Zec 9 | XteSC | STEP | Allah Yahwehdi pepra deipu upuda ake. “Nedi tuai mutu neitamai kunge nesala, sun kunge keca yuma tep dinuna cadi, Hadrak mutu cap, Damsyik mutu cap, kunung nesala mali kunge keca tep wenepkamne. Ada, sun Israel yala nesala kunge mutu neitamai tepapu gume. Aupuda tali tep men pepsene. Deiyoda, ila pala mutu neitamai, er sida Siria mutu, amutu neitamai ila nimi deiyo neng kunge mutu peda, ne Allah Yahweh dinedi talenune,” pepra deipu.

Zechariah 9

Israel nesala kungai di, yuk karen mutu dan-dana nesala tep, ‘Allahdi wenepkamre’ tenen, pepu upu

1 Allah Yahwehdi ^{▼▼Yahweh – Allah er si, tek sisi ngeda, ‘Yahweh’ kurure. Allahdi Musa tep, aupu katuai di lap pepu (Keluaran 3:14). Ibrani upu deiki di ahuruf ‘YHWH’ angepu sengnunge. Ibrani upu penge nesaladi, ‘Allah er si sisa katuai di men peptepe’ tenen, kware kununge. Kware kununga cadi, sundi huruf YHWH, angepu sengnunge. Dinino, Allahdi Musa tep, “Gume, ne sida ‘Yahweh’ kunerure. Asi ‘Yahweh’ kael keprumudi, asipu erepra ne tep gispal donkamnerume,” pepu. Ibrani nesaladi huruf YHWH sengnung dinin, ‘Ahurufpu sekmepyopda, aupu penada iriwarye kupsurur’ tenen, nundi, ‘Yahweh’ sengnupe. Indonesia Alkitab neitamaida, Allah er si Yahweh men sengnunge. Sunda, ‘TUHAN’ sengnunge. Dinino, Indonesia Alkitab neitamai yuma, ‘TUHAN’ epmumyopda, ‘Ada Allah er si sisa, Yahweh kwamngai,’ tenenkamrume. Allah er si Yahweh penada telepe pua. Tonda lap pena upu nomor 49 dirume.} pepra deipu upuda ake.

“Nedi tuai mutu neitamai kunge nesala, sun kunge keca yuma tep dinuna cadi, Hadrak mutu cap, Damsyik mutu cap, kunung nesala mali kunge keca tep wenepkamne. Ada, sun Israel yala nesala kunge mutu neitamai tepapu gume. Aupuda tali tep men pepsene. Deiyoda, ila pala mutu neitamai, er sida Siria mutu, amutu neitamai ila nimi deiyo neng kunge mutu peda, ne Allah Yahweh dinedi talenune,” pepra deipu.

2 Allah Yahwehdi Hamat mutu peda, talerure. Ada, Hadrak mutu cap, wilipra dana-dana bongdonai kunge nesala yuma peda, Allahdi talerur nesala kununge. Ange utopu amutu nengdi, ila kael kemna deiyo keca yuma kael keami neng kunung mutu, Tirus mutu cap, Sidon mutu cap yumada, Allahdi talerure. 3 Tirus mutu kunge nesalada, ‘Nimi yuk nengdi yana wekra popsenung’ tenen, lyom gel beilya wipra ongopdongopidi, kunumna weik keca, er si perak cap, emas cap yumada, yana kipra deriramipa, pio weik men nukmanto kupu. Ukuramya tep, ukupmantoda, tali me wenenga utopu cap, tali tu palipmengepa, embarameng bisi pirimanai yana deriramengepa, ila di weleramretopu kupu. Ada sun emas cap, perak cap deriramenge ngeda, men nukmanto tep pepne.

4 Ukutaruda, sunda isomka neng kununge. Dinino, ukutaruda, Allahda, ^{▼▼Allahda – Acada, Ibrani upu deiki di, Allah er si tep, ‘Adonay’ ton pepra sekya cadi, nundi aupu deiyo ngeda, konum jenek kupra sekmupu.} akeca-keca yuma talepra, deiki tara erepra, pio puto weik deiyo ngebodi, sun anesala talenge keca yuma, dalupra dopropredi, sun amutu kunge nesala tep, kankan kunge nesala utopu kupra deipkamre. Ada, amutu nengdi, sun kunumna weik keca dopra, ila gapung co deiki deipmengedi, laut mokon deiki embaramre keca, er sida kapal laut yuma, Allahdi peiprepa, agapung co yuma mokon jepropkamre. Ukupkamretopu, amutu ila ati dominge yuma, Allahdi peiprepa uku jepra gawal dakamre. Ukupya deiki di, amutu neng yumada, Allahdi anesala yuma kankan kunge nengpu kupra deipkamre.

