Zec 4 | XteSC | STEP | Arup taru ne cap kikiman upu talepmanemu malaikatda, kange di tamupra ne damai yau. Yau dingeda, ukupmanto nimi mapmangepa, yangedi bungderirameng utopu, ne damai yana bukra deipneudi, aupu pepneu.

Zechariah 4

Lampu weica yoneitam bari epunge, er deiyonge katuai kupka tep, pepu upu

1 Arup taru ne cap kikiman upu talepmanemu malaikatda, kange di tamupra ne damai yau. Yau dingeda, ukupmanto nimi mapmangepa, yangedi bungderirameng utopu, ne damai yana bukra deipneudi, aupu pepneu. 2 “Ukutaruda, kanda ware keca ton epmamum do?” pepra, asipetepneu. Upepneupa, nedi dipetepsidi tamupra pepsi. “Ada, weica er derina deiyo ngeda, kunumna weik gat keca, er si emas di deipra dominge epmane. Tonda, ange epman keca, er urup deiki tarada, minyak me gwepra derinai kupmarpa epmane. Tonda, aweica derina deiyo kecada, ukupmardi, ongopdongomngaida, yoneitam bari kwa ketenepra deipmainge deiki, weica yoneitam bari kupmare. Tonda, aminyak me mokon derin keca deikida, er uku bu jenkamrenge tep kecada, yo yuk-yuk kupmar yoneitam bari weica uku jenkamrai kupmarpa epmane,” pepsi.

3 Upepsi dingeda, aupu ton cap lap pepsi. “Alampu weica er yan damai dinin, ortara er tebalal tara cap, dumsisi tara capda, Zaitun co butene tekamupa epmane,” pepsi. 4 Upepsi dingeda, nedi adipapu, atekmau malaikat tep asipetepsi. “Naio, akapmau keca yuma epman dinin, ne deiyo ngebo, akeca epmana yumada, er deiyo ngeda, ware petenkemna keca deiyo tep kupmar do?” pepra asipetepsi. 5 Asipetepsipa, ne cap kikiman upu sisingmanemu malaikat ngebodi, ne tep pepneu. “Ange akupmau kecada, kanda kapul men kael kepmamum do?” pepra, ne tep asipetepneupa, nedi tamupra, “Gume naio, neda tek sisi pio men kael kepsa cadi, ne walwale,” pepsi.

Allah Yahwehdi nimi deiyo ngebo, er si Zerubabel tep, ‘Ukupkamkene,’ pepra deipu upu

6 Amalaikatdi ne Zakaria tep pepneu. “Kanda, nimi si Zerubabel, er damai bena, er tep Allah Yahwehdi pepra deipu upuda, lap pepkurume,” pepneu. Ada, kandi er tep pepkamrum upuda, ake.

“Zerubabel ^{▼▼Zerubabel – Angeboda, ake. Nabi Zakaria kuramu taruda, Yehuda tara mutu neitamai kurami nesala, sun taleamu ngebo, Gubernur kepra taleamu. Angebo, er nai bo sisa, er si Sealtiel, erdi deiamu ngebo, Zerubabel kuramudi, Yehuda tara taleamudi, Gubenur pel doramu.} kan telep kupkamrem ngeda, kan mutu jen talena neng, sun ila puto deiki di, mambul pel men dopkamreme. Ange utopu, kan pe puto deiki di men kupkamreme. Ange gum dinino, ne Allah Yahwehdi, ne ila puto kure Lek Sambala, er ila puto kan deiki deipkenepa, ange dipapu, nedi, ‘Angebo apel dopkamnere,’ tenepkesi mambul kecada, kupkamreme. Neda, Allah Yahweh, im deiki kunge jen talena malaikat yuma, sun deiyo ngebo kununa cadi, apepmaken upuda, tek sisi nong kupkamre ja!”

7 Nimi deiyo ngebo, Gubenur Zerubabel, tek sisi kan damaida, pio ila kange mun keca akapmarepa, kandi, ‘Uo wareto keca kuptenepa, ange yuma bisbisa kaptene do?’ tenerume. Ukupmantoda, ila lyom mutu, men welepmantonge tengamretopu, kan damai di ila kange mun keca tupa akapmare. Dinino, ukupmantoda, ila lyom mutu longamrepa, teno pakra saka dourbenamredi, amutu yuma banpu kupra kemamretopu, aila kange mun keca yumada, bisbisa kapmempa, nedi, akeca yuma gum kupra deipkamne.

