Zec 12 | XteSC | STEP | Sun Israel nesala tep, Allah Yahwehdi “Ukupkamsene,” pepra, deipu upuda adano. Allah Yahweh er dipapu im cap, tuai cap ketekepra deipu ngebo dipapu, akeca-keca yuma taleamudi, nimi cap ketekepra deipka cadi, sun nong neitamaida, gam kuramre sambala ton dongopra deipu. Allahdi pepu upuda, adano.

Zechariah 12

Allahdi, “Yerusalem mutu nesala lyepnedi telep kupra deipkamne,” pepu upu

1 Sun Israel nesala tep, Allah Yahwehdi “Ukupkamsene,” pepra, deipu upuda adano. Allah Yahweh er dipapu im cap, tuai cap ketekepra deipu ngebo dipapu, akeca-keca yuma taleamudi, nimi cap ketekepra deipka cadi, sun nong neitamaida, gam kuramre sambala ton dongopra deipu. Allahdi pepu upuda, adano.

2 Sun yuma moupra dipetepso! Tek sisi ne Allahdi Yerusalem mutu neitamai yumada, ila kange mun keca karepnyopda, sun dana-dana tara kunge nesala yala-yala yuma, ange epmengedi, ‘Uo, uo, ware kupmar do?’ tenen, kange tenimtonapu kungedi, kware weik kunkamre. Ukupmantoda, nimidi yu anggur me weika di jepmengepa, sun kange yawaramrepa, giso biri-biri peredi, duembaramretopu, Yerusalem mutu damai kunge nesala yuma peda, nedi deipkamne ikin keca epmengopda, ange utopu kupkamenge.

Tonda nedi go karepnepa, yuk mutu yu nengdi yana, ‘Yerusalem mutu nesala yumada, popkamep’ tenen, warekmengedi ongopdopkamenge. Ukupkameng taruda, sun Yehuda yala nesala, tupa akunkameng nesala yuma peda, dana-dana ongopdongopmengedi, wareknapu kupkamenge. Ukupmengepa, sun peda ikin weik kunkamre.

3 Dinino, ataru konum damai kupre pangeda, Yerusalem mutu tep nengeda, ‘Yuk mutu nesaladi amutu nesala popra sikke buktapnung’ tenen, nedi kalengkamne. Ukupnyopda, yuk mutu nengdi, ‘Yerusalem mutu nesala popkup,’ tenepkamenga peda, men kupmanto kupkamenge.

Ukupmantoda, nimidi, ila ikin gel akwamrepa, sundi, ‘Agel nun pe puto dipapu erepra yukai dubenkamep’ tenepmengedi, erepetepmenga peda, agel men erepmanto kununge. Ange utopu, nedi Yerusalem mutu kaleknyopda, yuk mutu nengdi anesala popra men sikke buktaptenge. ‘Yerusalem mut neng popkup,’ teneptenga peda, men popmanto kunkamenge. Tek sisi ngeda, sun yuk-yuk mutu nesaladi sun pedi, sun pe tara neng tep, popdanapu kupkamenge. Dinino, ‘Yerusalem mutu yuma sikke buktapkamep’ tenen, mutu ban-ban yuma dakunge nesala yumadi, Yerusalem mutu damai yangedi warengyankamenge.

4 Ukupkameng dinino, ataru neitamaida, sun jen talena nengdi bukra embana tep, sun kuda bisam cap, tonda, sun kuda bisam bali deiki bukmenge neng cap yumada, nedi kange yawarapra deipnedi, sun tenenange yumada, wang-wang pepra deipkamne. Tonda, sun akuda bisam deiki bukra embankameng jen neng yumada, mutana neng utopu kepra deipkamne. Ukupnedi sun Yehuda yala neng, amutu neitamai kunkameng nesala yuma puda, ‘Yu nengdi popnung’ tenen, kalengkamne. Dinino, sundi ne tep mar pena neng, sun kuda bisam yumada, asuru pun keca karepnepa, sun asuru yumada pupkamre. Ada ne ja!

