Zec 6 | XteSC | STEP | Ne Zakariadi, yuk keca ton ken mana deiki di katuai kepupa, epsinge tep pekune. Ada, ukupsi taru di dinmasipa, dumbare kuda bisamdi gipra tu deiki embana keca epsi. Ada, nimi buknedi nimi porbana tep keca, er sida kereta perang, mutu buma butene neitamai di yakanmaupa epsi. Amutu buma buku ngeda, er si telep gat keca, er si perunggu di kwamu. Amutu butene dana-dana tara bukupa, aneitamai di kereta perang dumbari gupra yakanmai.

Zechariah 6

Dumbare nimi porbana tep keca, kereta perang dumbari, katuai kepupa epunge tep, pepu upu

1 Ne Zakariadi, yuk keca ton ken mana deiki di katuai kepupa, epsinge tep pekune. Ada, ukupsi taru di dinmasipa, dumbare kuda bisamdi gipra tu deiki embana keca epsi. Ada, nimi buknedi nimi porbana tep keca, er sida kereta perang, mutu buma butene neitamai di yakanmaupa epsi. Amutu buma buku ngeda, er si telep gat keca, er si perunggu di kwamu. Amutu butene dana-dana tara bukupa, aneitamai di kereta perang ^{▼▼kereta perang – Akeca gambar dina tep, Yeremia 51:21 dinkurume.} dumbari gupra yakanmai.

2 Akereta perangda, kuda bisam yuk-yukda tapu di gerekra gidonmaipa, yakandanmaipa epsi. Menmena taru mepra yakanmau kereta perang, er kuda bisamda, er bol binge yakanmau. Ange utopu kereta perang butene ngeda, er kuda bisam bolda, mirin nge yakanmau. 3 Tonda, kereta perang weneri ngeda, er kuda bisa bolda, kurun nge yakanmau utopu, kereta perang dumbari ngeda, er kuda bisam bolda, mirin cap, kurun cap, wisipra kupmau ngeda, yakanmaupa epsi.

4 Akunmaipa, ne nabi Zakariadi malaikat ngebodi upu pepmaneu ngebo tep asipetepsi. Ada, “Ne deiyo ngebo, ayakanmar kereta-kereta perangda, deiyo warya tep yakanmang do? Er nong neitamai ngeda, deiyo warya keca tep do?” pepra asipetepsi. 5 Upepra asipetepsipa, amalaikat ngebodi tamupra pepneu. “Akereta perang dumbari epmarumnge, er nong neitamainge deiyoda ake. Ada, sun adumbari kereta perang nong neitamaida, mutu sirik, im sirik embaramre kumanya yuk-yuk daembenkamenge. Ada, sundi Allah Yahweh akeca-keca yuma talepra, deiki tara erepra, ila puto kure ngebo, er damai benmangu dinin, ukutaruda tamupra yana, yuk-yuk mutu ton embenkamenge.

6 Nimi porbana tep, kereta perang deiki teknedi, embenkamrenge, er kuda bisam mirin ngeda, gidonmarpa Babel mutu tara dinin, dapu tara (arah utara) mutu benkure. Kereta perang kurun kuda bisamdi gidonmar ngeda, keteng dangban tarapu banmare. Ange utopu, kereta perang kurun cap, mirin cap wisipra kure kuda bisamdi gidonmar ngeda, iknapi dam tarada, (arah selatan) itara mutu dinin, Mesir mutu tara banmare,” pepra lap pepneu.

7 Uda, akuda bisam dumbari, kereta perang gipra banmainge yumada, ‘Nun adipapu gupsaka, menmena dipapu benkupe. Tuai mutu ban-ban yuma epra embepedi, pio moupra kalengbenkamepe,’ tenepi. Dinino, sun tenena ngeda, moupra men tenepidi, ‘Adipapu menmena benkupe,’ tenenapu kunmai. Ukupmai dinin, amalaikat ngebodi pepu. “Uda, ukutaruda, sun yuma, tuai mutu ban-ban yuma bemumdi, moupra kalekra erbenkurume!” pepu. Upepupa, sun kuda dumbarida, adipapu bei.

8 Ukupra bendopi taruda, er amalaikat ngebodi ne Zakaria tep tamupra pepneu. Ada, “Mirin kuda bisam Babel tara mutu neitamai benmarenge deiki di, Allah Yahweh er yu kwamunge yumada, adipapu kange boun kupra deipkamare,” pepnepa gekepsi.

