Revelation of John 19
Mbóó p꞉uu u ngwo dnye wéti
1U kuwó dini ghi ngê mbóó p꞉uu pi yilî yi dnye dmi ndîî nî nyongo, nmî Mî dnye chaa kîgha, apu, Nmî Yâpwo chaa kîgha koo.Apu, Nmî Yâpwo ngê u yoo kamî ngê dê pyódu té,
- kóó k꞉oo dê kaa té.
2Apu, Yoo dnyinté daa kóté kîgha too,
- pi dono knî ye ntââ ntênê dpo vy꞉u.
- n꞉ii ngê dono u mbwaa kuu pi dyêêdî yintómu yi mênê yó,
Apu, Dê dyênê,
- mu kópu u dîy꞉o u dpodo pyu yoo yinê a vya too.
3Myombó dnye chaa kîgha, apu,
Nmî Yâpwo chaa kîgha koo.
Apu, Yi pyópu u kpadakpada u ndê dpudu adî koko,
- chedê ngê daawa pyódu.
Nmî Yâpwo p꞉uu dpodo pyu yoo.
Apê, Nmî Lémi dmyinê chaa kîgha.
Apê, N꞉ii knî y꞉oo a chââchââ ngópu, a dnye ny꞉ee yó.
Apê, K꞉omo tpile nmyi pi dmi ndîî dé ó têdê dé,
- ngmênê dmyinê chaa kîgha. - 2 Tpyuu 6꞉10,* - 3 Tpyuu 14꞉11* - 4 Tpyuu 4꞉9-11*
Sipi tp꞉oo ngê u yémî p꞉uu u ngwo wa a y꞉oo
6Yi ngwo pi yilî yi dnye dmi nî nyongo, t꞉ââ pââ ndîî ntee wunê dpudu yédi, mye yinté. Mwini dpodombiy꞉e ntee a mbumu yédi, yi dnye dmi mye yinté. Apu,Chóó Lémi chaa kîgha koo,
mu kópu u dîy꞉o nmî Lémi, nmî Yâpwo,
king ndîî ngê dê pyódu,
u wêdêwêdê mu daa mu tp꞉ook꞉omo.
7Apu, Nmî gha dmi mb꞉aamb꞉aa ngê pyaa we,
w꞉aa myedê pyw꞉ee koo.
Apu, Chaa kîgha koo,
mu kópu u dîy꞉o sipi tp꞉oo ala ngwo a yééyéé,
u yémî p꞉uu ngê yééyéé u kpîdî dmi u mbwo dê t꞉oo,
u yoo knî yi k꞉ii ngmidi ngê a pyodopyodo té.
8Apu, Kpîdîni u mbwo dê t꞉oo,
Chóó Lémi ngê u kwo dê y꞉oo.
Apu, Yi kpîdî dmi kpaapîkpaapî dé,
tupwó yi p꞉uu daa t꞉a.
(Yi kpîdî dmi kpaapîkpaapî dé yi nt꞉u kópu, kópu mb꞉aa n꞉ii nmî Mî u yoo knî y꞉oo a d꞉uud꞉uu tumo.) 9Enjel ngê a ka pê, Ala kópu d꞉êê ngi. A ka pê, Sipi tp꞉oo ala ngwo a yééyéé. A ka pê, Chóó Lémi ngê yélini yi kmaapî têdê a dóó kalê too, yi yéli y꞉oo w꞉aa wa a pyw꞉ee ngmê. A ka pê, Chóó Lémi ngê yi kópu dyuu ndêndê ngê dê vyi té, daa k꞉omodanê kópu dyuu.
