Zec 8 | XteSC | STEP | Allah Yahwehdi ne Zakaria damai mambul upu ton pepra deipneu. Allah Yahweh, akeca-keca yuma talepra, ila erepra kure ngeboda, im deiki jen talena malaikat yuma talerura deiyo ngebodi, aupu peipneu.

Zechariah 8

Allah Yahwehdi, ‘Yerusalem mutu neitamai tamupra lepsisikra dopkamne,’ pepra deipu upu

1 Allah Yahwehdi ne Zakaria damai mambul upu ton pepra deipneu. Allah Yahweh, akeca-keca yuma talepra, ila erepra kure ngeboda, im deiki jen talena malaikat yuma talerura deiyo ngebodi, aupu peipneu.

2 Neda Allah Yahweh, akeca-keca yuma talepra, ila erepra kunun ngebodi, im deiki jen talena malaikat yuma talenedi, sun ila deiyo ngebo kunune. Nedi, aupu pepsene. Ada men taruda, sun Yerusalem ^{▼▼Yerusalem – Yuk Allah upu buku neitamaida, Sion mutu seki. Sionda, ada Yerusalem mutupu dinin, pumun taru perami si tep nengeda, Sion mutu perami. Ukutaruda, Yerusalem mutu penunge.} mutu neitamai kurami nesala yumadi, mali weik kuramya tep, ila yu kupneupa, sun tep wenepsidi, kange mun keca weik kareramsisi. Dinino, sun tep, ila di bicau teneamsidi, ‘Sunda ne mawa nesala kununge,’ tenemsa cadi, ne kangeda, ‘Sundi, yuk tali keca si men eremkamenge.

Ne sipu erepmengedi, ne upupu talepra moupra kunkamenge,’ tenemsi. Utenemsa tep nengeda, ukutaruda, sun kukamnungai cap, sun cap tep, kange di tamupra, pio telep kupra deipkamsene. Ne Allahdi, ne dipru neitamai yumada, sun anesala tep, ‘Sunda ne mawa nesalapu kunkamenge,’ tenenuna cadi, sun Israel yala nesala tep, yu kurepa yana poryakanung neng yuma tep, ne dabal weik kuneredi, ne dipru neitamaida, bupu weik pirinerure.

3 Neda, Allah Yahwehdi pepsene. Neda kange di tamupra Sion mutupu yankamne. Ada, neda ila ati arum domyai, Yerusalem mutu neitamaipu kunkamne ja! Nimi yumadi, amutu tep, ‘Uo, sun Yerusalem mutu kunge nesaladi, Allah tep, pio teka tenepmengedi, er tepapu talepra kungedi, er sipu eremnunge,’ pepra penkamenge. Tonda, neda Allah Yahweh, im deiki jen talena malaikat yumada, sun ila deiyo ngebo kunune. Ne pe mutu sisada, Sion mutu tep nengeda, nimi yumadi, ‘E, amutuda tek sisi pio telep lengna mutupu kurure,’ penkamenge. Neda Allah Yahweh, amutu neitamai yanedi, amutupu pio kunkamne.

4 Tonda, neda Allah Yahweh, im deiki jen talena malaikat yumada, sun ila deiyo ngebo kununa cadi, apepsen upuda tek sisi nong kupkamre ja! Ne Yerusalem mutu neitamai kunkamne taruda, sun du yapu neng, wisi neng cap, wisi nerapu cap yumada, amutu neitamai kunkamre bisi damaida, kange deipra bungkamenge. Tonda sun nau yapu wisi nerapu cap, pio wisi neng capda, pio wisi deipbankamenga cadi, amutu neitamai tupa gam kungedi maca deiki dipapu embankamenge.

5 Tonda, amutu neitamai embankameng taruda, sun metek nyapu yuma cap, metek ner nyapu yuma capdi, ila ati arum Yerusalem mutu bisi neitamai cap, nimi ati damai capda, kange deipra esu pepra kuramengedi, amutu yumada dinikamenge.

6 Tonda, ne Allah Yahweh, akeca-keca yuma talepra, ila puto kunun ngebo cadi, ne kaele. Ukutaruda, sun Yerusalem mutu tupa gam kunmarum nesalada, ne pepmasen upu tep, ‘Tek do, gum do? Ange yumada, tek sisi kuprepa epkamep do? Angeda pio men kupmanto kecapu penmaser do?’ tenen, kange tenimtonapu kupserepa, kware kunkamsere.

Dinino, moupra gekepneso! Neda Allah Yahweh, im deiki jen talena malaikat yumada, sun ila deiyo ngebo kununa cadi, ne putoda pio weik kunerura cadi, nedi, ‘Ukunkamne,’ tenenun kecada, men kupmanto kupnetu do? Gume ne tenemsi keca yumada, kupkamne ja! Tek sisi apepmasen upu yumada, nong katuai kuprepa, epkamrum ja!

