Luke 11
Yɛsu langoecha njea yee kwiyaya
(Mat 6:9-13; 7:7-11)
1Lɔmɔ lusu, Yɛsu wabɛa amɔchi mu kwiyaya. Asia awɛ, ɔmɔ asambea baeyechwa bakɛ na komobocha: «Mwaame, tochebekya njea yee kwiyaya bwaeyecha Yɔana baeyechwa bakɛ.» 2Awɛ na kobasaolea: «Atwiyaya banu mɔɔchɛ:‹Isito oe mwiyoo,
chiina lyao leame.
Boombe bwao bobake.
3Tɔɛcha byekolya biito lusu ku lusu.
4Ndekoeyoka bwabea bwito,
kɔmɔa na bae kabee totoeyoka bwabea bwabɔ.
Ndɛkɔtɔlɛkɛa mɔ kɔɛlɛkiwa, toolola ne mondo wabea.›» 5Yɛsu na kobasaolea: «Naani asambea banu oe nɛ kɛɛmba wamoolelea ne butu ne komosaolea: ‹Ɛɛ kɛɛmba ngɔpɛsa mikati esato. 6Kɔmɔa kɛɛmba kyaakɛ keomoolelea kotokea lwɛndɔ lwakɛ, na mee siisi ne keemo kyɛ kɔmɔɛcha.› 7Olya oe monda mwe ndabo otamosaolee: ‹Ndekongembecha kɔmɔa nausia kuchiba mokinda ne baana banɛ baɔkɛsa kɔmɔɔsa naanɛ ko kyandwa, sikaɔsɔnɛ kobyoka nɛ kɔkɔɛcha bitɔɛngɛa awɛ.› 8Natɔbaɔkɔɛla itɛ: ɔbɛɛ ndakabyoke kɔ kɔmɔɛcha ko boa boe awɛ kɛɛmba kyaakɛ, kɔ kɔmɔa osomoembecha, otabyoke nɛ kɔmɔɛcha kɛtɔɛngɛa awɛ. 9Na mee natobasaolea banu, mɔɛngɛɛ, na banu motaɛwɛ, molenge na banu motakonje, mupike ɔli batamochiboele. 10Kɔmɔa ɔɔsɛ mondo ɔtɔɛngɛa otakonje; na olya otoenga otakonje, na olya utupika ɔli otachiboelwe. 11Otoenga otakonje, na olya utupika ɔli otachiboelwe kɔmɔɛcha iwɛ? Aɔ kɔmɔɛngɛa kamwɛa na kɔmɔɛcha njɔka? 12Aɔ ingɛ ɔsɔɛngɛa chae na kɔmɔɛcha kambasa? 13Ingɛ banu bae babea motocheba kɔɛcha baana binu biemo byaachi, ko booni Isinu wee mwiyoo ndakaɛchɛ basɛ batɔmɔɛngɛa Motema wa Ama?»
Yɛsu osobochiwa Bɛlɛsɛbulu
(Mat 12:22-30; Mali 3:22-27)
14Awɛ waba oe mu kulikita isombo lyaba kaluma. Atoka lea isombo mu ilebe alyo na kɔɔcha: ndongo na kokanakana 15Bakinɛ asambea abɔ na kɔɔcha: «Otoocha masombo kɔ bɔkɛtɛ bwa Bɛlɛsɛbulu, mokoo we masombo.» 16Bakinɛ na kɔmɔɛlɛka mo koenga bisinga bye kotoka kwiyoo. 17Awɛ wacheba lokani lwabɔ, na kobasaolea: «Boombe bɔɔsɛ botosambokana bɔtɔɔnɛka; nɛ ɛɛsɛ ndabo etosambokana etakee. 18Kabee, ingɛ Isombo lisuchiana bita naalyo lyɛɛnɛ, booni botaemae boombe bwakɛ? Mɔtɔɔcha itɛ, nae mukulikita masombo ne kɔmɔa nakongee bɔkɛtɛ bwa Bɛlɛsɛbulu. 19Ingɛ mee natulikita masombo kɔ bɔkɛtɛ bwa Bɛlɛsɛbulu, baana binu batulikita masombo kɔ bɔkɛtɛ bwa naani? 20Ingɛ mee natulikita masombo kɔ bɔkɛtɛ bwa Kakua, kɔ bɔbɔ, boombe bwa Kakua bosoolea kwinu. 