Zec 14 | XteSC | STEP | Allah Yahweh, erdi tuai nesala ban-ban yuma, sun wenemna tep tumi konum damai kupre. Atep nengeda, pumun taru, sun pona tep nengdi, sun Yerusalem mutu kurum nesala popidi, sun taleramrum bung keca yuma dalupra dopromi ngeda, nedi dopropnedi, sun Yerusalem mutu nesala tep ka tamupra karepkamsene. Akeca-keca yumada, nedi sun yuma tep, bokra yuk-yuk karepkamsene. Ange yumada, sun asuru di epkamrume. Dinino, ada dorkunkamre tarupu kupkamne.

Zechariah 14

Yerusalem mutu cap, yuk mutu ban-ban yuma cap tep, pepu upu

1 Allah Yahweh, erdi tuai nesala ban-ban yuma, sun wenemna tep tumi konum damai kupre. Atep nengeda, pumun taru, sun pona tep nengdi, sun Yerusalem mutu kurum nesala popidi, sun taleramrum bung keca yuma dalupra dopromi ngeda, nedi dopropnedi, sun Yerusalem mutu nesala tep ka tamupra karepkamsene. Akeca-keca yumada, nedi sun yuma tep, bokra yuk-yuk karepkamsene. Ange yumada, sun asuru di epkamrume. Dinino, ada dorkunkamre tarupu kupkamne.

2 Ange yuma kapul men kupkamne taruda, menmena taru, ne Allah Yahwehdi, mutu ban-ban yuma kunung nesala kan-kan di, ‘Israel yala nesala poptepe’ tenenung nesala yala-yala yuma bupra deipnepa, Yerusalem mutu yana poryankamenge. Yerusalem ila ati arum domi mutu neitamai yumada, amutu ati yuma wekmengedi, akati pumbon kwamre keca yuma dalupra dopropkamenge.

Ange ukupkamengtopu, sun amutu nerapu yuma peda, upula dopropmengedi, nyangmanganen, upula dalupra dopropkamenge. Amutu kunkameng nesala neitamai di bokrapmengedi, gung butene kepra deipkamenge. Tenpu tara gungda, ateng koupra, yuk karen mutu ton deirbenkamenge. Dinino, ton tara gungda, amutu neitamaipu tapmengepa, dakunkamenge.

3 Ange yuma konum kupmengopda, dakuramenganen, amenda taruda, Allah Yahweh yaredi, Yerusalem mutu popkami nesala yala-yala yuma, mutu ban-ban yuma neitamai kunkameng neng tep, er dipapu porbenkamre. Angeda pumun taru Israel mutu neitamai kurami nesala cap, Allah cap, sun yuk mutu nesala tep, kikiman porbenamitopu, amenda taru peda, utopu kupkamre.

4 Ataruda, Allah Yahweh yaredi Zaitun mutu buma deiki yana tekamre. Zaitun mutu bumada, ada Yerusalem ila ati arum damai dinin, ortara keteng yakan tara kurure. Aceida, Allah yaredi, Zaitun mutu buma deiki yana tekamre. Ukupyopda, Zaitun mutu dupai di bongoprapredi, pala weik tarada, keteng yakan tara di gonga kepra benamyanen, keteng wengban tara benkamre. Amutu bongoprapredi, ton tarada, utara dapu tara ton gisikra benkamre. Ton tara neitamai bongopropada, iknapi dam tara ton gisikra benkamre. Ada, Zaitun mutu buma yumada, dana-dana tara keproprepa, daneitamaida, ila banaipu kupkamre.

5 Atep nengeda, Zaitun mutu yuma adipapu abongopredi, keteng yakan tara di, ortara keteng wengbaramre tara butenepkamre. Butenepre pangeda, amutu neitamai tarada, ila banda katuai kepkamra cadi, sundi adipapu aban mutu neitamai sepra benkamrume. Sepra benkamrumaida, Azal mutu damai benkamrume.