7 – 8 Neda Allah Yahweh, im deiki jen talena malaikat yumada, sun ila deiyo ngebo kunune. Nedi pepsene. Ne adipapu ne nyapu sisa, Israel yala nesala yumada, sun tep lyepra deipkamne. Ada, menop taru yu nengdi, sun yuk-yuk dabena deiamipa, ukutaru dakunge mutu neitamai yuma di dopra, tamupra duyana Yerusalem mutu neitamaipu deipnepa, aceipu akunkamenge.

Ada keteng yakan tara cap, keteng dangban tara cap di, tamupra dopra aceipu deipkamne. Ukupnepa, sun Israel yalal nesala yumada, ne nyapu sisapu kepra kunkamenge. Neda, sun nai bo Allah pio tep kunkamne ja! Ukungepa neda sun nai bo Allah kunkamne. Ukunkamne taruda, ne dipapu ne nyapu sisa tep, kange deipnedi, pio men tapkamsene. Nedi, “Ukupkamsene,” penetopu, tek sisi kupkamne ja! Sunda, kange deipdangedi, telep kupra dumsisipu kunkamenge.”

9 Neda Allah Yahweh, im deiki jen talena malaikat yumada, sun ila deiyo ngebo kunune. Nedi pepsene. Ada, sun kange dipru neitamai yuma di, puto kepropkurume! Ukutaruda, sun nabi-nabi nengdi, apeipmasen upu gekepya tep, sundi aupupu lap penmasengpa, sun ataru kunmarum nesaladi gekenmarume.

Atep, sun buru cap, nong capda, puto kepropkurume! Anabi-nabi nengda, ne si eremna ati, menop taru uruptapra, sikke buktapi ngeda, amutu nengdi, ‘Lepsisikra dopkupe’ tenen, pel gonga kepi taruda, akati ayumnya co deipi taruda, anabi nengdi ton epmaidi, aupu pepi. Apepitopu, ukutaru peda, aupupu pepmasenpa, sundi gekepmarume. Ada, ne Allahdi sun tep kange di telep kupra deipsenepa, amutu nengdi, ne si eremna ati tamupra lepsisikra dopkamenga tep pepmasene.

10 Ataruda, ne si eremna ati gonga keprap, lepsiskra dopkoi taruda, sun amutu kurami nengdi, co bo pio men taleramya tep, ‘Pel dona tep melimna neng cap, pel melimna tep gam keca sapi capdi, pel dopra melipsetenge’ tenena tep, ‘Keana tep co bo karepmepedi, dopropmasepyanen, amenda akeca tamupra akeca tamupra karepkamsepe,’ men pepmanto kupi. Akeca yumada, men kunupmanto kurami.

Tonda, amutu kurami nesalada, podana gum di tali bouna di dim pepra, telep kupra men kupmanto kurami. Ada, sun mar podana neng weik kuramya cadi, amutu di bura men benmanto kurami. Tonda, yuk mutu di amutu yana men kupmanto kurami. Nedi yu kange tenedana deiyo keca karepsipa, sun cap, sun dana-dana tara kurami nesala cap, yu tenedaramrumdi, podanapu kuramrume.

11 Dinino, menop taru sun podan nengdi poramseidi, ateng koupra yuk karen mutu dubenamseipa, ikin weik kuramrum taru cap, yuk karen mutu tapra, amutu tamupra yamumdi, ne si eremna ati lepsisikra dona tep ayumnya co kapul me ikrum taru cap, nedi sun Israel nesala tep kuramsisi ngeda, konum tapsi.

Ukutaru di dipra, dorkunkamre taruda, ange utopu men kupkamsene. Ukutaru amutu neitamai tupa gam kunmarum nesala yuma tep nengeda, telep kupra deipkamsen ja. Neda Allah Yahweh, im deiki jen talena malaikat yuma, sun deiyo ngebo kunedi, puto weik kununa cadi, nedi aupu pepmasenada, tek sisi nong kupkamre ja!

12 Ne Allahdi sun tep, telep kupra deipsenyopda, ukupmantoda, sun amutu nesala yumadi wisipraprumudi, telep yal keca bouna di gwekra embankamrume. Ukuprumupa, sun anggur co du tapu yumada, du moupnapu kupkamre. Utopu, amutu wa tu neitamaida, sundi kouramrum keca yuma nongpu kunkamre.

