Zep 1 | XteSC | STEP | Allah Yahwehdi, nimi si Zefanya er damai yana, aupu lap pepra deipu. Zefanyada, amenda taru kupkamu keca tep, upu lap pena deiyo ngebo kuramu. Atep, Zefanyada, nabi ngebo kuramu. Zefanyada, er nai bo sisada, nimi si Kusyi kuramu. Erdi Zefanya deiamu. Kusyi er nai boda, Gedalya kuramu. Gedalya er nai boda, Amasia kuramu. Amasia er nai boda, Yudea tara kurami Israel yala nesala taleramu ngebo, Raja Hiskia kuramu. Sun anengdi deipdanen banada, pumun taru di dipdongopra, Zefanya kuramu taru tep, aupu yumada, nukra seku. Raja Yosiada, Yehuda tara kurami Israel yala nesala taleamudi, Raja kepra kuramu taru neitamaida, nabi Zefanya kuramudi, Allah Yahwehdi pediramu upuda, gekepra lap peramu.

Zephaniah 1

Allah Yahwehdi, tuai nesala ban-ban yuma, sun mali kunge keca tep wenepra popkamre taru tep, pepu upu

1 Allah Yahwehdi, nimi si Zefanya er damai yana, aupu lap pepra deipu. Zefanyada, amenda taru kupkamu keca tep, upu lap pena deiyo ngebo kuramu. Atep, Zefanyada, nabi ngebo kuramu. Zefanyada, er nai bo sisada, nimi si Kusyi kuramu. Erdi Zefanya deiamu. Kusyi ^{▼▼Kusyi – Angebo kael kemna tep, Yeremia 36:14 dinkurume. Zefanyada, Allahdi peramu upu dopra, Israel nesala tep lap peramu taruda, Raja Yosiadi, Yehuda tara neitamai kurami Israel nesala taleamudi, Raja kuramu. Tonda, Kush mutuda, ila di embaramu me, Nil me damai deiki tara kwamu. Ukutaruda, amutu yuma tep nengeda, Sudan mutu cap, Etiopia mutu cap penupe.} er nai boda, Gedalya kuramu. Gedalya er nai boda, Amasia kuramu. Amasia er nai boda, Yudea tara kurami Israel yala nesala taleramu ngebo, Raja Hiskia kuramu. Sun anengdi deipdanen banada, pumun taru di dipdongopra, Zefanya kuramu taru tep, aupu yumada, nukra seku. Raja Yosiada, Yehuda tara kurami Israel yala nesala taleamudi, Raja kepra kuramu taru neitamaida, nabi Zefanya kuramudi, Allah Yahwehdi pediramu upuda, gekepra lap peramu.

Allahdi tuai nesala yuma tep, nimi upu bokra deipredi wenepkamrenge tep, pepu upu

2 Allah Yahwehdi nabi Zefanya tep pepu upuda, ake.

“Ne Allah Yahwehdi, tuai mutu neitamai gam kurur keca yala-yala yumada, gum kupra deipkamne, pepsene. 3 Ada, tuai kunge nesala yala-yala yuma cap, tali tuai gam dakunung keca yala-yala yuma cap, tonda ma yala yuma cap, mekina yala yuma cap, ange yumada, gum kupra deipkamne. Tonda, pio yu kange tenepra kungedi, mali-mali kun kecapu talepra kunung nesala yuma tep nengeda, wenepkamna cadi, nedi go karepnepa, yu nengdi anesala yuma, sun damai yana popra gawal dakamenge.

Ukupkamna deiki di, ne Allah Yahwehdi, tuai nesala yumada, popra gum kupra deipkamne. Ukupkamne taruda, tenpu ngebo peda ton tapnepa, men gam kunkamre. Ne Allah Yahwehdi, aupuda konum pepra deipmana cadi, angeda pio tek sisi nong kupkamre ja!

4 Tonda ataruda, ne Allahdi, ila ati arum, Yerusalem mutu neitamai kunung Israel nesala cap, Yehuda tara kunung Israel yala nesala cap yumada, ne pe buru di, ila kange mun keca karepkamna deiki di, Israel yala nesala ton wenepkamsene. Tonda, amutu neitamai tupa kure ila mali keca, sundi Bahal ^{▼▼Bahal sekmepunge deiyoda, yuk Alkitab neitamai Baal sengnunge. Nundi ‘Bahal’ sekmupkada, ‘Baal’ sekmepepa, walwal di, ‘Bal sisa tenepnung’ tenen, nundi ‘Bahal’ sekmupke. Si yuk sekmepu dinino, aisokda tenpua.} isok tep, ‘Nun nai bo,’ pepra, er si eremnung keca tep, ne Allahdi, akeca yuma gum kupra deipkamne.

