Tit 3 | YLE | STEP | Taitas a tp꞉ee, pi knî ye kópuni ny꞉uu vyi too, ye moo vyilê té, yipi, Kada pini knî ye dmyinê ng꞉aa, kópu mb꞉aa dmyinê d꞉uud꞉uu dé.

‏ Titus 3

Yesu Kédisu ngê kamî ngê ntee pyódu nmoo

1 Taitas a tp꞉ee, pi knî ye kópuni ny꞉uu vyi too, ye moo vyilê té, yipi, Kada pini knî ye dmyinê ng꞉aa, kópu mb꞉aa dmyinê d꞉uud꞉uu dé. 2 Yipi, Pi u pi nangmê dyênê, kwopwepe ngê kêê nangê t꞉oo, pi yintómu knî ye dmyinê mb꞉aamb꞉aa, nmyi chóó nmyi pi dmi nangê kmîmî. 3 Nmî Lémi u yoo vy꞉o ghêlî k꞉ii dpîp꞉o ghê dniye, yi ngwo nmî Lémi nmî lama dêpwo a ya, u dnye dênmee a nyêmî, nmî nuw꞉o dmi kwolo ngmê ngê dnya a ya. Nmî chóó nmî pono nmîmo a vyápê, nmî chóó nmî kópu knî yi p꞉uu nmî nuw꞉o dmi dnya a kwo. Dono ngê nmee a ya, nmîmo a ń꞉ee kapî, pi knî ye nmee a diya, nmo myednya a diya. 4 Yinté nmee a ya, ngmênê nmî Mbwámê Chóó Lémi ka nmo ch꞉anê dniye, 5 kóó k꞉oo u ngwo kaa nmoo. Daa nmî kópu mb꞉aa knî yi l꞉êê dîy꞉o kóó k꞉oo kaa nmoo, ngmênê u kwo nmo ch꞉anê dniye, nmî dono yilî ghêê too, chóó u Ghê Dmi ngê kamî ngê mê pyódu nmoo, ghê kamî nmo a kpo. 6 Nmî Mbwámê Yesu Kédisu ngê mb꞉aamb꞉aa ngê a yeede nmoo, chóó u Ghê Dmi nmî mênê yó. 7 Yi yeedeyeede mbêmê Chóó Lémi ka yoo mb꞉aa ngê pyódu nmoo, ala ngwo nmî lama ka tóó, ghê kamî nmo wa a kê, ghéni n꞉ii chedê ngê daawa pyódu. 8 Ndê kópu yila. Yi kópu dyuu pi knî ye ntênê chi tpapê dé, ntênê yi lama paa yaa dniye. Yélini Chóó Lémi ka a kêlîmî té, u ya a nga a kwo, Kópu mb꞉aa dny꞉oo d꞉uud꞉uu dé. Yi kópu dyuu ye chi tpapê dé, yoo mb꞉aa ngê u ngwo wa pyaa dmi. 9 Ngmênê kwopwepe têdê yi vy꞉o kidingê ghê, n꞉ii knî y꞉oo yoo yi kn꞉ââ yoo yi pi dmi a dówodówo tumo, ṉuw꞉o kêdangê y꞉ee ngmê. Yélini yoo dêêpî kópu dyuu p꞉uu a kwopwepe nyédi, ye namê ng꞉aa, mu kópu u dîy꞉o yinté kópu knî y꞉oo yoo daawa wêdêwêdê kalê t꞉oo, noko módó a kwopwepe nyédi. 10 N꞉ii ngê u yi u ngwo adî kwo, Yoo nî chaa, woni yoo a pee nê kaa té, yi pini ka dpî kwódu ngi. Ṉye daawa ny꞉ee knomomê, myombó u kwo moo kwódu ngi. Ṉye myedaawa ny꞉ee knomomê, yed꞉oo kpeme u kwo dpî yey. 11 Ḻama u ngwo wa yââ, anye, Kî pini u nuw꞉o kwolo ngmê, u dono knî yi l꞉êê dîy꞉o chóóchóó ka ndyîkondyîko. - 1 Lóma 13꞉1-7, 1 Pita 2꞉13-14* - 2 2 Timoti 2꞉23-25* - 3 Epeso 5꞉8-9* - 4-5 Njon 3꞉5-7* - 7 Mátiyu 25꞉34* - 10 Mátiyu 18꞉15-17* - 11 1 Timoti 6꞉3-5*

Póól u nd꞉uu tpapê

12 Daa kêmakêma Nikopolis n꞉aa lêpî, yópu ndîî dye ghi ngê y꞉i anîn꞉aa ya. Dini ghi n꞉ii ngê Atimas pini dê Tikikas ṉga angmênê dy꞉ââ, yi ngwo lîmîlîmî ngê y꞉i a ka dpo pwiyé. 13 Pini n꞉ii u lama dêêpî kópu dyuu mb꞉aamb꞉aa ngê a kwo, Sinas, Apolosa k꞉ii tpileni u yi y꞉e maa p꞉uu adî kwo, dpo ngee dé, u ngwo modo dy꞉ââ dé. 14 Nmî Lémi u yoo mb꞉aamb꞉aa ngê dny꞉oo a dpodo, u ntââ mbêmê yi chóó u ngwo adnyi ya, ngópuch꞉anê yoo myedny꞉oo ngêêpî dé. Módó kîdnyinga a lîme, dny꞉oo a dpodo.

15 Yélini a p꞉uu wunê pyede, yi mb꞉aamb꞉aa ṉga da dy꞉ââ ngmê. Nmî pyipe yoo yélini nmî Lémi ka y꞉i wunê kêlîmî té, nmî mb꞉aamb꞉aa ye dpî yéni.

Nmî Mî mb꞉aamb꞉aa ngê nmye choo a vyuwo.

Wu u dî. - 12 Epeso 6꞉21-22* - 13 Dpodo 18꞉24* - 14 Epeso 4꞉28*