Exo 32:1-19 | XteSC | STEP | Ataruda, Israel nesaladi Musa tep, ‘Dan taru yankamre do?’ tenen, pio diramipane, er Sinai mutu deikipu pio sika di dakuramu. Ukuramudi, sun damai menmena tamupra men yaua tep, sundi Harun damai bulupra yaidi upepi. “Musada, Sinai mutu deiki di tamupra nun damai men yaua tep, ware kupkup do? Kandi yuk Allah utopu keca ton ketekepmempa, erdi nun dinaipu embaserepa dipedi, akeca sipu eremkamepe. Akecada, nun deiyo ngebo kuseredi, er mepra barepa, nunda amenda embankamepe. Nun deiyo ngebo kunkamsere. Ada, Musa Mesir mutu di doupra yaseu ngebo, erda tali ngebo pua. Erda Sinai mutu deiki di konum dimpepka tep, ‘Nun damai tamupra yankamre do, gum do?’ tenen, nun walwale. Atep, Musa er yo pununa tep, yuk allah utopu keca ton, kandi ketenepra deipsetumpa, akeca di, ‘Ukuprume,’ penkamsere. Ada, ‘Musa konum depu do, gam kurur do?’ tenen, nun walwale tepa,” pepi.

Exodus 32:1-19

Gat keca er si emas di, sapi bisam mi urasin utopu kupra ketekepra deipidi, si eremami upu

1 Ataruda, Israel nesaladi Musa tep, ‘Dan taru yankamre do?’ tenen, pio diramipane, er Sinai mutu deikipu pio sika di dakuramu. Ukuramudi, sun damai menmena tamupra men yaua tep, sundi Harun damai bulupra yaidi upepi. “Musada, Sinai mutu deiki di tamupra nun damai men yaua tep, ware kupkup do? Kandi yuk Allah utopu keca ton ketekepmempa, erdi nun dinaipu embaserepa dipedi, akeca sipu eremkamepe.

Akecada, nun deiyo ngebo kuseredi, er mepra barepa, nunda amenda embankamepe. Nun deiyo ngebo kunkamsere. Ada, Musa Mesir mutu di doupra yaseu ngebo, erda tali ngebo pua. Erda Sinai mutu deiki di konum dimpepka tep, ‘Nun damai tamupra yankamre do, gum do?’ tenen, nun walwale. Atep, Musa er yo pununa tep, yuk allah utopu keca ton, kandi ketenepra deipsetumpa, akeca di, ‘Ukuprume,’ penkamsere. Ada, ‘Musa konum depu do, gam kurur do?’ tenen, nun walwale tepa,” pepi.

2 Upepipa, Harundi tamupra pepu. “Sundi upepra moropneruma tep nengeda, sun nerapu cap, nyapu cap, sun ner nyapu cap, sundi garangmenge urasin telep gat keca, er si emas, sun amol deiya potokra dongorumunge yumada, bulupra ne damai duyankamarume,” pepu. 3 Upepka tep, sun Israel nesala yuma gekepidi, sundi urasin telep keca amol dongorami emasnge yuma bupra buluprapidi, Harun er damai duyai.

4 Akeca yuma bulupra, Harun damai duyaipa, doropu dingeda, Harundi akunumna weik keca, emas yuma uku dongopupa, boun kupu pangeda, agat keca emas doprapudi, petuprapudi erdi sapi bisam urasin utopu kupra, gambar patung utopu keca deipu. Ukupu pangeda, Israel nesaladi pepi, “Asapi bisam mi, er urasin utopu kecada, nun nai bo Allah utopu kunkamsere. Ada Mesir mutu di doupra yanamseu ngebo, Allah gume. Ada, yuk ngebo gum dinin, ukutaru Harundi, emas doupra petupra keteneipseu sapi bisamda, erda nun lyepseu ngebo adano. Akecada, nun nai bo, Allah utopu kunkamsere,” pepi.

