Mat 12:1-14 | XteSC | STEP | Yahudi yala neng sun Allah si eremna tep, pel dona gum di, beipye peingne tep keteneiami tumi, Sabat tumida, Yesus cap, er nyapu cap, yuk neng gandum wa pepra kouamya neitamai banmai. Abanmai taruda, sun jen putapupa, er nyapudi gandum du dakra, bam deiki tara ngeda, lapra tapyopda, gandum penpenya kaptapra embek jepbanmai.

Matthew 12:1-14

Yesusdi, “Allah er gispal dona tep, pel dona gum dipapu, beipye peingne tumi, Sabat tumi deiyo ngeboda, ne pua,” pepu upu

(Markus 2:22-28; 3:1-6; Lukas 6:1-5; 6:6-11)

1 Yahudi yala neng sun Allah si eremna tep, pel dona gum di, beipye peingne tep keteneiami tumi, Sabat tumida, Yesus cap, er nyapu cap, yuk neng gandum ^{▼▼Gandum kecada yambulanun beras utopu dinin, er urasin yuke. Akecada, yambulanun manmaneng utopu dinin, buta deiki tarada, metek du weik mouramre. Adu er urasinda, beras utopu kurure. Adu dopra, taikrapmengedi, sikke utopu konum kupyopda, me cap tapakmengedi, jen keca er si roti kwaneng dapra jenunge.} wa pepra kouamya neitamai banmai. Abanmai taruda, sun jen putapupa, er nyapudi gandum du dakra, bam deiki tara ngeda, lapra tapyopda, gandum penpenya kaptapra embek jepbanmai. 2 Sun gandum jepbanmai tumida, ada Yahudi yala neng, sundi Allah gispal dona tep, pel dona gum dipapu, beipye peingami tumi dinin, gandum embek jepbanmai. Agandum dakra jepbanmaipa, Farisi neng epidi, ‘Aneng wenepkup’ tenen, Yesus tep asipetepi. “Kan nyapudi, gandum dakra jepbanmangada, warya tep do? Allahdi, ‘Angeda ukunkamrume, angeda men kunkamrume,’ peipupa, Musadi sekeiamseu upu neitamaida, ‘Allah gispal dona tep, beipye peingne tumi, Sabat tumida, tali pel dona cap, wai dam kirbana capda meme,’ pepra sekeiamseue. Musadi upepra sekeiamseu dinin, kan nyapudi gandum dakra jenmangada, wa kipra pel doramengtopu kunmanga cadi, akunmanga deiki di, Allah upu yaniptapmange. Akunmange ngeda, warya tep do?” pepra, Farisi nengdi, Yesus tep wenepra asipetepi.

3 Upepra wenepipa, Yesusdi tamupra sun Farisi neng tep aupu pepu.

Ne nyapu, sun akunmangenge utopu, Allah upu buku Samuel neitamai kwamu upuda, peramrum dinin, men kael keprum do? Nun apu bo Daud cap, er melipra kikiman embarami neng cap, jen pio putapupa, jen keca rotida, Allah karena ati pumbon dapra deipmaiyada, Dauddi dopra jepu. Tonda, er cap kikiman embanmai neng tep, bokra karepupa, jepi. Angeda, moupra men kael keamrumdi, aupu penmanerum do? 4 Allah karena tep, jen keca roti kwaneng dapra, ^{▼▼Roti kwaneng – Yahudi yala nengdi, ‘Nun pel doramepyanen, doronup kecada, tek sisi Allahdi kareserepa doronupe, tenenkamep’ tenen, roti kwaneng 12 dapra, Allah er si eremna cap, er karena cap tep, keana tep domi ati, opkal bol di dodina ati pumbon deriramyada deiyo ake. Ada, Allah er gispal dona tep, minggu-minggu yuma, sun Allah si eremami tumi, Sabat tumi deiki di, roti kwaneng ukupunge 12 dapra, Allah karena tep, opkal bol di keana tenda ati domidi, akati pumbon deriramya deiyoda ake. Aroti kwanengda, tali nengdi pio men jerami. Mem keca utopu kwamu. Dinino, tenpu minggu konum kupkopda, Allah karena ati pel dona deiyo neng dipu, aroti kwaneng dopra jeramidi, ukupunge ton dapra derirami.} er ati pumbon deriramyada, pepkusene. Ada, Yahudi yala nengdi, jen keca roti kwaneng 12 dapra, Allah karena ati neitamai derirami. Aroti kwanengda, Musadi upepra sekeiamutopu, Allah karena ati pel dona deiyo nengpu aroti kwaneng jerami. Aroti kwanengda, mem roti kwaneng kuramnga tep, yuk tali nengda, akeca men jerami. Tali nengda men jerami dinin, ataruda Dauddi kupu kecada pepkusene.

Jen keca rotida, Allah karen ati pumbon dapra deipi ngeda, Daud jen putapupa, dopra jepu. Tonda, er cap kikiman embanmai neng tep, bokra karepupa, sun peda akeca jepi. Jepi dinino, Daud cap, er melimna neng cap, roti kwaneng dopra jepi ngeda, Allahdi aneng tep, ‘Mali kupmange,’ tenepudi, men wenepu. ‘Angeda telepe pua,’ tenepu.