5 Ukuprepa, ila ati domi mutu si, Askelon mutu cap, Gasa mutu cap, Ekron mutu cap akuprenge epmengedi, lukdana kwar weik kupkamre. Ukuprepa, Ekron mutu nengdi, ‘Uo, ange ukuptepe,’ tenen, pio putaramupa tenerami keca yumada, Allahdi gum kupra deipkamre. Tonda, Gasa mutu ila nimi deiyo kepra kurur ngeboda, deprepa gum kupkamre. Tonda, Allahdi Askelon mutu kunge mutu nesala yuma tep, gum kupra deiprepa, Askelon mutuda longdana gum, dimpepredi walangapu kupkamre.

6 Asdot mutu nesala sisa yuma, gum kupra deipre pangeda, nimi karen mutu dana-dana yuma, yana punupra kunkamenge. Ada nimi bo neng utopu nesaladi, Asdod mutu kure keca yuma dopropmengedi, amutu kunkamenge. Ukunkamenga tep nengeda, Allah Yahwehdi uperure. “Sun Filistin nengdi dipru eremami mutuda, ne Allahdi yanipra metek kupra deipkamne. Ukupne pangeda, sun Filistin nesalada, ali dangkamenge,” pepra deipu.

7 Allahdi sun amutu nesala tep upepu.

“Sun Filistin nesalada, menop taruda, yapi tupa kupmarenge tu keca yala-yala yumada, tali lupra jerami dinino, ukutaru tupa men jenkamenge. Tonda, yuk jen keca yala yuknge yuma peda, sun tep, ‘Ange men jenkamrume,’ pepra deiamsisinge yumada, amutu nengdi men jenkamenge. Ada, ne Allahdi sun amutu sisa neng yuma, popra gawal daknedi, yuk nengda tapnepa, tupa gam kunkameng nesalada, ne mawa nesalapu kunkamenge.

Ukupmenge pangeda, yuk neng yumadi aneng tep, ‘Sun anengda, Yehuda yala nesala utopu kununge,’ pepra penkamenge. Ange utopu, Ekron mutu tupa gam kunkameng nesala yumada, ne amutara neng kunkamenge. Ada pumun taru, Yebus mutu kurami nesala cap, ne nyapu sisa, ne mawa nesala Israel neng cap, tapakra kuramitopu, Yebus mutu nesala cap, ne mawa nesala Israel yala nesala cap, kikiman kunkamenge. Ukupmengopda, sun Yebus mutu nesalada, ne tara nesala utopu kupra kunkamenge.” Allahdi pepu.

8 “Ne Allahdi talene mutu tep kalekra dinkamne. Ukunepa, yuk karen mutu jen talepra kunung neng yumadi, ‘Amutu yana dalupra dopropkamepe,’ tenenge ngeda, nedi upu sengdongonkamne. Ukunkamna cadi, yuk karen mutu jen talen nengdi, ‘Allah er mawa nesala tep, yana popbisipmepedi, sun mutu talenkamepe,’ tenenge neng tep, ne Allahdi, go men karenkamne. Go men karenkamna deiyoda, ne mawa nesala, ikin kange doupra kunge ngeda, nedi konum dinuna tep pepsene.” Allahdi pepu.

“Ila nimi deiyo ngebo Raja, amenda taru yaredi, Israel nesala yuma talenkamre,” pepu upu

9 Uo, Sion mutu neitamai kurum nesalao, sun ila di kange deipra pingping deiki kumumdi gudinkamrume. Tonda, sun Yerusalem mutu kurumu nesala yumada, ila di kange deipra, ila upu deiki di, ‘Telepe,’ penkamrume. Sun dinkurume. Sun ila nimi deiyo ngebo, akeca yuma bisina cap, tonda pio dumsisi kuna cap, deiyo ngebo yanmara tep dinkurume. Er ayankamre ngeboda, nimi kungetopu dipetepra, dumsisi kupra upu bongdina deiyo ngebo kurure. Tonda, nimi lyemna deiyo keca duyanmare. Dinino, angeboda, er dipru bouna di kuredi, amutara kurure. Angeboda, ukupu keledai bisam bali deiki bukra yakanmare.

