Zec 2 | XteSC | STEP | Amenda taru kupupa, epsi kecada ake. Ada, nimi tenpu ngebo ton, ‘Akecada, er lyomda ware kuprap kurur do?’ tenen, er buru deikida, kunumpetena tep tapu, doupmaupa epsi.

Zechariah 2

‘Akecada, er lyomda ware kuprap do?’ tenen, kunumpetena tep tapu epunge tep, seku upu

1 Amenda taru kupupa, epsi kecada ake. Ada, nimi tenpu ngebo ton, ‘Akecada, er lyomda ware kuprap kurur do?’ tenen, er buru deikida, kunumpetena tep tapu, doupmaupa epsi. 2 Ukupmaupa epsi dingeda, ne Zakariadi, “Kanda dan mutu benkamarem do?” pepra asipetepsi. Upepsipa, er angebodi tamupra lap pepneu. “Gume, neda ila ati arum dorami mutuda, Yerusalem mutu kunumpeterbenkamane. Ada, ne ton akotada, er lyom cap, er bum cap, er pala capda, ware kuprap kurur do?’ tenen, kael kemna tep benkamane. 3 Ange yuma konum epsidi, kael kepsi dingeda, ne cap nun kikiman upu talepmanemu malaikat tep, dinmasipa, ne tekmasi tarapu yakanmauanen, ne damai yau. Ukupu pangeda, yuk malaikat tenpu ngebo ton yau dingeda, ne cap nun kikiman upu talepmanemu malaikat damai yana antapdarei.

4 Yau dingeda, menmena taru yanmau malaikatdi, amenda taru yanmau malaikat tep pepu. “Kan adipapu, kunumpetena tapu doupmar kaber ngebo damai bememdi, pepkurume. Ada ake, “Kota Yerusalem mutu neitamai yuma cap, akota dana-dana tara capda, nesala pio weika di dinikamare. Tonda, sun amutu kunkameng nesaladi talepra peinkameng gam keca yumadi, amutu neitamai kapkamre tu yumada, dekpepra dinikamare. Atep amutu neitamai kupkamre tuda, gel beilya ongopra ila gel tembok pio men doptenge. Ada, ila pala weik mutu kupkamra tepa.

5 Dinino, gel beilya ongopdongorameng ngeda, men putapkamre. Deiyoda, ne Allah Yahwehdi, ne pedipapu amutu neitamaida, talepra kunedi, ila gel beilya tembok ongodongorameng utopu kupra, uku bu jeredi, ongopdongopredi kuramretopu kupkamne. Ada ne dipapu, amutu cap, amutu kunkameng nesala yuma cap tep, melipra kalengkamne. Tonda, amutu neitamaida, ne ila puto cap, ne ila telep kune nge cap, ne ila dirine cap deiki dipapu, pio mambul mutu kunkamre. Allahdi pepneu.

‘Yuk mutu neitamai, dabena dopra domi nesala, tamupra kong peprepa, yankamenge,’ pepu upu

6 – 7 Allah Yahwehdi upepneu dingeda, aupu ton dukdongopra pepu. Ada, er nyapu sisa, sun Israel nesala yuma tep pepu. “Ada, nedi sun Israel yala nesala yuma, mali-mali kuramruma tep, enepra donokamsisi. Donokamsisipa, Babel mutu nengdi yana popra dubenamseipa, karen mutu, Babel mutu neitamai kuramrum nesalada, ukutaruda bukroso! Ukutaruda, sun yuk mutu dabena kuramrum nesalao, Babel mutu di tamupmumdi, adipapu sepdaro Yerusalem mutupu tamupra yankurume,” pepu.

8 Allahdi ne nabi Zakaria tep pepneua deiyoda, ake. Ada, ware mutu nesaladi do, sun Israel yala nesala tep yana poryakaramseidi, sun keca yala-yala yuma dalupra dopromi neng tep pepkene. Sun moupra tenipetepso! Tek sisi pepne. Ne pio dipru nesala, Israel nesala tep, ikin keca sun nong deiki derinung neng do, poryakanung neng do, sun tep nengeda, ila di wenepkamsene.

Deiyoda, Israel nesalada, ne pio dipru nesala kununga cadi, Israel nesala tep, mali kupmumdi, ikin keca deipmumnyopda, ada ne pe tep mali kudinange kupmaneruma tep pepsene. Neda Allah Yahweh, im deiki kunge jen talena malaikat yumada, sun deiyo ngebo kununa cadi, ne dipapu aupu pepmasene.

