Zec 11 | XteSC | STEP | Uo sun Libanon tara mutu neitamai kumum nesalao, sun ati arum wengna tep bisi buplan yumada paktapkurume. Ukupmum pangeda, nedi dokotepnepa, ila uku bu jeredi, sun mutu neitamai tara tengamu aras co yumada, jepropkamre!

Zechariah 11

Allah Yahwehdi, yuk mutu puto weik kunge nesalada, wenepra popkamrenge tep, pepu upu

1 Uo sun Libanon tara mutu neitamai kumum nesalao, sun ati arum wengna tep bisi buplan yumada paktapkurume. Ukupmum pangeda, nedi dokotepnepa, ila uku bu jeredi, sun mutu neitamai tara tengamu aras co yumada, jepropkamre! 2 Uo, atep ukupkamre taruda, daru co tep, pio tenepra engenapu kunkamrume. Deiyoda, amutu neitamai atekamu cemara co yumada, urasin pio telep kwamupa, nimi yumadi, ‘Uo angeda ila mambule,’ perami dinin, ukutaruda konum lekmardi loknapu kupmara tepa. Tonda utopu, sun mutu neitamaida, ila kange mun co yala yumada, gum kupkamra tepa. Ange utopu, uo sun Basan mutu neitamai kurum nesalada, ila gat co, er si sanobar tekamnga yumada, nimidi kwemtamengepa, konum gum kupbaramra cadi, sunda, ‘Uo’ tenen, engenapu kunkamrume. Deiyoda, amutu neitamai kuamu aras co cap, sanobar co cap yumada, kwepra pio gum kupra derinunge.

3 Ange tep nengeda, sun deiyo talepra kunge neng cap, sun domba bisam ^{▼▼domba bisam peinung neng – Aupuda, domon upu deiki di pepu. Ada nimi deiyo neng tenena tep, ‘domba bisam peina deiyo neng’ seki. Atep, amutu neitamai, kange mun keca yaryopda, sun amutu nimi deiyo neng engepkamenga tep pepu.} peinung deiyo neng capdi engenkamengada, sundi gekenkamrume. Deiyoda, sun deiyo nengdi gemena deiki di, pio telep keca talepra kuraminge yumada, pio gum kuprepa engenkamange. Utopu, sun domba bisa peina deiyo nengda, sun domba bisam yuma gum kupka cadi, sun pedi engenapu kunkamenge! Ange utopu, bura tara Yordan me pirman co palpal neitamai kuramre gam keca, er sida yu singa pus, erdi ila upu deiki di, mali penkamre ngeda, gekenkamrume. Deiyoda, sun kunai yumada, nimidi kwemtamnunga tepa. Ada, Yordan me pirman tara tengamu co palpal yumada, kweptapnapu kupkamenga tepa.

Domba bisam peina deiyo neng tep, pepu upu

4 Uda, Allah Yahwehdi ne Zakaria tep pepneu. “Ada domba bisam peina deiyo nengdi, ‘Nun domba bisam popkamepe,’ konum tenenung dinin, kanda adomba bisam tep, dopropmemdi, kan pedi sun peina deiyo ngebo kunkamrume,” pepneu. 5 Tonda upepu. Ange deiyoda ake. Sun adomba bisam yuma konum kunupmengedi, dopropkameng nengda, adomba bisam yuma popkameng dinin, sun anengdi, ‘Uo, adomba bisam popkamapada, bicaue,’ pio men tenenunge. Sun adomba bisam er galemna deipra kunumenge nengdi upenunge, “Uo, Allah Yahweh kanda pio telepe. Adomba bisam kunupmapa deiki di, nunda, pio ila di tamakra isomka neng kunkamepe,” penunge. Tonda, adomba bisam kunumenge neng cap, sun domba peina tep deiyo neng cap, sun yumadi sun peinung domba bisam tep, ‘Uo nun domba bisam popmengedi, jepropkamenge,’ tenen, pio bicaue men tenenunge.

6 Nedi, ‘Kanda sun domba bisam peina deiyo ngebo utopu kupkamrume,’ pepmakenada, deiyo ake. Nedi amutu, Yudea tara neitamai kunung nesala yuma tep, ne bicau tenena keca ton pio men deipkamne. Ne pedipapu amutu kunge nesala, sun dipru neitamai, ‘Nun damai kunge nengda, nun songe,’ tenedana deiyo keca karepnepa, sun yumadi, ‘Anengda nun songe,’ tenedankamenge. Ton ngebodi, er damai kure ngebo tep, podana cap, pangdana cappu kunkamenge.

