2Pe 2 | ZmbSC | STEP | Kaɛ kaɛ, kwaiochecha ndɛnda che manu asambea baana be Isilaɛli. Bwakaɛ boa ne bwakaiochecha baeyechi be manu mwingya mwiinu. Batabɛ mo kosaola makomo me manu mu bwise, matokoka kɔɔna. Bataolee ne mo keeko kye kɔkɔna Mwaame wabaolola. Ko bobo, bataiotee manɛnɛ matabakete basie njɛngɔ.

2 Peter 2

Baeyechi be manu

1 Kaɛ kaɛ, kwaiochecha ndɛnda che manu asambea baana be Isilaɛli. Bwakaɛ boa ne bwakaiochecha baeyechi be manu mwingya mwiinu. Batabɛ mo kosaola makomo me manu mu bwise, matokoka kɔɔna. Bataolee ne mo keeko kye kɔkɔna Mwaame wabaolola. Ko bobo, bataiotee manɛnɛ matabakete basie njɛngɔ. 2 Bando babua bataeye bikete byabɔ byabea; ne koetea abɔ, maeyechi ma Mwaame matatɔndwayɛ. 3 Ne koetea ikaa lye byɛndɔ, baa baeyechi be manu bataikonjee byɛndɔ mɔ myɔngɔ yiinu, mɔ mɛɔcha yee manu. Kobangoa kaɛ, Kakua wausia kobasangyea manɛnɛ, ne kusia njɛngɔ kwabɔ koekee njɔɔ.

4 Naa ne meombo yaketa bwabea Kakua ndabakwea lokwa, wabakosoa ku iboa lye manɛnɛ. Koa bae mo kosangewa ne kokakwa mwikunyɛ lekoo ko koendecha lusu lwe mayombe. 5 Kakua ndakwea bando be kaɛ lokwa kotasi kobamɔnya manɛnɛ. Asia awɛ bando babea njɛngɔ ne mɔnɛmbɔ we mbua, wakongoseka Nɔa ne bando bakinɛ mosambo, awɛ wasaola bando makomo me kiinɛkinɛ. 6 Bwakaɛ bwakaɛ Kakua wamɔnya manɛnɛ tolya twɛ Sɔlɔma nɛ Kɔmɔla, ne kututuula mbɛmba. Waketea bɔbɔ ne koangoecha baa babea. 7 Loti awɛ, mondo we kiinɛkinɛ kombaa kwakɛ na kooloka. Oona Loti lokani lwa momwaokanaya mɔ kɔmɔa bikete byabea bye baa batoketa bwabea. 8 Bwakaɛ, Lɔti ne waketaya makomo maachi. Lusu ku lusu, waimɔɛnaya ne kwiungea makomo mabea maketaya baa bando babea, kɔmɔa wabɛchaya naabɔ amɔɔsa. Maa makomo mamochabyaya motema byatɔba. 9 Bia ne bitoangwecha itɛ, Mwaame otocheba njea yee koolola bando mɔ kɔɛlɛkiwa, baa bae bwaachi kombaa kwakɛ. Kabee otocheba kokongoseka bando babea ko kobaangoecha manɛnɛ mo loa lusu lwe mayombe 10 Baa batoya mu bikete byabɔ byabea bye ikaa nɛ kɔnyɛka bokoo bwa Kakua baa ne batakonje manɛnɛ mabua kokoela bando bakinɛ.

Baa baeyechi be manu bae ne muuma ne kuitombeka byabua, na abɔ batotena kɔbɛngɛa byabombiwa bya Ama bye mwiyoo. 11 Ɔbɛɛ bɔbɔ, meombo etobaeta bɔkɛtɛ nɛ boombe etobataeka ko Nganya bwabea mɔ kɔbatɔnda kwa Mwaame. 12 Baa baeyechi be manu, abɔ batoongwa boe nyama che chaani chitoboteka ku kubundwa mɔtɔlɛbɔ ne kuchiiwa. Batɔtɔnda makomo mataasi abɔ batocheba. Ko boa, batachiiwe boe chia nyama. 13 Maa ne mayombe makakonja abɔ koengama ne bwabea bwaketaya abɔ. Baanga kwimɛma koketa bitokonda ngɔba chabɔ mwingya chooba. Kabee atolya baanu biewa bye ketokoyo amɔsa nabɔ, abɔ batwimɛma kobaonga baanu. Bia ne bitobesa masɔni ne kokanakana. 14 Miisɔ mabo matochaa bwambya. Abɔ baatɔkɔɛka koketa bwabea. Batɔsɔngɔɔla bando bataasi nɛ bɔkɛtɛ mu iekekeo. Banyaiwa ne ikaa lye kokonda byɛndɔ. Kiinɛkinɛ, Kakua wausia kobakimoa. 15 Baɔlɛkɛa njea yee kiinɛkinɛ, ne kuchimbea mo koyea njea ya Balama, mwaana wa Bɛɔli. Olya Balama wakonda kokonja byɛndɔ mo njea etaasi myaachi. ^{▼▼Yɔɔla Koba 31:16.} 16 Wakandokiwa ko bwabea bwakɛ. Bonda etaasi ɛɛtɔɔcha na kɔɔcha boe mondo, ne kuchibea ikomo lyɛ kɔɔka lya elya ndɛnda. ^{▼▼Yɔɔla Koba 22:21-35.}

17 Baa baeyechi be manu bae ne boe ibongo lyausia kokama. Kabee bae boe ikongo letoendwa nɛ lɔbɛ lwachoa. Kakua wausia kobasangyea buchikye bwabɔ ku ikunyɛ lya mbaa katende 18 Batwitombeka kotasi kwisama mɔ kɔɔcha mɛɔcha yaabɔ bokata. Kabee batɔɛlɛka bando batwiocha mo ketongo kye baa bataasi kocheba makomo me kiinɛkinɛ. Mo kobaonga baanga kokambekya makomo mabɔ me ikaa le bwambya, 19 mo kobalaa itɛ bataole mobocha, koko ne abɔ bɛɛnɛ bakee ne bacha ko makomo me kuchimbea! Kɔmɔa mondo ɔɔsɛ waanga ne mocha we lokani lotomonyaa. 20 Bando bausia koola mwi ikaa lyabea le oono mɔsɛngɛ, koetea njea yee kocheba Mwaame ne Moolochi wiito Yɛsu Kilisito, ne Moolochi. Kende bataimenye kabee kusukwiwa na lea ikaa, alya kɔbɔnga kwabɔ kotabɛ kwabea koeta bwabɛchaya abɔ kombaa! 21 Baa bando, bingaongwa bwaachi koe abɔ ndekocheba njea yee kiinɛkinɛ, kotasi komecheba ne kɔlɛkɛa elya salia ya ama yaɛchiwa abɔ. 22 Kea keemo kyaketa abɔ ketoangoecha kisimo kɛtɔɔcha paa paa itɛ: «Imbwa ɛsɔɔtɔkɛa kolya bisɛa byakɛ.» ^{▼▼Yɔɔla Bis 26:11.} kabee itɛ: «Ngoobe iusia kɔɔyiwa, ɛsɔɔtɔkɛa kabee kwibuula mu bitɔbɔ.»