Eph 2 | ZmbSC | STEP | Kaɛ kaɛ mwabɛchaya mosokwa kemotema koetea bikete binu byabea ne bwabea bwiinu.

Ephesians 2

Paɔlɔ uswinokea batuimenya

1 Kaɛ kaɛ mwabɛchaya mosokwa kemotema koetea bikete binu byabea ne bwabea bwiinu. 2 Mwabɛchaya mo bwabea abɛchaya baanu mɔ kɔɛnda koengama ne bikete byabea bye mɔsɛngɛ. Mwanyɛmyaya mokoo we mikinje, mokoo otonyaa asambea sɛnga ne iyoo. Olya mokoo ne otonyaa ko bando bataasi batomocheba Kakua.

3 Na bae basɛ, twabɛchaya bwe abɔ, mu ikaa le kɛ lɔkɔba. Twabɛchaya mo koketa byabea bitokonda mebee yiito ne ngani chiito, mo koongwa kwito, twawaena ne kokonja kiichi kya Kakua bwe bakinɛ.

4 Kakua, awɛ oe ne lokwa lwabua, ne kabee ototokonda byabua. 5 Ko boa awɛ na kotoolola amɔɔsa na Kilisito; naanga mwabɛchaya mosokwa kemotema, mosooloka kɔ lɔkɔka lwa Kakua. 6 Ko koongwa kwito amɔɔsa na Yɛsu Kilisito, Kakua na kutuubua amɔsa naakɛ kɔmɔa toongwe naakɛ amɔsa kwiyoo. 7 Ko bobo, ko kotoangwecha bwaachi bwakɛ koetea Yɛsu Kilisito, wakonda koangwecha ku ibota le kɔmɔngɔ itɛ awɛ oe ne lɔkɔka koetea Yɛsu Kilisito. 8 Kɔ kɔmɔa, mosooloka ne kɔ lɔkɔka, koetea iekekeo. Biisi ko kokonda kwinu, kee ne kɛɛchwa kotoka kwa Kakua. 9 Biisi ku bikete, mondo ndaitombekaya. 10 Ne koetea koongwa kwito amɔɔsa na Yɛsu Kilisito, Kakua watobomba ne bae tokete bikete byaachi. Bia bikete byaachi, Kakua wabisangya kaɛ ko bae kubiketaya.

Koongwa bɔmɔɔsa koetea Kilisito

11 Baanu bataasi Bayula, moeyoke bwabɛchaya baanu kombaa! Bayula batoketewa sakubɛmbɛ, naanga sakubembɛ etoketewa nɛ kɛlɔkɔba. Ku bia nɛ kɔtɔbatɔnda abɔ itɛ: «moe nɛ mɛlɔbɔ». 12 Mo mamɔ masu mwabɛchaya njɔɔ na Kilisito, ndemwabɛchaya amɔɔsa na baa basɔbɔa Kakua, mwabɛchaya bɛɛni, ndemwabɛchaya be ibota le Isilaɛli, kabee ndemwabɛchaya ne moanda ko lea ilai lyaketa abɔ na Kakua. Mɔbɛɛ mɔ mɔsɛngɛ kotasi koongwa ne bye kobaela ɔbɛɛ Kakua. 13 Mo koongwa kwinu amɔɔsa na Yɛsu Kilisito, baanu babɛchaya njɔɔ, motae bwiye koetea masi ma Kilisito. 14 Awɛ ne nyaa yiito. Mo koketa Bayula ne bataasi Bayula koongwa kɛɔngɔ kɛmɔɔsa. Ko koocha lɔkɔba lwakɛ ususunjua boangani bɔbɛɛ bwe keele kye kotosamboa. 15 Wachimya Salia yee Bayula na bia byabasukuaya ayo kubiketa, na bia bitɔɔchɛka monda mwayo. Waketa bɔbɔ ne bando babɛ bɛ kɛɔngɔ kɛmɔɔsa keyakeya. 16 Kokwa kwa Kilisito ko mote we maakanu, ne kosobaketa baa bando basɛ koongwa keemo kɛmɔɔsa ne kobabeka mɔ bɔmɔɔsa na Kakua. Koetea olya mote we maakanu, ususunjua boangani. 17 Kilisito wabaka kwasaole Ilɔngɔ Lyaachi lye nyaa ko banu babɛchaya njɔɔ na Kakua, na baa babɛchaya naakɛ bwiye. ^{▼▼Yɔɔla Isa 52:7.} 18 Kɔmɔa koetea Kilisito, bae basɛ tosowaena koolea kombaa kwa Tati Kakua koetea ikɛɛsa Motema wa Ama.

19 Ne ko boa baanu bataasi Bayula moekee kabee bɛɛni ɔbɛɛ babeoka; motae ne bɛɛnɛ amɔsa ne bando ba Kakua, kabee motae ne bando bɛ nɔngɔ yaakɛ. 20 Mo leno motae bwe ndabo esoabokiwa monganda mwe musingi waabokiwa ne ndomwa ne ndɛnda cha Kakua; na awɛ Yɛsu Kilisito mwɛɛnɛ ne iwɛ lye kaongoongo. 21 Mo koongwa kɔmɔɔsa naakɛ, naanga ndabo ɛɛsɛ koabokiwa bwaachi, ne koolea mo koongwa ndabo ya Kakua monda mwa Mwaame. 22 Kabee koetea koongwa kwiito amɔɔsa na Kilisito, baanu bwakaɛ motae amɔɔsa ne bando basɛ, kɔmɔa mɔbɛ ndabo ituchikanea Kakua koetea Motema waakɛ.