21«Ingɛ mondo we bɔkɛtɛ, nɛ byɛla byakɛ, oe mo kosanga ndabo yaakɛ, byɛndɔ byakɛ bitaongwe byaachi. 22Ingɛ mondo ukinɛ oe nɛ bɔkɛtɛ komweta olya osoolea kwakɛ na komokanga, awɛ otamobakoe byɛla byakɛ biisɛ bibee awɛ mo koekekea, na koabanya byɛndɔ bibakoee awɛ. 23«Ɔɔsɛ mondo otaasi naanɛ kɔmɔɔsa ne moangani naanɛ, na olya otaasi ndatosombecha naanɛ oe ne mo kosanja.»Bikete bye masombo matɔɔtɔkɛa mondo
(Mat 12:43-45)
24«Atotoka isombo mo mondo, lɛtɔɛndɛa a iboa letaasi ne maache, mo koenga iboa lye kubundea mbomo, ingɛ ndelyakonja, lɛtɔɔcha: ‹Naɔtɔkɛɛ mo ndabo ɛbɛɛ mee.› 25Ingɛ lɛsɔɔtɔka, na kɔmɔa iboa lɛɔkɔmbiwa ne koongwa lyaachi. 26Ko boa, letaye kwaende masombo mosambo mabea koleetea alyo lyɛɛnɛ, kwaingee na kuchikaa; nɛ bɔtabɛ olya mondo kɔbɔnga botaete bɔbɛɛ awɛ kombaa.»Koenoka kwe kiinɛkinɛ
27Abɛchaya awɛ mɔ kɔɔcha, ɔmɔchi mwamokachi ne kokandoka mo ndongo na komosaolea: «Lyaenoka ikundu lekochaee ne mabɛɛ makɔnyɔmyɛɛ!» 28Yɛsu na kɔɔcha: «Waenoka ne mondo utuungwa Ikomo lya Kakua na koleketa!»Kɔɛngɛa kisinga
(Mat 12:38-42)
29Abɛchaya ndongo etae kubua bando, awɛ na kobangoa kɔɔcha: «Lɔɔka lwabea, lɔtɔɛngɛa kɛmɔnɛ, nɛ kɛmɔnɛ baakakɛmɔɛ kokoea kea kya Yɔna. 30Kɔmɔa, bwakaɛ bwaba Yɔna kɛmɔnɛ ko bando be Ninawi, Mwaana we Mondo otaongwe kɛmɔnɛ kɔ lɔɔka lwa leno. 31Lusu lwe tulubinali, mwaame we mwamokachi wa Mili otaemane ne bando ba loo lɔɔka, ne kɔbaɛbɛcha kasia: kɔmɔa watoka kwibɔngɛa mɔsɛngɛ, na koba kwaiyungweecha lokani lwa Sɔlɔmɔnɔ, ano moe ne mondo otoeta Sɔlɔmɔnɔ. 32Lusu lwe tulubinali, bando be Ninawi bataemane ne bando ba loo lɔɔka ne kɔbaɛcha kasia, kɔmɔa abɔ baimenya bwabea bwabɔ a mokando wa Yɔna; mɔlɔlɛ ano moe ne mondo waeta Yɔna.»Kyɛɛngɛ kye mobee
(Mat 5:15; 6:22-23)
33«Kuusi mondo, kɔmɔngɔ kwe kɔkɔcha mumunɛ ne komobeka a iboa lya isama aɔ kose kwe kembaka; a iboa lye konganda, ko boa baa batwingea batamɔɛ lwɛɛngɛ. 34Liisɔ ne mumunɛ we mobee. Ingɛ liisɔ lyao lee bwaachi, mobee ɔɔsɛ otamunekiwe; ingɛ liisɔ lyao lee ne kolwaa, mobee ɔɔsɛ otaongwe ne ikunyɛ. 35Lɔla ingɛ kyɛɛngɛ kee monda mwao kiisi ikunyɛ. 36Ingɛ mobee wao ɔɔsɛ oe nɛ kyɛɛngɛ, kotasi ikinɛ mbanga ne ikunyɛ, mobee ɔɔsɛ otaongwe kyɛɛngɛ; boe mu kukununekea mumunɛ nɛ kyɛɛngɛ kyaakɛ kɛsɛ.»Mabɛchi ma Yɛsu ko bakoo be Bafalisayɔ ne baeyechi be Salia
