Zec 7 | XteSC | STEP | Ibrani upu deiki war si Kislew, tumi dumbaringe, tanggal empatda, ware sembilan nge deiki kupu. Atumi deiki peda, Babel mutu ila nimi deiyo ngebo Raja Dariusdi, amutu taleamudi kuramnganen, keteng tamun dumbaringe kupu. Atumi neitamaida, Allah Yahwehdi ne nabi Zakaria damai yana, upu pepra deipneu.

Zechariah 7

Allah Yahwehdi, “Ne si eremna tep jen si tepra kuna ngeda, telep kuprappu kunkarume,” pepu upu

1 Ibrani upu deiki war si Kislew, tumi dumbaringe, tanggal empatda, ware sembilan nge deiki kupu. Atumi deiki peda, Babel mutu ^{▼▼Babel mutu – Babel mutuda, Israel tara dinin, iknapi dam tara kwamu. Babel mutu nesala, sun ila nimi deiyo ngebo, er sida Darius kuramu. Sun Babel tara nengdi, keteng tamunda 586 deiki di Israel tara nesala yuma poprapidi, amutu yuma urupra sikke buktapi. Tonda, gam tupa kurami Israel nesalada, weika di ateng kouprapidi, sun pe karen mutu tamupra dubenamipa, ikin weik kupupa dakurami.} ila nimi deiyo ngebo Raja Dariusdi, amutu taleamudi kuramnganen, keteng tamun dumbaringe kupu. Atumi neitamaida, Allah Yahwehdi ne nabi Zakaria damai yana, upu pepra deipneu.

2 Uda ataruda, Betel mutu neitamai di kurami nesalada, nimi butene wepra deipi neng, sun sida ake, Sarezer cap, Regem-Melekh cap, tonda sun pel melimna neng cap, wepra deipi. Deiyoda, ‘Anengdi, Allah Yahweh er si eremna ati damai bena, Allah moropmengepa, Allahdi melipkamser’ tenena tep, sun anesala yumada wepra deipipa, bei.

3 Sun anesala yumada, ‘Allah Yahweh ^{▼▼Yahweh – Allah er pe si, tek sisi ngeda, ‘Yahweh’ kurure (Keluaran 3:14). Ibrani upu deiki di, asi penga er deiyoda, ‘Ne pio akunune’ tenen, kurure. Ada, akeca-keca yuma kapul men ketekepra deiamu taruda, Allah konum akuramu. Allahda, ataru pe kurure, tonda, ataru di dipra, pio dorkunkamre taru peda, Allah pio akurure, ton apio kunkamra cadi, er asi penga deiyoda akurure. Dinino, Ibrani upu deiki di, akayat neitamaida, ‘Yahweh Sebaot’ pepra ton seki. Aupu ‘Sebaot’ penga deiyoda, ada ‘Im deiki jen talena malaikat yuma taleredi, sun deiyo ngebo kurure’ tenena tep, seki. Atep nengeda, sun kael kemna tep, aupu deiyongepu katuai di sekmepu. Indonesia upu Allah upu buku neitamaida, ‘TUHAN Semesta’ sengnunge, tonda, ‘Allah yang Mahakuasa’ ton sengnunge. Ange peda telep dinin, aupu tek sisi deiyo akapu ngeda, nundi konum katuai di sekmepu.}, im deiki malaikat jen talena neng yuma talerura deiyo ngebo, er tep moropmepedi asipetepkamepe’ tenen, bei. Tonda, Allah er si eremna ati pumbon pel dona deiyo neng, sun imam-imam neng cap, Allah er upu lap pena deiyo neng, sun nabi-nabi neng cap tep, ‘Asipetepkamep’ tenen, akati damai bei. Sundi asipetepi ngeda ake. Ada, “Nun Israel yala kunup nesalada, menop taru Allah er si eremna ati urupra sikke buktapinge tep, ukutaru peda nundi tupa engena cap, ikin kange douna cappu kuramepedi, jen jena gum di, pio jen si tepra kuna deikipu, ware pamubari ^{▼▼ware pamubari – Aupu deiyoda, ake. Ada, sun Israel nesaladi, ikin kange doupra, engena cap, jen jena gum di, jen si tepra Allah tep gispal doraminge deiyoda, menop taru sun Babel nengdi, Yerusalem mutu yana, Raja Salomodi domu Allah si eremna ati yuma, uruptapidi, sikke buktapipa gum kupu. Ada, Yesus kapul men yanamu taru, keteng tamun 586 (BC) deiki di kupi. Angeda, 2 Raja-Raja 25:8 di kael kepkurume. Ange konum kupya tep, sun Israel nesaladi, ‘Angeda tupa tenepmepedi, mambul kange doupra, Allah tep moronkamepe,’ tenemnya cadi, keteng tamun yumada, ware pamu bari yakaramu taru yumada, jen jena gum di, jen si tepra kuramidi, Allah tep mororamidi, er si eremami.} neitamai di, angepu talepra kunkamep do, gum do? Angeda keteng tamun, keteng tamun yumada, akunup utopu kupra, pio tupa ukunkamep do, gum do?” pepra asipetepi. 4 Upepra asipetepseipa, amenda taruda, Allah Yahweh, im deiki jen talena malaikat yuma talerura deiyo ngebodi, ne Zakaria damai yana upu pepra deipneupa, gekepsi ngeda adano. 5 Allah Yahwehdi peipneu upuda adano.