Tonda ukuprepa, amutu neitamai yumada, ila mo cepredi, pio sangkamre. Atelep keca yumada, nedi karepsenya deiki di, sun tupa amutu neitamai gam kunkamrum nesaladi, akeca-keca yumada karepsenepa, dopra taleprumudi, kange deipra teleppu kunkamrume.

13 Tek sisi pepsene. Ne Allahdi, sun Yehuda tara mutu kurum nesala cap, Israel tara mutu neitamai kurum nesala capda, sun wenemna tep, pio kange mun keca kareamsisipa, ikin weik kuramrume. Ukupra kuramruma tep, yuk mutu nesala yumadi, sun diramseidi, yuk neng tep widana tep upepdarami. “Uo, sun Yehuda nesala cap, Israel yala nesala cap tep, Allahdi wipupa, ila kange mun keca yakaramupa, ikin weik kurami ngeda, sun deiki ton, pio ikin keca yankamsere!” pepra, widanapu kurami.

Dinino, ataru di dipra, dorkunkamre taruda, ne Allahdi sun amutu kurum nesala tep, pio telep kupra lyepra deipkamsene. Ukupsenepa, pio teleppu kunkamruma cadi, sun dana-dana tara kunge yuk mutu nimi bo nesaladi, sun kayapu neng tep upenkamenge. Ada, “Uo, sun Yehuda tara nesala cap, Israel nesala cap tep, Allahdi lyeprapudi, kange di pio telep kupra deipupa, pio telep kungetopu, ‘Sun peda telep kupra deipsetupa, teleppu kunkamrum’ tenen, Allah moronkamsepe,” pepra, telep upu pedankamenge.

Ange tep nengeda, ne Allahdi sun amutu kurum nesala tep pepsene. Sunda, adipapu dipru puto keproprumudi kware men kunkamrume. Kange deiprumudi, teleppu kunkamrume, pepsene.

14 Teka, neda Allah Yahweh, im deiki jen talena malaikat yuma, sun deiyo ngebo kunedi, puto weik kununa cadi, nedi apu pepmasenada, tek sisi nong kupkamre ja! Atep, sunda kware ton men kunkamrume. Deiyoda ake. Ada, sun apu yapu nengdi mali weik kuramipa, yu kupneupa, nedi aneng tep, ‘Sun wenemna tep, ila kange mun keca karepkamsena deiki di, wipkamsene,’ tenemsitopu, tek sisi tamna gum dipapu, nedi kange mun keca dopra, sun tep wenemamsi. Dinino, ukutaruda sun ataru neitamai amutu kurum nesala tep, yuknge ton kupkamsene.

15 Ada, ake. Ukutaruda, nedi sun amutu gam tupa kurum nesala tep nengeda, kange di ton cap telep tenepnedi, sun Yerusalem mutu neitamai kurum nesala cap, sun Yehuda yala nesala cap yumada, nedi sun tep, kange pio deipra kunkamsene. Sun tep pio telep kupra deipkamsena tep, sun kwar kuna meme.

16 Kange di ton cap teleppu deipkamsena cadi, atep nengeda, ataru di dipra dorkunkamre taruda, ‘Sundi angeda kunkamrume, angeda pio men kunkamrume,’ pepra deipsen upuda adano. Ada, sundi sun kayapu neng tep, tek sisi telep upupu pedankamrume. Ukuprumudi, sundi nimi upu bongdina tep taruda, sun ila ati arum wengna tep bisi buplan damai bulupra wengkamrum taru yumada, dumsisi upupu pedankamrume.

Ada, ‘Angeda konuma,’ pepra, upu sirya pepkamrum ngeda, pio tek sisi ngepu pepra derinkamrume. Tonda, ‘Nun cap, nun kayapu neng cap tenpu kange tenepra, dukdongopra, telep kupra kikiman kunkamep’ tenenangepu peprumudi, nimi upu bongdinkamrume. Tali upu pedana pio gume.

17 Tonda, sun cap, sun kayapu neng sisa cap tep, yu kange doupnedi, sun kange dipru neitamaida, ‘Aneng tep mali kupkamepe, aneng popkamepe,’ pio men tenenkamrume. Ange utopu sun kayapu neng tep, tali upu deiki di, ‘Tek sisi ukupkamkene,’ pepra, mawa di mok upu men pepra deridankamrume. Apepmasen ngeda, tali tep men pepmasene. Deiyoda ake, ne Allah Yahwehdi, sundi mali tenedana cap, mali kudana cap, sundi sun kayapu neng tep, puto di pedarumunge cap, uda dumsisi men kudarumunge cap yumada, nedi pio dabale tenenune. Amali kudanange yumada, ne song cadi, ange yuma tapkamrume. Allahdi pepu.

