Zep 3 | XteSC | STEP | Uo, Yerusalem ila ati arum domi mutu neitamai kunge nesalada, balilapu kungedi, sun nai bo Allah Yahweh tep, ‘Erda mambule gume,’ tenepidi, Allah tep tamnapu kurami utopu, tupa ukununge. Tonda, Allahdi perur upuda, pio men gekenunge. Tonda, sundi pio mali kun keca talepra kununga deiki di, mali kupra deridanunga cadi, Allah damai ton men yatenge. Angepu gum dinin, sun Yerusalem mutu kunge nesaladi, Allah tep, teka tupa men tenenunge. Tonda, ‘Allahdi ware upu pepkuser do?’ tenen, er damai yana, moupra men gekenunge. Sun Yerusalem mutuku nimi deiyo kepra kunge nengdi, sun pe mutu nesala tep, ikin keca derinunge.

Zephaniah 3

Allahdi, Yerusalem mutu nesala tep wenepkamre dinin, amenda taru tamupra anesala kange di ton cap telep kweipkamra tep, pepu upu

1 Uo, Yerusalem ila ati arum domi mutu neitamai kunge nesalada, balilapu kungedi, sun nai bo Allah Yahweh tep, ‘Erda mambule gume,’ tenepidi, Allah tep tamnapu kurami utopu, tupa ukununge. Tonda, Allahdi perur upuda, pio men gekenunge. Tonda, sundi pio mali kun keca talepra kununga deiki di, mali kupra deridanunga cadi, Allah damai ton men yatenge. Angepu gum dinin, sun Yerusalem mutu kunge nesaladi, Allah tep, teka tupa men tenenunge. Tonda, ‘Allahdi ware upu pepkuser do?’ tenen, er damai yana, moupra men gekenunge. Sun Yerusalem mutuku nimi deiyo kepra kunge nengdi, sun pe mutu nesala tep, ikin keca derinunge.

2 Aila ati arum dominge kunung nesala yumada, Allahdi do, nimi di do, ‘Angeda kuna telepe, angeda pio men kunkamrume,’ pepra, wenemna upu peptenga peda, amutu nesaladi, aupu pio men gekenunge. Angetopu, Allahdi, ‘Angeda mali kunmaruma cadi, angeda pio tapkurume,’ petua peda, balila kupmengedi, ‘Dakwapye’ tenen, pio men gekepmengedi, men kael kepmanto kununge. Tonda, amutu neitamai kunge nesalada, sun kange yumada dopra, Allah er deiki pio men derinunge. Tonda, sundi, ‘Allah Yahweh dipapu, melipra lyepropkamsere’ tenen, teka men tenenunga cadi, er tep men moronunge. Tonda, sundi, ‘Nundi si eremnup ngebo Allah, er damai ton tamupra yankamepe,’ pio men tenenunge.

3 Amutu neitamai ila ati arum talepra kunung nimi deiyo nengda, yu singa pusdi ila upu weika di peramredi, yuk gam keca popra jeramretopu, sun adeiyo neng pedi ila upu pepmengedi, ‘Nunda ware keca ton upula doproptepe do?’ tenen, mali weik kununge. Tonda, amutu nesala, mali kupdangepa, amutu deiyo nengdi, ‘Sun mali kupdanmange keca tep, upu bokeipkamepe’ tenen, bulupmengedi, upu bongdina tep deiyo nengda, ukupmanto kununge.

Ada, bura tara yu kuramre kam, jena weik putapredi, akwapmare keca popra jepredi, gawal dangamretopu, kununge. Tonda, ayu kam ukupredi, ‘Ajena yoda, tenpu ton mawa deipmanyanen, ipna taru ton tamupra yanedi jepkamne,’ pio men teneramretopu, amutu upu bongdina deiyo neng peda, adipapu yuk nengdi talenge keca, dalupra doronunge.

4 Ange utopu, Yerusalem mutu neitamai kunung nabi-nabi neng pel donung ngeda, tek sisinge ton men kununga cadi, ‘Aupuda tek sisi Allahdi peseretopu, angepu penkamepe’ tenen, men tenepra kununge. Sun pe kange dipapu tenenge keca, tali pertamnunge. Atep, sundi penge upuda, yuk nesaladi tek sisi teka men teneptenge. Tonda, Allahdi, ‘Angeda ne mawa keca’ tenen, er pe tep ketenepra deipu ngeda, sun imam pel dona deiyo nengdi, akeca tep mali kupra derinunge.