Ukupne pangeda, ne si eremna ati uruptami ngeda, lepsisikra dopkamnerume. Tonda, akati dopra gawal dangna tep nengeda, kandi tenpu gel menmenange dopra deipkamrum taruda, ataru kunkameng nesaladi, ‘Uo, agelda, pio telep gel kurure. Tonda akatida, Allahdi er si eremna ati kurura cadi, er dipapu akati pio telep kweipkamre,’ tenepmengedi, anesala yumadi kange pio deipra, kange lon upu penkamenge!

8 Ukupu pangeda, Allah Yahwehdi pepra deiamneu upu, yuknge ton, ne Zakaria damai yana pepneu. Aupuda, ake.

9 Nimi deiyo ngebo Zerubabeldi, ne si eremna ati dona tep, gel menmenange dopra, ne ati ayumnya tep ikamu gelda, er pe buru puto di deiamu. Ukupu dingeda, adipapu dopbaramyanen, siryada, ne si eremna ati nong yumada, dopra gawal dakamnere. Ange konum kupnere dingeda, ne nyapu sisa, sun Israel nesala yumadi moupra kael kepkamenge. Ada, ‘Uo, nabi Zakariada, tek sisi Allahdi angebo wepra dokotemupa, nun damai yana, Allahdi peiamu upu lap peipseutopu konum kupmar adano,’ tenepmengedi, kael kepkamenge. Ada, Allah Yahweh, im deiki kunge jen talena malaikat yuma, sun deiyo ngebo kurura cadi, erdi, ‘Ukupkamne,’ tenemutopu konum kupmar adano!’ tenen, kael kepkamenge.

10 Uda, ware nesala do yuma, akati dona tep, pel gonga keami taruda, pel sika dipapu dorami. Ataruda, sundi metekanunpu pel dopbaramengepa, sun anesaladi, ‘Uo, pel metekanunpu donunga cadi, nun dabale,’ tenenkamenge. “Akati donada dakwapye,” pepra, ‘Nun songe’ tenen, mali upu pertamnung nesala yumadi, sun kayapu nengdi akati dona pel tupa donmanganen, gawal dakmanto taru epmenge dingeda, sundi, ‘Uo, angeda pio telepe,’ tenepmengedi, telep kange doupkamenge. Tonda, sun anesala yumadi, amenda taru Zerubabeldi, ‘Gume akati dopnapu kunkamepe’ tenen, ‘Ati delada dumsisipu dopmap do, gwalipmar do?’ tenen, kunumpetena tapu doupredi, embaryopda, sun anesala yuma, angebo epmengedi, kange pio deipkamenge. Zerubabeldi pepu.

Amenda taru, ne cap, upu sisingmanemu malaikatdi, ne tep tamupra pepneu. “Ayoneitam bari lampu weica ngeda, ada petenkemna tep, asuru yoneitam bari utopu kurure. Aweica yoneitam bari ngeda, ukupmanto kecapu kurur dinin, er nongda, ada Allah Yahweh er asuru di, tuai mutu ban-ban yuma kwamre keca diramredi, ‘Ware kunung do? Ware kupkameng do?’ tenen, dipra kalengrura tep, aweicada ketekepra deiami,” pepne.

11 Upepneupa, nedi tamupra amalaikat tep kange di ton cap asipetepsi. Ada, nedi, “Alampu derina deiyo dam dumsisi tara cap, tebalal tara cap, zaitun co butene tekamreinge, deiyoda ware keca tep do?” pepra, asipetepsi.

12 Upepsi dingeda, adipapu yuk nge ton asipetepsi. Ada, “Naio, azaitun co butene tekamreia pirman tarada, co teru butene kupmarengada, akeca deiki kunumna weik keca, er si emas di, pipa butene deiami ngeda, azaitun co du me mokon dikra deipnepa embana tep keteneiaminge deiyoda, warya tep do?” pepra asipetepsi. 13 Asipetepsipa, ne cap kikiman upu sisingmanemu malaikatdi, ne tep pepneu. “Ange abutene akupmaupa epmamum kecada, kanda moupra men kael kepmamum do?” pepra, ne tep asipetepneupa, nedi tamupra, “Gume naio, neda tek sisi kapul men kael kepsa cadi, ne walwale,” pepsi.

14 Upepsipa, amalaikatdi pepneu. “Aneng buteneda, Allahdi akeca-keca yuma talepra, deiki tara erepra, ila puto weik kurur ngebo, tuai mutu ban-ban yuma taleredi, ila deiyo ngebo kurure. Erdi, ‘Abutene neng ne pel melipra donkamnereng’ tenen, minyak me gwepra, sun giso deiki likra deipudi, sun konum wepra deiamupa, Allah er damai tupa-tupa tengrerunge.” Malaikatdi ne Zekaria tep, lap pepneupa, gekepsi.