2Jo | ZmbSC | STEP |

2 John

Kwinokea

1 Ona mokanda ototoka kwanɛ mee mununu. Natukukunyea awɛ nɛnɛ wasɔbɔiwa na Kakua, amɔsa ne baana bao batokonda mee byɛ sɛsɛ. Ndɛɛkɔ mee ikɛɛsa otobakonda, naanga ne baa batocheba kiinɛkinɛ batobakonda kabee, 2 Kɔmɔa ena kiinɛkinɛ ituchikaa monda mwiito, nayo kiinɛkinɛ etabɛ niito meaka ne meombo. 3 Tati Kakua kɔmɔɔsa na Yɛsu Kilisito, Mwaana waakɛ, batatɔɛchɛ lɔkɔka, lokwa ne nyaa monda mwe kiinɛkinɛ ne kokonda.

Kuchikaa monda mwe kiinɛkinɛ ne kokonda

4 Namɛmɛɛ byɛ sɛsɛ kɔmɔa itɛ bamɔchi asambea baana bao batuchikana mu kiinɛkinɛ boa bɔtɔɔcha salia ya Tati. 5 Ko leno ɛɛ nɛnɛ, natwiyaya koe awɛ: tokondane. Kɔmɔa iisi salia meyameya itukunyea mee, ee ne salia yakonja bae kombaa. 6 Kokonda koe ne kuchikana mɔ kɔnyɛmya salia ya Kakua. Eena ne salia yaungwa banu kombaa: muchikae mo kokondana. 7 Kɔmɔa bando be manu babua basoolea mɔ mɔsɛngɛ. Baa bando batuimenya itɛ Mwaame Yɛsu wabaka mɔ lɔkɔba lwe kemondo. Olya otaasi ndatuimenya bobo oe ne mondo we manu ne otoangecha Kilisito. 8 Kɔ bɔbɔ mwilɔlɛ banu bɛɛnɛ mobachimbecha bimuka bye meemo yiinu, mokonje kɛɛchwa kyaachi. 9 Ɔɔsɛ olya otaye njɔɔ ne otaasi ndatuchikaa mo maeyechi ma Kilisito, olya mondo ndatosamba na Kakua. Na olya utuchikaa mo mamɔ maeyechi otosamba na Tati ne Mwaana bwakaɛ. 10 Ingɛ osoba kwinu, na awɛ ndabaeyecha mama maeyechi, mɔmɔsɛkɛɛlaya mo ndabo yiinu, ɔbɛɛ kumwinokea; 11 kɔmɔa kende usumwinokea, ososamba naakɛ ko makomo maakɛ mabea.

Kwinokea kwɛ kɔbɔnga

12 Nae ne mabua me kobasaolea, sitokonda komakunya mo ona mokanda. Natoekekea kobaɛndɛa nɛ kɔɔcha niinu kanwa kwe kanwa ko bae kochekwa nɛ kɛmɛmɔ kiinɛkinɛ. 13 Baana be motamba wao wasɔbɔiwa na Kakua bwakaɛ batukwinokea.