1Pe 2 | ZmbSC | STEP | Ko bobo, mokosoe njɔɔ bikete biisɛ byabea ne bye manu, amɔsa ne boale, ne kwinyekecheana kwe mitindɔ ɛɛsɛ.

1 Peter 2

Kɛɔngɔ kya ama

1 Ko bobo, mokosoe njɔɔ bikete biisɛ byabea ne bye manu, amɔsa ne boale, ne kwinyekecheana kwe mitindɔ ɛɛsɛ. 2 Boe baana bakeboteka batokonda kɔnyɔma, na baanu moongwaye ne saki yɛ kɔnyɔma Ikomo ma Kakua, Lɛlyɔ ikomo lee ne bwe mabɛɛ mataasi kosambyewa. Ko boa mwasomanyɔma, motakoe ne kooloka. 3 Kɔmɔa Tuchimba Twa ama twaanga kɔɔcha itɛ: «Muswimɔɛna banu bɛɛnɛ itɛ Mwaame waanga mwaachi.» ^{▼▼Yɔɔla Nem 34:9.} 4 Mɔbɛ mu kumwisɛɛnɛa Mwaame. Awɛ ne ibwɛ lyɛ mwɛchɔ. Lea ibwɛ lyakosoiwa ne baaboki, alyo lyasɔbɔiwa na Kakua, nalyo leobaikiwa koba ibwɛ lyɛ ibɛi lekataa kombaa kwakɛ. 5 Na baanu bwakaɛ, moongwe boe mabwɛ mɛ mwɛchɔ, kɔmɔa mokambekiwe ko koaboka ndabo yee Motema wa Ama. Kabee motaongwe basia ba ama batabɛ mo kokamba meemo yee koochea Kakua biochwa koeta njea yee Motema wa Ama waakɛ. Bia biochwa, Kakua otabɛ mu kubiimenya koetea Yɛsu Kilisito. 6 Kɔmɔa Kakua ɔsɔɔcha mu Tuchimba twa Ama itɛ:
«Lɔla! Nasoemeka ibwɛ lekataa boe ikako lye kaanga lye kosekemeka mosomba we Sayuni.
Lea ibwɛ, mee ne ɔlɛsɔbɔɛɛ,
kabee, lee ne lye ibɛi lekataa.
Lotobaela awɛ,
ndakamɔa masɔni naa nɛ lɔmɔ.» ^{▼▼Yɔɔla Isa 28:16.}

7 Lee ibwɛ lee ne meemo ya bua koe maanu batuimenya. Ko baa bataasi batuimenya,
«Ibwɛ lyakosoa baaboki,
alyo ne lisutuuluka koongwa ibwɛ le koabokea nalyo.» ^{▼▼Yɔɔla Nem 118:22.}

8 Bie kabee bukunyiwe itɛ:
«Lea ibwɛ lee ne lyɛ kɔtɔndɔkɛkya bando.
Kabee ne itanda lye mɔsɛɔ lye kobakecha.» ^{▼▼Yɔɔla Isa 8:14.}

Baa bando bae mu kwitɔndɔka, kɔmɔa baanga kɔkɔna kuimenya Ikomo lya Kakua. Na lea ne lyalaiwa abɔ kaɛ.

9 Chɔ banu, moe ne bando basɔbɔiwa na Kakua, kabee moe ne basia be Nombe, kabee moe ne ibota lye ba ama. Osobaketa koongwa ibota lyaakɛ, kɔmɔa, moongwe mo kusaoleaya bando ilɔngɔ lye bikete bikataa bitoketa awɛ. Olya ne wabaitana moole mwikunyɛ ne kobaingecha mɔ kyɛɛngɛ kyaakɛ kye kokanyakanya. 10 Kaɛ kaɛ banu ndemwaongwa bando ba Kakua, chɔ leno motae bando bakɛ. Kabee kaɛ kaɛ, Kakua ndabakweaya lokwa, ano mookwelwa lokwa naakɛ.

