Zep 2 | XteSC | STEP | Allah Yahwehdi nabi Zefanya damai yana pepupa, nabi ngebodi pepu upuda ake. Uo, sun amutu neitamai kumum nesala yumada, sun mali kumum keca tep, ali dangna cap, kware tenenange capda, pio men kuserur nesala kurume. Sun yumada, kikiman buluprumudi, aupu gekepra bouna di moupra kael kepkurume!

Zephaniah 2

Allahdi Israel nesala yuma tep, “Sundi mali kumum keca yumada, adipapu taprume,” pepu upu

1 Allah Yahwehdi nabi Zefanya damai yana pepupa, nabi ngebodi pepu upuda ake.

Uo, sun amutu neitamai kumum nesala yumada, sun mali kumum keca tep, ali dangna cap, kware tenenange capda, pio men kuserur nesala kurume. Sun yumada, kikiman buluprumudi, aupu gekepra bouna di moupra kael kepkurume! 2 Ada tali tep men pepsene. Deiyoda, ake. Allah Yahwehdi, nesala ban-ban yuma, sun mali kunge keca tep, wenepra poptapkamre tumi tek sisi yankamra cadi, sun moupra gekepso! Allah er yu kuprepa, ila di wenepkamser tumi, kapul men yanmare taru dipapu, sun mali kumum keca adipapu tapra, Allah er damai tamupra yankurume.

Ange men kupmumnyopda, gandum du taikmengepa, er bam koluamre ngeda, tuai sakrepa, koluprepa, kumanya di pupredi duberamretopu, Allah er yu weik, sun damai yana deipserepa, yuk mutu yu nengdi, sun popra ateng koupmengedi, sun mutu neitamai di yuk karenai dubenkamsenge. Ataruda, Allah er yuda, uku bu jeramra utopu kupra, mali kange doupseredi, ila di wenepra poptapkamsera tep pepne.

3 Uo, sun amutu neitamai kumum nesala kan-kan di, sun dipru amu tara kepra kurum nesalao, sun adipapu Allah Yahweh er damai tamupra yankurume. Tonda Allahdi, ‘Angeda kunkamrume, dinin angeda, pio men kunkamrume,’ peipungepu talepra kurum nesalada, tamupra Allah damai yamumdi, Allah erdi tenerur utopu kupkamrume. Tonda, ‘Ataruda, nun nai Allahdi ware pepkamser do?’ tenen, Allah damai tamupra yamumdi, moupra gekepterepkamrume. Ada, dipru amutara kepra, Allah damai yamumdi, dipru eremdana gum dipapu, dipru bouna dipu kunkamrume.

Tonda, Allahdi, ‘Ukunkamrume, ukunkamrume. Dumsisi kuna ngeda, ake, angepu kunkamrume,’ pepra, lap peiamseu upu gekepra, angepu talepra teleppu kunkamrume. Ukupmum pangeda, Allah Yahweh, er ila yu, ‘Sun Israel nesala deiki deipkamsen,’ tenepu tumida, sun teleppu kumum neng deiki, ‘Bicau tenepsetudi, wenemna keca men deipkamser do? Deipkamser do?’ tenena tepa. Dinino, er kange ja, nun walwale.

Israel nesala dinin, sun mutu neitamai dana-dana kunung yala yuk-yuk nesalada, wipra mali kupdongopkamrenge tep, pepu upu

4 Gaza mutu, ila ati arum dopra kunung nesalada, ila yu di popnyopda, tenpu ngebo peda, ton men lyepdankamenge. Sun yumada, popra gawal daknyopda, amutuda walangyopu kupkamre. Tonda, ange utopu, Askelon mutu ati arum dopra kunungai peda, nesala yuma popnedi, gawal daknyopda, amenda taru ton, nimi amutu pio men kunkamenge. Ati walangyopu kupredi, dim bulung pepkamre. Tonda, Asdod mutu kunung nesalada, sun mar pona tep nengda, mankau kange doupmenge tarupu, beipye peikameng keteng dinin, sun podan nengdi, ipna taru poryangedi, ponmanganen, keteng dukduk konum kupyopda, anesala yuma popra enepronkamenge. Tonda, sun podan neng yangedi, ‘Ekron mutu kurum nesalada, sun kumum mutu neitamai di tapra, bendopso!’ pepmengepa, anesala yuma popra eneprongopda, amutu nesala peda, adipapu bendopkamenge.