Atep nengeda, aupu yumada, amutu neitamai kunung Israel nesala damai lap pepra deipkurume. Tonda, ne si eremna ati pumbon pel dona deiyo neng, sun imam-imam neng damai peda, aupu lap pepra deipkurume. “Sun Israel yala nesalada, mambul kange doupra, jen jena gum di, jen si tepra morona cap, engena cap, kuramrum ngeda, tek sisi ne tenena teppu kuramrum do? Ada, keteng tamun tujuh puluh (70) deiki di, ware pamubaringe neitamai ukuramrum utopu ngeda, tek si ne Allah gispal dona tep kuramrum do, gum do? Ne kangeda, ne tepapu men kuramnerume.

6 Ange utopu, ne kaele, yuk taru yumada, sundi telep kange deipra, jen keca jena cap, me cap jerum taru yumada, sun pe putana tepapu, ‘Jen keca jepmepedi pio bounkamsere,’ tenena ngepu kuramrume. Ange yumada, ne tepapu tenena gume. Allah Yahwehdi pepu.

7 Zakariadi pepu.

Angeda, Allah Yahwehdi, pumun taru Yerusalem mutu bouna di dim pepra kuramrumpa, akeca-keca yuma teleppu kuramseu taruda, aupu di pepra deiamupa, sun nabi-nabi nengdi peiamsei upuda, adano. Tonda, sunda teleppu kuramrumtopu, sun damai di, dana-dana mutu neitamai domi yambul ati arum kurami nesala peda, teleppu kurami. Ataru neitamai peda, sun damai apu men kurami dinin, ton tarada, itara iknapi dam tara mutu (arah selatan) Negeb tara cap, keteng dangban tara (arah barat) ortara mutu buma-buma bukamngai, Shepela mutu peda, sun atara kurami nesala peda, teleppu kupra kurami. Ataru neitamaida, Allahdi aupu utopu upu ton, peiamseu.

Israel nesaladi, Allah peiamu upu yanitamia tep, yuk mutu yu nengdi yana popidi, nimi weik ton ateng kouprapidi, karen mutu dubenaminge tep, pepu upu

8 Allah Yahweh akeca-keca yuma talepra, deiki tara erepra ila puto kurur ngebodi, ne nabi Zakaria damai yana, aupuda pepra deipneu. 9 Ne Allah Yahwehda, ^{▼▼Allah Yahweh – Ayat 9 neitamai peda, Ibrani upu deiki di, ‘Allah Yahweh Sabaot’ pepra seki. Ange kael kemna tep ayat 3 diatas dinkurume.} im deiki jen talena malaikat yumada, sun talepnedi, sun deiyo ngebo kunune. Pumun taruda, nedi aupu konum pepra deiamsisi. Ada, “Sun yumadi, sun tara nesala yuma tep, tek sisi dumsisi kupra upu bokdankamrume. Tonda, sundi sun kayapu neng cap, sun tara kunge nesala cap tep, pio bouna di bicau tenedamumdi, dipru karedankamrume. Adipapu yu tenepra wenemdana gume,” pepra deiamsisi.

10 “Tonda, sundi sun solu nerapu cap, lyan nyapu cap, tonda nimi bo neng, yuk mutu neng dinin, sun damai yana kuramenge neng cap, tonda, sun kayapu neng akeca-keca yuma gum kuprepa kange mun kange doupra, ‘Uo’ tenen, kunmare ngebo cap, anesala yuma tep nengeda, ikin keca dopra sun nong deiki pio men derinkamrume.

