1Ti 4 | ZmbSC | STEP | Motema wa Ama ɔtɔɔcha paa paa itɛ: ko keeko kyɛ kɔbɔnga, bando babua bataye mɔsɛɛsɛ mwe iekekeo lyabɔ ne koyea metema yee manu ne maeyechi me masombo.

1 Timothy 4

Mwilɔlɛ ne baeyechi be manu

1 Motema wa Ama ɔtɔɔcha paa paa itɛ: ko keeko kyɛ kɔbɔnga, bando babua bataye mɔsɛɛsɛ mwe iekekeo lyabɔ ne koyea metema yee manu ne maeyechi me masombo. 2 Batɔɛngiwa ne bando be tobee tobee be manu ne bɛ mɛsɔna bae ne lokani lwasakwa. 3 Abɔ bae mokoeyecha itɛ bie byabea kotombana, ne batokandea bando kolya bimɔchi biewa. Kakua wasɛnga bia byekolya, kɔmɔa itɛ batumwimenya ne kocheba kiinɛkinɛ babilye kɔmɔngɔ kwe kobitwamboela. 4 Kɛsɛ kyasɛnga Kakua kee kyaachi, na bono kuusi naa nɛ kɛmɔ kinakɔniwa, bie bwaachi koketwamboela kombaa kwe kokelya. 5 Kɔmɔa, koetea njea yee Ikomo lya Kakua ne lye kuiyaya, byekolya bisɔɔywa kombaa kwakɛ.

Mokambi mwaachi wa Kilisito

6 Ingɛ otabasaolee paa paa babotwa nao maa makomo, otabɛ mokambi mwaachi wa Kilisito Yɛsu, otolesiwa kemotema ne makomo me iekekeo, ne maeyechi maachi me kiinɛkinɛ ma uungwa awɛ. 7 Kɔna ngano che manu chie mɔ kɔsɛsɛkana ne iekekeo. Iyobecha mɔ kɔnyɛmya Kakua ku kiinɛkinɛ. 8 Kwiyobecha kɛlɔkɔba koe kwaachi, koe ne biemo bichiinini, kwisambya nɛ kɔnyɛmya Kakua koe kwaachi ku biisɛ, kɔmɔa kɔtɔtɔɛcha ilai lye mwɛchɔ we leno la olya wakabaka. 9 Lɛlyɔ ikomo lee ne lye kiinɛkinɛ, nalyo leengye kwimenyiwa ne basɛɛ. 10 Nɛ kɔbɔ kutuikuula bae ne kuchiana, kɔmɔa toe mo koekekea Kakua oe nɛ mwɛchɔ, oe Moolochi we bando basɛ, nɛ kɛtɛchɛ Moolochi we batuimenya. 11 Maa ne makomo maengye awɛ kusiela ne koeyecha. 12 Ndekwilɛkɛa kɔnyɛkiwa ne mondo ɔɔsɛ kɔmɔa okee muulwa. Ongwa keeyeo ko batuimenya: kɔ mɛɔcha, ko kokonda, ko iekekeo, ku bikete byaachi, ne ko kuikɛnga ne bwabea bɔsɛ. 13 Mo koendecha akabaka mee, itendemeka mɔ kɔyɔɔla Tuchimba twa Ama, mo kuisinga ne mo koeyecha. 14 Ndɛkɔkɔɛka kokambekya bɔkɛtɛ bwe Motema boe monda mwao, bwakonja awɛ koetea byaɔcha Ndomwa cha Kakua, ne ko njea yee kokobekea manja me ketongo ke bakoo ke Kanisa. 15 Keta bia biisɛ, bitɛcha momotema wao. Alya bando basɛ batamɔɛ botoya awɛ kombaa. 16 Ilɔla awɛ mwɛnɛ ne maeyechi mao. Ndɔlɛkɛaya bibi biemo. Kɔmɔa ingɛ osoketa bɔbɔ otaiolole awɛ mwɛnɛ, ne koolola baa bae mo kukuungwa.