5 Uo, sun Filistin yala nesalada bicaue. Sunda, Kereti yala neng kurume. Sunda ila me mokon, er sida Laut Tengah mokon pirman tara kurumu nesalada, sun yuma tep pepsene. Allah Yahwehdi, sun tep Kanaan tara neitamai kurumu nesala tep, wenemna upu peipsere. Ada, Allahdi, ‘Ukupra wenepra popkamne,’ konum tenepka cadi, erdi sun tep mali upu pepra, sun deiki wenemna keca deipseredi, wipdongopkamsere. Uo, sun Kanaan tara kurumu Filistin nesala yumada, bicaue. Allah Yahwehdi sun wenemna tep keca konum ketenepra deipka tep, tek sisi sun nong deiki deipkamsere. Allahdi sun amutu neitamai kurumu nesala yuma popseredi, gum kupra deipkamsere. Atep sun kumumnya neitamai di, tenpu ngebo peda men gam kunkamre. Sun mutu yumada walangyopu kupkamre.

6 Ange utopu, ila laut mokon deipupa, pirman tara kumum Filistin nesala yumada, Allahdi popra gawal dakserepa, sun ati arum dorumyaida, ati yuma sikke buktapmengepa, gum kupre pangeda, mutmutapu papdongopkamsere. Ukupredi, walangyopu kupserepa, sun mutu neitamai, menop taru ati arum kwamu dinin, amenda taruda, domba pein nengdi, sun dodina tenda ati dopra aceipu deipmengepa, sun domba bisamda, amutmutapu jenkamenge. Ukupmengedi, domba bisam beilya peda, amutu neitamaipu wipkamenge. Nimi ton cap amutu neitamai ati dopra men kunkamenge.

7 Yehuda yala nesala yambulanun tupa gam kunkameng nengda, ne Allahdi lyepropnedi, telep kupra deipkamne nengda, sun Filistin nesala menop taru kurami mutu, ila laut mokon pirman damai kwamu mutu yumada, sun Yehuda yala nengdi doropsengedi, sunda amutu neitamaipu yana kunkamenge. Tonda, Yehuda yala neng dipapu, sun Filistin neng taleami mutu neitamaida, mutmuta papkamraida, sun domba bisam peinkamenge. Lukunda keprepa, sun domba bisam peina deiyo neng mana tep nengeda, Askelon nesaladi menop taru domi ati tapkameng ngeda, wekra mankamenge.

Ange yumada tek sisi nong kupkamre deiyoda ake. Ada, Yehuda yala neng yumada, sun nai bo Allah Yahwehdi sun tep, ‘Aneng melipnedi, kange di telep kupra deipkamsene’ tenen, erepra deiprepa, sunda menop taru teleppu kuramitopu, kange di tamupra teleppu kupra deipkamsene.” Allahdi aupu peipupa, nabi Zefanyadi lap pepu.

Allahdi sun Moab tara nesala cap, Amon mutu nesala cap tep, wenepra popkamra tep, pepu upu

8 Allah erda aupu ton pepu. “Moab tara neitamai kurumu nesala cap, Amon mutu kurumu nesala capdi, ne nyapu sisa Israel yala nesala yuma tep, mali-mali upu deiki di nyek-nyek pepra auturami ngeda, ne konum gekeramsidi, tupa gekenune. Tonda, sun Israel yala nesaladi talenung mutu tep, mali upu peramrume. Tonda, sun amutu kurumu nesalada, mok upu deiki di, “Allah er nyapu sundi talepra kunung mutuda, nundi tek sisi dalupra doropkamepe,’ pepra, salnong-nong kamrumdi perumupa, konum gekenune.