5 Apenmainge gekepu dingeda, Harundi akeca urasin tara damai, gel pala doprapudi, pala gel taplakra yakeipudi betapra deipu. Ada, ‘Gam keca popra, agel deiki deipmepedi, asapi bisam mi utopu keca, er si erepkamep’ tenen, gel pala taplakra deipu. Gel taplakra betaipu dingeda, upepu. “Uda ketenepso. Ambutumida, nun nai Allah Yahweh, er si tep erepkamapa cadi, ila kailya kalepra jenkamepe,” pepu.

6 Upepka tep nengeda, mapmaiya berekupa, pio ipna sisa di, sapi bisam popra duyai dingeda, ‘Allahdi nun mali keca kaukepseredi, gum kupra deipkamser’ tenen, ‘Er kange telep kemdina tep, karepkup’ tenen, apopmai bisam dopra, gel pala yakeiamyai deipra, uku dongonmai. Tonda, ‘Allah cap, nun cap, yuk neng cap, telep kupra kikiman kunkamepe’ tenen, gam keca yuknge ton, weika di popra karepi. Dinino, uku men dongopi. Akeca yumada, Allah tep, karepi. Konum karepmai taruda, jen keca cap, kange yawaramne me cap, jenmaidi, tali upula nyangdana cap, yuk mali kun keca yala-yala weik kunmai.

7 Ukunmaipa, Allah Yahweh epudi Musa tep, pepu. “Kan Mesir mutu di duyanamum nesalada, sun pio mali-mali konum kupmenga deiki di, mali kudidanmanga tep, kanda menmena amutu dup di, sun kunmangai kwerepo,” pepu. 8 “Nedi, ‘Angeda ukunkamrume, angeda men kunkamrume,’ pepra peramsi upuda, sundi bisiptapra, yuk bisi konum banmanga cadi, ne pemsitopu men kupmenge. Sun pedipapu sapi mi utopu keca, emas di ketenepra deiap, akeca si eremangdi, akeca gispal dona tep, gam keca popra karenmange.” Allahdi pepu. 9 Upepudi, aupu ton pepu. “Ne kaile anesalada, sun kika pio weike kununge. Ne upu yanipra, ila balila nesala kununge. Tonda, ne upu men gekenenunge,” Allah Yahwehdi pepu.

10 “Ange tep nengeda, kanda ne damai di tapra, yuk karenai berume. Amali kunmang nesala tep, ne yu weik kupnere. Atep, ‘Anesala yuma popra gawal dakune,’ tenenmane. Amali nesala yumada, popra gawal dakaman dinin, Musa kan tep nengeda, kandi nyapu deipmempa, dadeipdanen, baramenganen, kunkameng nesalada, men nukmanto kunkamenge. Nedi kan tep telep kweipkenepa, teleppu kunkamrume,” Allahdi Musa tep pepu.

11 Aupu pepupa, Musadi, Allah Yahweh tep, ‘Erdi tenepmar kangeda, boun kuptudi taptue’ tenen, Musadi Allah tep moropu. “Uo ne nai Yahweh, kan yu weik kupkerepa, ‘Israel nesala wenepra popkamne,’ tenepmarem ngeda, ware keca deiyo tep do? ‘Tulum tenepmarem ngeda tapkamrem do?’ tenen, moropkene. Anesala yumada, Mesir mutu neitamai kuramipane, kan buru puto deiki di duyanamsemume. Tonda, nimi men kupmanto keca, puto weik keca kuramuma deiki dalupra duyanamum nesala tep, ‘Kan yu, sun anesala nong deiki men deipkamrem’ tenen, moropkene,” Musadi Allah tep pepu.

12 Upepudi, aupu ton dukdongopra pepu. Ne nai Allah, kandi anesala wenepra popmem pangeda, Mesir mutu neng gekepmengedi upenkamsenge. “Uo, Allahdi Israel nesala tep, nun mutu neitamai di lyeprapudi, doupra dubenamu dinin, ukutaruda, yu tenepudi, ‘Anesala yumada, ila mutu neitamai di popra tapnedi, gawal daknyopda, tuai mutu ban-ban yuma neitamai, sun pio gum kupkamenge,’ tenenmare,” pepra penkamsenge. Ange tenepra pepsetengopda, pio mali naio. Atep naio, kan yu kupmakerpa, ‘Anesala popkaman,’ tenepmarem ngeda, pio tapkurume. Teka ne nai Allah Yahweh, ‘Kandi wepra deiamsemum Israel nesala yumada, popra men gawal dakamserem’ tenen, moropkene. Musadi Allah tep upepra moropu.