Ada, ‘Akeca dopropmepedi, tali lupra doptepe,’ tenepmengedi, amambul lengna telep keca tep, mali kupra derinunge. Ukupmengopda, Allah er si eremna tep pel, akeca dopra men pel doptenge. Tonda, amali kunge imam neng, sun pe putanange tepapu kungedi, Allahdi, ‘Angeda kunkamrume, angeda pio men kunkamrume,’ pepra deiamseu upu yumada, yaniptapmengedi, tamupra sun pe tenepmenge ngepu kununge.

5 Yerusalem mutu nimi deiyo nengdi, tupa mali kunung dinino, Allah Yahweh erda, aila ati arum dopra kunung mutu neitamaipu tupa akurure. Allah er dipapu tupa-tupa telep kupra, pio dumsisipu kurure. Erdi, mali kudinange ton pio tenpunge peda men kurure. Tek sisi tumi-tumi yumada, ipna taru pe, sintara taru peda, Allahdi dumsisi kunangepu pel dorur dinino, amutu tep nimi deiyo kepra talenung nengda, dumsisi kuna ngeda, pio men kael kemnung neng cadi, sunda, ‘Uo, mali kupmape’ tenen, ali dangna gum dipapu, tupa mali-malipu kununge.

6 Neda, Allah Yahwehdi pepsene. Nedi ware yala nesala yuma do, nedi sun mali kun kecapu talenung yala nesala ton, upu konum seksidi, anesala konum gum kupra deiamsi. Sun ayala, amutu neitamai kurami nesaladi, ila ati arum dopra kurami mutu, ange yuma nedi dakra, sikke bungtapsipa, walangyopu kupu. Ukupsipa, sun akati arum neitamai pala bisi yapra deiami ngeda, pumun taru nimi weik embarami dinin, nedi abisi yuma dakra, sikke bungtapsipa, ukutaruda, tenpu ngebo peda, abisi men embarure. Dim bulung pepnapu kurure.

Tonda, sun amutu ati arum dopra kuramyaida, ‘Yuk mutu yu nengdi poryasenung’ tenen, kalengna tep lyom gel di domi ati cap, gat gel di lyom beilya wipdongominge cap yumada, nedi konum dakra tapsipa, ukutaruda orbopu kupredi, walangyopu kurure. Tonda, amutu neitamaida, nimi tenpu peda amutu neitamai men kununga cadi, amutu neitamai yaiyami bisida, men embanunga cadi, dimbulung pepnapu kupu.

7 Ataruda, nedi ukupra tenepsi. Ada, ‘Gume, ne nyapu sisada, sundi, ne tepapu, ‘Uo nun nai Allah tep, mambul weik ngebo kurure’ tenen, kware kuprepa, ne tep gispal donkamnenge,’ tenepsi. Tonda, nedi sun mali kunange tep, ‘Angeda tapkurume. Telep kuna ngeda ake,’ pepra, sun amutu neng wenepne pangeda, adeiki di, ‘Sundi ne penun upu moupra gekenkamnenge,’ tenepsi. ‘Tonda, ne penun upu yuma gekepmengopda, ne tep kwar dangkamenge,’ tenepsi.

Angetopu, nedi sun wenemna tep, karepkamne ngeda, tenepmengedi, ‘Uo, gume. Ada, nun mali kupmapa tep, wenepmasere, tenen, kael kemkamenge,’ tenepsi. Ukupra tenemsi dinino, ukutaru mali kuna deiyo kecada, pio katuai kupre. Sun Yerusalem mutu kunge nesalada, men taruda yambul malipu kurami dinin, ataruda, pio ila mali kun keca talepra, tali lupra pio malingepu weika di tapakra kununge.

8 Ange tep nengeda, sun amutu kurum nesalada, nedi sun damai yana kupkamsen tumi tepapu, moupra dinapu kunkamrume! Deiyoda, nedi sun mali weik kurum keca tep, katuai di lap pena ngebo kunkamsena cadi, sundi, ‘Uo, Allahda, dan taru di nun mali kunup keca tep, yana katuai di lap pepseredi, wenepkamser do?’ tenen, moupra dinapu kunkamrume. Angeda, tali tep men pepsene.