Tonda, tali Bahal isok si eremna tep, sundi deiyo kepra, imam pel donung nengda, pio mali weik kununga cadi, ne Allahdi sun tep, popra gawal dakamne. Sunda, yuk tali keca si eremnunga cadi, ukupmantoda, nimi konum domi nerapu tapra, yuk tali nerapu tep mun perameng utopu kununge. Ada, ne tapneidi, tali isok tep si eremnunga tep pepne.

5 Ange utopu, ware nesala do yuma, sundi, im neitamai kure kecada, ada keteng cap, ware cap, kuru cap tep, ‘Akecadi melimkamseng’ tenen, akeca si eremnunge. Akeca tep si eremnung nesala yuma peda, wenepra popnedi, gawal dakamne. Anengda, gat keca di ati amnya bo dopra, ban kupra dominge deiki tara di welepra, im neitamai kure keca tep si eremnunge. Aneng peda, popra gawal dakamne.

Tonda, yuk nesala dinin, sundi, ne Allah tep, ‘Naio kan sipu eremnupe,’ pepra, pedina upu di peipnei dinin, tali pertamaya cadi, sundi tali isok, er sida Milkom, isok si cap tapakra eremnunge. Atep, Milkom isok si eremnung nesala yuma peda, popnedi pio gum kupra deipkamne.

6 Tonda, ware neng do yuma, sundi, ‘Uo, nun nai bo Allahdi, ware upu pepkamser do?’ Tonda, ‘Nai kandi nun tep, kalekra melimkamserume,’ tenen, ne damai ton yana, men moronenunge. Tonda, sun anengdi, ‘Uo, nun ware kupkamep do? Telep ngeda, ange do, ange do?’ tenen, ne Allah tep, tupa men asimpetenenung nesala yuma peda, wenepra popra, gawal daknedi, gum kupra deipkamne.

Ada, sun anesala yumada, ne Allah tep, melipra men domyakanengedi, sundi ne konum tapnei. Tonda, ‘Allahdi ware upu pepserepa, angepu talepra domyakankamep do?’ tenen, ne damai yana, ne upu men gekenenunge. Ukununga tep, anesala yuma popnedi pio gum kupra deipkamne.

Allah Yahweh, erdi tuai nesala yuma tep, upu bokeipredi, wenepkamra tep, ila mambul tumi keteneipunge tep, pepu upu

7 Nabi Zefanyadi aupu pepu.

Allah Yahwehda, ^{▼▼Yahweh – Ayat 7 neitamaida, Ibrani upu deiki di, Allah er si butene dukdongopra seki. Tenpu ngeda, ‘Yahweh’ pepra seki. Butene ngeda, ‘Adonay’ pepra seki. Yahweh kael kemna tep nengeda, Keluaran 3.14 dinkurume. Adonay kael kemna tep nengeda, nundi aupu deiyonge tep, konum jenek kupra sekmepu.} akeca-keca yuma taleredi, ila di erepra, ila puto weik deiyo ngebo kurure. Erdi, ‘Tuai mutu kunge nesala yuma tep, sun kunge kecada telep do, mali do?’ tenen, dipetepseredi wenepkamser taru konum damai kupmara cadi, sun tuai mutu nesala yumadi, gekepso!

Ada, Allah Yahweh, er damai yarumudi, upu pena pio gum di, pio dim peprappu kunkamrume. Er Allahdi, tuai nesala yuma upu bokeipkamre tumi konum damai kupmara cadi, erdi teneamudi, konum weamu nesala yuma tep, konum keteneipmare. Ada ukupmantoda, nimidi, ‘Allah tep gispal donkamep’ tenen, sundi tali gam kun keca, domba bisam do, kambing do, popmengedi, uku dongoramengtopu, er Allahdi sun Israel nesala tep, utopu kupkamsere.

Allahdi, ‘Anengda ne mawa nesalapu kununga cadi, ne gispal dona tep, wenepnedi, popra gawal dakamne,’ konum tenepka cadi, angeda, adipapu kupkamsera tep, sunda, Allah er damaipu yarumudi, dim peprappu kunkamrume. Ada, sun mali-mali weik kunung nengda, Allahdi sun tep, wenepredi poptapkamra cadi, konum keteneipmare.

8 Ne Allah Yahwehdi, sun mali kunge nesala weika di wenepra popkamne tumi konum yaryopda, ne Allah Yahwehdi nimi deiyo kepra kunung neng cap, ila nimi deiyo neng cap, Raja-Raja kunung neng, sun nyapu yuma cap, tonda, sun yuk mutu nesaladi kunge keca talepra kungedi, sundi, ‘Amutu nesaladi tali keca si eremkamep’ tenen, yuk mutu nesala kenengnung opkal dopra kenengnung nesala yuma capda, wenepra popkamne.

