Luke 10
Yɛsu ootoma baeyechwa bakɛ makumi mosambo ne babee
1Kɔmɔngɔ kwe bia, Mwaame na kɔsɔbɔa bakinɛ bando makumi mosambo na babee. Awɛ na kobatoma babee babee, kumwiyambea mo tolya tɔɔsɛ ne mo maboa makonda awɛ koya. 2Na kobasaolea: «Mebyao ee ne kubua, be kokaola ne bae bakɛɛkɛ. Mɔɛngɛɛ kwa Mwaame we mebyao otome bakambi kwamekaole. 3Moyake! Nasobatoma bwe mekɔkɔ mwingya mwe mɛɛla yee chaani. 4Moendaya tombaambaa, naanga ne kakombekombe, naanga ne biɔndɔ, mwinokeaya mondo mo njea. 5Ne mo ndabo ɛɛsɛ etaingee banu, mɔɔchɛ kombaa: ‹Nyaa iongwe ko ena ndabo!› 6Ingɛ moe mondo usuiyanga kokonja nyaa, otachikae ne nyaa emobesee banu. Ingɛ ndɛ bɔbɔ, elya nyaa etabaɔtɔkɛɛ. 7Muchikane mo elya ndabo, mole biebwa ne kɛsolwa ketaechiwe baanu, kɔmɔa ngambi etowaena kɔɛchwa kemanda kyaakɛ. Mobeokaya ndabo kwe ndabo. 8Mo kalya kasɛ kataingee banu, ingɛ bando baɔmɔsɛkɛɛla, molye nɛ kɔsɔa bitabaɛchɛ abɔ. 9Moolose balwachi batasange banu ne mosaole ko bando: ‹Boombe bwa Kakua boe amɔɔsa niinu.› 10Mo kalya kasɛ kataingee banu, ne batuchikana amo ndebabasɛkɛa, moyake mo njea chikoo nɛ kɔɔcha: 11‹Tosobakukuela naa ne lukunyɛ lwe kalya kinu loe bubunde ko meende yiito, lɔbɛ kechebeo kwinu. Naa na bɔbɔ mochebe bwaachi itɛ boombe bwa Kakua bosobaisɛnɛnɛa.› 12Natomosaolea kiinɛkinɛ itɛ, lusu lwe manɛnɛ kaɔ kalya katakomoiwe byatɔba kokoea, kalya kɛ Sɔlɔma.»Mayombe me tolya tɔkɔnɛɛ Yɛsu
(Mat 11:20-24)
13Yɛsu na koseboa: «Lokwa lwao, kalya ke Kolasini, lokwa lwao, kalya ke Bɛtɛsaila, kɔ kɔmɔa melendo esoketeka mwingya banu, ayo ngoba boetekee monda mwe kalya kɛ Tilɔ ne kɛ Silɔna, kungyaeta masu, baa batuchikaa amo bangatuuluka metema yaabɔ ne bangaibɛcha mo metema yaabɔ mo kobwaa makunya ne kuchikaa mɔ mɔtwɛ. 14Ko boa, lusu lwe mayombe bando binu batabɛmbiwé makomo mabɔ ne kochoa kokoela bando bɛ Tilɔ na Silɔna. 15Na awɛ, kalya kɛ Kapɛlɛnaumu, utuninga itɛ otakobechiwe ne kwiyoo? Kuusi otaikyewe ne ko bakwo.» 16Yɛsu na koseboa kɔɔcha: «Olya otamuungwe banu usunungwa, olya otamɔkɔnɛ banu ɔsɔngɔna mee, na olya ɔsɔngɔna mee, ɔsɔkɔna olya ondomee.»Kɔɔtɔka kwe baeyechwa makumi mosambo
17Baa makumi mosambo baɔtɔka nɛ kɛmɛmɔ, mɔ kɔɔcha: «Mwaame, ne masombo matwiyaya koe bae amalikitee bae ku chiina lyao.» 18Yɛsu na kobasaolea: «Namɔichi Isombo mo kokea bwe mɔkɛɛli kotoka kwiyoo. 19Mwiyungweeche bwaachi bibi: nasɔmɔɛcha banu bɔkɛtɛ bwe kwinya njɔka ne tombasa, nɛ bɔkɛtɛ bɔɔsɛ bwa olya moangani Isombo, kokabɛ keemo kye kobaketa banu bwabea. 20Mɔɔmɛmaya, kɔ kɔmɔa itɛ masombo masomotena; mwimɛmɛ kɔ kɔmɔa miina minu masukunyewa kwiyoo.»Kɛmɛmɔ kya Yɛsu
(Mat 11:25-27; 13:16-17)
