Eph 4 | ZmbSC | STEP | Nasokakwa kɔmɔa natokambea Kakua Mwaame. Ko bobo, natwiyaya kwinu moongwe ne bikete byaachi koengama na boa bwabaitana Kakua.

Ephesians 4

Koongwa bɔmɔɔsa mo mobee wa Kilisito

1 Nasokakwa kɔmɔa natokambea Kakua Mwaame. Ko bobo, natwiyaya kwinu moongwe ne bikete byaachi koengama na boa bwabaitana Kakua. 2 Moongwe bando be kwiikya nɛ baɔla ne kokemya motema, ko kokondana kwinu banu bɛɛnɛ na bɛɛnɛ mokemye metema. 3 Muifɛkɛɛnyɛ kuchikaa kɔmɔɔsa boa bototobeka Motema wa Ama mo bɔmɔɔsa. Kabee moongwe mukuchikaa mo nyaa yee mo kobabeka mo boa bɔmɔɔsa. 4 Koe nɛ lɔkɔba lɔmɔɔsa ne Motema wa Ama ɔmɔɔsa. Kobaela kwamwitanea Kakua na ako koe ne kɔmɔɔsa. 5 Mwaame oe nɛ ɔmɔɔsa, ne Iekekeo lee ne lɛmɔɔsa ne Isoko lɛmɔɔsa. 6 Kakua nɛ ɔmɔɔsa, na awɛ ne Tati we bando basɛ. Awɛ ne otonyaa bando biisɛ, awɛ ne otokamba monda mwe bando basɛ. Awɛ ne oe monda mwe bando basɛ.

7 Ɔɔsɛ mondo asambea bae ɔɛchiwɛɛ loa lɔkɔka koengama ne moanda waɛchiwa bae na Kilisito. 8 Bia botoengama nɛ bɔtɔɔcha Tuchimba twa Ama itɛ:
«Akobea awɛ kwiyoo,
na koya ne baangani naakɛ bakaka awɛ,
na kɔɛcha bando meanda.» ^{▼▼Yɔɔla Nem 68:19.}

9 «Wakobea» ɛtɔɔcha eke? Nɛ kɔɔcha itɛ waika mose mwɛ sɛnga. 10 Oolya waika, na olya wakaɛ wakobea konganda kwe iyoo lɛsɛ, kɔmɔa ochekye mɔsɛngɛ ɔɔsɛ. 11 Awɛ mwɛɛnɛ ne waɛcha bando meanda. Waketa bamɔchi koongwa ndomwa, bakinɛ ndɛnda cha Kakua, ne bakinɛ batosaola Ilɔngɔ Lyaachi, bakinɛ basangi ne bakinɛ baeyechi. 12 Waketa bobo ko kosangya bando ba Kakua bakambe meemo yaakɛ, kɔmɔa mobee wa Kilisito ɔsɛngwɛ. 13 Ko bobo bae basɛ totaolee koongwa mo bɔmɔɔsa mu iekekeo liito ne komocheba kiinɛkinɛ Mwana wa Kakua. Alya, totabɛ bando bakiya ne koolea mokeema kya Kilisito mwɛɛnɛ. 14 Ko bobo, tokaongwe kabee baana bakɛɛkɛ, batoendwa koko na koko ne maeyechi mabea kotoka ko bando be maanu, matobachimbecha. 15 Kende totasaoleane kiinɛkinɛ mo kokondana, totakoe mo njea chisɛ, ne koolea mo keema kya Kilisito oe motwe. 16 Kabee awɛ, ne otoketa bibando biisɛ bye mobee kosekamaa kɔmɔɔsa. Mobee ɔɔsɛ otosekamaa koetea moa mutukumbakanea awo mɔɔsɛ. Alya atokamba bibando biisɛ botokoka abyo, mobee ɔɔsɛ waanga kokoa ne kwisɛnga mo kokondana.

Mwɛchɔ moyamoya we Bakilisito

17 Ko leno natwiyaya ku chiina lya Mwaame: nde koongwa kabee ne bikete bwe bye bando bataasi kocheba Kakua, batoyea lokani lwe bolebe. 18 Lokani lwabɔ loe mwikunyɛ. Baa bando baasi ne moanda kɔ mwɛchɔ ɔtɔɛcha Kakua, kɔmɔa abɔ bae ne bolebe. 19 Ne bwakaɛ ndebaekee kuungwa masɔni, baswipekya ne bwambya, ne koketa biisɛ bya bea kotasi masɔni.

20 Ko mbanga yiinu, biisi boa ne bwaeyechwa baanu Kilisito, 21 Bieko, muungwe ilɔngɔ lɛtɔɔcha kombanga yaakɛ. Kabee kɔmɔa moe batuimenya ku kiinɛkinɛ, mosoeyechwa makomo me kiinɛkinɛ mae monda mwa Yɛsu Kilisito. 22 Nɛ kɔ bɔbɔ, bitowaena mɔlɛkɛɛ bikete binu bye kaɛ. Kabee mɔlɛkɛɛ bikete binu bye manu bibɛchayee mo kobachaa ku kuchimbea. 23 Moketwe bayabaya mo metema yiinu ne mo lokani lwinu; 24 Kabee mutuuluke bando bayabaya, babombiwee koeyana na Kakua, mo koongwa ne bikete byaachi ne bya Ama bitotokea mu kiinɛkinɛ.

25 Ne kɔ bɔbɔ, mɔlɛkɛchanɛ ne manu, ɔɔsɛ wiinu ɔɔchɛ bye kiinɛkinɛ ne munjinakɛ, kɔmɔa toe ne bibando bye lɔkɔba lɔmɔɔsa. 26 Kende mosoemoka, mwilɔlɛ mooleaya mo koketa bwabea. ^{▼▼Yɔɔla Nem 4:5.} Koemoka kwinu kotowaena kusie kombaa kwe chooba koya. 27 Ndɛkɔɛcha Isombo iboa. 28 Olya ɔbɛchayɛ mu kwiba ɔlɛkɛɛ kwiba, wifɛkɛɛnyɛ kwikambea meemo mo njea myaachi, ngɔmɔa okonje biemo bye kɔɛcha bakinɛ bae ne bɔɛnwa. 29 Mo tonwa twiinu moolaya makomo mabea. Mo tonwa twinu, moolaya makomo maachi matokoka kɔɛbɔa bakinɛ mɔ bɔɛnwa bwabɔ, kabee matabeese lɔkɔka ko baa batomaiungwecha. 30 Moemokyaya Motema wa Ama wa Kakua. Olya Motema wa Ama ne kisinga kyabeka Kakua monganda mwiinu, ko koangwecha itɛ baanu ne bando bakɛ, ne koolea ku lusu lotabaolole awɛ. 31 Mama makomo masɛ momakosoe njɔɔ: kobekeana mɛsɔna, kɔbɛbɛɛlwa, moemo, meango, kɔbɛngɛana bia biisɛ kɔmɔɔsa ne kochoa, mɔlɛkɛchanɛ nabyo. 32 Moongwe mo koketeana byaachi ne kuungweana lokwa, boa bwamuungwea Kakua lokwa koetea Kilisito.