9 Ada, tali tep gume. Sun anengda, ‘Nunda, yuk mutu nesaladi si eremnung isok taleserepa, gispal donup ngebo, erdi kange telep kupra derinkamser’ tenen, sundi aisok si eremna ati, bisi buplan wekmenge taruda, abisi buplan neitamai ngeda, ‘Men yanipkamep’ tenen, erepra dourbengedi, akati pumbon moupra wengbanunge. Anengdi, yuk neng talenung kecada, puto di dalupra doronunge.

Tonda, mawa di mok upu weik penunge. Yuk neng keca inipra upula dopropmengedi, abung keca bulupra, sun isok si eremna ati damai yana karepmengopda, akatida dekperure. Sunda, mok upu pena cap, upula dorona cap deiki di, mali weik kununga cadi, atep nengeda, ne Allahdi, amali kunge nesala yumada, wenepra popra gawal dakamne ja!

10 Ne Allah Yahwehdi pepsene. Anesala yuma wenepra popkamne tumi konum kuprepa, sun mali kun nesala wenepne pangeda, anesala weika di kange mun kange doupmengedi, ngolokmengedi, lelim weik pepmengopda, yuk neng weika di gekepkamenge. Yerusalem mutu ila ati arum ongopra wiami gel beilya neitamai dinin, “Mekina wengna buplan er sida, Gerbang Ikan, ake,” pepra, potokeipi ila bisi buplan dam tara di, ngolongna lelim penkamenge.

Tonda, Yerusalem mutu neitamai dinin, ukutaru donmange ati arum dam tara di, engena lelim pengepa, yuk neng ton gekepkamenge. Tonda, Yerusalem mutu buma deiki cap, dana-dana tara mutu buma deiki cap damai di, nimi ati dopinge yumada, yu nengdi uruptapmengepa, karuruk pena lelimpu peprepa, yuk tara nimi yumadi gekepkamenge.

11 Alelim perepa gekepkamrum dingeda, sun yuma ngolokra mali pemumdi engepkamrume. Deiyoda, Yerusalem mutu neitamai dinin, utara yambul ban kwamu mutu neitamai, jen keca kunumna tep ati dopra deiamruma neitamaida, nimidi, ‘Uo, ware kupkamep do?’ pepra, mali pengedi, ila di engenkamenge. Engenkamenga deiyoda, sun bung keca talepra kunumna deiyo nesala cap, tonda yuk nengdi bung keca yala-yala yuma kunupmengepa wengre taru, gel uang cap, co bo cap nukmengedi, ‘Bokra keana tep kareamnemempanen, ka di tamupra deipkamkene,’ pertamnung deiyo neng cap, aneng yuma wenepra popnyopda, gum kupkamenge. Ange tep nengeda, sun yuma engerumudi, ngolongna lelim weik penkamrume.

12 Ataruda, ne Allahdi, Yerusalem ati arum dominge neitamai yumada, ‘Ne kapul men wenepra popman nengda, dan cei inipmang do?’ tenen, epetepkamne. Ukupmantoda, ton nengdi, ‘Aneng popkup’ tenen, nimi inipmantoai yuma bena, upna upra doupmengepa, dirin kupya deiki di, epra embanung utopu kupkamne. Ada, Yerusalem mutu neitamai yumada, epra embenkamne.

Tonda, sun Yerusalem mutu kunung isomka nengdi, ne Allah tep, ‘Gume, Allah Yahweh erda, nun damai mali kunupnge pe, telep kunupnge peda, tek sisi ton men diserura cadi, nun mali kunange tep, men wenepkamsere. Nun telep kunange tep, ‘Telepe,’ men pepkamsere. Nundi mali kupmepya peda, erdi, ‘Angeda mali,’ pepra, men wenepkamsere,’ tenenunge. Anengda, sun pedi, sun pe tepapu, ‘Nunda mambul isomka neng kunupa cadi, Allahdi ware kupkamser do? Gume, erda ange-ange yumada, men diserur ngebo, kurura,’ tenenenunga tepa. Atep sun ukupra tenenge nesala yumada, wenepra popnepa, depkamenge.

