2Ti 1 | ZmbSC | STEP | Mee Paɔlɔ, nae ndomwa ya Yɛsu Kilisito, ko kokonda kwa Kakua ikɛɛsa. Kakua ondomee nasaoleya bando ilai lyɛ mwɛchɔ lekonjee bae koetea koongwa amɔsa na Yɛsu Kilisito.

2 Timothy 1

Kwinokea

1 Mee Paɔlɔ, nae ndomwa ya Yɛsu Kilisito, ko kokonda kwa Kakua ikɛɛsa. Kakua ondomee nasaoleya bando ilai lyɛ mwɛchɔ lekonjee bae koetea koongwa amɔsa na Yɛsu Kilisito. 2 Mee ne utukukunyea awɛ Timɔtɛɔ, mwaana waanɛ otokonda mee. Natɔɛngɛa kwa Tati Kakua ne kwa Mwaame wiito Yɛsu Kilisito, bakɔɛchɛ bwaachi. Bakuungwee bwakaɛ lokwa, ne bakɔɛchɛ kabee nyaa.

Paɔlɔ ososeka Kakua

3 Nasoseka Kakua, otokambea mee ne motema we kiinɛkinɛ boa bwaketaya baisanɛ mokoo. Bwakaɛ natokoeyoka mee mu kwiyaya kwanɛ butu ne chooba, natoseka Kakua. 4 Nae mo koeyoka misɔɔchi mao, nae kabee ne saki yɛ kɔ kɔmɔa, kɔmɔa motema waanɛ ochae nɛ kɛmɛmɔ.

5 Nae mo koeyoka kabee iekekeo lyao monda mwa Kakua letaasi lwe koonga, iekekeo lyabɛa na inao mokoo wa Loisi na nɛnɛ wao wa Yuniki babɛchaya mu kumwimenya. Natocheba kiinɛkinɛ awɛ oe nayo boe abɔ. 6 Kɔ bɔbɔ, nae mo ko koeyoa, sekecha bɔkɛtɛ bwa Kakua, bokonjee awɛ akobekee mee manja mo motwe wao. 7 Ko boa, Kakua ndatɔɛcha Motema we kotobeka nɛ bɔɔba. Watɔɛcha ne Motema we kotobeka nɛ bɔkɛtɛ, ko kokonda ne kwikɔbɔa. 8 Ko boa, nde kokwa masɔni mɛ kɔɔcha makomo matocheba awɛ ma Mwaame wiito. Kabee ndekokwa masɔni ko boa boe mee mo kekako ko mbanga yaakɛ. Ongwa naanɛ mo keeko kye mayombe me kosaola Ilɔngɔ Lyaachi nɛ bɔkɛtɛ bɔkɔɛchɛɛ Kakua. 9 Awɛ ne watoolola, kabee awɛ ne watwitana, kɔmɔa toongwe bando bakɛ ba ama. Koa kooloka kwiito kotoongwaya ko bikete biito, koe ne ko boa bwakonda awɛ koketa ko lokwa lwakɛ awɛ mwɛɛnɛ. Na loa lokwa watɔɛcha alwo, koeta Kilisito Yɛsu, kombaa kwe kɔsɛnga mɔsɛngɛ. 10 Mo leno, loa lokwa lɔsɔmɔɛka koetea koba kwe Moolochi wiito Kilisito Yɛsu. Awɛ wausia kɔɔna lokwo, ne koangoecha mwɛchɔ we meombo koetea Ilɔngɔ Lyaachi. 11 Lea Ilɔngɔ Lyaachi ne lyaketa Kakua ombekee monande, ndomwa ne mweyechi. 12 Nɛ kɔ bɔbɔ nae mu kubimɔɛna manɛnɛ, situbikwea masɔni. Kɔmɔa olya utwimenya mee mo motema waanɛ natomocheba bwaachi. Bwakaɛ, natocheba itɛ, biisɛ byambɛcha awɛ oe nɛ bɔkɛtɛ bwe kubikongoseka ɛka alya akaotoka awɛ. 13 Ko boa, makomo masɛ makoeyecha mee, mabunda mu iekekeo ne mo kokondana kwito, koetea koongwa amɔsa na Kilisito Yɛsu. 14 Biemo biisɛ byaachi byakɔɛcha Kakua, biɔnga kɔ bɔkɛtɛ bwe Motema wa Ama utuchikaa monda mwiito.

15 Mbaya waanga kocheba awɛ mwɛɛnɛ itɛ, babotwa niito bɛ mɔsɛngɛ we Asia baonjangameka; asambea abɔ koe Fɛngɛlɔ na Elɛmɛngɛnɛ. 16 Naanga nɛ bɔbɔ, bando be ndabo ya Ɔnɛsifɔlɔ, abɔ Kakua oongwe mo kobaenokya. Kɔmɔa olya Ɔnɛsifɔlɔ waoleaya kwandɛchɛ motema, ne ndangweaya masɔni kende ɔsɔmbɔa mo kekako. 17 Ne aolea awɛ mo mosomba we Lɔma, waikuula konenga ne bwa mbɔa awɛ. 18 Kabee, mbaya waanga kocheba awɛ mwɛɛnɛ itɛ, wangwachaya abɛchaya mee mo mosomba wɛ Ɛfɛsɔ. Ne ko boa, Mwaame wiito omuungwee lokwa loa lusu lwe kɔbɔnga.