Kuchikaa boe mokambi wa Kakua

11 Ngondwa chaanɛ, moe baɛni, kabee bando babeoka mo ono mɔsɛngɛ, kɔ bɔbɔ natwiyaya kwinu byabua, mwikɛngɛ ne ikaa lyɛ kɛ lɔkɔba lituchiana ne motema. 12 Mɔɔbɛ ne bikete byaachi asambea bando bɛ mɔsɛngɛ. Moketaye bobo, kɔmɔa atabainyekechee abɔ itɛ mooketa bwabea, nɛ kɔmɔa bikete binu byaachi batombeke Kakua loa lusu lwɛ kɔɔtɔka kwakɛ.

Kɔnyɛmya bakoo

13 Koetea Mwaame, moongwe mo koeleleka bakoo batonyaa: moeleleke nombe kɔmɔa awɛ ne oe ne otonyaa bando basɛ. 14 Bwakaɛ moeleleke bakoo baɛbwa bokoo ne nombe, ko kokanya batoketa bwabea ne koseka batoketa byaachi. 15 Kɔmɔa Kakua otokonda mɔbɛ mo koketa byaachi, ku kuchiba tonwa twe maɔku ne biobeobe. 16 Mɔbɛ mukwiungwa bwe bando bataasi bokakwe. Koongwa kwiinu kwe muusi bokakwe kɔɔbɛchaya njea yee kobwekea bwabea; mɔbɛ mukwiungwa bwe ngambi cha Kakua. 17 Mɔnyɛmyɛ bando basɛ. Mokondaye babotwa niinu Bakilisito; motene Kakua, mɔnyɛmyɛ nombe.

Koeya Yɛsu ko manɛnɛ

18 Na banu ngambi, mɔbɛ mɔ kɔnyɛmya bakoo binu be meemo, ataasi baa bae baachi nɛ kɔɔla ikɛɛsa; ɔbɛɛ baa bae ne kochoa. 19 Kɔmɔa ingɛ mookemya metema ko manɛnɛ matokonja banu naanga ndemwaketa bwabea, ko njea yɛ kɔnyɛmya Kakua, awɛ otabatɛchɛɛ kaowe. 20 Koe boke boombe ingɛ mookemya metema ko manɛnɛ me bwabea boketee baanu? Ingɛ mosokemya metema ko manɛnɛ makonjee banu mo koketa bwaachi, Kakua otamɛmɛ. 21 Ne ko bobo kobaitanee Kakua momoyee, kɔmɔa Kilisito nawɛ bwakaɛ wamɔa manɛnɛ ko mbanga yiinu, na kobasiela lɔtɔndɔ ko koyea njea yaakɛ. 22 Awɛ ndaketa bwabea bɔɔsɛ, kuusi ikomo lye manu lyaola mo kanywa kaakɛ. ^{▼▼Yɔɔla Isa 53:9.} 23 Amɔbɔɛa abɔ, ndaɔtɔsɛa mabɛngɛchi. Amɔmɔnya abɔ manɛnɛ, ndabaemboa, Waibeka mo mabɔkɔ ma Kakua ɔtɔbɛmbɛ makomo me bando ku kiinɛkinɛ. 24 Kilisito awɛ mwɛɛnɛ wachaa misiɔ yee bwabea bwito monda mwɛ lɔkɔba lwakɛ, akwa awɛ ko mote we maakanu. Waketa boa ko bae kosambokana ne bwabea kɔ lɔsɛ ne tuchikane nɛ mwɛchɔ mwaachi kombaa kwa Kakua. Koetea kotutwa kwakɛ, banu mooloke. 25 Kɔmɔa mɔbɛɛ boe mɛkɔkɔ yachimbea, ano mɔsɔɔtɔkɛa olya ɔbɛɛ mosangi ne mɔlɔli we metema yiinu.