1Jo 4 | ZmbSC | STEP | Ee ngondwa chanɛ, mwimenyaya ɔɔsɛ ne motema, kombaa nɛ kɔmɛɛlɛka ko kocheba ingɛ ee metema etotoka kwa Kakua, kɔ kɔmɔa ndɛnda chabua che manu chisoolea mɔ mɔsɛngɛ.

1 John 4

Ndɛnda che manu nɛ ndɛnda che kiinɛkinɛ

1 Ee ngondwa chanɛ, mwimenyaya ɔɔsɛ ne motema, kombaa nɛ kɔmɛɛlɛka ko kocheba ingɛ ee metema etotoka kwa Kakua, kɔ kɔmɔa ndɛnda chabua che manu chisoolea mɔ mɔsɛngɛ. 2 Mɔlɔlɛ botachebe banu Motema ototoka kwa Kakua: ne motema ɔtɔɔcha itɛ Yɛsu Kilisito wabaka mɔ lɔkɔba oe ne motema wa Kakua. 3 Ne ɔɔsɛ motema otaasi utwindoa Yɛsu, uusi wa Kakua, oe ne motema we moangani wa Yɛsu, uungwee banu itɛ otoba, na leno otae mɔ mɔsɛngɛ. 4 Banu, baana bakɛɛkɛ, moe ne ba Kakua ne moobakoela. Kɔ kɔmɔa oolya oe monda mwiinu oe mokoo koeta oolya oe mɔ mɔsɛngɛ. 5 Abɔ bae bɛ mɔsngɛ; ne batɔɔcha bwe bando bɛ mɔsɛngɛ nɛ mɔsɛngɛ otobaungwa. 6 Bae toe ne ba Kakua, oolya otocheba Kakua ututuungwa; olya otaasi wa Kakua ndatutuungwa. Ko bobo ne kotachebe bae koni koe Motema we kiinɛkinɛ na koni koe motema we manu.

Kokonda kwe kiinɛkinɛ ne kokonda kwe manu

7 Ngondwa chaanɛ, tokondane bae bɛɛnɛ kwɛ bɛɛnɛ; kɔmɔa kokonda koe ne kwa Kakua, nɛ ɔɔsɛ otokonda, ooboteka na Kakua ne otocheba Kakua. 8 Olya otaasi ndatokonda, ndaacheba Kakua, kɔmɔa Kakua ne kokonda. 9 Kokonda kwa Kakua kwamɔɛka mwingya mwiito koetea boa bwatoma awɛ Mwaana waakɛ ɔmɔɔsa mɔ mɔsɛngɛ tokonje mwɛchɔ koe awɛ. 10 Koo ne kokonda; ataasi itɛ bae ne bakonda Kakua, ko boa bwatokonda awɛ na kotoma Mwaana waakɛ koongwa keochwa ko bwabea bwito. 11 Ngondwa chaanɛ, kende Kakua ototokonda bobo, tokondane bae bɛɛnɛ kwɛ bɛɛnɛ. 12 Kuusi wasɔmɔa Kakua; kende twasokondana bae bɛɛnɛ kwɛ bɛɛnɛ, Kakua oe monda mwiito ne kokonda kwakɛ koe monda mwiito. 13 Totocheba itɛ toe monda mwaakɛ na awɛ oe monda mwiito; kɔ kɔmɔa watɔɛcha Motema waakɛ. 14 Na bae twamɔa ne kusingeecha itɛ Tati watoma Mwaana waakɛ koongwa Moolochi wɛ mɔsɛngɛ. 15 Ɔɔsɛ utwimenya mo ndongo itɛ Yɛsu ne Mwaana wa Kakua. Kakua oe monda mwaakɛ na awɛ monda mwa Kakua. 16 Na bae twasocheba kokonda kwa Kakua ko mbanga yiito twasaimenya. Kakua ne kokonda, nɛ ɔɔsɛ otokonda oe monda mwa Kakua. 17 Ko eena njea kokonda kɔsɛ kɔsɔmɔɛka asambea bae. Ko boa toongwe ne kiinɛkinɛ ku lusu lwe mayombe, kɔ kɔmɔa mo ona mɔsɛngɛ toe boe Kilisito. 18 Bɔɔba buusi monda mwe kokonda kwe kiinɛkinɛ, kokonda kwe kiinɛkinɛ kwaanga kuchia bɔɔba, kɔ kɔmɔa bɔɔba botoangoecha keangaa kye kokonja manɛnɛ na oolya utuungwa bɔɔba ndaasi monda mwe kokonda. 19 Bae totokonda kɔ kɔmɔa awɛ watokonda kombaa. 20 Kende mondo ɔsɔɔcha: «Natokonda Kakua», koko nɛ ɔtɔkɔna mobotwa naakɛ, oe we manu; kɔmɔa olya ɔtɔkɔna mobotwa naakɛ ɔtɔmɔa awɛ, booni botakonde awɛ Kakua otaasi awɛ ndatɔmɔa? 21 Na awɛ ɔtɔɛchɛɛ eena salia: ɔɔsɛ otokonda Kakua okonde mobotwa naakɛ.