Heb 1 | YLE | STEP | A tîdê mbwó yoo, nmî lama ka tóó wunê n꞉ii knî y꞉oo Chóó Lémi u komo dnyimo a kapî, yi yéli y꞉oo nmî kn꞉ââ knî ye daa kópu ngmidi dnyimo a tpapê, ye dnyimo a mgongo, ntênê ye myednyimo a danê,

‏ Hebrews 1

Kópu kamî n꞉ii Chóó Lémi ngê nmî dye ghi ngê d꞉uu ngê

1 A tîdê mbwó yoo, nmî lama ka tóó wunê n꞉ii knî y꞉oo Chóó Lémi u komo dnyimo a kapî, yi yéli y꞉oo nmî kn꞉ââ knî ye daa kópu ngmidi dnyimo a tpapê, ye dnyimo a mgongo, ntênê ye myednyimo a danê, 2 ngmênê nmî dye ghi ngê Chóó Lémi ngê Tp꞉oo nmo a dy꞉ââ ngê, u Mî komo nmo yinê mî kââ. Vyîlo yi pini Chóó Lémi k꞉ii tpile yintómu nipi l꞉âmo ngópu. Kuwókuwó wéni ngê tpile yilî yintómu yi kada pini ngê vyîlo ayi pyódu. 3 Tp꞉oo p꞉uu nmo w꞉ee ngê, nê, Chóó Lémi u pi ndîî, dyââpe p꞉uu daangma a t꞉a. Chóó Lémi ntee a tóó, Tp꞉oo ndêndê mye yinté. Tpile yilî yintómu knî ye vyîlo yiwunê vyuwo, chóó u kópu mbêmê wunê mbêpê kîgha té. Dini ghi n꞉ii ngê nmî dono chedê too, u Mî ka mê diyé wo, u che p꞉ââ pee ngê mî pyodo. - 2 Njon 1꞉3, Kîlosa 1꞉16* - 3 2 Kódin 4꞉4, Kîlosa 1꞉15*

Enjel yoo yi pwo, Chóó Lémi Tp꞉oo a tóó

4 Pi woni knî y꞉oo enjel yoo mb꞉aamb꞉aa ngê a chââchââ tumo, ngmênê nmî Mî Tp꞉oo u pi ndîî, enjel yoo yi pi dmi têdê. Nmî Mî Tp꞉oo kada mê tóó, enjel yoo kuwó mê pyede. 5 Chóó Lémi ngê Tp꞉oo u pi ndîî ngê pyódu ngê, kwo,

Nyi a tp꞉ee,

ngmênê enjel ngmê ka daa vyu,

Nyi a tp꞉ee, awêde m̱î ngê dî pyódu.

Myenté enjel ngmê p꞉uu daa vyu,

A tp꞉ee ngê wa pyódu, u mî ngê anî ya.

6 Tp꞉oo Kaa dyámê mbêmê ghêlî dêpê dy꞉ââ ngê, Mósisi ngê komo alanté a kââ, ala kópu a d꞉êê ngê, apê,

Chóó Lémi u enjel knî y꞉oo ntênê dny꞉oo chââchââ.

7 Chóó Lémi u kópu enjel knî yi p꞉uu puku yedê alanté a tóó,

Yópu lîmî ntee a dpodo nódó,

enjel yoo Chóó Lémi p꞉uu yinté a dpodo nyédi.

8 Ngmênê Tp꞉oo p꞉uu Chóó Lémi u kópu puku yedê alanté a tóó,

Yâpwo ndêndê, dye ghi yintómu ṉyoo anyi y꞉enê, chedê ngê daawa pyódu.

Ṉyoo ntênê anyi y꞉enê.

9 L꞉êê ghi mb꞉aa ṉuu u l꞉êê ghi dé, yoo dono u yi ṉga daa kwo.

Yi kópu u l꞉êê dîy꞉o yâpwo ndêndê, ṉyâpwo ngê a ngmidi nyoo,

ṉga mb꞉aamb꞉aa ngê a pyódu ngê, w꞉aa u ngwo nyinê pyw꞉ângo,

m̱yipe knî y꞉oo yintoo w꞉aa dêpê pyw꞉ee ngópu.

10 Ala kópu mye tóó,

A Lémi, mwiyémwiyé dini ghi ngê dyámê pê nyi l꞉âmo ngê,

ṉgêê dê y꞉oo mbóó nyi l꞉âmo ngê.

11 Yi tpile yilî yintómu chedê ngê wa pyaa dmi, ngmênê chedê ngê daanyi pyódu.

Kpîdî ntee mbwee ngê dpî pyódu,

mbóó dyámê yinté mbwee ngê amye pyaa knî.

12 Pi ngê u kpîdî ntee dpo kmongo, ntee myoo ngmêê,

tpile yilî yintómu yinté am꞉ii ngmêê té,

ngmênê ntee nye tóó, dye ghi yintómu yinté anyi ya, daanyi dyênê.

13 Chóó Lémi ngê enjel ngmê ka daa vyu,

M̱i ndîî ngê n꞉aa pyépi, a wéni pee dpî yey, pi yintómu chi y꞉enê dé.

Yélini m̱꞉uu a l꞉êê té, dîyo anî vya té,

ṉyi yodo u maknopwo wanî yé té.

14 Tp꞉oo ka yi kópu u mo vyu, enjel ngmê ka daa vyu. Tp꞉oo kada a tóó, enjel yoo kuwó a pyede. Enjel yoo ghê dmi dé, Chóó Lémi p꞉uu a dpodo nyédi. Yi dpodo têdê dpodo têdê dpî dy꞉ââ té, yélini yi mbwámê ngê Tp꞉oo pyodo, y꞉oo a ngêêpî tumo. - 4 Pilipay 2꞉9* - 5 Psalm 2꞉7, Hipîlu 5꞉5* - 7 Psalm 104꞉4* - 8 Psalm 45꞉6-7* - 10 Psalm 102꞉25-27* - 13 Psalm 110꞉1* - 14 Psalm 91꞉11, Dpodo 12꞉7*