10 Allahdi peipu, “Efraim yala jen talen neng, nimi podan taru bukmengepa baramre kuda, bisamdi gipr, a tu deiki embarameng keca, kereta perang kuda yumada, ne Allahdi gum kupra deipkamne. Tonda, Yerusalem mutu neng, bali deiki bukra embanung kuda bisam yuma peda, gum kupra deipkamne. Tonda, nimi podana tep dourameng jen yumada, yuk nimi pon keca yala-yala yuma cap, copra sikke buktapnedi gum kupra deipkamne. Angeda tali tep men pepsene. Ada, Israel nesala sun ila nimi deiyo ngebo, ne Allahdi sun yuma tep, tali kange deipra, telep kunkamrum taru karepkamsena tep pepsene.

Ada, ‘Sun cap, mutu ban-ban yuma dakunge nesala cap, tenpu kange doupra, dukdongopra kunkamrume’ tenen, upu penkamsene. Ortara deipu laut mokon cap, atara deipu laut mokon cap, daneitamai dipdongopra kunge nesala yumada, ne Allah dipapu talenkamne. Tonda, Efrat me damai di dipdongopra, mutu sirik dana-dana yuma, ne dipapu talenkamne.” Allahdi pepu.

Karen mutu nengdi, Israel nesala ateng koupra dubenaminge tep, Allahdi, ‘Loptapra lyepkamne’ tenen, pepu upu

11 Allah er si Yahwehdi, er wepra deiamu nesala tep pepu. “Ne Allahdi sun tep ‘Telep kupra derinkamsene,’ pepra, pedina upu deiki di pediramsisi ngeda, tek sisi nong kupkamre. Ada, sun mali kuramrum keca yuma kaukemna tep, yapi keca popra kareryakarumnya deiki di, ‘Konum kupseu,’ tenenkamrume. Aupu pediramsisi ngeda, tek sisi nong kupkamre. Aupuda men gum kuptue. Atep nengeda, nedi, ‘Ukunkamsene,’ pepra, pedina upu deiamsisi ngeda, tek sisi nong kupkamre. Karen mutu nengdi sun tep, ateng koupra me jena tep paliami pumbon, me cepramu pumbon dokoteramseipa, kange mun kange doupra kuramruma neitamai di, loptapra lyepropkamsene.”

12 “Uo, sunda yuk karen mutu dubenamseipa, wenemna ati pumbon tupa kurum nesalada, ‘Tek sisi Allahdi loptapra lyepkamsere’ tenen, ketenepra dinapu kunkamnerume. Atumida, nedi sun tep, ‘Kange di ton cap telep kupra deipkamsene,’ pepra, pedina upu deiki di pepsene. Ukupkamna tep, tamupra sun pumun taru, lyom gel beilya wipra ongopdongomrum mutupu, yana kunkamrume. Nedi sun tep melimsenepa, pio teleppu kunkamrume.

Atep gekepso, ne weika di palupra karenkamsene. Ada, sun kange mun kange doupra, kuramrumnge pununa tep, ue butene deiki di kareramengtopu kupra, karenkamsene. Kange mun kuramrum ngeda, yambul weik kuramu dinin, pio kange derin keca karenkamsenada, men nukmanto, ue butene deiki di kareramengtopu kupra, weika di tapakra karenkamsene.”

13 “Ne Allahdi sun Yehuda yala nesala yuma tep, ne nimi pon jen utopu kupra deipkamsene. Sun Israel nesalada, ne nimi pon mar utopu kupra deipkamsene. Tonda, sun Sion mutu kurum nesalada, ne nimi pon parang ya utopu kupra deipkamsene. Ukupsene pangeda, sun yumadi, sun Yahudi yala gum nesala, Yunani yala nesala kunge mutu porbenkamrume. Menop taru popbisipsei nesalada, sundi popra bisbisa kepkamrume. Ne Allahdi Israel yala nesala cap, Yehuda yala nesala cap, sun yuma tep pepsene.” Allahdi pepu.

