1Pe 4 | ZmbSC | STEP | Totocheba itɛ Kilisito wakonja manɛnɛ kɛ lɔkɔba. Na baanu mwifɛkɛɛnyɛ moongwe ne lokani boe lwakɛ. Kɔmɔa, mondo utwimenya manɛnɛ me mobee, bitokoka oongwe mɔ kɔlɛkɛa koketa bwabea.

1 Peter 4

Mwɛchɔ moyamoya

1 Totocheba itɛ Kilisito wakonja manɛnɛ kɛ lɔkɔba. Na baanu mwifɛkɛɛnyɛ moongwe ne lokani boe lwakɛ. Kɔmɔa, mondo utwimenya manɛnɛ me mobee, bitokoka oongwe mɔ kɔlɛkɛa koketa bwabea. 2 Ko leno, muuchikanaya kabee mo koketa bitoekya kɛ lɔkɔba, muchikane mo koketa bitokonda Kakua ko keeko kesobasaela baanu kuchikaa mɔ mɔsɛngɛ. 3 Ko bobo, alya kaɛ mwachimbecha masu mabua mo koketa biitowaena ne bapakani. Mɔbɛɛ mo koketaya bwambya, ikaa lyabea; nɛ bɔngɔlwa. Mɔbɛchayɛ mo kolya nɛ kɔsɔa byabua ne kwiyaya ko maboka, kwe kaseba. 4 Leno, baa bapakani baokanakana kɔmɔa itɛ mweekee kosambea nabɔ kabee mo bikete byabɔ bye masɔni koeta kesabya; kɔ bɔbɔ bia ne bitobasukua bamɔtɔndɛ banu. 5 Baa bando bataɔchɛ makomo mabɔ kombaa kwa Kakua wausia kwisangya kɔbɛmba makomo me bakwa ne bɛ mwɛchɔ. 6 Nɛ kɔ bɔbɔ, bibyɔ ne byatoma Kilisito oyee kwaeyeche Ilɔngɔ Lyaachi ko bakwo. Baa bakwo babɛmbiwea makomo mabɔ kɛ lɔkɔba boe bakinɛ bando, koengama ne biketaye abɔ mɔ mɔsɛngɛ. Mo leno, koetea Motema wa Ama batae ne mwɛchɔ otokonjekana ko kokonda kwa Kakua.

7 Kɔbɔnga kwe biemo biisɛ kungaolea. Kɔ bɔbɔ moongwe ne lokani ne kuchiboa miisɔ ko bwabea ko baanu koongwa nɛ bɔkɛtɛ bye kwiyaya kwa Kakua. 8 Kombaa kwe biisɛ moongwe mo kokondana kotasi kɔkɔɛka, kɔmɔa kokondana kutuchimya bwabea bwabua. 9 Mɔsɛkɛanaye asambea banu kotasi busu. 10 Mondo ɔɔsɛ asambea banu okambekye keemo kɛsɛ kye motema kyamɔɛcha Kakua ko kokwasa bakinɛ. Ko bobo motaongwe basangi baachi batocheba kosanga keemo kɛsɛ kye motema kya mɔɛcha Kakua. 11 Olya otoeyekya, ɔbɛɛ mo koeyekya Makomo ma Kakua botokoka amɔ. Na olya otokwasa bakinɛ, ɔbakwasaye ne bɔkɛtɛ bwamɔɛcha Kakua, abɔ batoketa bobo, kɔmɔa Kakua osekiwe ko makomo masɛ koetea Yɛsu Kilisito wee ne boombe ne bɔkɛtɛ meombo ne meombo, bɔbɔ.

Kɔmɔa manɛnɛ kombanga ya Kilisito

12 Babotwa naanɛ, nde kokanakana kɔ kɔmɔa manɛnɛ makoo mɛ kɔɛlɛkiwa kwinu. Kɔkɔ kɔɛlɛkiwa mokobaekaya boe kikinɛ keemo keyakeya kwinu. 13 Mɔmɛmaye kɔmɔa moe mo kosambea na Kilisito manɛnɛ. Kɔ bɔbɔ motainande nɛ kɛmɛmɔ atamɔɛkɛ awɛ mo boombe bwakɛ. 14 Kende basɔmɔbɛngɛa kombanga yee komoyea Kilisito, mosoenoka! Kɔmɔa moe ne Motema we boombe wa Kakua. 15 Asambea banu abɛchaya naa ne mondo ɔmɔɔsa otokonja manɛnɛ ku kuchia, ku luubo, ku koketa bwabea, ku kwiingeecha mo makomo me bando bakinɛ. 16 Ingɛ mondo ookonja manɛnɛ kɔmɔa oe mokilisito, ndamɔnaya masɔni. Osekaye Kakua kɔmɔa ɔsɔɛbwa lea chiina. 17 Kiinɛkinɛ, Keeko kye kɔmɔnya manɛnɛ kesoolea. Ne mamɔ manɛnɛ matabangoe ne bando ba Kakua. Ne ingɛ masobangokea ko baa bando ba Kakua, ko boa kɔ kɔbɔnga bitaongwe booni ko baa bataasi batuimenya Ilɔngɔ Lyaachi lya Kakua? 18 Kabee, bie na bobo bɔtɔɔcha Tuchimba Twa Ama:
«Ingɛ kooloka kwe mondo we kiinɛkinɛ kombaa kwa Kakua koe ne kokoba,
bitabɛ booni ko bando babea ne bae ne bwabea?» ^{▼▼Yɔɔla Bis 11:31.}

19 Ko bobo bando bae mo kokonja manɛnɛ kɔmɔa bae mo koketa botokonda Kakua, baketaye byaachi. Kabee babeke metema yaabɔ mo mabɔkɔ ma Kakua wabasɛnga, ne otoketa bya laa awɛ.