Gal 3 | ZmbSC | STEP | O banu Bakalatia maɔkwa! Naani obakendee bobo? Motae maɔkwa bobo ɔbɛɛ moangoechiwee bwaachi itɛ Yɛsu Kilisito okwee ko motema we maakanu!

Galatians 3

Salia ɔbɛɛ iekekeo

1 O banu Bakalatia maɔkwa! Naani obakendee bobo? Motae maɔkwa bobo ɔbɛɛ moangoechiwee bwaachi itɛ Yɛsu Kilisito okwee ko motema we maakanu! 2 Natokonda monamboe ko lee ikomo lɛmɔsa bokata: mokonjee Motema wa Ama koetea bikete bye Salia ɔbɛɛ muungwee Ilɔngɔ Lyaachi ne kuliimenya? 3 Booni botoongwa baanu maɔkwa bobo? Baanu babangoee kombaa ne Motema wa Kakua, motokonda kɔbɔngɛa leno nɛ bɔkɛtɛ bwe kɛ lɔkɔba? 4 Biisɛ biketee baanu motokonda ne bikwe bokata? Biitowaena kɔɔnɛka bokata! 5 Kakua ɔtɔmɔɛcha Motema waakɛ ne koketa melendo mwingya mwiinu. Mutuninga itɛ otoketa bibyɔ nɛ kɔ kɔnyɛmya Salia, ɔbɛɛ ko boa buungwee baanu Ilɔngɔ Lyaachi ne kuliimenya? 6 Naa ne Abulaamu waimenya Kakua, ko boa Kakua ne komobaeka boe mondo wɛ kiinɛkinɛ kombaa kwakɛ. ^{▼▼Yɔɔla Kob 15:6.} 7 Bibi ne biitowaena banu kocheba: bando batuimenya Kakua, baa ne baana ba Abulaamu. 8 Tuchimba twa Ama, twabɛchaya tososangya kombaa itɛ, Kakua otabakete bataasi Bayula, koongwa be kiinɛkinɛ kombaa kwakɛ, koetea iekekeo lyabɔ. Ko boa lɛlyɔ Ilɔngɔ Lyaachi, Kakua wabɛchaya uusia kosaolea Abulaamu kaɛ kaɛ itɛ: «Kakua otatɛchɛ kaowe ko biɔngɔ biisɛ byɛ mɔsɛngɛ ko njea yao.» ^{▼▼Yɔɔla Kob 12:3; 18:18.} 9 Ko bobo, baa batuimenya, basokonja kaowe amɔsa na Abulaamu mondo we iekekeo.

10 Bieko, baa basɛ batoekekea koketa bitɔɔcha Salia, bae ne mose mwe mokimo. Kɔmɔa, Tuchimba twa Ama tɔtɔɔcha itɛ: «Mokimo ko mondo otaasi ndatokambekya lusu ku lusu biisɛ bitɔɔcha Salia.» ^{▼▼Yɔɔla Koe 27:26.} 11 Bieko! Kuusi mondo otabaekiwe we kiinɛkinɛ kombaa kwa Kakua koetea Salia, kɔmɔa Tuchimba twa Ama tɔtɔɔcha itɛ: «Mondo we kiinɛkinɛ kombaa kwa Kakua, bikete byakɛ bitaeyane ne iekekeo.» ^{▼▼Yɔɔla Aba 2:4; Lɔm 1:17.} 12 Kabee, Salia ne iekekeo biisi bimɔsa: «Oolya otokambekya bitɔɔcha Salia, otakonje mwɛchɔ na elya Salia.» ^{▼▼Yɔɔla Law 18:5.} 13 Kilisito otoololee ne mokimo otokandekee Salia nao, na kokimonwa ko mbanga yiito, kɔmɔa byakunyiwa mu Tuchimba twa Ama itɛ: «Mondo ɔɔsɛ otuisongeeka ko mote, osokimonwa!» ^{▼▼Yɔɔla Koe 21:23.} 14 Ko eena njea kaowe kalaa Kakua kolaa Abulaamu, bataasi Bayula bausia ko kakonja ko njea ya Yɛsu Kilisito. Kɔ bɔbɔ koetea iekeko ne kokonjea bae Motema wa Ama watolaa Kakua. 15 Babotwa naanɛ, natabundea ko byaanga bando koketa: ingɛ mondo osoocha ilai ko njea myaachi, kuusi mondo otalɛɔnɛ ɔbɛɛ kolekondoa. 16 Chɔ ilai lyaɛcha Kakua kɔɛcha Abulaamu, walɛɛcha kabee ku ibota lyaakɛ. Tuchimba twa Ama tɔtɔɔcha itɛ lea ilai, Kakua waɛcha «ibota lyaakɛ», boe ungalɛɛcha ko bando bakinɛ. Tuchimba twa Ama tɔtɔɔcha itɛ «ibota lyao ^{▼▼Yɔɔla Kob 12:7.}», ko koangoecha itɛ oe ne mondo ɔmɔɔsa waɛcha awɛ ilai. Na ɔyɔ mondo ne Kilisito.