Deiyoda ake. Ada, nedi tuai nesala ban-ban yuma kungedi, nesala yala-yala yumada, sun mali kun keca tep, ila yu di wenepkamsene. Ukupkamna cadi, nimi deiyo kepra talenung mutu yuma cap, ila yala nesala cap, nedi konum bulupra deipne dingeda, sun tep wenepkamsene. Tonda, sun mali kun keca tep, ne ila yu tenenun ngeda, ila uku bu jeramretopu kunerur cadi, ange yumada, sun deiki deipsenepa, mutu ban-ban yuma kunung nesalada, uku di jepra, gawal dangamretopu, wenepsenedi, popra sikke buktapkamsena tepa.

9 Dinino, ange yuma wenemna keca konum karepnyopda, nedi sun tuai mutu neitamai kunung nesala yuma tep, kange tamupra deipnepa, sundi ne Allah tepapu moronkamnenge. Tonda, sundi mali penung upu yumada, gum kupra deipkamne. Ukupnyopda, nimi ban-ban yuma tep, tek sisi upu, telep upu penangepu, sun dipru kange neitamai deipnyopda, telep upupu penkamenge.

Ukupkamna deiyoda, sun tenpu kange deiki dipapu, ne Allah Yahweh tep, ne sipu eremkamnenunga tep, ukunkamne. Sun yumadi, ne tep, ‘Uo Allah kan dipapu melipra lyepropkamserume,’ pepra moronkamnenge. Tonda, sun tenpu kange dipru deiki di, ‘Gume, nun nai bo Allah tepapu, er pelpu donkamnupe,’ pepra kunkamenge. Yuk tali isok tep ton men si eremkamenge. Ange gum dinin, nimi ban-ban yumadi, nedi pepne upupu, moupra talepmengedi, ne sipu eremkamenge.

10 Tonda, pumun taru, yu nengdi ne nyapu Israel yala nesala damai yana, popidi, tupa gam kurami nesala yuma, ateng koupra dubenamidi, pio karenai Sudan mutu dinin, ortamna mutu neitamai, dabena tupa gam kunung nesala yumada, ne damai tamupra yakankamenge. Anesala tamupra yangedi, sundi ne si eremna cap, ne karena cap tep, telep karen keca doupra, kareryakankamnenge.

11 Ataru neitamaida, uo, ne nyapu sisa yumadi, ange konum kupkamrum taruda, men taru sundi, ne damai mali kuramnerumnge tep, ali men dangkamrume. Deiyoda, akeca tep nengeda, tupa men wenemkamsena tepa. Tonda, sun dipru erepra, pio salnong-nong kamamrum taru, nedi peiamsisi upu yaniptapra, ne tep tamamnerumdi, mali kun kecapu kuramrumnge tep, ali men dangkamrume.

Deiyoda ake. Ada, sun kunkamruma damai di, sun dipru erepdangedi, pio salnong-nong kamnung nesala yumada, sun neitamai di konum enepronkamne. Ukupnyopda, sun tupa acapu kunkamrum nesalada, ne pio telep lengna mutu dup deiki kunkamrumada, dipru erepra salnong-nong kupra, gemepra men kunkamrume. Atep, ne damaida, mali kun kecada, ton cap pio men kunkamruma tepa.

12 Telep kun kecapu kunkamruma deiyoda ake. Ada, nedi alengna mutu orbena kunkameng nesalada, ne Allahdi, sunda tenpu kange kepra deipnepa, dipru amutara kepra, Yerusalem mutu neitamaipu bena, teleppu kunkamenge. Amutu neitamai bena kunkameng taruda, sun anesala yumadi, ‘Uo, nun nai bo Allah Yahweh, er tepapu, melipra lyepkamser ja. Er si deiki dipu teleppu kunkamepe,’ tenenkamnenge. Sun ange utopu nesala, sunpu ormutu bena kunkamenge.

13 Tuai nesala ban-ban yuma neitamai, mali kun kecapu talepra kunge neng tep, ila yu di, wenepra popra gawal dangkamne dinino, sun tupa gam kupkamrum nesala, tupa yambulanun akunkameng Israel yala nesalada, ton cap tamupra, mali kun keca men kunkamrume. Ware neng damai do, sun anesaladi, ton cap mok upu pena gum dipapu, mali men kunkamenge. Tonda, sundi tali upu pena cap, kip upu pertamna cap, mawa di pena capda, sundi pio men penkamenge.