5 Uda, ange yuma konum kupnyopda, sun Yehuda tara mutu neitamai kunge nesaladi sun dipru neitamai dipapu tenepmengedi upepkamenge. “Gume, nun pe puto di akeca yuma tek sisi men kuptepe. Atep, nun konum kaele. Nun nai bo Allah Yahweh ila puto kure ngebo, im deiki kunge jen talena malaikat yuma, sun deiyo ngebo kurura cadi, er puto deiki dipapu konum kalengmasere! Ada, Allahdi er nyapu sisa sun Israel neng Yerusalem mutu kunup nesala tep, er pe ila puto deiyo keca konum karepmasera deiki di, sun yuk mutu yu nengdi, men popmasenge.

6 Yuk mutu yu nengdi, ‘Yerusalem mutu yana popkup,’ tenepkameng taruda, ataru neitamaida, sun Yehuda tara neitamai kunge nesala yala-yala yumada, puto weik karepkamne. Ada, ukupmanto ngeda, uku jena tep asin tu telepra deipmengedi, ‘Uku jenkur’ tenen, co dopra uku dongopmengepa, uku menmena di jeramre utopu, sun Yehuda tara nesala peda, sun damai ukupra deipkamne. Ukupmantonge ton, nimidi upna upmengedi, gandum er koluamrepa ipkunga tep, uku menmena di dopra baramengtopu, Yudea tara nesala tep, ukupra deipkamne.

Ukupkamne taruda, sun Yudea tara nesala yumadi, sun dana-dana tara mutu ban-ban yuma dakunge nengda, ‘Popkamsep’ tenen, yangopda, Yudea tara nengdi anesala yuma popra, gum kupra deipkamenge. Ada, dumsisi tara yankameng neng pe, tebalal tara yankameng neng peda, sun yuma popra gawal dangkamenge. Dinino, sun Yerusalem mutu di ila ati arum dominge yuma, yu nengdi popmengepa, walangyopu kupkamre dinin, ataruda sun Yehuda yala nesalada, kange di ton cap, amutu neitamaipu kunkamenge. Aceipu sunda bouna di dim pepra telep deiki dipapu kunkamenge.

7 Ataruda, ne Allah Yahwehdi sun Yehuda tara neng, sun jen talena neng tep, nimi pona tep puto deiyo keca dopra, sun tep karepne pangeda, sundi sun pona tep yakankameng neng yumada, menmena di popra tapkamenge. Ukupne pangeda, yuk mutu nengdi sun tep, ‘Uo, sunda pio teleppu kununge,’ tenepmengedi, sun tep ila di gispal donkamenge. Amenda taruda, Dauddi deiamupa, dadeipdanen yakarami neng cap, sun Yerusalem mutu neitamai kunung nesala cap tep, yuk nengdi sun yuma tep, yambula di gispal donkamenge. Dinino, menmena taruda, Yehuda tara nesala tep, ila di gispal donkamenge.

8 Ataru neitamaida, ‘Yuk mutu nengdi, ne nyapu Yerusalem mutu kunge neng popnung’ tenen, nedi Yerusalem mutu neitamai kunge nesala tep melipra kalengkamne. Tonda, sun yuma tep ne puto karepnyopda, sun amutu neitamai di puto boun kupra kunge nesala yuma peda, melipnya deiki di, puto weik neng kunkamenge. Ada, pumun taru Raja Daud er puto weik kuramutopu kunkamenge.

Ataruda, sun Yehuda tara kunkameng nesala yuma tep, Daud erdi deipupa, deipdanen yakarami nesala kankan neitamai di, er tara nengdi nimi deiyo kepra anesala yuma pio telep kupra talenkamenge. Ukupmantoda, ne Yahwehdi, ne im deiki pel dona neng malaikat dokoteptenepa, amalaikatdi, anesala melipra kalektutopu, Daud tara nengdi, pio telep kupra anesala talenkamenge. Tonda, ukupmanto, ne pe dipapu anesala sun Raja ngebo kutenedi, anesala pio telep kupra taleptenetopu, Daud tara nengdi, pio telep kupra anesala talenkamenge.