9 Atep nengeda, sun yuma gekepso! Ukutaruda, ne Allahdi, sun yuk mutu-mutu nesaladi, ne nyapu sisa tep, ikin keca derirami nengda, popnedi wenepkamne ja! Amutu-amutu nesala yuma konum popnedi, gawal daknyopda, sundi menop taru pomidi, ateng koupdongopra dubenamidi, pio ikin pel dimami nesala, anengdi, tamupra sun Babel mutu neng cap, yuk mutu yu neng cap, popkamenge. Sun menop taru di ikin keca dopra deriramipa, kange mun kuramu nengdi tamupmengedi, sun dubenami mutu deiyo neng cap, sun tara neng cap, popmengedi sun amutara deipkamenge. Allahdi pepu.

Tonda, Allahdi lap peipneupa, nedi sun gekena tep lap pepmasen ngebo, nabi Zakaria, ne tep ton moupra kael kepkamnerume. Ada, Allahdi, ‘Ukupkamne,’ pepra, lap peipneu upu yuma konum nong kupyopda, sun akurum nesala yumadi, ne Zakaria tep kael kepkamrume.

Ada, sundi, ‘Uo, tek sisi, im deiki kunge jen talena malaikat yuma talepra kurur deiyo ngebodi, nabi Zakaria dopra nun kori dokotepseupa, erdi lap pepseu upu yumada, konum nong kuprepa epmap adano,’ tenemumdi, ne tep, ‘Dyo, erda tek sisi Allah dipapu dokotepupa, nun damai yana lap peipseu ngebo kurure’ tenepmumdi, teka tenepkamrume. Nabi Zakariadi pepu.

10 Upepupa, dukdongopra, Allah Yahwehdi pepu. “Uo sun Yerusalem mutu neitamai kumum nesala yumada, pio ila di kange deipmumdi, kange lon mut penkamrume! Deiyoda, ake. Sun yumada, moupra dinapu kunkamrume. Neda tek sisi yanedi, sun Israel yala nesala neitamaipu, kikiman kunkamepe. Ne Allah Yahwehdi pepmasena cadi, angeda tek sisi nong kupkamre! Ukumum pangeda, ne sun nai boda, sun kumumnya neitamai apu kunkamne!”

11 Ataru neitamaida, yuk-yuk mutu ban-ban yuma kunge nesala yumadi, Allah Yahweh damaipu bulupra yakankamenge. Ada, ‘Nun cap kikiman kunkamepe’ tenena tepa. Sun anesala peda, neda Allah, ne nyapu sisa kemkamenga tepa. Ukunkameng taruda, ne Allah cap, sun yuma cap, amutu neitamaipu kikiman kunkamepe. Allahdi pepu. Upepupa, nabi Zakariadi pepu. “Sun yuma gekepso! Allahdi, ‘Ange-ange kupkamne,’ peipmaser upu nong konum kupyopda, sun yumadi ne tep kael kepkamnerume. Ada, ‘Dyo, erda tek sisi Allah dipapu dokotepupa, nun damai yana lap peipseutopu konum kupmar adano’ tenen, teka tenenkamnerume. Nabi Zakariadi, sun Israel tara nesala tep pepu.

12 Tonda, sun Yehuda tara kurum nesala yuma tep, Allah Yahwehdi er pe nyapu sisa kemna tep, tamupra dopropkamserure. Er cap, sun cap kikiman kunkamrume. Ukupredi, sun mutu tu neitamaida, pio telep lengna tu kweipkamre. Tonda, menop taru kuramutopu, kange di ton cap, Allah Yahwehdi, ila ati arum, kota Yerusalem tep, ila di kange deipredi, bicaue tenepra, ‘Amutuda ne mawa mutu pua’ tenen, wepredi, yana dopra deipkamre.

13 Ange yuma tep nengeda, sun tuai mutu ban-ban yuma neitamai kurum nesala yumada, pio bouna di dim pepra, Allah er damai tamupra yana kunkamrume. Upu penada gume. Deiyoda, Allah Yahweh er damaipu kunkamrume! Allah Yahweh, er pio telep, lengnapu kuramngai, im deiki di, konum bukredi, yana lyepropkamsera tep, sun yumada, upu pena gum dipapu, dim peprappu kunkamrume! Ne Zakariadi pepsene.