Eph 5 | ZmbSC | STEP | Momoeye Kakua, kɔmɔa moe ne baana batokonda awɛ;

Ephesians 5

Kuchikaa mɔ kyɛɛngɛ

1 Momoeye Kakua, kɔmɔa moe ne baana batokonda awɛ; 2 Moongwe mo kokondana baanu bɛɛnɛ na bɛɛnɛ boa bwatokonda Kilisito. Waocha mwɛchɔ waakɛ kombanga yiito bwe keochwa ne kɛkyɔ keochwa kye kutumba ko masabau, ketoocha ilumba lyaachi lɛtɔmɛma na Kakua.

3 Baanu ne bando ba Kakua. Ne ko boa, Isɛmi ne bikinɛ bye ikɔya ɔbɛɛ ketama, biitowaena kuungweka asambea banu. 4 Kabee, mɛɔcha yee masɔni, yee meango, mɛɔcha etaasi kowaena, maatowaena kɔɔchiwa asambea banu, kyaachi ne koseka Kakua. 5 Mochebe bobo: be bwambya, be ikɔya, be ketama baasi ne moanda otakonje abɔ mo boombe bwa Kilisito na Kakua. Kɔmɔa ketama ne njea yee kwiyaya ku ngisi.

6 Bikete bwe bibi ne bitusukua Kakua oongwe ne kiichi ko baa batɔkɔna kɔmɔnyɛmya. Ne ko boa mondo ndamoongaya ne makomo me bokata. 7 Mwisambyaya ne bando bwe baa. 8 Kaɛ kaɛ mwabɛchaya ikunyɛ, mo leno motae kyɛɛngɛ monda mwa Mwaame; ne ko boa mɔɛndɛ bwe baana bɛ kyɛɛngɛ. 9 Bimuka bye kyɛɛngɛ ne bwaachi ne kiinɛkinɛ. 10 Mwifɛkɛɛnyɛ koenga bia bitwimɛma na Mwaame. 11 Nde kwisambya ku bikete bye kanyanya bye ikunyɛ, Baanu mubiile paa paa. 12 Kɔmɔa bia bitoketa bando mwikunyɛ, tutubiungwa masɔni naanga ne kubiɔcha. 13 Bia biemo kende bisobooliwa, bitɔmɔɛka paa paa kɔ kyɛɛngɛ. 14 Bia biisɛ bisobooliwa kɔ kyɛɛngɛ, bitoongwa ne kyɛɛngɛ. Ne kɔ bɔbɔ bitɔɔchwa:
«Byoka awɛ ɔtɔkyɛsa!
ubuka ko bakwo,
Kilisito otakumunekee.»

15 Mwilɔlɛ bwaachi bɔtɔɛnda baanu. Mɔbɛchaya bwe bando bataasi ne lokani, mɔɛndɛ bwe bando be lokani. 16 Mokokeele keke keeko, kɔmɔa mama masu ne mabea. 17 Ko bobo moenaya lokani, mwifɛkɛɛnyɛ kocheba bia bitokonda Mwaame mɔbɛ mukubiketa.

18 Mɔkɔlwaya ne malu, matochaa bando ko bwabea, mochekiwe ne Motema wa Ama. 19 Mɔchɔbwɛ wiinu oongwe we kɔtɛchana motema, mo koemba nembo che koeleleka Mwaame. Ne chikinɛ nembo che komoseka, chitotoka ko Motema wa Ama. Momoembee ne komoseka ne motema wiinu ɔɔsɛ. 20 Ko keeko kɛsɛ mɔbɛchayɛ mɔ kɔɔcha isili kwa Kakua Tati we biisɛ, mu chiina lya Mwaame wiito Yɛsu Kilisito.

Bakachi ne baome

21 Mɔnyɛmyanɛ baanu bɛɛnɛ na bɛɛnɛ, kɔ bɔnyɛmu boe niinu kwa Kilisito.

22 Baanu bakachi, mɔnyɛmyɛ baibinu, boa bɔtɔnyɛmya baanu Mwaame. 23 Kɔmɔa moome ne motwe we mwamokachi, bwakaɛ boe Kilisito motwe we Kanisa. Kilisito ne Moolochi we kaa Kanisa, kae mobee waakɛ. 24 Bwakaɛ boa bɔtɔnyɛmya Kanisa kɔnyɛmya Kilisito, bwakaɛ boa baabakachi banyɛmyɛ baibabɔ ku biemo biisɛ.

25 Na baanu babaome, mokonde bakachi binu, boa bwakonda Kilisito kokonda Kanisa, ne koolea mukwiocha awɛ mwɛɛnɛ kombanga ya akɔ. 26 Waketa bɔbɔ, kɔmɔa okabeke ka ama, ne kaɔywa ne maache ^{▼▼kɔɔya ne maache: Ana bitoangwecha ne isoko. Yɔɔla Tit 3:5.} ne koetea Ikomo. ^{▼▼Yɔɔla Yɔa 15:3.} 27 wakonda kwiangwecha awɛ mwɛɛnɛ Kanisa kachachia, ka ama, kataasi ne kangɔnjɔ, kataasi ne ikɔya ɔbɛɛ mobanji, ɔbɛɛ kataasi ne bwabea bukinɛ. 28 Ne ko boa baa baome okonde bakachi babɔ botokonda abɔ mobee waabɔ abɔ bɛɛnɛ. Kɔmɔa olya otokonda mokachi waakɛ utwikonda awɛ mwɛɛnɛ. 29 Kɔmɔa kuusi mondo ɔtɔkɔna mobee waakɛ, waanga ne komolesa, ne komokongoseka bwaachi, boa botoketea Kilisito Kanisa, 30 kɔmɔa, bae toe ne bibando bye mobee waakɛ. 31 Tuchimba twa ama tɔtɔɔcha bobo: «Bia ne bitoketa mwamoome kosambokana na isakɛ na inakɛ, ne kwisambya ne mokachi waakɛ. Basɛ babee batabɛ lɔkɔba lɔmɔɔsa.» ^{▼▼Yɔɔla Kob 2:24.} 32 Koe myanda mekataala yaisama mo maa makomo, kwanɛ mee natɔɔcha itɛ ne Kilisito ne Kanisa. 33 Bitokoka kwinu bwakaɛ, mwamoome ɔɔsɛ okonde mokachi waakɛ butuikonda awɛ mwɛɛnɛ, ne mwamokachi ɔnyɛmyɛ ibakɛ.