Uda, menop taru, nimi deiyo ngebo Raja Usiadi Yehuda mutu talepra kuramu taru neitamaida, sun mutu neitamaida, ila mutu longna lokupa, sun apu yapu nengdi menmena sepra benamitopu, Zaitun mutu bongopkamre taruda, sun amutu kunkamrum nesala peda, utopu sepra benkamrume. Atep nengeda, ne Zakariadi si eremnun Allah, ne nai bo Allah Yahweh cap, er im deiki pel don neng, sun pio telep lek malaikat yuma cap, sun kikiman yankamenge. 6 Allah cap, malaikat cap kikiman yankameng taruda, konum kuprepa yangopda, pio bul kumanya li do, bul li keca es mo do, ange yumada pio men kupkamre.

7 Ange utopu, ataru neitamai yuma peda, kunungna keca ton, pio men kupkamre. Ataru neitamai yumada, ila dirin kecapu kupkamra cadi, lukunda taru kunungna cap, keteng komuni dirine cap, yuk-yuk men kupkamre. Dirinepu kunkamre. Ada lukunda peda, dirinepu kupkamre. Angeda nun walwal dinin, Allah Yahweh erpu ange konum kael kemrure. Erda dirinaipu kurura tepa. 8 Ataruda, pio telep me Yerusalem mutu neitamai di, gam kuna deiyonge karerur me bungna bukredi, Yerusalem mutu neitamaida, ila embankamre. Amepu dinin, neitamai di bokra butenepkamre. Tenpu tara meda, embaramredi, ortara, keteng wengbaramre tara mokon, er si Laut Mati tara kepra benkamre. Ton tara meda wilipra, dortara keteng yakan tara deipu laut mokon neitamai, er si Laut Tengah tara kepra benkamre. Ameda, keteng tamun yumada, embanapu kunkamre. Ada bul taru, mo kunkamre li taru pe, dou mankamre li, bupu kunkamre taru pe, pio embanapu kunkamre. Ameda, pio men cenkamre.

9 Ange yuma konum kupyopda, ataruda, Allah Yahwehdi, mutu ban-ban yuma kunge nesala tep nimi deiyo kepra, Raja kuredi, tuai nesala yuma talenkamre. Ataruda tuai mutu nesala yumadi, kael kepkamenge. Ada, ‘Uo, teka, nun nai bo Allahda, er tenpu kurure. Allah er si Yahwehda, erpu kurure’ tenen, moupra tenepmengedi, er sipu eremkamenge.

10 Ukutaruda, amutu neitamai di, mutu buma cap, ban mutu cap wisipra akurur dinin, amenda taruda, amutu yumada, ila banpu kepra deipkamre. Ada, Geba mutu neitamai dinin, dapu tara mutu (arah utara) adinin dipra, Rimon mutu iknapi dam itara mutu yumada (arah selatan), ila pala ban mutupu kepra deipkamre. Ukupra deipkamre dinin, Yerusalem ila ati arum kupkamraida, mutu buma deikipu pio akapkamre. Ada, Allahdi amutu ila di erepra deiprepa, tenpu mutu buma deikipu tupa akunkamre.

Amutu neitamai er palada, ake. Ada, Yerusalem ila ati arum dana-dana ongopgenepra wiami gel beilya neitamai dinin, wengyakan bisi potokami buplan, er sida Benyamin yala neng wengna tep buplan bisi, aila pala bisi buplan damai di dipdongopra benamnanen, menmena taru potokami ila pala bisi buplan, adinin dipdongopra benamnanen, agel beilya kumunaida, er sida Kumunai Bisi Buplan, adinin dipdongopra benamnanen, menop taru domi lyom gel ati er sida, menara Hananeel, aneitamai di dipdongopra benamnanen, Israel nesala taleramu ngebo, nimi deiyo ngebo Rajadi, er anggur du me keteneamudi, anggur du me pururamngai bena dipkamre. Atep, aila pala ban mutu ketekeipkamre ngeda, pala weik kupkamre.