Sun atelep kunkameng Israel nengda, yuk nesala cap kange deipra kikiman telep dipapu dim pepra kunkamenge. Ataru di dipra dorkunkamre taru yumada, sunda yuk nesala tep ton, kwar pio men kunkamre.

Amenda dortaru Yerusalem mutu kunkameng neng, kange lon mut pepkamenge tep, pepu upu

14 Uo, sun Israel yala nesala dinin, Yerusalem mutu kunkamrum nesala yumada, sun kange yuma deipdamumdi, ila upu deiki di, kange lon mut penkamrume! Ada, sun ila ati arum Sion ^{▼▼Yerusalem – Ibrani upu neitamaida, ‘Sion mutu’ pepra seki dinin, asekinge deiyoda, tek sisi Yerusalem mutu tep seki. Sion perami ngeda, ada pumun taru amutu si tep perami dinin, ukutaruda, amutu tenpu tep, Yerusalem mutu penunge. Allah upu neitamaida, amutu si tep, asi butene penung dinino, amutuda, tenpa.} mutu, neitamai kurum nesalao, pingping kange deiprumudi, kange lon mut penkamrume. Ada, meteka di gume. Sun Yerusalem mutu nesalada, Allah, er nyapu sisa kuruma tep nengeda, sun kange dipru yuma ne deiki deiprumudi, ila upu deiki di, kange lon mut penkamrume!

15 Angeda, tali tep gum dinino, deiyoda ake. Ada, Allah Yahwehdi, sun mali kun keca yuma tep, sun wenemna keca cap, sun mali kunange tep, menenga keca karena capda, ton cap men karenkamsere. Ange gum dinin, Allahdi kaukemnapu kunkamsera tepa. Tonda, Allah erdi sun tep, yu tenepra posenung nesala yuma tep nengeda, ‘Gume, sun yapso! Israel yala nesala ton men porbenkamrume,’ pepra, sun pona tep nengda enepronkamra tepa. Ukutaruda, sun ila deiyo ngebo, Allah Yahwehda, sun Israel yala nesala yuma tep, pio kalekra talenkamsere.

Ada Allah cap, sun kunmarumai neitamaida, pio kikimanpu kunkamrume. Atep nengeda, Allah Yahweh dipapu, sun tep pio kalengkamsere. Sun tep, ila deiyo ngebo kupredi, sun Raja kunkamsere. Atep ataru di dipra, dorkunkamre taru yumada, sun kwar kuna keca ton men kunkamsere. Tonda, ‘Uo, ware kange mun keca nun damai yarepa, ikin weik kunkamser do?’ tenen, kware pio men kunkamsere.

16 Ne tenepsi taru konum kupyopda, sun dana-dana tara nesala yumadi, sun tep upenkamsenge. “Uo, sun Yerusalem ila ati arum neitamai kurum nesalao, sun kange yumada, bongtokserepa, kwar pio men kunkamrume. Tonda, sun Sion mutu neitamai kurum nesalada, sun buruda, puto bounpu men kunkamrume. Ne Allah dipapu sun tep, melipra kalengkamsene,” pepsene.

17 Deiyoda, sun nai bo, Allah Yahwehdi, ila puto weik ngebo kunedi, sun kankan neitamai di pio kalekra melimkamsene. Sun podan neng cap, ikin keca yana kange mun kuserur keca yuma capda, ne dipapu popra gawal dangkamne. Sun dopra deiki tara erepra, kange di teleppu kweipkamsere. Tonda, sun Israel yala nesalada, ne amutara kurumupa, ne Allah disenedi sun tep, kange deipsenedi, ne kange pininga deiki di, telep kupra deipkamsene.

Tonda, ne Allahdi sun yuma tep, kange derisenuna cadi, sun ukutaru ikin kuserur keca cap, menop taru gum kupseu keca capda, ne Allahdi sun tep, kange di tamupra telep kupra deipsenedi, ukupu gam kunangepu karenkamsene. Sun Israel nesalada, neda Allah ne nyapu sisa kuruma cadi, sun tep tenepnedi, telep kange deipsenyopda, ila upu deiki di kange pingping mut ton penkamne. Allahdi pepu.

