Eph 3 | ZmbSC | STEP | Kɔ bɔbɔ, mee Paɔlɔ, oe mokakwa wa Yɛsu Kilisito ko mbanga yiinu, baanu bataasi Bayula.

Ephesians 3

Mokambo wa Paulɔ ko bibɛɔ

1 Kɔ bɔbɔ, mee Paɔlɔ, oe mokakwa wa Yɛsu Kilisito ko mbanga yiinu, baanu bataasi Bayula. 2 Mususia kuungwa bwaachi ilɔngɔ itɛ Kakua ɔmbɛchɛɛ lɔkɔka lwe kokonja meemo yee kobakambeaya. 3 Kɔ kɔmɔa, Kakua ombangwechee biemo bya iseka awɛ, boa bwaiyambeela mee kobakunyea ko makomo makɛɛkɛ. 4 Mo komayɔɔla, motachebe itɛ, ingɛ na mee natocheba makomo maisekewa kombanga ya Kilisito. 5 Kombaa, maa makomo mabɛchaya bwisekiwe, Kakua ndamaboola ko bando be kaɛ bobo bosomachiboa awɛ ko ndomwa chaakɛ cha ama ne kɔ ndɛnda koetea Motema waakɛ wa Ama. 6 Maa makomo maisekiwa na mama: Koetea Ilɔngɔ Lyaachi, bando bataasi Bayula ne Bayula, basɛ basosambea boyani, boa bwaɔngɛa Kakua bando bae. Baa bando batae bibando bye mobee ɔmɔɔsa. Naabɔ batakonje moanda ku ikonja lya laela Kakua bando bakɛ koetea Yɛsu Kilisito.

7 Kakua mɔ lɔkɔka lwakɛ, ɔsɔmbɛɛcha kɛɛchwa ke mee koongwa mokambi we Ilɔngɔ Lyaachi, lyambɛɛcha awɛ kɔ bɔkɛtɛ bwakɛ. 8 Mee ne mɔkɛɛkɛ asambea bando basɛ ba Kakua. Nakonjee lɔkɔka lwe kosaola Ilɔngɔ Lyaachi ko bando bataasi Bayula, na lea ne ikonja lya Kilisito letaasi nɛ kɔbɔnga. 9 Bitokoka kwanɛ naangweche bwaachi bando basɛ, booni Kakua, awɛ wasɛnga biemo biisɛ, otoketa makomo masɛnga awɛ maa maiseka awɛ alya kaɛ. 10 Ko bobo, koetea Kanisa, batonyaa basɛ ne binombe ne bakoo bae ne bɔkɛtɛ kwiyoo, batocheba lokani lwa Kakua. Loa lokani, Kakua otoloangwecha kwabɔ mo njea chabua. 11 Kakua osoketa bɔbɔ, koengama na boa bwakonda awɛ kaɛ, koetea Mwaame wiito Yɛsu Kilisito. 12 Ko boa, koetea koongwa kwito amɔɔsa na Kilisito, kabee butumwimenya bae, twekee ne kye kutuchibea ko koolea kombaa kwa Kakua ne kobaela kokoo. 13 Ne ko bobo, natomosaolea itɛ: ndɛkɔlɛbɛa ko bobo boe mee mo kokonja manɛnɛ kombanga yiinu. Maa manɛnɛ ne boombe bwiinu.

Kokonda kwa Kilisito

14 Ne ko bobo, nae mɔ kɔkɔma malu makɔngɔ kombaa kwa Tati, 15 awɛ ne oe ibongo le nɔngɔ chisɛ che mɔ mɔsɛngɛ ne kwiyoo. 16 Nae mukwiyaya kwakɛ koengama ne kubua kwe bɔnyɛmu bwakɛ kɔmɔa ɔbatɛchɛ motema, ko njea yee Motema waakɛ. 17 Kabee, Kilisito oongwe mukuchikaa monda mwe metema yiinu, kɔmɔa baanu musumwimenya. Mwitendemeke ne kubunda ngoo mo kokonda. 18 Mo koketa boa, baanu ne bando basɛ ba Kakua motachebe itɛ kokonda kwa Kilisito ne kwanaka, mo bwiye ne mɔ bɔlɛɛ, mɔ bɔlɛɛ mwiyoo ne mo nindi. 19 Kabee motowaena kocheba koa kokonda kwakɛ kotokoela bichebi biisɛ, kɔmɔa moongwe bando bae bochae ne bondo bɔɔsɛ bwa Kakua. 20 Kakua oe mo kokamba monda mwiito oe ne bɔkɛtɛ kokoela biemo byabua bia bitɔmɔɛngɛa bae ɔbɛɛ bitochombyea bae ngani. 21 Otombekwe mo Kanisa koetea Yɛsu Kilisito, ko mabota masɛ, meombo ne meombo. Biibɛ bɔbɔ.