11 Menop taruda, Yerusalem ati arum dominge popra sikke buktapi dinin, Allah Yahweh tamupra yankamre taruda, Israel nesala kange di ton cap amutu yana kunkamenge. Amutu neitamai kunkameng nesala yumada, pio bouna di, dim pepra kunkamenge. Ada, ataru di dipra, dorkunkamre taru yumada, nimidi amutu yana, gum kupra derina tepnge yuma peda, sun anesala damai ton pio men kunkamenge. Ataru di dipra, dorkunkamre taru yuma, Yerusalem mutuda, pio teleppu kunkamre.

12 Ware yu mutu nesala do yuma, sundi, ‘Yerusalem mutu neitamai kunge nesala poptepe’ tenen, putapre nesala yala-yala yuma tep nengeda, Allah Yahwehdi ila kange mun kware kuna pu jenange karenkamre. Aila kange mun pu yala kecada, ake. Sun anesala tep kareprepa, anesala sun asuru cap, lyemu cap, tonda sun nong bol yuma capda, sun gam tupa kunkameng taru peda, adipapu lyupropkamre.

13 Ataru neitamai yumada, Allah Yahwehdi amutu ban-ban yuma kunge nengdi, ‘Yerusalem mutu nesala poptepe’ tenenung neng yuma tep, kwar kuna cap, kange yawarapra derina keca cap yumada, kareprepa, sun anesala yumada, sun kange tenimtonange cap, kange wang-wang pena cappu kunkamenge. Tonda, sun yumadi, ila kware kurepa, sun kayapu neng sisa tep dinin, buru talepdangedi, podanapu kunkamenge. Ortara neng cap, atara kunkameng neng cap tepapu, tomopmengedi podanapu kunkamenge.

14 Tonda, Yehuda tara mutu, yuk-yukai kunge nesala peda, ‘Yerusalem mutu kunge nesala tep, melipra kalengkamep’ tenen, yuk-yuk mutu nesala tep porbenkamenge. Ukunkameng taruda, Yerusalem mutu dana-dana tara kunge nesala, yuk nesala yala-yala yumada, sun mutu neitamai kunge nesala yumadi talenge bung keca yala-yala yumada, Israel yala nesaladi akeca yuma dalupra doronkamenge. Ada, sundi talerami kunumna weik keca, emas cap, perak cap, tonda opkal bol pio telepnge yuma capda, ila di taplakra deia doronkamenge. Sundi dalupra dopropkameng kecada, pio men nukmanto kupkamre.

15 Tonda, ataru peda, sun yuk mutu nesala, ‘Yerusalem mutu kunge nesala poptepe’ tenen, kunge nesala tep, Allahdi ila kange mun pu karenkamre ngeda, ange utopu, sun kuda bisam cap, sun unta bisam ^{▼▼unta bisam – Akeca gambar dina tep, Kejadian 12:16 dinkurume.} cap, sun keledai bisam cap, uda, sun anengdi peinung gam kun keca yuma tep nengeda, aila kange mun pu yala keca karepkamre.

16 Karepre pangeda, ‘Yerusalem mutu kunge nesala poptepe’ tenen, kurami nesalada, nimi pio weik depkamenge. Dinino, amutu ban-ban yuma neitamai tupa gam kunkameng nesalada, sun kange yuk doupkamenge. Sun amutu-amutu nesala konum kael kepmengopda, ataru di dipra dorkunkamre taru yumada, Yerusalem mutupu yakankamenge.

Ada tali tep gum dinin, ‘Uo, nundi Allah Yahweh, ila puto Raja ngebo kurura cadi, im deiki jen talena malaikat yumada, er dipapu talerura cadi, er sipu eremkamepe’ tenen, putaprepa, Yerusalem mutu yakankameng nesala tep, yana poryakarami. Tonda, Israel yala nesaladi, ila kailya, er sida, ‘Yambul Bura Ati Kailya’ kalepra jenkameng taru peda, sun yuk mutu nesaladi, ‘Nun cap kikiman akailya kalepra jenkamep’ tenen, Yerusalem mutu yakankamenge. Allah Yahweh, er si teppu eremkamenge.

