1Jo 5 | ZmbSC | STEP | Ɔɔsɛ utwimenya itɛ Yɛsu ne Kilisito, osoboteka na Kakua, nɛ ɔɔsɛ otokonda Tati otokonda mwaana waakɛ.

1 John 5

Bɔkɛtɛ bwe kuimenya

1 Ɔɔsɛ utwimenya itɛ Yɛsu ne Kilisito, osoboteka na Kakua, nɛ ɔɔsɛ otokonda Tati otokonda mwaana waakɛ. 2 Totocheba itɛ totokonda baana ba Kakua ko bobo: atokonda bae Kakua ne koketa bitɔɔcha salia yaakɛ. 3 Kɔmɔa kokonda Kakua ne kobengya salia yaakɛ, ne salia yaakɛ iisi na kokoba. 4 Kɔmɔa kɛsɛ kebotekee na Kakua kesokoela mɔsɛngɛ. Ne kokanga kotokoela mɔsɛngɛ ne kuimenya kwito. 5 Ne naani otokoela mɔsɛngɛ, na olya utwimenya itɛ, Yɛsu ne Mwaana wa Kakua.

Byaɔcha ko mbanga ya Yɛsu

6 Awɛ Yɛsu Kilisito wabaka ne maache ne masi; ataasi maache bokata, maache ne masi. Motema utusingeecha maa makomo kɔmɔa Motema ne kiinɛkinɛ. 7 Kɔmɔa koe basato batusingeecha maa makomo: 8 Motema, maache ne masi; ne basɛ basato batuungwana. 9 Tusuungwa bisingeechee bando, bitusingeecha Kakua ne bikataa; kɔmɔa bibi ne bitusingeecha Kakua: usingeechee bisɛ kombanga ye Mwaana waakɛ. 10 Ɔɔsɛ utwimenya Mwaana wa Kakua, utusingeecha monda mwaakɛ; olya otaasi ndatuimenya Kakua oomoketa koongwa wee manu, kɔmɔa ndatuimenya bitusingeecha Kakua kombanga ye Mwaana waakɛ. 11 Na tɔlɔlɛ kusingeecha koa kwa Kakua koe bɔtɔɛchɛ mwɛchɔ we meombo, na olya mwɛchɔ oe ne monda mwa olya Mwaana waakɛ. 12 Ɔɔsɛ oe ne Mwaana oe nɛ mwɛchɔ, ɔɔsɛ otaasi ne Mwaana wa Kakua, ndaasi nɛ mwɛchɔ.

Mwɛchɔ we meombo

13 Nakunyee bibi koe baanu batuimenya chiina lye Mwaana wa Kakua, ko boa mochebe itɛ moe nɛ mwɛchɔ we meombo. 14 Ena ne kiinɛkinɛ ee niito kombaa kwa Kakua itɛ: ingɛ tɔsɔɛngɛa keemo koengama ne kokonda kwakɛ, ututuungwa. 15 Ingɛ twasocheba itɛ ututuungwa, tosocheba itɛ tookonja keemo kɛɛngɛɛ bae kwakɛ. 16 Ingɛ mondo ɔsɔmɔa mobotwa naakɛ koketa bwabea botaasi bwe koolecha ko lokwo, uiyaye kwa Kakua na Kakua otamɔɛchɛ mwɛchɔ. Bibi bie ne iboa ko baa be bwabea bwabɔ buusi bwe koolecha ko lokwo. Alakini koe bwabea botoolecha ko lokwo, biisi ko boo bwabea bɔtɔɛngɛa mee kwiyaya. 17 Biisɛ bitaasi bwaachi ne bwabea; koe bwabea botaasi koyesa mondo ko lokwo. 18 Totocheba itɛ, ɔɔsɛ otoboteka na Kakua ndatoketa bwabea; kɔmɔa Mwaana wa Kakua ɔtɔmɔkɛnga, ne Isombo lɛtɔmɔkɔbɔcha. 19 Totocheba itɛ toe ba Kakua, nɛ mɔsɛngɛ ɔɔsɛ oe ne mose mwe boombe bwa Isombo. 20 Totocheba bwakaɛ itɛ Mwaana wa Kakua obee, nɛ ɔtɔɛchɛɛ lokani lwe kocheba Kakua ke kiinɛkinɛ, na bae toe bomweyechee sambe naakɛ Kakua we kiinɛkinɛ koetea Mwaana waakɛ Yɛsu Kilisito. Awɛ ne Kakua we kiinɛkinɛ; awɛ nɛ mwɛchɔ we meombo.

Kolaana

21 Ee baana banɛ, mwikɛngɛ banu bɛɛnɛ ne maboka.