9 Ataruda, ware mutu nesala do yuma, sundi, ‘Yerusalem mutu neitamai kunung nesala tep, poryakankamep’ tenen, mutu ban-ban yumadi tenenung mutu nengda, ne Allahdi sun yuma popra gum kupra deipkamne. 10 Uda, Dauddi deipupa, deipdanen yakanung neng yuma cap, Yerusalem mutu ila ati arum neitamai kunung neng yuma capda, nedi sun tep, kange dipru boun kuna deiyo keca karepkamne. Ada, ange karepnyopda, sundi, ‘Uo’ tenen, bicau tenepra dipru karedanangepu kunkamenge. Tonda, sunda dipru eremna gum dipapu, bouna dipu, ne Allah tep moronapu kunkamenge.

Ukupkamsena deiyoda ake. Ada, amenda taruda, sun tara nengdi, ne tep lukra popkamnenge. Amenda taruda sundi lukra popnei ngebo, anesala yumadi epkamnenge. Tonda, epnengedi, ‘Uo, bicaue’ tenen, engenkamenge. Ne tep engenkamengada, sun mi tenpu deiamengepa, ami depmarepa, ami tep ila di engeramengtopu, kunkamenge. Tonda, sun anesala yumadi engenkamengada, sun weni mi tenpupu, depyopda, atenpu mi sisa tep, engeramengtopu kupra, ne epnengedi utopu ila di engenkamenge.

11 Ukunkameng taruda, Yerusalem mutu neitamai kunung nesala yumadi, pio ila kange mun kange doupra engena weika di engenkamenge. Ukupmantoda, sundi weika di engenkamengada, nimi deiyo ngebo Raja Yosia, mutu si Hadad-Rimon ^{▼▼Hadad-Rimon – Amutuda, nun yambul walwale. Lap pena ngeda, butene kurure. Ton neng tenenungada, ‘Ada, menop taru isok si tep, asi pepra seki,’ tenenunge. Dinino, nundi tenenupada ake. Menop taruda, Yehuda tara nesala taleamu ngebo, telep ngebo er si Yosia, nimi podan taru di, Megido mutu damai, ila ban mutu neitamaida, yuk mutu nengdi Raja Yosia popipa, sun Yehuda tara nesaladi, pio weika di engerami. ‘Ange tenena tep, amutu si pepra seki,’ tenenupe. Ange kael kemna tep, 2 Raja-Raja 23.28-30 cap, tonda, 2 Tawarikh 35.20-27 cap dinkurume.} mutu tara dinin, Megido mutu neitamai ila pala ban mutu neitamai di, bena pangdanmanka, Raja Yosia popipa deamupa, engeramitopu kunkamenge.

12 – 13 – 14 Yehuda tara kunge nesaladi, ne lukra popnei ngebo epnengopda, amutu neitamai kunkameng nesala yumadi, sun yuk-yuk weika di engenkamenge. Ada, Dauddi deipupa, dadeipdanen yakarami nengdi, sun tara nimidipu sun yuk engenkamenge. Ange utopu, sundi domi nerapu peda, sun yuk bulupra wekmengedi, engenkamenge. Ukunkamenge utopu, Natandi deipupa, dadeipdanen yakanung nimi cap, sun yuk bulupra bukmengedi, engenkamenge. Ange utopu, sundi domi nerapu peda, sun yuk bulupra wekmengedi, engenkamenge.

Angetopu, Lewi yala nimi yuma cap, Simei yala nimi cap, yuk-yuk bulupra, sun yuk-yuk wekmengedi, engengkamenge. Ange utopu, ayala nengdi domi nerapu peda, sun yuk-yuk bulupra wekmengedi, engenkamenge. Ange utopu, sun Yehuda tara kunge nesala ayala-ayala neng yumada, acei lap pepmanetopu, sun yuk-yuk bulupra, wekmengedi, weika di engenapu kunkamenge.

Allah Yahwehdi, ne Zakaria tep pepneupa, acei di lap pepra sekra deipsi.