17 Ukunkameng dinin, ne Allahdi pepsene. Ataru di dipra, dorkunkamre taru neitamai yumada, ton tara mutu nesalada, sundi, ‘Nun nai bo Allah Yahweh, ila puto Raja ngebo kurura cadi, im deiki jen talena malaikat yumada, er dipapu talerura tep, er sipu eremkamepe’ tenen, Yerusalem mutu neitamai ton men yangopda, ne Allahdi, ange tep nengeda, sun mutu neitamai yumada, mo ton pio men cemkamre.

18 Ange utopu tonda, ataruda, sun Mesir mutu nesaladi, ne Allah Yahweh damai men yangedi, ne si men erepnengopda, ange ukuramenga tep nengeda, sun damaida, ila kange mun pu yalada, karepnepa, sun damai yankamre. Ada, sun yuk mutu nesala peda, ila kalemna taru, er si ‘Yambul Bura Ati Kailya’ neda Allah Yahweh, ne si eremna tep, men yakankameng nesala, sun wenemna tep, karenkamne kange mun pu yala karepkamne ngeda, ange utopu, sun deiki karepkamne ja. Mutu ban-ban yuma yana, ne si men eremkamneng mutu nesala yumada, sun deiki apu yalada deipkamre.

19 Akupkamre ngeda, sun Mesir mutu neitamai kunung nesala cap, tonda, sun yuk mutu ban-ban yuma kunung nesala cap, ila kalemna taru, er sida, ‘Yambul Bura Ati Kailya’ ataru ne damai men yangopda, sun wenemna tep, ila kange mun pu, sun deiki deipkamre.

20 Ataru neitamai dipapu, sun kuda bisam deiki, lelim pen keca er sida lonceng-lonceng yuma peda, urasin telep kupra deipmengedi, alonceng nong deikida, petupra sekeipkamenge. Ada, ‘Akecada, Allah Yahweh er tepapu akeca wepra deipmepu’ pepra, sekra derinkamenge. Tonda, Allah Yahweh, er si eremna ati pumbon derinung gamna mauda, er si panci-panci yumada, Allah er mawa keca kurura cadi, ‘Ange yumada pio telep lengna keca,’ tenenkamenge.

Ange utopu, yuk me jen mau, er si mangkuk-mangkuk yumada, ne karena tepai, er si mesba damai derinung me mau peda, sundi, ‘Akecada, Allah Yahweh er tepapu akeca wepra deipmepu. Tonda, angeda, er maunge,’ tenenkamenge. Ame mauda, ‘Gam keca popnedi, Allah tep karenkamep’ tenen, mesba dominge damai derinung me mau tep, ange tenenkamenge. ‘Akeca-keca yumada, Allah erngepu kurura,’ tenena tepa.

21 Angepu gum dinin, ataru neitamaida, tali jen keca gamna tep mau, er si panci mauda, Yerusalem mutu neitamai akapkamrenge yuma cap, Yehuda tara neitamai akapkamrenge yuma capda, sun Israel nesaladi, ‘Gume, akeca yala-yala yumada, Allah erngepu kurura cadi, akecada pio telep, lengna keca kurure,’ tenenkamenge. Ada, Allah Yahweh ila puto weik kuredi, im deiki jen talena malaikat yuma, sun deiyo ngebo kurure. Er tepapu, akeca yuma wepra derinkamenge.

Akunkameng nge deiyoda ake. Ada, ware neng do yuma, amutu neitamai kunkameng nesala yumadi, gam keca popmengedi, ‘Nun nai bo Allah tep karekupe’ tenen, akeca doupra yana karepmengedi, ne Allah tep, ne si eremkamnenga tepa. Ne mawa tep derinkamneng me mauda, ayana doupra karenkameng bisam tu gamna tep, amau ketenepra deipkamenge.

Tonda, akunkamre taru konum kupyopda, ne Allah Yahweh, er si eremna ati pumbon cap, akati pirman cap, nimidi akeca-keca yuma, tali kunumna tep kecada, ne ati damai pio men yana derinkamenge. Ne Allah Yahweh, ila puto ngebo kunedi, im deiki jen talena malaikat, sun deiyo ngebo kununa cadi, ne atida, pio telep, lengna ati kurura tep pepsene. Atep, akati damaida, tali nengdi, tali kun keca pio men kunkamenge.