Zec 5 | XteSC | STEP | Amenda taruda, ne Zakariadi ne giso erepra dinmasipa, ken mana utopu deiki di, upu sengna keca, pio moupra getepdongomu buku ton erepdaropudi, im deiki tara lakra banmaupa epsi.

Zechariah 5

Allahdi sekeipu keca getepdongomunge, erepra lakra embanmaupa epunge tep, pepu upu

1 Amenda taruda, ne Zakariadi ne giso erepra dinmasipa, ken mana utopu deiki di, upu sengna keca, pio moupra getepdongomu buku ton erepdaropudi, im deiki tara lakra banmaupa epsi. 2 Ataruda, tenpu ngebo malaikatdi asipetepneu. “Kanda ware keca dinmarem do?” pepneu. Upepneupa, nedi tamupra pepsi. “Gume, upu sengna keca, buku pio moupra getepdongomu buku erepra, im neitamai lakra banmarpa, dinmane. Ada abuku er lyomda, 9 meter kurure. Er kuamu utopu, er palada, 4 setengah meter (4.5) kupmarpa epmane,” pepsi.

3 Upepmasipa, amalaikat erdi tamupra ne tep pepneu. “Asengna keca, agetepdongomu buku neitamai sekamu ngeda, amutu yuma neitamai kupkamre keca tep sekamu. Ada, amutu mali kunge nesala yuma tep, wimdongona upu, Allah er dipapu sekra deiamu. Aupuda tali tep men kurure. Tenpu tara upu ton sekra deiamu ngeda, dan mutu do yuma, Allah er mawa mutu neitamai kunge nesaladi, upula donung nengda, Allah er dipapu anesala popra gum kupra deipkamre. Amutu neitamaida, pio men kunkamenge. Asengna keca dana tarada, aupu sekra deipu.

Ange utopu ngeda, dan mutu do yuma, Allah er mawa mutu neitamai kunge nesaladi, nimi upu bongdina taruda, sundi mok upu pertamnung nengda, ‘Allah er si deiki di, tek upupu pepsene,’ penung dinin, sun tenena deiki di tali upupu penunge. Allah er dipapu anesala popra, gum kupra deipkamre. Amutu neitamaida, pio men kunkamenge. Ange-ange yumada, abuku deiki sekeiamunge akuretopu, tek sisi ukupkamre.

4 Allah Yahweh, im deiki kunge jen talena malaikat neng yuma, sun deiyo ngebo kunedi, ne peipsi upuda, awidongona upu yumada, sun mali kunge nesala ati wengbenkamre. Ada, sun tali upula donung nesala, sun ati cap tonda, tali upu deiki di, ‘Ne tek sisi, Allah er si deiki pepsene,’ pepra, tali upu pertamnung nesala, sun ati yuma capda, ila ikin keca dopra deipkamre.

Ukupkamrenge yumada, amutu neitamai mali kunge nesaladi dopra kunung ati-atida, aupu pio widongona kecapu bepkamre. Ukuprepa, akati-akati cap, akati gel cap, co cap, akati pumbon kunge nesala cap yumada, Allahdi gum kupra deipredi, walangyopu kupkamre.” Malaikatdi ne Zakaria tep, lap pepneupa, aupuda gekepsi.

Alen utopu keca, er si keranjang pumbon di, mali kun keca yuma deiyonge kupmaupa epka tep, pepu upu

5 Amenda taruda, ne cap kikiman upu sisikmanemu malaikatpu dinin, kange di tamupra, ne damai yaudi, ne Zakaria tep aupu pepneu. “Kanda itara tamupra dipetepo! Ada, deiki tara di yakanmar kecada, dinkurume,” pepneu. 6 Upepneupa, nedi, “Naio, akecada wareto keca kurur do?” pepra asipetepsi. Upepsipa, amalaikatdi pepu. Kan dinmarem kecada, ada tenpu gat alen utopu keca, er sida keranjang kurure. Akeca keranjang neitamai di yakanmar ngeda, ada mali kuna deiyo keca adano. Ada, Yehuda tara mutu neitamai yuma kunge nesaladi, mali-mali kunung keca yuma deiyo kecada, peten kemnange tep yakanmarepa, kandi epmarema adano,” pepneu.

7 Akalen utopu keca, er si keranjangda, er lelimna tep kecada, ikin weik besi keca di lelipdongomi. Akwamunge tep, ne pio moupra dinmasipa, adekdongomi besi kecada, dopra erepdara banmau. Alelipdongominge beupa, akeranjang pumbonda, tenpu ner bukmaupa, epsi.

8 Amalaikatdi ne Zakaria tep pepneu. Abukmar nerda, tali ner guma! Anerda, pio mali-mali kuna deiyo keca, petenkemna tep nerda, er akurure. Ukupra pepneu dingeda, amalaikatdi, ‘Amali kuna deiyo ner berur’ tenen, aner kange di tamupra, keranjang pumbon darap peprapudi, wekroupa, akeranjang deikida, malaikatdi ikin besi keca dopra, adipapu akeranjang deiki lelipra dekdongopu.

9 Ukupu pangeda, ne asuru ereprapsidi, im neitamai dinin, deiki tara dinmasipa, nerapu butene ton erepdara, ne damai tarapu yakanmareipa epsi. Erepra yakanmareiada, sun ma pol pio urasin telep utopu kuamu ngeda, kumanya di punmaua deiki di yakanmarei. Ukupmanto ngeda, ila nong lyom ma, er sida bangau ma, lyom pol utopu kure ngeda, sun pol ton ange utopu kwamu. Sun anerapu butenedi akeranjang alenda, erepra doproprei dingeda, sundi adipapu lakra duberei. Lakra duberei dingeda, tuai mutu amutara, im deiki mutu pio itara kwamu mutupu lakra berei.

10 Lakra berei pangeda, nedi tamupra ne cap upu arup taru sisikmanemu malaikat tep asipetepsi. “Naio, sun anerapudi doupra bereng keranjang alenda, dan mutu dubereng do?” pepra asipetepsi. 11 Upepsipa, amalaikatdi tamupra ne tep upepneu. “Gume, sunda Babel ^{▼▼Babel – Babel mutuda, ataru di amutu si tep, Babel penupe. Dinino, Ibrani upu deiki di seki upu neitamaida, pumun taru si siperami sipu, ‘Sinear mutu’ pepra seki. Mutu si butene akapmar dinin, amutuda tenpua.} mutu berenge,” pepu. Berengedi, amutu neitamaida, sun isok er si eremna tepai bena, mambul ati dopkamrenga tepa. Ange tep nengeda, amali kuna deiyo keca, aner er si eremnaida, dopra gawal dakrenge dingeda, akeranjang gat alenda, dopra aceipu bena deiprengepa, amutu kunge nesaladi, akeca si eremkamenge,” pepneupa gekepsi.