(Mat 23:1-36; Mali 12:38-40)
37Abɛa awɛ mɔ kɔɔcha bɔbɔ ɔmɔchi Mufalisayɔ na kumwitana kwalye mambombe. Awɛ na kwingea, na kuchikaa a mɛsa. 38Mufalisayɔ na kɔmɔa itɛ Mwaame ndaɔya manja kombaa kwe kolya mambombe. 39Mwaame na komosaolea: «Baanu Bafalisayɔ, mɔtɔkwaɔyɛ bwaachi kɔmɔngɔ kwe bibacha binu, ne mbɛɛ chiinu, alakini monda mwiinu moe bochae lokani lwe luubo ne bwabea. 40Moe ne ilalo! Olya waketa kɔnjɛ ndaketa kabee monda? 41Mɔɛchanɛ kee niinu, ne biisɛ bitaongwe byasokoka koe banu. 42«Mayombe koe baanu, Bafalisayɔ, batoocha kɛmɔɔsa kye ikumi kye munana, kyɛ bichɛɛ, ne kye bisɛsi biisɛ bitolewa, na kɔnyɛnyɛka kiinɛkinɛ ne kokonda kwa Kakua. Lɔla bilengye baanu koketa kombaa, na ndakɔɔtɔsɛɛ koebeela bikinɛ mɔsɛɛsɛ. 43Mayombe koe banu, Bafalisayɔ, kɔmɔa motoekya kuchikaa ko byɛɛnɔ bye kombaa mo masinakɔki nɛ kɔɛwa mɔyɔ mo ndongo yee bando! 44Mayombe koe banu, bae boe manda chitaasi chitɔmɔnɛka, ne bando batɔɛndɛa mo nganda kotasi kocheba.» 45Ɔmɔ mondo we Salia koenda chuuki na kɔɔcha: «Mweyechi, mɔ kɔɔcha bɔbɔ, oe mo kotobabacha na bae kabee.» 46Awɛ na kɔɔcha: «Mayombe kwinu kabee, bando be Salia, kɔmɔa motokonda kochekya bando misiɔ ya nyɛma na banu bɛɛnɛ mɔtɔmɛkɔbɔcha ne ɔmɔ we mosani yiinu. 47Mayombe koe banu, kɔmɔa moe mo koaboka mandá che ndɛnda cha Kakua, koko ne baisinu ne babachia! 48Moe mo koangoecha ne kwimenya bikete bye baisinu mokoo; abɔ bachia ndɛnda cha Kakua, na baanu botoaboka manda chabɔ. 49Nɛ kɔ bɔbɔ Kakua, ko lokani lwakɛ, waɔcha: ‹Nabatomee ndɛnda cha Kakua nɛ ndomwa; batachie bamɔchi na kosongya bakinɛ.› 50Kɔ bɔbɔ, bando ba keno keeko batachɔnjɔɛ kokwa kwe ndɛnda chisɛ cha Kakua chachiiwa kobangoa kwabangokea mɔsɛngɛ, 51kobangoa kokwa kwa Abɛli, na kɔbɔngɛa kwa koa kwa Sakalia, wachiiwa asambea motunga ne ndabo ya Kakua. Inde, natobasaolea, banu bando ba keno keeko, motachɔnjɔɛ kokwa kwa bii bitomba biisɛ. 52«Mayombe koe banu, baeyechi be Salia, mwibakolee lufungula lwe kocheba. Ataasi itɛ banu bɛɛnɛ mutwingea, mutuchibea batokonda kwingea.» 53Aola Yɛsu mo ndabo, baeyechi be Salia, ne Bafalisayɔ na komoyembokea na kɔmɔɛbya ne bye komobocha ko biemo biisɛ. 54Abɔ na komolongea tɔlɛbɔ mɔ kɔɔcha, kɔmɔa bakonje ikomo lye kɔmwinyɛkɛchɛa.
Copyright information for
ZmbSC