1Jo 1 | ZmbSC | STEP | Tusumukunyea ko Ikomo lyɛ mwɛchɔ lyasangwa, a kobangoa. Bae twaliungwa, bae na kuimɔɛna ne miisɔ miito, bae kɔlɛlɔla ne kolekwata ne mesani yiito.

1 John 1

Ikomo lyɛ mwɛchɔ

1 Tusumukunyea ko Ikomo lyɛ mwɛchɔ lyasangwa, a kobangoa. Bae twaliungwa, bae na kuimɔɛna ne miisɔ miito, bae kɔlɛlɔla ne kolekwata ne mesani yiito. 2 Kiinɛkinɛ ona mwɛchɔ aolee awo, bae tɔmɔmɔɛɛ. Tususingeecha byamɔa bae, ne ko bobo, tosobasaolea ilɔngɔ lyɛ mwɛchɔ we meombo, ɔbɛɛ amɔsa na Tati ne koangoechwa kwiito. 3 Lea lɛmɔɛchi bae ne kuliungwa, ne lee bae mokosaola kwinu bwakaɛ, kɔmɔa moongwe niito amɔɔsa. Na koo koongwa kwito amɔɔsa na koa kwe niito amɔɔsa na Tati ne Mwaana waakɛ Yɛsu Kilisito. 4 Tosobakunyea maa makomo, kɔmɔa toongwe nɛ kɛmɛmɔ kye kiinɛkinɛ.

Kakua nɛ kyɛɛngɛ

5 Na lee ne ikomo liungwee bae kotokea ko kanywa kaakɛ na kolesaola kwinu: Kakua ne kyɛɛngɛ, ne monda mwaakɛ muusi ikunyɛ. 6 Twaswitomboa itɛ: toe naakɛ amɔɔsa, koko ne toe mu kuchikana mu ikunyɛ lya mbaa na mbaa, tɔsɔɔcha manu, tootoketa kiinɛkinɛ.

7 Kɔ bɔbɔ ingɛ tusuchikana mɔ kyɛɛngɛ boa bwe Kakua mwɛɛnɛ mɔ kyɛɛngɛ, toe amɔsa bae bɛɛnɛ na bɛɛnɛ, ne masi me Mwaana waakɛ Yɛsu masɔɔya bwabea bwito bɔsɛ. 8 Twaswitomboa itɛ tuusi ne bwabea, tuswionga bae bɛɛnɛ, ne monda mwiito muusi bye kiinɛkinɛ. 9 Kɔ bɔbɔ, ingɛ tuswimenya bwabea bwito, Kakua ndakabaeke bwabea bwito, oe we kiinɛkinɛ ne otatɔɔyɛ bwabea boe awɛ we kiinɛkinɛ. 10 Ingɛ tɔsɔɔcha itɛ tuusi ne bwabea, tusumutuula Kakua koongwa we manu, ne kiinɛkinɛ yee makomo maakɛ iisi monda mwiito.