1Ti 6 | ZmbSC | STEP | Bando basɛ bae bacha baengye kɔnyɛmya bakoo babɔ, kɔmɔa bando bababɛngɛa chiina lya Kakua ne kɔkyɛta maeyechi mito.

1 Timothy 6

Baacha ne bakoo babɔ

1 Bando basɛ bae bacha baengye kɔnyɛmya bakoo babɔ, kɔmɔa bando bababɛngɛa chiina lya Kakua ne kɔkyɛta maeyechi mito. 2 Na baa bae ne bakoo Bakilisito, baenaya kobanyɛmya, kɔmɔa bae ne babotwa nabɔ. Baengye kobakambea byaachi koeta, kɔmɔa abɔ bae Bakilisito baboteka ne batokondwa, nabɔ batokonja lɔkɔka lwe meemo yaabɔ.

Maeyechi ko mbanga yee manu ne ketama kyɛ byɛndɔ

Maa ne makomo maengye awɛ kweyecha.

3 Ingɛ mondo osoeyecha maeyechi makinɛ, nawɛ ndatuimenya makomo me kiinɛkinɛ ma Yɛsu Kilisito, ɔbɛɛ maeyechi maatoeyana ne lini lito, 4 awɛ wachaa kwimɔna, nawɛ ndaacheba keemo. Awɛ oe ne bolwachi bwe koangechana nɛ kɔtɛkɛta koetea mɛɔcha. Na bibi bitobesa busu, moocho, mabɛngɛchi, kokandekana, 5 ne matɛkɛta mataasi na kɔbɔnga asambea bando baachimbecha lokani ne koebeela kiinɛkinɛ. Inde, abɔ ne batoninga itɛ, lini ne njea yee kokonja ikonja. 6 Kiinɛkinɛ, lini lee ne ikonja lekoo ko mondo ingɛ ɔtɔmɛma ne biemo bie naakɛ. 7 Kɔmɔa ndetwabaka ne keemo mɔ mɔsɛngɛ, kabee tokaɔtɔkɛ ne keemo. 8 Kɔ bɔbɔ, toswaba ne biewa ne biwalwa, bia biokoka. 9 Baa batokonda koba ngonji, batokea kɔ kɔɛlɛkiwa nɛ mɔ tɔlɛbɔ. Ne koetea ketama kyabua ne bɔɔkwa ne bwabea, bitobaingecha mo kosielwa nɛ kɔɔnɛka. 10 Kɔmɔa, kokonda tombaambaa ne kisina kye bwabea bɔɔsɛ. Ko njea yee kotokonda, babua baokea mwiekekeo lyabɔ, ne kwingea mo tosina twabua.

Maani kwa Timɔtɛɔ

11 Awɛ mondo wa Kakua, isɔka maa makomo, isambya ne kiinɛkinɛ, kɔnyɛmya, kokonda, kokimya motema nɛ kɔɔla. 12 Chiana keboka kyaachi mo koseka iekekeo lyao, uikonjea mwɛchɔ we meombo wakoetanea Kakua aitaboka awɛ mbea yee iekekeo lyao kombaa kwe bando babua. 13 Kombaa kwa Kakua ɔtɔɛcha biemo biisɛ mwɛchɔ, ne kombaa kwa Yɛsu Kilisito waɔcha bye kiinɛkinɛ kombaa kwa Pɔsɔ Pilatɔ, nasukusiela maa makomo; 14 bunda makomo malaiwee awɛ ko kiinɛkinɛ, makongoseka bwaachi ne akaolea lusu lwe Mwaame wito Yɛsu Kilisito. 15 Kɔmɔɛka kwakɛ kokaketeka koetea bwa panga Kakua. Oolya ne Kakua olengye kotombekwa, otonyaa awɛ ikɛɛsa, Nombe yee binombe ne Mwaame we baame 16 Awɛ ikɛɛsa ne otaasi ndakakwe, ne utuchikaa mɔ kyɛɛngɛ ketaasi mondo ndakakiisɛnɛnɛɛ. Kuusi mondo wasamɔmɔa, ɔbɛɛ kuusi mondo wakamɔmɔa. Awɛ ne oe nɛ bɔnyɛmu nɛ bɔkɛtɛ bwe meombo. Biibɛ bɔbɔ.

Maani ko ngonji

17 Balaa baa bae ngonji mo ona mɔsɛngɛ wa leno, baitombekaya, ne babekaya iekekeo lyabɔ kɔ byɛndɔ bitochimbea chaachaa. Baekekee Kakua ɔtɔtɔɛcha biemo biisɛ byabua tuimɛmɛ nabyo. 18 Basaolea bakete bwaachi, baongwe ngonji ko bikete byaachi, nabɔ bakwasane ko motema mwaachi na koabanya byɛndɔ byabɔ ko bakinɛ. 19 Koetea ena njea, bataibekee bɔɔngya bwaachi bwe masu mabua ko masu makabaka, ko kokonja mwɛchɔ we kiinɛkinɛ.

Ilai

20 Ee Timɔtɛɔ, kongoseka bwaachi kɛɛbwɛɛ awɛ, mo kuikɛnga ne makomo mɛ kɛmɔsɛngɛ ne meango etasi nɛ kyɛndɔ ko bia bitoetana bakinɛ maeyechi bie ne manu. 21 Mo koyea maeyechi mamɔ, bamɔ bando baotoka mwiekekeo lyabɔ. Natobaɛngɛlɛa lokwa kotoka kwa Kakua.