Eph 1 | ZmbSC | STEP | Mee Paɔlɔ, oe ndomwa ya Yɛsu Kilisito ko kokonda kwa Kakua, natobakunyea banu ba ama bae mo kalya ke Ɛfɛsɔ. kabee baanu batobaelwa koetea koongwa kwinu amɔɔsa na Paɔlɔ.

Ephesians 1

1 Mee Paɔlɔ, oe ndomwa ya Yɛsu Kilisito ko kokonda kwa Kakua, natobakunyea banu ba ama bae mo kalya ke Ɛfɛsɔ. ^{▼▼Ɛmɔ mekanda yee kaɛ yee Kikiliki iisi ne ikomo lɛtɔɔcha «Lye mosomba we Ɛfɛsɔ.»} kabee baanu batobaelwa koetea koongwa kwinu amɔɔsa na Paɔlɔ. 2 Tati Kakua ne Mwaame wiito Yɛsu Kilisito babɛ mɔ kɔmɔɛcha lɔkɔka ne nyaa.

Koenoka monda mwa Yɛsu Kilisito

3 Tosekaye Kakua, Isakɛ ne Moolochi wiito Yɛsu Kilisito! Watɔɛcha koenoka kɔsɛ kwe kemotema kototoka kwiyoo koetea koongwa kwito amɔsa na Kilisito. 4 Kombaa kwe kɔsɛnga mɔsɛngɛ, Kakua wabɛchaya ɔsɔtɔsɔbɔa kaɛ ko bae koongwa bando bakɛ koetea koongwa kwito amɔɔsa na Kilisito. Waketa bɔbɔ ne kɔmɔa bae toongwe ba ama ne bataasi ne kangɔnjɔ kombaa kwakɛ. Ko boa bototokonda Kakua, 5 waiyambeela kɔtɔsɔbɔa kɔmɔa toongwe baana bakɛ koetea Yɛsu Kilisito. Waketa boa ne koetea kokonda kwakɛ. 6 Ne ko boa toongwaye mo koseka Kakua, kɔ lɔkɔka lwakɛ lwanaka lwatɔɛcha awɛ ko njea yee mwaana waakɛ Ngondwa. 7 Kɔmɔa Kilisito wakwa ne Kombanga yiito, tususia kooloka ne koebelwa bwabea bwito. Alya ne asoangwecha Kakua kubua kwe lɔkɔka lwakɛ, 8 watɔɛcha mwɛchɔ we lokani ne bichebi byabua. 9 Kakua mo kokonda kwakɛ na kotochebekya biisɛ mo bwaachi bwakɛ, koengama na boa bwakonda awɛ koketa kombaa awɛ mwɛɛnɛ koetea Kilisito. 10 Lea Ikomo Kakua wakonda koleketa mo keeko kyasɔbɔa awɛ, na kɔɔcha itɛ byaanga mwiyoo nɛ mɔ mɔsɛngɛ otabibeke mose mwe meende ya Kilisito, ubiemanee.

11 Kakua otoketa biemo biisɛ koengama ne kokonda kwakɛ. Watɔsɔbɔa kaɛ toongwe bayani bakɛ koengama ne ilai lyaakɛ, ko koongwa kwito amɔsa na Kilisito. 12 Ko bobo, bae babɛchaya be kombaa kobaela Kilisito, toongwaye mo koseka Kakua ko boombe bwakɛ!

13 Na baanu aungwa baanu makomo me kiinɛkinɛ, nɛ kɔɔcha itɛ Ilɔngɔ Lyaachi lee mo komoolola, banu na kuimenya Kilisito. Kabee Kakua na kɔmɔtɛcha kisinga kyaakɛ monganda mwiinu, ketoangwecha kiinɛkinɛ itɛ baanu ne bando bakɛ. Na kea kisinga ne Motema wa Ama walaiwa bae. 14 Olya Motema wa Ama ne kebange kye boyani bwito botakonje bae kwa Kakua. Bia bitoangwecha paa paa itɛ totabikonje alya akaolola Kakua bando bakɛ kɔ lɔsɛ. Ko boa, toongwaye mo komoseka ko boombe bwakɛ!

Kwiyaya kwa Paulɔ

15 Ko bobo, kobangoa aungwee mee itɛ muswimenya Mwaame Yɛsu Kilisito, ne botokonda baanu bando ba Kakua. 16 Ko mano masu sitoena kɔɔcha isili kwa Kakua kombanga yiinu. Natobaeyoka mukwiyaya kwanɛ. 17 Ko mano masu, nae mukwiyaya kwa Kakua wa Mwaame wiito Yɛsu Kilisito, Tati we boombe, ɔmɔɛchɛ baanu Motema we lokani ne kobaboolea njea yee komocheba awɛ kiinɛkinɛ. 18 Kabee nae mukwiyaya itɛ obachiboe miisɔ me metema yiinu, kɔmɔa mɔmɔɛ kyɛɛngɛ kyaakɛ. Alya motachebe bitobaela baanu ko mbeea yabaitana awɛ, kabee motachebe leke ikonja le boombe ne boyani bwe awɛ mɔ kɔɔngɛa bando bakɛ, 19 Kabee motachebe bɔkɛtɛ bwe boombe bwakɛ bwaanga bwanaka kwito bae batubwimenya. Boa bɔkɛtɛ ne bwaangwecha Kakua kiinɛkinɛ; 20 aubua awɛ Kilisito ko bakwo, ne komobeka ko mbanga yaakɛ yee saa ndome mu buchike bwe kwiyoo. 21 Alya ne abekewa Kilisito monganda mwe Konyaa kɔsɛ, ne bokoo bɔsɛ, nɛ bɔkɛtɛ, ne Nombe, ne monganda mwe maina masɛ, mɔ mɔsɛngɛ wa leno ne mɔ mɔsɛngɛ wakabaka. 22 Kakua wausia kɔtɛcha biisɛ mose mwe meende ya Kilisito, kabee na komobeka kooongwa motwe we batumwimenya. 23 Baa batumwimenya ne mobee wa Kilisito, ne monda mwaabɔ ne mutuchikaa Kilisito; na awɛ ne otochekya biemo biisɛ kiinɛkinɛ.