Anesala yuma tep, bicau tenepra, telep kupra melimkamrume. Tonda, sun cap kikiman kurumu nesala yuma tep nengeda, yu kange tenepra, sun kange dipru neitamai di, ‘Sun tep mali keca kupkamepe,’ tenepra, pio men kunkamrume,” pepra deiamsisi. Allahdi peipu. Allahdi nun Israel yala nesala yuma tep peiamseu.

11 Allahdi nun apu yapu tep upepra deiamseu dinino, sun ataru kurami nesalada, sun kange tenena yumada, gel giso kange deipra kuramidi, tek sisi pio men gekepmanto nesalapu kurami. Sun anesalada, ‘Allahdi pesere upu men gekenkamep’ tenen, sun amnyo karikra, sun amulda dekdongopya cadi, nabi nengdi perami upu cap, Allah er pedi peramu upu capda, pio men gekerami.

12 Ataru kurami nesala yumada, sun dipru neitamai yumada, balila deipra kuramidi, ‘Allahdi pesere upu pio men gekenkamepe,’ teneramidi, er upu yanitamnapu kurami. Ukuramya tep, sun dipru neitamaida, gat gel utopu kurami. Pumun taru Allahdi, ‘Angepu talepra kunkamrume, angeda pio men kunkamrume,’ pepra, deiamseu upuda, men gekepmanto kurami. Sun men gekerami upuda, tali upupu gume.

Ada, Allah Yahwehdi, im deiki jen talena malaikat yuma talepra ila deiyo ngebo kuredi, er Lek Sambala karepupa, erdi, sun nabi-nabi neng, sun kange dipru neitamai yana, upu peiamupa, sundi, ‘Allahdi, ‘Angeda ukunkamrume, angeda pio men kunkamrume,’ pepra, deipseu upu adano,’ pepra, lap perami dinino, sun ataru kurami Israel nesaladi, aupu pio men gekerami.

Aupu yumada, gekena gum di, pio moupra men talepra kuramipa, Allah Yahwehdi sun tep, pio yu kange deipra wenemamu. Ada, Allah Yahweh, im deiki jen talena malaikat yuma talepra, sun ila deiyo ngebo kure ngebodi, Israel nesala tep, ila yu kupupa, wenemamseu. Zakariadi pepu.

13 Upepupa, Allah Yahwehdi aupu ton dukdongopra pepu.

Israel nesala yumadi, ne upu pio men gekeramneidi, angepu talepra men kuramya tep nengeda, ne Allahdi, ‘Sunda ne upu gekepneso!’ pepra peiamsisi taruda, sundi ne upu men gekeramnei utopu, sundi ne tep, ‘Uo, nun nai Allah melipra lyepropseo!’ pepra, mororamnei taru peda, nedi sun upu pio men gekeramsisi. Neda, Allah Yahweh, im deiki jen talena malaikat yuma talepra, sun ila deiyo talepra kune ngebodi pepsene.

14 Uda, sundi ne upu pepra deiamsinge yuma tep, men gekeramneia tep, sun menenga wenemna tep ukupsi. Ukupmanto ngeda ila kumanya puto yaredi, pung peprepa, akeca-keca doupra, yuk mutu dana-dana tara dubaramretopu, ne ila puto di, sun Israel nesala yumada, dopra yuk karen mutu dokotepsipa, yu neng yana popidi, ateng koupdongopidi, yuk karen mutu neitamai dabena deiamipa, ikin kangepu doupra dakurami.

Sunda, nimi bo neng utopu kuramya cadi, sun men di men kael keami mutu nesala kan-kan neitamaipu ikin kupra dakurami. Nedi ukuramsa deiki di, sun mutuda, men taru pio teleppu kuramu dinin, ataru neitamaida, yuk amutu tu neitamai pio telep sukun tu kuamu dinin, nedi ange yumada, gum kupra deipsipa, sun mutuda walangyopu kwamupa, amutu neitamaida, nimi ton men kuramidi, abenap, oryanap men kemamipa, amutu neitamai yumada, pio malipu kupbaramu. Ange yumada, ne Allah ja! Allahdi pepu.

Allahdi upeipupa, nabi Zakaria gekepudi sekra deipu.