Ukupmengopda, nedi karepnepa, sun tara talepra kununge deiyo nengdi, amutu nesala yuma tep, ikin keca deipkamenge. Sun amutarapu kungedi, kange mun kange doupra kunkamenge. Ukupne pangeda, sun amutu deiyo-deiyo neng mali kupkamenga deiki di, sun mutu-mutu yuma, malipu kupra deipmengedi, amutu keca yuma sikke bukra tapkamenge. Ukupkameng dinin, ne Allahdi, amutu nesala yuma tep, bicau tenepnedi, men lopra lyepkamsene. Sun tep, ‘Dabale,’ tenenuna cadi, kaukepnapu kupkamne.

7 Neda, nabi Zakaria, sun domba bisam kunumnung nengdi, menenga karepnengepa, domba bisam popkameng nge yumada, ne pe dipapu peinkamne. Atep nengeda, ne macada butene konum doupmane. Tenpu macada, nedi si sipepsi ngeda, ‘Bicau tenepnedi melipkamne,’ pepra, si karepsi. Tonda, maca butene dopsi ngeda, er si tep, “Tenpu kange dukdongopra kunange,’ pepra, si karepsi. Ange yuma konum kupsi dingeda, adipapu gonga kepra, adomba bisam kalekra peina pel talepra doramsi. 8 Atep sun domba peina tep deiyo neng weneri nengdi ne tep, ‘Nun dabale,’ teneramnei. Ukupra teneramneipa, nedi sun tep, ‘Uo, sun anengda, dan taru di telep pel donkameng do? Pio sika dipu kungedi, telep kupra pel men donunge,’ tenepsa cadi, ‘Anengda ne pio dabale,’ tenepsidi, ‘Konuma sun dakwapye,’ tenepsi. Ukupra tenepsa tep, tenpu war deiki dipapu, sun adeiyo neng weneri tep, wenepsidi, enepra dokotepsidi, popra sikke buktapsi.

9 Ukupsi dingeda, nedi tamupra sun domba bisam kunumna deiyo neng tep pepsi. “Atep nedi sun domba bisam yuma tep, nedi men peinkamsene. Tali dadepkameng domba bisam tep nengeda, sun dadena telepe pua. Tonda tali dawangapkamre domba bisam tep nengeda, dakwapkamre. Ukuprepa, tupa yambula di gam kunkameng ngeda, sun domba bisa peina tep beilya pumbon neitamaipu, dapodangedi, jedanapu kunkamenge.” 10 Ukupra tenepsidi pepsi dingeda, nedi si sipepra deipsi macada, er si ‘Bicau tenepnedi melipkamne,’ pepra, si karepsi ngeda, tamupra dopropnedi, copra tapsi. Ada, menop taru nedi mutu ban-ban yuma kunge nesala tep, ‘Angeda kunkamrume, angeda pio men kunkamrume. Ukupmumnyopda, nedi sun menenga tep, ukupra melimkamsene,’ pepra, pedina upu deiki di pepra deiamsi upuda, ‘Ukutaru ange yuma konum gum kupra deipkune,’ tenena tep, amacada coptamsi.

11 Amaca coptapsa deiki di, atumida, amaca tep, pedina upu deiki di peipsi ngeda, konum gum kupra deipsi. Ukupsipa, sun domba bisam kunumna tep deiyo nengdi, ne tep kalekra diramneia cadi, moupra kael kepi. Ada, ‘Uo, nabi Zakariadi pepmaser upu cap, erdi kupmau keca capda, tek sisi ngeda, Allah Yahweh, er dipapu ange pepsetua peda, utopu kurure. Atep nabi ngebodi pepmasere ngeda, Allah Yahweh, er upu pua,’ tenerami. 12 Sun konum ange tenepra kael kepyopda, nedi sun adomba kunumna deiyo neng yuma tep pepsi. “Telepe ne kayapu, sundi ne tep, ‘Dyo telepe, ukuptepe,’ tenepnetumdi, pepnetumpa, ne pel doramsinge pununa tep, ne menenga co bo karepnetumopda, angeda telepe. Gum dingeda, dakwapkurure. Ada, sundi, ‘Dyo, ukupkamepe, kan co bo karepketepe,’ men pepnetum pangeda, ne menenga keca men karepnetume,” pepsi. Upepsi pangeda, sun adipapu, ne menenga gel uangda, tiga puluh perak karepnei.

