Zec 13 | XteSC | STEP | Allahdi Yehuda tara kunge nesala tep, kange di ton cap telep kweipkamre taruda, sun mali kurami keca cap, tupa mali kunge keca cap tep, gum kupra deipkamne. Ada, Yerusalem mutu ila ati arum neitamai kunge nesala cap, tonda Dauddi deipupa, dadeipdanen yankameng nesala cap tep, nedi karepnepa, ila me bungna utopu keca bukrapredi, embankamre. Ukupmantoda, aembankamre meda, sun mali kunange yuma me kupra derinkamre. Ada, Daud tara neng cap, Yerusalem mutu neitamai kunung neng capdi, mali kunung keca cap, isok si eremengedi kungenge yuma capda, nedi daepnedi, gum kupra derinkamne.

Zechariah 13

Allahdi isok si eremna kuna ngeda, gum kupra deipkamra tep, pepu upu

1 Allahdi Yehuda tara kunge nesala tep, kange di ton cap telep kweipkamre taruda, sun mali kurami keca cap, tupa mali kunge keca cap tep, gum kupra deipkamne. Ada, Yerusalem mutu ila ati arum neitamai kunge nesala cap, tonda Dauddi deipupa, dadeipdanen yankameng nesala cap tep, nedi karepnepa, ila me bungna utopu keca bukrapredi, embankamre.

Ukupmantoda, aembankamre meda, sun mali kunange yuma me kupra derinkamre. Ada, Daud tara neng cap, Yerusalem mutu neitamai kunung neng capdi, mali kunung keca cap, isok si eremengedi kungenge yuma capda, nedi daepnedi, gum kupra derinkamne.

2 Ataru neitamaida, atara mutu neitamai yumada, ne Allah, ne ila puto deiki di isok si eremnung nge yumada, kiliptapkamne. Ukupne pangeda, nesala yumadi, aisok-isok si yuma, kange di ton cap, pio men tenenkamenge. Lumdongonapu kunkamenge. Tonda, yuk nengdi, ‘Neda Allahdi perur upu lap pena deiyo ngebo, nabi kunune,’ pepra penung dinin, sun anengda isok sipu eremnunge. Aneng cap, aisok-isok capda, amutu neitamai yumada enepkotepkamne.

3 Amok upupu penung nabi nengda, nedi konum enepkotepmanepanen, amenda taru, sunda kange di tamupra yangedi, tupa tali mok upu deiki di, “Nunda Allahdi peipmar upu penupe,” pepmengopda, sun pe, sun nin yapu cap, sun pe, sun nai yapu capdi aupu penkamenge. “Sunda tali upu penmaruma cadi, nundi popkusepe.” Deiyoda, sun mok upu penge nabi nengda, tali mok upu deiki di, “Nunda, Allah Yahwehdi peserur upu gekepmepedi, aupu lap pena deiyo neng, nabi neng kunupe,” pepra tupa penkamenga cadi, sun nin yapu cap, sun nai yapu capdi, aneng sun nyapu sisa kunung dinin, tema dopra, amok nabi neng lukmengepa depkamenge.

4 Ukupkamenga cadi, ataruda, mok upu pena nabi-nabi neng, kwar weik kupkamre. Kwar kuprepa, anabi utopu nengdi, “Nunda ken mapmapa deiki di, mambul keca dinupe. Atep, ange deikida, Allahdi peserur upu lap penkamepe,” penung ngeda, tupa men penkamenge. Ada, ali dakmengedi, aupu tupa men penkamenge. Ange utopu, tonda, kwar kuprepa, ataruda, sunda, ‘Yuk neng epsengedi, ‘E, ada tek sisi nabi ngebo kunmara,’ tenepkamseng,’ tenena tep, tek sisi nabi neng kenengameng opkal, kambing potong di ketkemnung opkal, tupa men kenengkamenge.

5 Ataruda, sun mok nabi nengda, tamupronge dingeda, sundi upepkamenge. “Gume, neda tek sisi nabi ngebo guma,” upenkamenge. Tonda, “Tek sisi ngeda, neda tali wa pena ngebo kunune. Ukunedi, ne tali gam kune taruda, tali pel dona ngebo kunune,” penkamenge. Amutu tuda, ne metek nyapu kuramsi taruda, ne nai yapudi, awa tu karepneipa, ne gam kuramsi taru yumada, atu tupa taleamsitopu tupa talenune.

6 Tonda, sun tali mok nabi neng tep, nimi ton yangedi, yana asipkamenge. Ada, “Kan taram damaida, ware keca di popkeupa, dila kupkeu do?” Upepmengepa, angebodi tamupra mawa di lap pepkamre. “Ne apopneupa, susi jeneryada, ne kabo cap podanmanumnga deiki dia,” pepra, mok upu di penkamenge.

Allah upu lap pena tep, Allahdi wepra dokotemu ngebo pona tep, pepu upu

7 Allahdi pepu. “Uo yu temao, kanda bukromemdi, domba bisam peirura deiyo ngebo kuretopu, Allah ne nyapu sisa tep, melipra dubarura deiyo ngeboda, ne cap kikiman pel donum dinin, kan tema di porbenkurume. Bena popmem pangeda, adomba-domba utopu nesala, ne nyapu sisa yumada, bura sakmengedi, mutu yuk-yuk sepra bendopkamenge. Ukupkameng taruda, ne nyapu sisa, sun Israel nesala yuma tep, wenepra popkamne ja.

8 Ataruda, Yehuda tara mutu ban-ban yuma kunung nesala dinin, nimi yuma akapmangetopu, nuknedi, gung weneri bokra yuk-yuk deipkamne. Gung butenenge bokra, wenepra popnedi, gum kupra deipkamne. Tenpu gung puda, men poptapnyopda, tupa gam kunkamenge. 9 Ukupkamne taruda, agung tenpu, weneri di bokra seper tiga mawa deipkamne ngeda, lyepra deipkamne. Sun alyepra deipkamne nesalada, ada pio telep lengna nesala kupra deipkamne. Ukupkamne dinin, ukuna tep nengeda, ‘Telep kunkameng do, gum do?’ tenen, ikin keca di anesala yuma piripetepkamne.

Ukupmantoda, kunumna weik gat keca, er si perak dopra, ‘Mali keca gum kuprepa, telepngepu katuai kupkamre’ tenen, uku dongopmengepa, uku jepyopda, pio telepngepu katuai kurure. Ange utopu, kunumna weik gat keca emas tep, ‘Malinge gum kuprepa, telepngepu tupa kunkamre’ tenen, uku di pirirtereramengtopu, sun anesala peda, ‘Telep kunkameng do, gum do?’ tenen, piripetepkamne.

Ukupnepa, sun anesala yumadi, ne tep “Nun nai Allah melipseo,” pepra moronkamnenge. Ukunge pangeda, nedi sun tep, tamupra penkamne. Nedi sun tep tamupra penkamne upuda, ake. “Sunda, ne nyapu sisa kurume,” pepkamne. Ukupra pepnepa, sundi tamupra ne tep, penkamnenge. “Kan Allah Yahwehda, nun nai bo Allah kuruma cadi, kan sipu eremkamkepe,” pepra, ne teppu gispal donkamnenge.