5 Musa sekeiamu upu neitamaida, “Nesala yumadi, beipye peikra, Allah er tep gispal dopra, si eremkameng tumi, Sabat tumi deikida, pel men donkamrume,” pepra sekamu ngeda, sundi konum dirume. Sundi aupu konum moupra dirum dinin, men kael kepmarumdi, walwal neng utopu penmanerum do? Musadi, “Sabat tumi deiki di pel men donkamrume,” pepra sekamu dinin, mali keca kunumna tep, Allah karena deiyo neng, ^{▼▼Allah ati karena deiyo nengda, Allah er si eremna ati pumbon pel dorami. Sun lap pena upuda, nomor 14 dinkurume.} sundi Allah er karena tep, er si eremna ati pumbon Sabat tumi pel tupa donunge. Sabat tumi pel donung dinin, Allah er kangeda, ‘Apel donga deiki di, ne upu men yaninenunge,’ tenerure. ‘Angeda, telep pua,’ tenerure. Sunda ange men kael keprumdi, pepmanerum do? 6 Allah er si eremna tep, ila gel ati ilange domi ati tep nengeda, ‘Ila mambule,’ tenerum dinin, ne tek sisi pepsene. Akatida, yambul mambule. Dinin, neda, ila mambul ngebo konum yanmane. 7 Allah upu lap peramu ngebo, nabi Hoseadi sekeiamu upuda ake.
‘Allah er kangeda, sun mali kumum keca kunumna tep, yapi keca popra kareramnerum ngeda, yambul mambule. Dinino, ila mambul ngeda, nimi mali kupmengepapu, wenepra poptamna gum di, bicau tenepra dipru karenada telepe, tenerure.’ Nabi Hoseadi seku. (Hosea 6:6)

Hosea sekeiamu upu bol deikingepu gum dinin, ‘Deiyo ake’ tenen, deiyo neitamainge moupra teneptumtoda, ne nyapu gandum jenmanga tep nengeda, “Sun mali kunmange,” men pepmatume. Yesusdi sun Farisi neng tep pepu.

8 Yesusdi Farisi neng tep, aupu konum pepu dingeda, aupu ton cap pepu. “Ange tep nengeda, ne Nimi Mi Sisa Utopu Ngebo kununa cadi, beipye peingne tumi, Sabat tumi deiki di kunada, ‘Ange telepe, ange mali’ tenen, bokra derina deiyo ngeboda, ne tenpua. Atep nedi, ‘Ange telepe, ange mali,’ pepmasene,” Yesusdi sun Farisi neng tep pepu.

Yesusdi yo buru kwaneamu ngebo kwetepu upu

9 Aupu pepu dingeda, aca tapra, Yesus cap, er nyapu cap, banmaiyanen, Yesusdi Yahudi yala neng, Allah upu peteremami ati bena weku. ^{▼▼Allah upu ati – Yahudi yala nesaladi, Allah upu peteremami atida, sun mutu neitamai dinin, yuk-yukai yuma domi. Akati-akati yumada, urasin yuk dinin, sun mali kun keca kunumna tep, Allah er si eremnaipu, yapi keca popnedi, yapi dopra, karerbarami atida, urasin pio yuke. Tonda, Allah upu peteremna ati-ati weik doamidi, akwamu dinin, Allah er si eremna tep karerbarami ila mambul atida, Yerusalem mutu neitamai, tenpu atipu, ila lyom gel ati domipa, akati neitamaipu, gam keca popnedi, yapi doupra karerbarami.} 10 Yesusda, Allah upu peteremna ati pumbon wekra bena kunmau taruda, buru kwaneamu ngebo ton, akati pum kunmau. Ataruda, Farisi nengdi, ‘Yesus mali kuptupa, nundi, er mali kupmare peptepe’ tenen, Yesus tep pio dipdolom pepra kalengmai. Kalengmaiya tep, ‘Yesusdi mali pepkur do?’ tenen, aupu asipetepmemei. “Nun Allah gispal dona tep, pel dona gum di beipye peingna tumi, Sabat tumi deiki di, pu jeramre nesala kwetenada telep do, mali do?” pepra asipetepmemei.

11 Asipetepipa, Yesusdi tamupra pepu. “Ware ngebo do yuma, er peiramre domba bisam, Sabat tumi deiki tu pumbon sakyopda, adipapu doproptu do? Men doproptu do? Gume, tek sisi angebodi er peiramre domba bisam tu pumbon sakyopda, doproptue. 12 Sunda, ange men tenipmarumdi penmanerum do? Domba bisamda, yambul mambul dinin, nesalada, ila mambul cadi, Allah er si eremna tep tumi, nesala beipye peingne tumi deiki di, nimi makuna pel dona peda, telepe pua. Ukuna deiki di, Allah upu men yaniptepe.” Yesusdi pepu.

13 Yesusdi Farisi neng tep, aupu pepu dingeda, buru kwaneamu ngebo tep, aupu pepu. “Kanda buru bepekra karepneo,” pepu. Upepu pangeda, buru kwaneamu ngebodi, er buru bepekra karepupa, adipapu er buru telep kupra deipupa, angebodi er buru tepra deipu. Yesusdi angebo er buru kwetepu pangeda, angebo er dana tara buru telep kwamutopu kupu. 14 Yesusdi angebo er buru kwetepra deipka tep, Farisi nengda, yu pio weik kupupa, ‘Uo, ware kuptepya deiki di, Yesus popkamep do?’ tenen, akati tapra, yukai bena upu sisingbenmai.