Gal 5 | ZmbSC | STEP | Kilisito ototosee mo moocha ko bae kuchikana byɛ sɛsɛ. Kɔ bɔbɔ, muifɛkɛɛnyɛ, muilɛkɛaya kabee kɔɔtɔka mo boocha.

Galatians 5

Yɛsu ne otokakoa bando mo kekako

1 Kilisito ototosee mo moocha ko bae kuchikana byɛ sɛsɛ. Kɔ bɔbɔ, muifɛkɛɛnyɛ, muilɛkɛaya kabee kɔɔtɔka mo boocha. 2 Mwiungweeche, mee Paɔlɔ natobasaolea itɛ: ingɛ motaemanee kuipekya ne makomo me sakubembe, Kilisito ndakaongwe kabee ne keemo kwinu. 3 Nasɔlɛɔtɔkɛa kabee, mondo ɔɔsɛ usuibɛmbɛkya sakubembɛ, bie bwaachi ɔnyɛmyɛ Salia ɛɛsɛ. 4 Baanu batoenga koongwa be kiinɛkinɛ mɔ kɔnyɛmya Salia, mochebe itɛ, moe mu kuisamboa na Kilisito, mosokea ne kuchimbecha lɔkɔka lwa Kakua. 5 Bae basuimenya, toe ne iekekeo itɛ, Kakua otatokete koongwa be kiinɛkinɛ kombaa kwakɛ. Na lea iekekeo, Motema wa Ama nɛ ɔtɔtɔɛcha alyo koetea iekekeo lito. 6 Kɔmɔa, ko mondo utuchikaa kɔmɔɔsa na Yɛsu Kilisito, kɔbɛmbiwa ɔbɛɛ kotaasi kɔbɛmbiwa sakubɛmbɛ, kuusi nɛ kyɛndɔ. Kee ne kyɛndɔ ne iekekeo kuiitea kokondana asambea bae. 7 Mobangoee lwɛndɔ lwaachi! Chɔ ne naani obachibee njea mɔbɛchaya mɔ kɔnyɛmya makomo mɛ kiinɛkinɛ? 8 Kɔkɔ kuchibeewa koototoka kwa Kakua otobaitana! 9 Lɛtɔɔchɛkana itɛ: «Bisunga bichiinini bye mikati bitoembekya mukati motondoo.» ^{▼▼Ana maa masunga me mukati matoeyana ne baeyechi baongaya Bakalatia.} 10 Naanga na bɔbɔ, natoekekea kwinu monda mwa Mwaame, itɛ mɔɔkabɛ ne lokani lwe ukinɛ mutindo wa sɛsɛkana ne waanɛ. Nɛ ɔɔsɛ otomukuula, otaikonjee manɛnɛ ma Kakua naanga waongwa naani.

11 Ee babotwa naanɛ, kotaongwa itɛ na natoeyecha makomo me sakubɛmbɛ, ko eke kɔtɔmbɔnya abɔ manɛnɛ? Ingɛ na bɔbɔ, koeyecha Kilisito wakwa ko mote we maakanu, kwekee kabee kangɔnjɔ ko mondo ɔɔsɛ. 12 Kɔ bɔbɔ, baa batobesa moocho kwinu asambea baanu, baitongoe abɔ bɛɛnɛ!

13 Baanu babotwa naanɛ, Kakua obaitanee mobwandee. Kɔkɔ kobwanda, kɔbaɛchaya njea yee koketa bitokonda lɔkɔba lwinu! Mɔbɛ mo kokambeana mo kokondana. 14 Kɔmɔa itɛ Salia ɛɛsɛ etokoka ne mwikomo lɛmɔsa, nalyo na lele: «Kondaya mobotwa nao butuikonda awɛ mwɛɛnɛ.» ^{▼▼Yɔɔla Law 19:18.} 15 Ingɛ mɔtabɛchayɛ mo kolasana ne koandana baanu ko baanu, mwilɔlɛɛ mobasiana njɛngɔ.

Bie bwaachi kosongoiwa ne Motema wa Ama

16 Na kɔ bɔbɔ natobasaolea: mɔɛndɛ mo kosongoiwa ne Motema wa Ama, nɛ kɔlɛkɛa kɔnyɛmya bitokonda lɔkɔba. 17 Kɔmɔa bitokonda lɔkɔba bitoangana ne bitokonda Motema wa Ama, na bia bitokonda Motema wa Ama, bitoangana ne bitokonda lɔkɔba. 18 Ingɛ moe mo kosongolwa ne Motema wa Ama, mwekee mose mwe Salia. 19 Bikete bye kɛ lɔkɔba bitochebekana, nabyɔ na bibi: isɛmi, ikɔya, bwambya, 20 maboka, bwanga, boangani, maɔndɔa, boale, moemo, kekee, meango, kɔlɛngana 21 ketama, bɔngɔlwa, kawa, ne bikinɛ byaeyana na bibi, natobaɛcha iyani, bwaiyambea mee kɔbaɛbɛcha kombaa itɛ, batobiketa bibi, baakakonje moanda mo boombe bwa Kakua.

22 Bikete bye Motema wa Ama na bibi: kokonda, kɛmɛmɔ, nyaa, kokimya motema, lɔkɔka, motema we lokwa, kobaelwa, 23 kɔɔla motema, kuikɔbɔɛa, kuusi Salia etokandea makomo boe mama. 24 Baa bae ba Yɛsu Kilisito bausia kuchia lɔkɔba lwabɔ ko mote we maakanu amɔsa ne lokani lwa bea ne ketama. 25 Ko boa bɔtɔtɔɛcha Motema wa Ama mwɛchɔ, tumusiele awɛ kotosongoa. 26 Tuitombekaya bokata, ɔbɛɛ koaboana, ɔbɛɛ kuungweana boale.