutu-amutu deiyo neng tepa,” pepu.

20Upepupa, amenda taru Allah Yahwehdi gat keca, er si besi doupra, petupra derina kael neng, dumbari neng katuai kepupa epsi. 21Adumbari neng epsidi, asipetepsi. “Sun adumbari neng, besi keca ketkemne nengda, deiyo ware keca tep yanmang do?” pepra asipetepsi. Asipsipa, Allah Yahwehdi tamupra lap pepu.

“Atanduk epmamuma deiyoda, yuk-yuk mutu nimi deiyo keami neng cap, sun tara neng capdi, Yehuda tara kurami neng damai yana popidi enepra dokotepipa, sun gam tupa kurami nesaladi, sepdaro benamidi, dana-dana tara mutu kurami. Ataruda, kange mun kange douamidi, ali weik dangamya cadi, tenpu ngebo peda, kange deipra men kurami. Sun yumada, ikin weik kurami.

Atep, abesi keca pel donge deiyo nengda, sundi arup taru epmarum tanduk dumbari, nimi deiyo neng tep, yana popkamenge. Ada, sun yuk-yuk mutu deiyo nengdi, Israel tara nesala yuma pomi dinin, amenda taruda, adumbari nengdi sun yuk mutu deiyo neng tep, popkamenga deiki di, kware weik kuprepa, adeiyo nengda, amutarapu deipmengedi, popra gawal dangkamenge. Gum kupkamenga tepa.