1Jo 3 | ZmbSC | STEP | Mɔlɔlɛ bwatokonda Tati bae koolea kuitanewa baana bakɛ! Ne bwee bae kiinɛkinɛ! Ndɛɛkɔ bando bɛ mɔsɛngɛ baatotocheba, kɔ kɔmɔa ndebamocheba Kakua.

1 John 3

Baana ba Kakua

1 Mɔlɔlɛ bwatokonda Tati bae koolea kuitanewa baana bakɛ! Ne bwee bae kiinɛkinɛ! Ndɛɛkɔ bando bɛ mɔsɛngɛ baatotocheba, kɔ kɔmɔa ndebamocheba Kakua. 2 Ngondwa chanɛ, ano totae baana ba Kakua, botaongwe bae bunachebekana paa. Totocheba itɛ ataolee Kilisito, totaeyane naakɛ ko boa botamɔmɔɛ bae bɔɛwɛ. 3 Chɔ, ɔɔsɛ oe ne lee iekekeo monda mwa Kilisito uiamye boa bwe awɛ wa Ama. 4 Mondo ɔɔsɛ otoketa bwabea ne moangani wa Kakua, kɔ kɔmɔa koketa bwabea nɛ kɔɔna salia. 5 Banu motocheba itɛ Yɛsu Kilisito wabaaka ne kwaoche bwabea, ne monda mwaakɛ muusi bwabea. 6 Chɔ, ɔɔsɛ mondo oe naakɛ amɔɔsa ndatoketa bwabea; mondo otoketa bwabea ndanamɔmɔa ɔbɛɛ ndanamocheba. 7 Ee baana banɛ, mondo ndamoongaya! Mondo otoketa bye kiinɛkinɛ ne we kiinɛkinɛ boa bwe Kilisito we kiinɛkinɛ. 8 Olya waanga koketa bwabea ne wa Isombo. Kɔmɔa Isombo osoketa bwabea a kobangoa kwe biemo biisɛ. Ko bobo, Mwaana wa Kakua obee ne kwaɔnɛ meemo yee Isombo. 9 Ɔɔsɛ osoboteka na Kakua ndatoketa bwabea, kɔmɔa bɔkɛtɛ bwe mwɛchɔ wa Kakua otokamba monda mwaakɛ, boa boe Kakua Isakɛ, ndatowaena kabee koketa bwabea. 10 Bibi ne bitochebekya bwaachi baana ba Kakua ne baana ba Isombo, Mondo otaasi koketa makomo me kiinɛkinɛ ɔbɛɛ kokonda mobotwa naakɛ ndaasi Mwaana wa Kakua.

Kokondana

11 Kokondana a kobangoa: tokondane bae bɛɛnɛ na bɛɛnɛ. 12 Tɔɔbɛchaya bwe Kaini we mbanga ya Isombo, na kuchia mobotwa naakɛ. ^{▼▼Yɔɔla Kob 4:4.} Awɛ wamuchia ko eke? Nɛ kɔ kɔmɔa bikete byakɛ byabɛchaya byabea ne bye mobotwa naakɛ byabɛchaya bye kiinɛkinɛ. 13 Chɔ ee babotwa naanɛ, mokanakanaya ingɛ bando be ona mɔsɛngɛ basɔmɔkɔna. 14 Bae totocheba itɛ tusubuusuka lokwo ne kokonja mwɛchɔ kɔ kɔmɔa toe mo kokonda babotwa niito. Otaasi kokonda oe ne monda mwe lokwo. 15 Olya ɔɔsɛ ɔtɔkɔna mobotwa naakɛ ne mochai, motocheba itɛ mochai ɔɔsɛ ndaasi nɛ mwɛchɔ we meombo monda mwaakɛ. 16 Bae tosocheba kokonda koetea bobo: Yɛsu Kilisito na kuimenya kokwa ku iboa lito. Na bae bwakaɛ totokoka ne kokwa ku iboa le babotwa niito. 17 Ingɛ mondo oe nɛ byɛndɔ mo ono mɔsɛngɛ, ɔsɔmɔa mobotwa naakɛ oe nɛ bɔɛnwa, nɛ ndɛɛchɛ komokwea lokwa, mondo boe oona otaɔchɛ itɛ otokonda Kakua? 18 Ee baana baanɛ! Kokondana kwito koongwaya kwɛ mɛɔcha bokata; koongwe ne kwe kiinɛkinɛ kɔtɔmɔɛka ku bikete.

Iekekeo kwa Kakua

19 Ko njea eena totachebe itɛ toe bando be kiinɛkinɛ, ne metema yiito etaike kombaa kwakɛ. 20 Kɔ kɔmɔa naanga motema wiito ɔtɔtɔbɛcha, totocheba itɛ lokani lwa Kakua lotoeta metema yiito awɛ otocheba biisɛ. 21 Ee ngondwa chanɛ, metema yiito ingɛ ndeyatɔbɛcha, bae toe ne iekekeo kombaa kwa Kakua. 22 Totokonja kwakɛ biisɛ bitɔɛngɛa bae, kɔ kɔmɔa bae totobengya salia yaakɛ ne koketa bitokonda awɛ. 23 Salia yaakɛ na ena: twimenye chiina lya Mwaana waakɛ Yɛsu Kilisito ne tokondane bae bɛɛnɛ na bɛɛnɛ bwatusiela Kilisito. 24 Mondo otobengya salia yaakɛ oe monda mwaakɛ, na Kakua oe monda mwa olya mondo. Totocheba itɛ Kakua utuchikana monda mwiito ko njea yee Motema wa Ama watɔɛcha awɛ.