18 Ange tep nengeda, ne Allahdi kange deipsenedi, sun kange mun keca cap, yu nengdi popra sikke bukra tamamseinge cap, gum kupseunge cap yumada, aikin kusere keca yuma yakaramseu ngeda, nedi gum kupra deipkamsene. Ukupmantoda, ila kailya kalepra jenmangedi, kange deipmengedi, pio kange lon mut peramengtopu, nedi sun tep lyepropsenedi, telep kupra deipsene pangeda, sun yumadi kange deipkamrume.

Deiyoda ake. Ada, menop taru ikin keca weik, sun deiki kwamu taruda, yuk mutu nesaladi, sun tep mali pepra auturamsei dinino, angeda tupa men kunkamenge. Ne dipapu ange yuma kilipropsenedi, kange di tamupra pio teleppu kweipkamsene.

19 Tonda, moupra dinkamrume! Doryankamre taruda, yu nengdi, sun Israel yala nesala tep, ikin keca sun nong deiki deriramsei neng cap, ikin pel dimamsei neng cap, sun tep poryakaramsei neng capda, ne dipapu amali neng tep popra gum kupra deipnedi, sikke bukra tapkamne. Tonda, ukupmanto upu deiki di pepkusene. Ada, domba bisam peina deiyo nengdi, yan yo copmare domba bisamda, bisi men benmanto kuprepa, adeiyo ngebodi adomba bisam iripra dubaramretopu, kupkamsene.

Ada, sun Israel nesala peda, nong puto boun kupsere tarada, sundi, ‘Uo, ware kuptepe do, ware kupra betepe do?’ tenen, walwal pepdanen barumu nesala yuma peda, ne Allah dipapu lyepropsenedi, telep kupra deipkamsene.

Tonda, yuk karen mutu nengdi, sun tep, popra bisbisa kapsengdi, sun mutu dubenkamsengopda, nedi sun tep loptapnedi, dopra kange di tamupra sun pe mutu duyankamsene. Tonda, mali nengdi sun mutu neitamai di enepropsengopda, nedi sun damai yana kaleksenedi, sun bulupra, sun pe mutupu tamupra duyana deipsenedi, telep kudinkamsene.

Ukupkamna deiki di, sun Israel nesala tep, mali upu pepra, nalepra auturamseipa, ali weik kudiramsei ngeda, gum kupra deipkamne. Nedi sun tep, tamupra telep kweipsene pangeda, yuk mutu neng yuma epsengedi, ‘Uo, ukutaruda, sun Israel nesalada, pio teleppu kununge,’ tenepsengedi, sun tep gispal donkamsenge.

Tonda, sun yuk-yuk mutu dakunge nengdi, sun Israel nesala tep, ‘Uo, sun anesala yumada, tek sisi ila mambul neng kununge,’ pepra, kange pio deipsengedi, gispal donkamsenge. Sun tep pio telep upu penge pangeda, tuai mutu ban-ban yuma kunge nesaladi, aupu gekepmengedi, anggun si kael kepkamsenge.

20 Ange-ange yuma kupnedi, sun Israel yala nesala yuma kange di tamupra telep kudinkamsen taruda, sun yuk-yuk mutu neitamai tali dakunkamrum nesala yumada, kalekra doupnedi, bulupra sun pe mutu sisapu tamupra duyakankamsene. Ange konum kupnyopda, adeiki di, tuai nesala ban-ban yumadi, sun Israel yala nesala tep epsengedi, ‘Uo, sun Israel yala nesala yumada, tek sisi ila mambul neng kununge. Sunda pio telepe,’ pepra, sun si eremna tepapu, kange pio deipsengedi, gispal donkamsenge.

Ukupmenge pangeda, tuai nesala yumadi, gekepmengedi, sun Israel yala nesala si kael kepkamenge. Nedi sun tep, melipsenedi, menop taru sun taleamrum keca gum kupunge yumada, tamupra pio telep kupra deipnedi, sun tep karepsene pangeda, sun pe asuru di dinkamrume. Neda, sun nai bo Allah Yahweh, ila puto weik ngebodi pepsena tep, ange yumada, tek sisi nong kupkamre ja! pepsene.

Ne Allah Yahwehdi konum pepra deipsene. Allahdi pepu.