9 Ne Allah Yahweh, akeca-keca yuma talepra, deiki tara erepra, ila puto kune ngebodi, im deiki jen talena malaikat yumada, sun deiyo ngebo kunune. ^{▼▼deiyo ngebo – Ayat 9 neitamaida, Allah tep, Ibrani upu deiki di, er si dumbari pepra seki. Tenpu ngeda, ‘Yahweh’ pepra seki. Ada, Allah er pe si, tek sisi ngeda, ‘Yahweh’ kurure (Keluaran 3:14). Butene ngeda, Ibrani upu deiki di, ayat 9 neitamaida, ‘Sebaot’ ton pepra seki. Aupu ‘Sebaot’ pepya deiyoda, ada ‘Im deiki jen talena malaikat yuma taleredi, sun deiyo ngebo kurure’ tenena tep, seki. Weneri ngeda, ‘Adonay’ pepra seki. Atep nengeda, sun kael kemna tep, aupu ‘Sebaot’ cap, ‘Adonay’ capda, deiyongepu katuai di sekmepu. Dumbari ngeda, ‘Elohim’ pepra seki. Angeda sun konum kael keamrume. Ada, ‘Allah’ tenena tep seki.} Nedi tek sisi pepsene. Neda Allah, sun Israel nesala yala-yala yuma talenedi, sun deiyo ngebo kunune. Nedi sun tep melipra kalengsenepa, sundi ne tep si eremnerume. Neda Allah, tek sisi gam pio kunun ngebo, ne si deiki di tek sisi aupu pepsene. Moab mutu kunung nesala cap, Amon mutu kunung nesala capda, nedi popra pio gum kupra deipkamne. Ada menop taru, Sodom mutu nesala wenepsidi, popra gawal daksitopu, sun Moab nesala peda, utopu kupra popra gawal dakamne.

Tonda, menop taru Gomora mutu nesala pio mali weik kuramipa, sun wenemna tep, popra gum kupra deiamsitopu, Amon mutu kunung nesala peda, utopu kupra popra gawal dakamne. Ukupne pangeda, sun mutu neitamai kunge nesala yuma cap, ati cap konum gum kupra deipnyopda, sun mutu yumada walangyopu kupkamre. Amenda taruda, tali garam ua utopu kupkamre. Tonda, bunkon me palipra deiamengai utopu kupkamre. Tonda, bura tara tali paramre takke keca paramretopu kupra kupkamre.

Amutu yumada, dakra tapnepa, pio tep mali mutupu kupkamre. Ukupyopda, ne nyapu sisa, sun Israel nesalada, yambulanun tupa gam akunkameng nesalada, sun Filistin nesala talerami mutu yuma, dalupra dopropmengedi, aca ton dakunkamenge.

10 Moab mutu kunung nesala cap, Amon mutu kunung nesala cap yumada, ukupra wenepkamna deiyoda, ada sun dipru eremdaramya deiki di, salnong-nong kamamidi, ne Allahdi talenun nesala, sun Israel yala nesala yuma tep, nyek-nyek peramidi auturami. Tonda, sundi, “Gume, sun Israel nesala talenung mutu yumada, nun dipapu dalupra dopropkamepe,” pepra, mali upu perami.

Dinino, neda Allah Yahweh, puto weik kunedi, sun im deiki jen talena malaikat yuma talenedi, sun deiyo ngebo kununedi, ‘Israel yala nesalada, ne mawa neng kunkameng’ tenen, konum men di weiamsi. Israel nesalada, ne mawa nesala kununga cadi, sun Filistin nengdi, ne mawa nesala tep, mali upu pepra autununga tep, tek sisi nedi amutu nesala yuma tep wenepra poptapnedi, sikke buktapkamne.

11 Atep nengeda, ne Allah Yahwehdi, sun aFilistin mutu kunge nesala yuma tep, ila yu di wenepnyopda, sunda kwar pio weik kunkamenge. Tuai mutu ban-ban neitamai yuma kunung nesaladi, tali isok tep, ‘Nun nai bo,’ pepra, si eremnung tali keca cap, isok-isok cap yumada, ne Allahdi popra gawal daknedi, sikke buktapkamne. Aisok yumada, pio amutarapu kepra deipnedi, enepropkamne.