13 Karepneipa, dopropsi taruda, Allah Yahwehdi ne tep pepneu. “Kanda agel uang tiga puluh yumada, dopra ne Allah, ne si eremna ati pumbonda, ne karena tep, co lase pumbon, er si kas, ange neitamaipu dongopkamnerume,” pepneu. Atep nengeda, Allah Yahwehdi peipneutopu, nedi agel uang tiga puluh perakda, Allah er si eremna ati pumbon neitamai, er karena tep, kas pumbon dongopsi. 14 Ange yuma konum kupra seng pepsi dingeda, ne adipapu ne maca butenenge, ada “Tenpu kange dukdongopra kunange,’ pepra, si karepsinge peda, copra tapsi. Ada, nedi si sipepra kareamsi maca butene ngeda, coptapsa deiki di, sun Yehuda tara kunge neng cap, Israel tara kunge nesala cap, yuk-yuk kepra deipsidi sekdongopsi. Sun anesala yumada, ‘Nunda kikiman tenpu yala nesalapu kunupe,’ tenedaramidi, tenpu yala nesalapu kurami dinin, ukutaru di dipra, oryankamre taruda, sun yumadi, ‘Nunda yala yuk-yukpu kunupe,’ tenepra, yuk-yukpu kunkamenge.

15 Ukupsi pangeda, Allah Yahwehdi ne Zakaria tep pepneu. “Kanda kange di ton cap domba bisam peinung neng utopu neng kunkamreme. Tonda, sun domba peina deiyo nengdi talepra pel donung kecada, kange di ton cap, akecapu dopra kunkamrume. Kanda tek sisi kan kaele, yuk nesaladi sun domba peina pel don neng tep, ‘Sunda mambul neng gume, tali nengpu kununge,’ tenenunge.” Allahdi ne tep pepneu.

16 Upepneu dingeda, adipapu dukdongopra aupu ton pepu. “Nedi, ‘Kanda domba peina nengdi, talenung pel don keca doupkurume,’ pepmakena deiyoda, petenkemna tep pepmakene. Dinin deiyoda ake. Ada, ataruda nedi ne domba bisam peina deiyo ngebo ton wepra deipkamane. Angebo ketenepra deipkaman dinin, angeboda, erdi wangamrur domba bisam tep, pio moupra men tenepredi, men erbarure.

Tonda, domba bisam depmanto kure ngeda, erdi, ‘Uo’ tenen, men melipra lyemrure. Tonda, susu jeramnepa, dila kuamne domba bisam tep, erdi moupra obat men karerure. Tonda, domba bisam tupa gam kurur ngeda, tupa telep kupra sun jen keca men karerure. Ange yumada, telep pel men dorur dinin, erdi konum nong telep neramre domba bisam, meta weik kure ngeda, erdi adomba popra jepropredi, gawal dangrure. Adomba sun yan gala peda, kwenedorure. Anong nena telep bisamda, poprapnedi er yan gala buru gala yumada kwenedoramu.

17 Uo, nedi wepra deipsi domba peina deiyo ngeboda, erda telep ngebo pio gume. Angeboda, pel telep kupra dopmanto ngebo men kurure! Ne domba bisam yuma, telep kupra men peiredi, adomba bisam yuma tep nengeda, tamrure! Ukurura tep nengeda, ne Allah Yahwehdi, erda domba bisam moupra pena gum ngebo tep wipdongopkamne!

Ukupnepa, erdi adomba bisam peina tep ngeda tapkamre. Ukupredi, go karepnepa, yu jen talena nengdi, nimi pona tep parang ya di, er buru dumsisi tarange poprepa, ila susu kwapkamre. Ukupredi, er asuru dumsisi tarange peda, asuru luktapkamre! Ukupyopda, adomba peina mali kurur ngeboda, er buru putoda, pio gum kupkamre. Er dumsisi tara asuruda, pupnapu kupkamre!” Allahdi aupu pepupa, ne nabi Zakariadi gekepsi.