Eph 6 | ZmbSC | STEP | Ee baana! Moongwaye mɔnyɛmyɛ baboti binu koetea koongwa kwinu amɔɔsa na Mwaame kɔmɔa bia ne kiinɛkinɛ.

Ephesians 6

Baana ne baboti

1 Ee baana! Moongwaye mɔnyɛmyɛ baboti binu koetea koongwa kwinu amɔɔsa na Mwaame kɔmɔa bia ne kiinɛkinɛ. 2 «Nyɛmyaya isao na inao.» ^{▼▼Yɔɔla Kot 20:12.} Elya ne mibeko yee kombaa yee ne ilai lee: 3 «ko kokonja koenoka ne kuchikaa masu mabua mɔ mɔsɛngɛ.» ^{▼▼Yɔɔla Koe 5:16.}

4 Na baanu batati moaboaya baana binu, mobakoche mo kobaeyecha ne ko baana maani kotoka kwa Mwaame.

Maani ko baacha ne batobabeka

5 Na baanu bacha, moketeaye bia bitobatoma baa batobabeka mɔ mɔsɛngɛ ono, mo batenaye ne kochanja, mo kobanyɛmya ne motema mwaachi. 6 Nde kokamba kɔ kɔmɔa itɛ batɔkɔlɔla, bwe otoenga kosekiwa ne bando, mokambe boe bacha ba Kilisito batoenga koketa bitokonda Kakua ne motema wiinu ɔɔsɛ. 7 Mobakambeaye ne motema mwaachi, bwe batokambea Mwaame ikɛɛsa, ndɛɛkɔ bando. 8 Motochebe itɛ, Mwaame otaute ɔɔsɛ mondo koengama ne byaachi biketee awɛ, ɔbɛɛ mocha ɔbɛɛ otaasi mocha.

9 Na baanu batobeka baacha, moketaye bwakaɛ boa ko baa batobeka banu. Ndekobaketea ne bikangecha. Motochebe itɛ, baanu ne baacha moe ne Mosangi wiinu ɔmɔɔsa oe ne kwiyoo, ne kwakɛ kuusi kɔlɔla luungi. ^{▼▼Yɔɔla Koe 10:17.}

Bita bye iekekeo

10 Kɔ kɔbɔnga, mwitendemeke mo koongwa kwinu amɔɔsa na Mwaame, koetea mwɛchɔ we bɔkɛtɛ mwaakɛ bokoo. 11 Mɔbɛ mo koenda byɛla biisɛ bye bita bya Kakua ko baanu kwianga kombaa kwe maanya me Isombo. 12 Kɔmɔa, bita biito biisi bye kɔtɛchana ne bando, bie ne bye kɔtɛchana ne masombo me kwiyoo, ne bae ne bɔkɛtɛ, ne bakoo, ne ko baa bae ne bɔkɛtɛ mɔ mɔsɛngɛ oono we ikunyɛ. 13 Ne kɔ bɔbɔ, mubunde byɛla biisɛ bya Kakua, Kɔmɔa mwiange atabaolelee lusu lwabea. Ne mwasusia kuchiana bwaachi motaemae ngoo.

14 Mwiange! mwibweke, kiinɛkinɛ bwe kyate mo lobonda, moongwe ne kiinɛkinɛ bwe ngubɔ yee kyooma ituchibea mɛsɔngɔ mo kyaale. 15 Mowae Ilɔngɔ Lyaachi le nyaa ne kiinɛkinɛ bwe bilato. 16 Moende iekekeo, bwe ngabo etabaɛbɔɛ kuchibea mɛsɔngɔ yee toya yee Isombo. 17 Kɔ kɔbɔnga, mobwae kooloka bwe kekombo, ne Ikomo lya Kakua bwɛ kɛyɔma kɛsɔɛchwa banu ne Motema wa Ama.

18 Ko makomo masɛ, mwiyaye Kakua mo keeko kɛsɛ ketobasukua Motema wa Ama. Mwikɛngɛ byabua ne koongwa mukwiyaya kombanga yee bando ba Kakua basɛ.

19 Na mee, mwiyaye ko mbanga yaanɛ, kɔmɔa Kakua ɔmbɛchɛ makomo me kɔɔcha, ne nakonje bɔkɛtɛ bwe kosaola bando kotasi bɔɔba makomo matwisekiwa me Ilɔngɔ Lyaachi. 20 Mee nasotomwa kwasaole Ilɔngɔ Lyaachi, naanga na bono boe mee leno mo kekako. Kɔ bɔbɔ, mwiyaye ko mee kɔɔcha kotasi bɔɔba bitokoka mee kɔɔcha.

Kolaana

21 Natokonda na baanu mochebe ilɔngɔ lyanɛ, ne bitoketa mee. Mobotwa naanɛ Tikikɔ, ngondwa yaanɛ ne ngambi myaachi ya Mwaame, ɔtamɔɛchɛ ilɔngɔ lɛsɛ. 22 Nasomotoma kwinu kwamosaolee, booni boe bae, ne kobatɛcha motema.

23 Tati Kakua ne Mwaame wiito Yɛsu Kilisito, babaɛchɛ babotwa niito basɛ nyaa, kokonda ne iekekeo. 24 Kakua ɔbatɛchɛɛ lɔkɔka, bando batokonda Mwaame wiito Yɛsu Kilisito ne kokonda kotasi kɔbɔnga.