Yosua er giso deiki ila nimi deiyo ngebo kenengna keca galupra deipkamunge tep, pepu upu

9 Allah Yahwehdi ne nabi Zakaria tep, ne damai yana, “Aupu upepkurume,” pepra deipneu. 10 Malaikatdi pepneu upuda ake, “Kan Zakariada, atumi dipapu, nimi si Zefanyadi deiamu ngebo Yosia, er ati damai benkurume. Yosia ati konum bememnyopda, weneri neng cap antapdankamrume. Ada, Babel mutu dubenami dinin, ka tamupra ukutaru yanmai neng, sun sida, Heldai cap, Tobia cap, tonda Yedaya cap, antapkamrume. Sun aweneri nengda, Babel mutu neitamai dabena donokamipa, dakuramyanen tamupra yanmang nengdi, sun Allah si eremna tep, karepkamkeng kunumna weik gat keca yumada dopropkurume. Dopropmemnyopda, akeca deiki di nedi pepkuken keca ketenepkamrume.

11 Ada ake. Sun aweneri nengdi doupra yana karepkamakeng keca, emas cap, perak cap yumada, dopropmemdi, nimi deiyo nengdi sun giso deiki galupra kenengameng keca ton, er si mahkota ketekeipkurume. Nimi deiyo ngebo mahkota konum keteneipmemnyopda, akeca dopra nimi si Yosadakdi deiamu ngebo, er si Yosua, er giso deiki amahkota kenekra deipkurume. Yosuada, imam-imam neng, sun ila deiyo ngebo kurure.

12 Imam-imam neng, sun deiyo ngebo Yosua, er giso deiki amahkota deipkurum taruda, er tep aupu peipkurume. Ada, ake. “Allah Yahweh akeca-keca yuma talepra, deiki tara erepra, im deiki malaikat yuma, sun deiyo ngebo kurure. Erdi aupu pepkere. “Sun yuma moupra gekepso! Ukupmantoda, angebo erda co teru utopu ngebo kunkamre. Angebo nepbaramreyanen, amenda taruda, ne Allah Yahweh tep, ne si eremna ati dopkamnere. Atep nengeda, erda ila mambul ngebo kurure,” pepsere.

13 Ukunkamre taruda, er angebo dipapu, neda Allah, ne si eremna atida dopkamnere. Tonda, nimidi, er tep, ila nimi deiyo neng tep, gispal doramengtopu, sundi angebo tep, gispal donkamenge. Angeboda, nimi deiyo neng bungna keca, er sida kursi tahkta deiki bukredi, amutu talepra upu penkamre. Ukunkamre taruda, imam ngebo ton, er tahkta kursi damaipu tengkamre. Ukupre dingeda, aimam ngebo cap, animi deiyo ngebo cap, tenpu kangepu teneprengedi, ‘Telepepu kikiman kunkamneme’ tenen, kange deipdana kunkamrenge. Ukunkamreng taruda, er dipapu amutu neitamai kunkameng nesala yuma tep, talepredi upu peramrepa, teleppu kunkamenge.

14 Animi deiyo ngebo, er giso deiki galuna tep kenekra deipkamrum keca, er si mahkotada, neda Allah, ne si eremna ati pumbonpu pio tep deipkamenge. Akeca akati pumbon deiamengepa, nimi yuma epmengedi, adipapu sun Heldai cap, Tobia cap, Yedaya cap, akunumna weik keca kareami neng tep, tupa tenenapu kunkamenge. Ange utopu, nimi deiyo ngebo Yosiadi, dipru boun kuna deiki di telep kunkamrenge tep, tupa tenenapu kunkamenge.

15 Uda, amenda taruda, sun yuk karen mutu neitamai di kunge nesalada, telep karen keca karenkamenga deiki di, neda Allah, ne si eremna ati dona tep, melimkamenge. Ton nengdi, aceipu yana, akati melipra donkamenge. Ukuramenganen, akati konum dopra gawal dakmengopda, sun Israel nesala yumada, ne Allah Yahwehdi kupkamne keca deiki di betapra kael kepkamrume.

Ada, Allah Yahweh, akeca-keca yuma talepra, deiki tara erepra, ila puto weik kure ngebodi, neda nabi Zakaria damai yana upu peipneupa, sun damai yana lap pepsisi ngeda, kael keprumudi, teka tenenkamrume. Nedi, ‘Ange-ange yumada, Allahdi ukupkamsere,’ pepra, lap pepsisi keca yumada, tek sisi nong kupkamre ja!

Ada, sun si eremrum Allah, Yahwehdi akeca-keca yuma talepra, deiki tara erepra, ila puto weik kure ngebodi pesere upu yuma moupra gekeprumudi, tamna gum dipapu, angepu tek sisi talepra kuprumnyopda, erdi, ‘Ukupkamsene,’ pepra, pedina upu deiki peiamseunge yumada, tek sisi nong kupkamre. Ange yumada, ne nabi Zakariadi tek sisi pepsene.