17 Muungwe bitokonda mee kɔɔcha: kombaa, Kakua wasia lusielo, kabee awɛ na kolaa kolekongoseka. Kɔmɔngɔ kwe myaaka ngama chinachi ne makumi masato, Salia ya Musa na koolea. Na elya Salia ɛkaɔsɔnɛ kɔɔna lea ilai lya Kakua, ɔbɛɛ kuchimya ilai lyaakɛ. 18 Kɔmɔa, ngotaba itɛ Kakua ungaba mɔ kɔɛcha bando boyani kɔ kɔnyɛmya Salia, alya boa boyani buungatokea kabee ku ilai lyaakɛ, koetea lɛɔ ilai, Kakua oangoechee bwaachi bwakɛ kwa Abulaamu. 19 Chɔ, ne eke byasukua Kakua kobesa Salia? Omekondoee ku ilai, ko eena Salia ekwasaye bando kocheba bitaasi koya kɔmɔɔsa ne kokonda kwa Kakua. Elya Salia ekambee ko koolea mo keeko kye mondo owaenee koboteka mu ibota lya Abulaamu oolee. Na olya mondo ne waɔchaya lea ilai ko mbanga yaakɛ. Na elya Salia, meombo ne emeolechee ko bando koetea losambya ^{▼▼Olya mondo ne Musa. Yɔɔla Law 26:46.}. 20 Olya losambya ndaasi ne lye koketa ingɛ ikomo lee ne le mondo ɔmɔɔsa. Nawɛ Kakua wee nɛ ɔmɔɔsa.

Faila yee Salia

21 Nɛ kɔɔcha itɛ Salia ee ne mo koangechana ne ilai lya Kakua? Kuusi! Kɔmɔa, ngotabɛchaya itɛ Salia ɛtɔɔsɔna kɔɛcha bando mwɛchɔ we kiinɛkinɛ, bando bangaongwa be kiinɛkinɛ kombaa kwa Kakua ko njea yee Salia. 22 Tuchimba twa Ama tɔtɔɔcha itɛ bando basɛ bae ne mose mwe bwabea, kɔ kɔmɔa itɛ ilai lya Kakua leolelee batuimenya koetea iekekeo lyabɔ monda mwa Yɛsu Kilisito. 23 Kombaa kwe iekekeo lye monda mwa Kilisito lɛbɛɛ linaolea, Salia ɛbɛɛ eketobeka mo kekako mo koendecha lea iekekeo lebooliwee. 24 Ko bobo, Salia ɛbɛɛ ne boe mosangi wiito, ɛka alya aolea Kilisito, ko bae koongwa bando be kiinɛkinɛ kombaa kwa Kakua koetea iekekeo. 25 Aolea keeko kwe kuimenya Kilisito tuusi kabee mo kosangiwa na olya mosangi.

Bae basɛ toe ne baana ba Kakua

26 Kɔmɔa banu basɛ, koetea iekeko linu monda mwa Yɛsu Kilisito, banu basɛ moe ne baana Kakua monda mwa Yɛsu Kilisito. 27 Iinde, banu basɛ batɛchiwa isoko koetea koongwa kwinu amɔɔsa na Kilisito, mususia komoeya. 28 Kɔ bɔbɔ, kuusi kabee Muyula, ɔbɛɛ Mukiliki. Kuusi kabee moocha ɔbɛɛ otaasi moocha. Kuusi kabee mwa moome ɔbɛɛ mwa mokachi. Kɔmɔa banu basɛ, motae ne mondo ɔmɔɔsa koetea koongwa kwinu amɔɔsa na Yɛsu Kilisito. 29 Ingɛ moe ne bando ba Kilisito, nɛ kɔɔcha, moe ne ibota lya Abulaamu, ne mwakakonja boyani bwalaiwa baanu na Kakua.