13 Musadi upepu dingeda, aupu ton dukdongopra Allah tep pepu.

Naio, kan nyapu Abraham cap, Isak cap, Yakub cap tep, ‘Ukunkamsene,’ pepra, pedina upu deiki di pediramum ngeda, kange di ton cap tenepkurume. Kan pe si deiki di uperamume. “Sunda, ‘Ne mawa nesala pio kunkamrum’ tenen, nedi sun tep weamsisi. Sundi deipmumpa dadeipdanen, benkameng nesala yumada, pio weik karenkamsene. Akarenkamsen nesala yumada, men nukmanto denge pio weik, kuru im deiki ingamretopu, kupbankamenge. Tonda, ‘Nedi ukupu mutu karepkamsene,’ pediramsemumtopu, ‘Amutu neitamai talepra kunkamenge,’ peiamsemum ngeda, lumdongona gume naio.” Musadi Allah tep pepu.

14 Musadi Allah Yahweh tep, aupu pepka tep nengeda, Allah Yahwehdi, ‘Jo, amali keca kunmang nesala yuma wenepnedi, poptapra gawal dakamane,’ tenepmanuada, tapkune. ‘Anesala men popkune,’ tenepu. Utenepudi, Allah er yu kupmaunge yumada, anesala sun nong deiki ikin keca men deipu. Ukupudi, Allah er yu tenepmau ngeda, tapudi kange di ton cap telep kange doupu.

15 Ataruda, Musa Sinai mutu deiki di tamupra, sun Israel nesala kuramyai kwereryakankou taruda, gel pala butene doupra kwerepu. Adoupmau gel pala butene deikida, Allahdi, ‘Angeda ukunkamrume, angeda men kunkamrume,’ pepra deriramu mem upuda, Allah er pe buru deiki di sekeiamu upu, Musadi doupmau. Agel pala butene dana-dana tara yuma seknapu kwamu ngeda, Musa tep karepupa, dopra kwerepu. 16 Agel pala butene nongda, Allahdi ketekepu. Tonda, agel deiki upu sekeipu ngeda, Allah er pedi peamu upu, er pe buru di agel pala deikida, Allah er pedi peramu upu sekeipu.

17 Musa cap, Yosua cap, amutu deiki di kwereryakanmarei taruda, Israel nesaladi tupa mali-mali kunmaidi, upu ila di penmaipa, Yosuadi gekenmau. Gekepu dingeda, Musa tep pepu. “Uo, alelim penmangpa gekepmanada, nimidi podanmange taru lelim peramengtopu penmanga cadi, Israel nesala kunmangaida, podanmangpa gekepne,” pepu. 18 Upepu dinin, Musadi tamupra pepu. “Gume alelim penmangpa gekenmanemada, yu nengdi nimi popra bisbisa kapmengedi, sun kange telep mut perameng utopu gume. Tonda, popbisip dongopmenge tara nengdi, ngolongameng utopu men penmange. Ange gum dinin, sunda kange deipra tali kange lon mut penmange,” Musadi pepu.

19 Upepudi, Yosua cap, Musa cap kwerepreidi, ortara banmarei taruda, Musadi opkal bol di keana dodin ati damai beudi dinmaupa, sapi bisam nong utopu kupra ketenepra deiami keca tep, si eremaidi, mut semainge epu dingeda, Musadi yu pio weik kupu. Yu weik kupupa, Allah er upu sekeiamu gel pala butene doprapudi donokupa, Sinai mutu amu di Allah upu sekeiamu gel pala butene yuma, olokra sikke buktapu.