21Kyakaɛ kea keeko, Yɛsu na kuchekwa kɛmɛmɔ ne Motema wa Ama na kokandoka: «Ee Tati, Mwaame we ese ne iyoo, nasokoseka ku kuchiboea baana bakɛɛkɛ byaiseka awɛ ko bando be lokani ne njebi. Inde, ee Tati, okondee biongwe bobo. 22«Naɛchiwɛ biemo biisɛ na Isanɛ; kuusi mondo oe bochebe Mwaana ne naani, Mwaana ikɛɛsa, ne mondo ɔɔsɛ, otakonde Mwaana komoboela.» 23Na kutuluka ko baeyechwa bakɛ, na kobasaolea ku bwise: «Kɛmɛmɔ miisɔ matɔlɔla baanu. 24Kɔ kɔmɔa, natobasaolea: ndɛnda cha Kakua chabua ne binombe bakonda kɔmɔa makomo mama matɔmɔa baanu, alakini ndebamamɔa, ne kuungwa makomo matuungwa baanu, alakini ndebamaungwa.»Kisimo kye Musamalia mwaachi
25Mweyechi ɔmɔ we Salia na kotaoka na komobocha Yɛsu mo komoongea kalɛbɔ na komosaolea: «Mwaame, ndakete eke ko kokonja mwɛchɔ we meombo?» 26Yɛsu na komobocha: «Bike bitukunyiwa monda mwe Salia? Utuungwa bwaachi bitɔyɔɔla awɛ?» 27Olya mondo na komosaolea ko mama makomo: «Konda Mwaame Kakua kao, kwe ibae lyao lɛsɛ, ne ko motema wao ɔɔsɛ, ne kɔ bɔkɛtɛ bwa bwao bɔɔsɛ, ne ko ngani chao chisɛ, ne sambe nao butuikonda awɛ mwɛɛnɛ.» ▼ 28Na komosaolea: «Ɔsɔɔcha bwaachi; keta bɔbɔ otakonje mwɛchɔ.» 29Mweyechi we Salia, na kokonda kwiyɛcha sambo, na koseboa: «Inde: sambenanɛ ne naani?» 30Yɛsu na komosaolea: Kwabɛchaya ɔmɔ mondo mu kwika koya ko Yɛlusalɛma ne Yɛlikɔ; na kokea mo mesani yee ngiba, abɔ na komokongoa ngubɔ chaakɛ, na kumututa, na koya byabɔ, na kumusia mubibai. 31Kwaola ɔmɔ musia mu kwika mo yakaɛ elya njea, na kɔmɔmɔa, na kwibɛmbɛɛla, na koya byakɛ. 32Bwakaɛ Molawi, na koolea a lea iboa, na kɔmɔmɔa, ne kwibɛmbɛɛla na koya byakɛ. 33Alakini ɔmɔ Musamalia waeta alya, na koolea abɛa olya moande. Amɔmɔa awɛ, awɛ na komokwea lokwa. 34Awɛ kumwisɛnɛnɛa, na otoboka tolwaa twakɛ ne makuta ne malu, na kobwekea tolwaa. Kusia na komokobecha mo mbonda yaakɛ, na komochaa ku lupitalo lwabokiwa awɛ bye bondobondo. 35Ngɛcha yaakɛ, na otoocha tombaambaa tobee, na kɔɛcha ɔtɔɛngɛa tombambaa mu lupitalo na otomosaolea: «Kongoseka ona mondo, biisɛ bitamoketee awɛ kɔmɔngɔ, ndakɔɔtɔsɛɛ kɔɔtɔsɛɛ ataɔtɔkɛ mee.» 36Yɛsu na koseboa: «Kombanga yao, naani ko baa basato uiyangwechee kosamba na oona mondo ututwee ne maɔkwa?» 37Mweyechi we Salia na komosaolea: «Na olya omokwee lokwa.» Yɛsu na kɔɔcha bwakaɛ: «Kɔ bɔbɔ, yaaka, keta bwakaɛ bwakaɛ.»Yɛsu mo ndabo ya Malata na Malia
38Abɛchaya Yɛsu ne baeyechwa bakɛ mɔ kɔɛnda, abɔ na kwingea mo kamo kalya. Alya mwamokachi ɔmɔ we chiina lya Malata na kumwinokea mo ndabo yaakɛ. 39Wabɛchaya ne kisikyakɛ we chiina lya Malia. Oona koba na kuchina ko meende ya Mwaame, na utuiyungwechaya byaɔchaya awɛ. 40Mo kea keeko, Malata na utukuuka ne meemo komatua. Awɛ na kwisɛɛna kwa Yɛsu na komosaolea: «Mwaame, biitokochabya motema kɔmɔa bosonjangameka kisikyanɛ mee ingaa ne meemo? Mosaolea obambɛbɔa.» 41Alakini Mwaame na kosaolea Malata: «Ee Malata, Malata, utuundana ne kwikuula ne biemo bya bua; 42koe ne kɛmɔɔsa ketowaena mondo kwikuula nakyo. Malia ɔsɔsɔbɔa kyaachi, ketaasi mondo ndakaɔsɔnɛ komobakoa.»
Copyright information for
ZmbSC