13 Nedi go karepnepa, yu nengdi, sun salnong-nong kamung nengda, sun talenung bung keca yumada, dalupra doropkamenge. Tonda, sundi telep ati dominge peda, yu nengdi yana uruptapmengedi, sikke buktapkamengepa, kange di ton cap, akati yuma wengmengedi, men kunkamunge. Tonda sundi anggur wa pepra koupmengedi, talepra kunung dinin, ange yuma gum kupra deipnyopda, sun kouami anggur du er nongda, men kipra taikmengedi, anggur me mokon ton pio men jenkamenge. Deiyoda, sun ati pe, sun anggur wa peda, ne Allahdi gum kupra deipkamna tepa.

14 Allah Yahweh erdi, ‘Tuai mutu kunge nesala yuma tep, sun kunge kecada, telep do, mali do?’ tenen, dipetepredi, wenepkamre taru konum damai kupmare. Atumida, tek sisi menmena dipapu yana kupkamsere. Atumida, Allah Yahwehdi, tuai nesala kunge keca yuma tep, dipetepredi, sun yumadi mali keca kuraminge tep wenepra popkamre. Atumida, tek sisi menmena yankamre. Atumida, ila kange mun keca yankamra cadi, pio weika di engenkamrume. Tonda sun balila kepra, mar podana ila kael keamenge neng peda, ‘Uo, warya tep angeda kupmaser do? Ukutaru ware kuptepe do?’ tenen, kange mun kuprepa, sun peda engenkamenge.

15 Tek sisi atumida, Allah Yahweh er ila yu kuprepa, wenemna tumi kepkamsere. Ukupre pangeda, tuai nesala yumadi, kange mun kange doupkamenge. Allah Yahwehdi tuai nesala yuma tep wenepra popkamre tumi yankamra cadi, ila engena tumi cap, ikin keca yankamre tumi cap, kange mun keca kupkamre tumi cap kepkamre. Atumi neitamaida, akeca-keca yuma uruptapra sikke bungtamna tumi kepkamre. Tonda, akeca-keca yuma lokra dourban tumi kepkamre. Atumi neitamaida, mirin dua weik yana keproryopda, tuai mutu yuma kunukamre. Tonda, kunukmeteng pen tumi kepkamre.

16 Atenpu tumi neitamaida, pio yu neng yangedi, ila pung pena keca, er si terompet lelimpu pepmenge dingeda, ila upu deiki di, “Yehuda tara neitamai kunge neng cap, Yerusalem mutu ila ati arum neitamai kunge neng cap, poryankupe,” pepra, pepmengedi, adipapu menmena poryankamenge. Uda, sun mutu dana-dana tara yumada, ‘Nun podan nengdi poryasenung’ tenen, sun kalengna tep, ila lyom gel beilya ongopdongopra wipdongoprumnge pe, abeilya kumunai yuma lyom gel ati doramrumnge akaptua peda, ayu nengdi men tapkamenge. Sunda, nimi mar pona ila kael neng yangedi, ila upu yana pepmengedi, warekra popkamsenge. Allah Yahwehdi pepu.

17 Upepu dingeda, aupu ton dukdongopra pepu.

Nedi sun wenemna tep, ila ikin keca dopra, sun nong deiki deipsene pangeda, adeiki di, mutu ban-ban yuma kunge nesala yumada, kange mun kange doupmengedi, kange teniptonapu kuprepa, asuru puna nengdi, kopdanen, embaramengtopu kupkamenge. Ada, sun pedi, ne Allah Yahweh damai mali pio weik kuramenge keca menenga tep nengeda, nedi wenepra popsenepa, sun apopmenge neng sun yapida, me embaramretopu kupra embenkamre.

Tonda, ne doproipkamne yu nengdi, poptapkameng neng, sun nongda, tali tu deikipu poptapmengepa, sun nongda saka, tu deiki dourbengedi, acapu tali lyupkamre. ‘Sun nongda, tu pumbon men peipkamenge, dakwapye’ tenen, tapkamenge.

18 Allah Yahweh, er ila yu tenerur ngeda, katuai kuprepa, aila kange mun tumi karepre pangeda, sun isomka nengdi talenung kunumna weik keca, emas cap, perak capdi, amutu nesala tep, pio men melipkamre. Sun isomka nengdi, sun talenung kunumna weik keca deiki di, pio men lyepdankamenge.

Deiyoda, Allah erda, ila yu weik kupkamra cadi, uku jeramretopu kupredi, tuai mutu nesala yuma wenepkamra deiki di, tuai mutu yuma cap, tuai nesala yuma capda, sikke bukra tapkamre. Angeda, nimidi men tenepmangedi, sun mankau kange doupmenge tarupu, Allah Yahweh menmena di tuai mutu gam kunung keca yala-yala yuma cap, tuai nesala ban-ban yuma capda, poptapseredi, gawal dakamsere ja! Tenpunge peda, men tapkamre.