1Ti 5 | ZmbSC | STEP | Ndakokandokea banunu, baana bwe tati wao; aana bitekoa bwe babotwa,

1 Timothy 5

Mitindɔ ye baimenyi

1 Ndakokandokea banunu, baana bwe tati wao; aana bitekoa bwe babotwa, 2 babakachi banunu bwe nɛnɛ, baa bakee totombe bwe metamba, ne kwilɔla ne bwabea bɔsɛ. 3 Nyɛmya balyangɔ bae balyangɔ be kiinɛkinɛ 4 Kende mwalyango oe ne baana ne ngoko, baieyeche kombaa kwe biisɛ kɔnyɛmya nɔngɔ yaabɔ, ne koana ko bababota, kɔmɔa lele ikomo ne lyaachi ne litwimenyewa na Kakua. 5 Olya oe mwalyango kiinɛkinɛ ne kosangamekewa ikɛɛsa oe mo kobekea Kakua iekekeo lyaakɛ, ne oe mukuiyaya butu ne chooba. 6 Kɔmɔa olya otaemanee kokonda mɔsɛngɛ ususia kokwa okee mwɛchɔ. 7 Balaa mama makomo babundewaya ne bwabea. 8 Kɔ bɔbɔ, kende mondo ndasanga nɔngɔ yaakɛ, kɛtɛchɛ baa bae mo ndabo yaakɛ bɛɛnɛ, ɔsɔɔna iekekeo ne awɛ ne wa bea koeta olya otaasi ndinaimenya imenya. 9 Mwalyango ndakunyewaya chiina kende ndiinakokya meaka makumi mosambo, ne awɛ oongwe mokachi we moome ɔmɔɔsa. 10 Na awɛ utuindoeka mubikete byaachi, kende otokongoseka baana, kende ɔtɔsɛkɛɛla bɛni, kende ɔtɔɔya meende yee ngambi cha Kakua, kende otoyeela bae mo manɛnɛ, kende otoketa bikete biisɛ byaachi. 11 Balyangɔ bataasi bana nuna, ikandea kukunya maina mabɔ, kɔmɔa kende basokonda kɔsɔngwa, batakɔnɛ kokambea Kilisito. 12 Naabɔ batamɔɛ manɛnɛ kɔmɔa basɔlɛkɛa iekekeo lyabɔ lye kombaa. 13 Ne ko boa, batwibeka ne kitufu mo kochomba ndabo ko ndabo, ne nde kitufu bokata ne kosambya ne bɔɔcha ɔsɔɔcha ne kɔsɔngɛkanya bando ne matɛnda. 14 Ne ko boa natokonda balyangɔ bataasi baananuna basɔngwɛ, babote baana, bakongoseke baana babɔ, basielaya moangani iboa lye kobatɔnda: 15 Kɔmɔa bakinɛ bausia kutuuluka ne koyea Isombo. 16 Kende mwamoome ɔbɛɛ mwamokachi ususia kwimenya Kilisito oe ne balyangɔ ɔbatɛndɛɛ, kanisa kabaenda kɛnyɛmɛnɔ, kɔmɔa katɛndɛɛ baa bae balyangɔ kiinɛkinɛ.

Banunu mo ndabo ya Kakua

17 Banunu batɔɛnda bwaachi ne Ndabo ya Kakua, batowaena kokonja bɔnyɛmu ngongobwa chibee, kɛtɛchɛ baa batwikuula ne Ikomo lya Kakua ne koeyecha. 18 Kɔmɔa tuchimba tɔtɔcha: «Ndekuchiba kanwa ke ngombe kende yee mo kolya ngano» ^{▼▼Yɔɔla Koe 24:5.}, ne kabee: «Mokambi we meemo otowaena ikonja lyaakɛ.» ^{▼▼Yɔɔla Mat 10:10; Law 19:13.} 19 Ndwimenyaya ikomo lɛtɔɔchɛa abɔ mununu kende linasingeechwa ne tonwa tobee ɔbɛ totanu. 20 Baa batoketa bwabea baemoka bokoo bokoo kombaa kwe bando basɛ, kɔmɔa baa bakinɛ baasɛ batene. 21 Natokolaa lele ikomo kombaa kwa Kakua, ne kombaa kwa Yɛsu Kilisito, ne kombaa kwe meombo ya sɔbɔiwa, keta bibi bitokosaolea mee kotasi kɔsɔbɔa, ndoketaya naa ne ikomo lɛmɔɔsa ko koenokya. 22 Ndɛkɔtɛchɛa mondo kɔbɔkɔ chaa chaa, ɔbɛɛ ndekwingea mo bwabea bwe bando bakinɛ, ibeka awɛ mwɛɛnɛ tɔɔ. 23 Nde kɔsɔaya maache bokata, sɔa malu machiinini, ko mbanga yee ikundu lyao, ne bolwachi butukukuula masu mabua. 24 Bwabea bwe bando bakinɛ bɔtɔmɔɛka paa paa naanga ne bunabamɔnya manɛnɛ, kobakinɛ bwabea bwabɔ botobayea kɔmɔngɔ. 25 Bwakaɛboa bikete byaachi bitɔmɔɛka paa, ne bia bitaasi kɔmɔɛka, biikaisame.