18 Uda, Allah Yahweh akeca-keca yuma talepra, deiki tara erepra, ila puto kure ngebodi, im deiki jen talena malaikat yuma, sun deiyo ngebodi, ne nabi Zakaria damai yana, aupu ton peipneu.

19 Aupuda ake. Sun Yehuda tara kurum nesala cap, Yerusalem mutu kurum nesala cap yumada, pio bicau tenedarumudi, ‘Nun cap, nun kayapu neng cap, podana gum dipapu, kange deipdapedi, bouna di dim pepra, kikiman kunkamepe,’ tenedankamrume. Tonda, pio bicau tenedarumudi, tali upu pedana gum dipapu, dumsisi upupu pedankamrume. Ukupkamruma tep nengeda, ne si eremna tep, jen jena gum di, jen si tepra kunkamrum taruda, sun kange deipdarumudi, pingping kange doupra kunkamrume.

Ada, war dumbaringe cap, war pamubaringe cap, war yoneitam baringe cap, war morokyonge cap, ataru-ataru yuma deiki di, jen si tepra, ne tep moronerumudi, ne sipu eremkamnerume. Atep, ne tep jen si tepra kunkamrum taru yumada, sun Yehuda mutu nesala cap, Yerusalem mutu nesala cap, sun kange yuma telep teneprumudi, pingpingapu kunkamrume. Ange tep nengeda, sundi tek sisi pena upu cap, pio bicau tenedarumudi, bouna dipu telep kupra antapra kikiman kunkamrume, pepsene.

20 Allah Yahweh akeca-keca yuma talepra deiki tara erepra kuredi, im deiki malaikat yumada, sun ila deiyo ngebo kuredi aupu pepu, “Ada amenda taruda, ila ati arum doaminge ware kupra do, amutu-amutu neitamai di dakunung nesalada, denge pio weika di, Yerusalem mutu neitamaipu yakankamenge.

21 Yerusalem mutu yakankunge taruda, tenpu mutu neitamai kuramenge nesaladi, ton yuk mutu neitamai kuramenge nesala tep, upenkamenge. “Ada sun yuma yamumpa, Allah Yahweh akeca-keca yuma talepra, deiki tara erepra, ila puto kure ngebo, er sipu kikiman erembenkupe. Ne pedi benkuna cadi, sun cap wisipmepedi, kikiman benkamepe,” penkamenge. Tonda, sundi er Allah tep, “Naio, kanda im deiki jen talena malaikat yumada, sun deiyo ngebo kuruma cadi, kan dipapu nun tep melipseo!” pepra, moronkamenge.

22 Upepra kunkamenga utopu, yuk mutu nimi weik ton cap, mutu ban-ban yuma di, nesala yala-yala yuk-yuk nesala cap, ila puto weik kunge nesala cap, weika di Yerusalem mutupu yakankamenge. Sun anesala yuma yankamenga deiyoda ake. Ada, sundi ne Allah Yahweh, akeca-keca yuma talepra, deiki tara erepra, ila puto kunun ngebodi, sun im deiki tara kunge jen talena malaikat yuma, sun deiyo ngebo kununa cadi, sundi ne si eremna tep yangedi, “Naio, melipseo!” pepra, ne tep moropnengedi, ne sipu eremkamnenge.

23 Neda Allah Yahweh, akeca-keca yuma talepra, deiki tara erepra, ila puto kunun ngebodi, im deiki tara kunge jen talena malaikat yuma, sun deiyo ngebo kununa cadi, nedi pepsen upuda, tek sisi nong kupkamre ja! Ada, amenda taruda, Yahudi yala nesala gum dinin, mutu-mutu ban-ban yumadi, sun upu sisa yuk-yuk penge nesalada, Yahudi yala neng epmengedi, sun opkal talepmengdi, moronkamenge.

Ada, “Uo, sun ton melipseso! Yuk nengdi, ‘Allahda, tek sisi sun Yahudi yala nesala cap kikiman kuredi, sun tep pio melimrure,’ peramipa, gekeramupka cadi, sunda Yerusalem mutu benkumum taruda, nun cap wisipra betepe’ tenen, moropsepe!” pepra moronkamenge.

Ataruda, ukupmanto ngeda ake. Ada, ataru-ataru yumada, Yahudi yala gum nengdi bulupra yangedi, Yahudi yala ngebo tenpu, er damai yangedi, ‘Tapseredi berur’ tenen, er opkal talepmengedi, aupu penkamenge. Ada, “Kao, kanda Yerusalem mutu bena, Allah Yahweh tep, er si erepkumem taruda, nun cap wisipra kikiman betepe’ tenen, moropkepe. Sundi Allah Yahweh tep, er si eremrumtopu, nun peda utopu kupedi, Allah er si eremkamepe,” pepra moronkamenge.