3Jo | ZmbSC | STEP |

3 John

Kwinokea

1 Ona mokanda ototoka kwanɛ mee mununu. Natukukunyea awɛ Kayɔ, ngondwa yaanɛ, otokonda mee kiinɛkinɛ. 2 Ngondwa yaanɛ, natokonda okambe bwaachi ko keemo kɛsɛ: ongwa ne iyɛma lyaachi lye mobee, bɔɛwɛ nalyo kemotema. 3 Namɛmɛɛ byabua aolelee bamɔchi babotwa niito ne kusingeecha ko mbanga yee kiinɛkinɛ ee monda mwao, ne kabee utuchikana mo kiinɛkinɛ. 4 Kuusi ikomo lɛtɔmbɛcha kɛmɛmɔ koeta lea lye kuungwa itɛ baana banɛ batuchikana mo kiinɛkinɛ.

Kiinɛkinɛ ya Kayɔ

5 Ngondwa yaanɛ, oe we kiinɛkinɛ ko meemo etokamba awɛ ko mbanga yee babotwa niito, naa ne ko mbanga ya baa bae bɛɛni. 6 Baa bando basingeechee kombaa kwe kanisa botokonda awɛ. Natwiyaya, bakwasa ko boa baɔsɔnɛ koyaka mɔ lwɛndɔ lwabɔ butwimemya Kakua 7 Kɔ kɔmɔa baa babangoee lwɛndɔ lwabɔ ku chiina lya Kilisito kotasi kokonja naa nɛ kɛmɔ ko bataasi kuimenya. 8 Kɔ bɔbɔ, bae towaenee kokwasa bando boe baba, tosambe nabɔ ko meemo yee kosaola kiinɛkinɛ. 9 Nasukunyea kanisa kinu mamɔ makomo, Liɔtɛlɛfu otoenga kobaemanea ko njea chisɛ ndɛɛchɛ kutuungwa. 10 Ko bobo, atabake mee, ndaangoeche biisɛ bitoketa awɛ, ututwinyekechea bae makomo mabea. Ndatɔbɛka na maa makomo; awɛ mwɛɛnɛ ɔtɔkɔna kɔsɛkɛɛla bɛɛni na awɛ otokandea baa batokonda kobasɛkɛa ne kobalikita ko kanisa. 11 Ngondwa yaanɛ, ndekoeyeela byabea, eyeela byaachi. Mondo otoketa byaachi ne wa Kakua; olya otoketa byabea ndatosamba na Kakua. 12 Bando basɛ basɔɔcha byaachi ko mbanga ya Lɛmɛtiliɔ, kiinɛkinɛ myɛɛnɛ itusingeecha lɛlyɔ ikomo. Na bae kabee tusuliimenya, na awɛ otocheba itɛ bitɔɔcha bae bieko.

Kwinokea kwɛ kɔbɔnga

13 Nae ne makomo mabua me kokosaolea, sitokonda komakunya mo ona mokanda. 14 Natoekekea nakɔmɔɛ ano ano, ne ko kea keeko totaɔchɛ kanwa kwe kanwa. 15 Nyaa eongwe nao. Biɛmba byao bitukwinokea. Twinokea biɛmba biito, chiina ku chiina.