10Yi ngwo enjel yu dmyeno kwodokwodombiy꞉e k꞉ame nî ghê wo, ngmênê a ka pê, Apuu! A ka pê, Nangê châpu nê. A ka pê, Ṉ́îdê mbwó yoo, yélini yi k꞉ii Yesu u kópu dyuu nmyi mgîmî ngópu, Chóó Lémi p꞉uu ntee nmye dpodo té, yinté p꞉uu myinî dpodo. A ka pê, Nangê châpu nê, Chóó Lémi p꞉ee vyîlo yu châpu ngi, mu kópu u dîy꞉o Yesu u kópu dyuu Chóó Lémi u komo kapî pyu knî y꞉oo wunê a m꞉uu tumo. - 6 Tpyuu 11꞉15-18, 14꞉2-3* - 7-8 Tpyuu 21꞉2,9, Epeso 5꞉32* - 9 Luukî 14꞉15* - 10 Tpyuu 22꞉8-9*
Yesu ngê tpile tp꞉oo dono u ngwo dyênê ngê
11Yi ngwo mbóó a ngópu a kpêmî ngê, hósi kpaapîkpaapî ngmênî módu, pi pyipwo ngmêdoo ya, k꞉omodanê kópu p꞉uu dêpwo ya, myedaangmê kn꞉aadi ngê. Yoo ntênê a kóté kîgha too, yi p꞉uu u ngwo a l꞉êê yédi. 12Ngwolo dê ndê dóó ntee tpile dê, dyámê pee yilî yi kîdon dé mbêmê dnye kwo. U pi kêpa nî módu, ngmênê u nt꞉u kópu pi ngmê u lama daa tóó, chóó u mo u lama a tóó. 13U pi alanté nmo tpapê ngê, Chóó Lémi u Kópu Dyuu. Kpîdîni u mbwo doo ya, d꞉ud꞉umbiy꞉e wêê vyi. 14Chóó Lémi u lede knî y꞉oo dnye yâmuyâmu, hósi kpaapîkpaapî knî yi pyipwo dnye ya, kpîdî kpaapîkpaapî dmi yi mbwo yidoo ya, tupwó yi p꞉uu dêpwo ya. 15Yoo dyêêdî dono yi vyee u l꞉êê dîy꞉o taa ńepwi ngmê u kwo ngma a pwii wo. Nkichi pee kiyé ngê adî vyee dé. Yoo dono wain kîgha mtyé ntee tpile ngê wa pyódu té, adî vyilêvyilê dé, yi wêê adî pywuwopywuwo, mu kópu u dîy꞉o Chóó Lémi dpodombiy꞉e ye nod꞉e wo. 16U pi u kpîdî p꞉uu doo ya, kpâlî kn꞉ââ dê yi p꞉uu myedoo ya, apê, King yintómu yi King, Lémi yintómu yi Lémi.17Yi ngwo enjel m꞉uu nî módu, kââdî mbêmê doo kwo. Wââ ntee ńméni, n꞉ii knî yi lama tpile tp꞉oo ntóó pîpî a tóó, dpodombiy꞉e ye mbwolo, yepê, A pwiyé dmyeno. Yepê, Chóó Lémi ngê kmaapî ndîî nmyi l꞉êê dîy꞉o ngmêwunê pwapî. 18Yepê, Pi dyêêdî yintómu yi ntóó dmi dpî ma tóó. Yepê, King yoo, kada pini yoo, lede yoo yi k꞉ii, l꞉êê têdê a pwopwo té, yi ntóó dmi dpî ma tóó. Yepê, Hósi dé, yi tpiipi yoo yi ntóó dmi dpî ma tóó, pi dyêêdî yintómu, wop dpodo pyu yoo, ndapî p꞉uu dpodo pyu yoo, yélini yi pi dmi ndîî dé ó têdê dé, yintómu yi ntóó dmi dpî ma tóó.
19Yi ngwo tpile tp꞉oo dono nî módu, dyámê mbêmê king yoo, yi lede yoo yintómu yi k꞉ii, p꞉uu dnye ya. U yi y꞉e doo kwo, Pini n꞉ii hósi kpaapîkpaapî pyipwo a tóó, u lede yoo yi k꞉ii, nmî vya té. 20Ngmênê dêê dniye, p꞉ee vya tumo, tpile tp꞉oo dono mgîmî ngópu, u komo kapî pyu mye mgîmî ngópu, n꞉ii ngê mbwudu yilî u pi mbêmê mwiyé dpîmo a chapî dé. (Yi mbwudu chapî mbêmê yoo dono mwiyé a dóó too, tpile tp꞉oo u l꞉ii yi p꞉uu u ngwo a t꞉ee ngópu, u yâpwo tpile ka myednyimo a ngêpê.) Yi tpile tp꞉oo dono, u komo kapî pyu u k꞉ii, mgîmî dumo, yi ghê dê dpîmo ya, ndiya u ngwo d꞉ii dumo. Mwááli dyuu d꞉ud꞉umbiy꞉e kîîkîî ngê ntee dpî pyódu, yinté kwéli ghê dpîmo mgînî vyîmî. 21Pini n꞉ii hósi kpaapîkpaapî pyipwo doo ya, yi tpódu yi lede yoo vya too. Taa n꞉ii u kwo doo kwo, u ngwo vya too. Wââ ntee ńméni knî y꞉oo yi ntóó dmi ma tumo, d꞉ud꞉umbiy꞉e pile dniye. - 12 Tpyuu 1꞉14* - 13 Njon 1꞉1,14* - 15 Tpyuu 1꞉16* - 16 Tpyuu 17꞉14* - 19 Psalm 2꞉2* - 20 Tpyuu 13꞉11-17, 20꞉10* - 21 Tpyuu 19꞉17-18*
Copyright information for
YLE