Allah Yahwehdi, “Ne mawa nesala Israel neng tep lyemdonkamne,” pepu upu

14 Allah er si Yahwehda, er nyapu sisa, sun Israel nesalada, sun deiki ila dua tengamretopu yana kunkamre. Ukupmantoda, menmena perenglang peramretopu kupkamre. Tonda, mar dopmengepa menmena baramre utopu, Allah er putoda ukupkamre. Er mawa nesala podan neng tep, er mar dokotepredi, menmena poptapkamre. Akeca-keca yuma talepra, Ila Eremna Ngeboda, ila puto weik deiyo ngebo kuredi, ‘Ukunkamne’ teneretopu, kunupsek pen pel dore ngebo Allah, ^{▼▼Allah – Acada, Ibrani upu deiki di, Allah er pe si sisa ‘Yahweh’ cap, tonda, ‘Adonay’ cap pepra sekya cadi, nundi aupu ‘Adonay’ deiyo ngeda, jenek kupra sekmupu. ‘Yahweh’ kael kemna tep, lap pen upu nomor 49 dinkurume.} er si Yahwehdi, bung-bung pena keca, er si terompet di pung peprepa, ila lelim pepkamre.

Atep, ‘Nimi porbenkamep’ tenen, ketenepkamenga tep, peten kemna tep pong pepkamre. Ataruda, ila kumanya puto itara di puprepa, bupatek-bupatek pepra kwereramretopu kupra, er podan nesala tep, yana ponkamre.

15 Ukupkamre taruda, tek sisi akeca-keca yuma deiki tara talepra, ila puto talepra kurur ngebo Allah Yahweh, im deiki kunge malaikat yuma, sun ila deiyo ngebo kurura cadi, er wepra deiamu nesalada, er puto amutara kungepa, er nong di lelimdongonkamre. Adeiki di, sundi sun podan neng yuma popbisipkamenge. Ada, ‘Nimi popkun,’ tenepne taruda, tapu di gel gerekdongopra bomananen, agel puto kupnopda, nimi nong deiki dopra popterepkamenge. Dinino, Allah er mawa nesala cadi, melimrepa, apodan nesala bisbisa kupmengedi, popra gawal dakamenge.

Ukupmantoda, nimidi yu me jepmengepa, kange telepnge yawaraprepa, balila di nimi tali lupra poramengtopu kupkamenge. Ukupmenga deiki di, popmenge neng sun yapida, pio weik embenkamre. Ukupmantoda, Allah karena tep, gam keca popmengedi, Allah si eremna ati pumbon deiami bekin deiki, yapi lingdirameng utopu, yapi weik embenkamre. Tonda, yangdin mau pumbon yapi dikdongopnepa diningamretopu, sun podan nengdi pomenge neng yapida, weika di embenkamre.

16 Allah Yahweh erdi teneramu taru konum kupre pangeda, erdi, ‘Ne mawa’ tenen, wepra deiamu Israel nesala lyepropkamre. Ada tali tep gume. Deiyoda, Israel nesalada, Allah er mawa nesala kununga tepa. Ukupmantoda, domba peina deiyo ngebodi, er domba bisam, ‘Kot saknerur’ tenen, turya gerengdongorameng utopu, Allahdi Israel nesala tep, kalekra melimkamre.

Ukuprepa sun anengda, Allah er kurura damai kunkamenge. Ukupmanto ngeda, ila nimi deiyo neng, sun galurameng keca, gat topi neitamai kunumna weik gel dongopmengepa, melang peramretopu, sun Israel yala nesalada, Allahdi karepkamser mutu neitamaida, pio teleppu kupra kunkamenge.

17 Doryankamre taruda, Allahdi aneng tep, karepkamre mutu neitamaida, nimidi wa pepra kourameng keca, er si gandum, nong weik kuprepa, kipra jeramenga deiki di, sun akaber neng cap, kaber nerapu cap, sun nong telep kupra nenkamenge. Ange utopu, anggur me ukupu purupmengepa, pio teleppu kuprenge, sundi gwepra jenkamenga deiki di, teleppu kunkamenge. Ukupmengopda, anesala sun nong kamo yuma, pio teleppu kupra kunkamenge. Anesala yumada, Allahdi pio moupra taleprepa kunkamenge.