Ukupne pangeda, mutu ban-ban yuma kunge nesalada, ila laut pirman dakunung nesala cap, laut mokon neitamai me di dana-dana sekdongopu mutu, dum-dum deiki tara kunge nesala cap yumada, ‘Yahweh erda, tek sisi Allah kurure,’ tenepmengedi, ne damai giso genepdongopmengedi, gutam tu dipdongopra, ne Allah tep gispal donkamnenge. Ada sun yuma, mutu yuk-yuk dakungetopu, sun pe atalepra kunge mutu neitamai dipapu, ali dakmengedi, ne Allah sipu, eremkamnenge.

12 Tonda, sun Sudan mutu neitamai kurum nesalada, ne Allah Yahwehdi, go karepnedi, yuk mutu yu weik podan neng dopra deipne pangeda, sun ayu nengdi parang ya dopra, sun Sudan ^{▼▼Sudan – Amutu sida butene penupe. Ton ngeda, ‘Sudan’ pepnupe. Ton ngeda, ‘Etiopia’ penupe. Dinino, amutuda, tenpupu kurure.} mutu neng weika di poptapkamsenge.

13 Angepu gum dinin, ange yuma konum kupropnyopda, ne Allah ila puto deiki di, go ton karepnepa, nedi deipkamne yu nengdi, dapu tara mutu (arah utara) kunge nesala, ada Asyur mutu kunge nesala peda, sun damai bena popmengedi sikke bukra tapkamenge. Dinino, ange yumada ne ja. Atep, ukupne dingeda, ayu neng deiki di, Niniwe mutu nesala peda, ila ati arum domi dinin, amutu kunge nesala peda, popra gawal daknyopda, sun mutu yuma ati walangyopu kupredi, dimbulung pepkamre. Tonda, sun mutu tu yumada, nimi cap, me cap pio gumai, katuaipu kupkamre. Atep, nimi men kupmanto mutupu kupkamre.

14 Nimida, amutu ton cap men kunkameng dinin, walangyopu kupkamra cadi, bura mutu tali gam kure keca yala-yala yuma cap, tonda, amutu neitamaipu, nimi kununga damai pio men yakanung ma, kout ma cap, pio katuai mutu neitamai kure kout ma cap peda, acapu beipye peingmengedi, aceipu kunkamenge.

Nimi atida, nimi kuna gum, walangyopu kupkamra cadi, menop taru ila ati dominge neitamaida, nimi gum tep, kout ma, er si burung undan cap, bangau capda, aceipu mapkamenge. Tonda, kout madi, jendela bisi bukredi, er upu penkamre. Tonda, sun tami ati damai wengban bisi buplan damaida, ila mirin ma, er sida gagak madi, er upu ila di penkamre. Amutu telep ati domi taruda, urasin pio telep co, kunumna weik co, er si cemara codi, sun ati ason cap, dela cap domi dinin, aco tu deiki saka dourberyopda, aceipu lyupkamre.

15 Menop taru Niniwe mutu neitamaida, nimi weik bulupidi, ila ati arum dopra kuramidi, salnong-nong kange doupra kurami. Sundi upedarami, “Gume, nunda pio telep dipapu kunupe. Nunda, pio dim pepra kunupe. Yuk mutu neng yumada, men poryakankamsenga cadi, nunda amutu yuk kunupe. Nunda pio weik ati arum dopmupunge utopunge ton, yuk mutu nesala yumada, akati arum utopunge ton men doptenge. Ton yuk mutu nesaladi men poryasetenge,” pepra pedarami.

Upedarami dinino, amutu pio telep ati weik akwamu ngeda, ukutaruda dan cei kurur do? Niniwe mutu ila ati arum domi ngeda, ukutaru konum gum kupu. Tali bura tara gam kuramre keca yala-yala yuma, kware tenena gum dipapu, tali lupra amutu bulupra wekmengedi, beipye peingnunge. Ware nesala do yuma, amutu damai bisi embankameng nengda, awalang yopu kupu mutu epmengedi, ‘Uo, uo, amutu kurami nesalada, ware keca deiyo tep, Allahdi anesala yuma popra gawal daku do?’ tenen, kwar dangkamenge.

Allahdi aupu yuma pepu.