Luke 13
Bwaachi bwe kɔlɛkɛa bwabea
1Mo kea keeko kwabɛchaya bamɔ bando basaoleaya Yɛsu bwachia Pilatɔ Bakalilaya mo keeko kyayengoaya nyama che koochea Kakua. 2Yɛsu na kobasaolea: «Mutuninga itɛ baba Bakalilaya bakwa kaboko nɛ kɔɔcha itɛ babɛchaya ne bwabea bwabua kokoela Bakalilaya bakinɛ? 3Kuusi! Natobasaolea banu: ingɛ mookatuuke kotoka ko bwabea bwiinu, motakwe kiinɛkinɛ boe abɔ. 4Moeyoke bando ikumi na kinaanɛ bakwa akea ndabo ya sakama yee Silɔamu. Mutuninga itɛ abɔ babɛa ne bwabea koeta bando bakinɛ basɛ mo Yɛlusalɛma? 5Imbɔɔ! Natomosaolea: ingɛ mookatuuke kotoka ko bwabea bwiinu, motakwe kiinɛkinɛ boe abɔ.»Kisimo kye mote otaasi koocha bimuka
6Kɔmɔngɔ, Yɛsu na kɔbatɛchɛa kisimo: «Mondo ɔmɔ wabyaa mutini mu isio lyaakɛ lye misabibu. Lɔmɔ lusu, awɛ na kokonda kokaa bimuka ko olya mutini, na utubiena. 7Kɔmɔa boa, awɛ na kosaolea mɔtɛmi we isio lyaakɛ: ‹Lɔla mo meaka esato nae mo koenga bimuka ko ena mete, situbikonja. Mɔbɛmba! Mote ona ɔsɔɔna matɛkɛ bokata.› 8Mɔtɛmi na kosaolea mwɛɛnɛ we isio: ‹Mwaame, tamɔɛka ono mwaaka! Ndabeke matɛkɛ nɛ mɔtwɛ kokombya ichina lya ona mote. 9Kende otaoche bimuka mu ukinɛ mwaaka. Ingɛ ndewaocha otabɛmbiwɛ.›»Yɛsu osoolola mwa mokachi lusu lwe sabatɔ
10Lɔmɔ lusu lwe sabatɔ, Yɛsu wa eyechaya monda mwe sinakɔki. 11Moa mwasangwa mwa mokachi ɔmɔ wabɛa otae meaka ikumi ne kinaanɛ ne isombo mɔ lɔkɔba lwakɛ. Lea isombo lya mubunga mɔngɔ ne komoketa ndaɔsɔnaya kabee kɔɛlɛka kwibandosa mo mwema. 12Amɔmɔa Yɛsu, na kumwitana ne komosaolea: «Ɛɛ nɛnɛ, osooloka ko kɛɛma kyao!» 13Na kɔmɔtɛchɛa mabɔkɔ, akaɛ alya awɛ na kɔɔnɔnɔka na kobangoa koseka Kakua. 14Mokoo ɔmɔ we sinakɔki na kɔbɛbɛɛlwa amɔa awɛ Yɛsu osoolosa olya mwamokachi lusu lwe sabatɔ. Awɛ na kosaolea bando: «Koe masu motoba matoongwa me kokamba meemo; mobechaye kwaoloswe mo maa masu, ataasi lusu lwe sabatɔ!» 15Mwaame na komosaolea: «Banu be tobee tobee! ɔmɔ wiinu ndatoocha ngɔmbɛ ɔbɛɛ mbonda yaakɛ ko keleseo ne komechaa ko kɛsɔɛlɔ lusu lwe sabatɔ? 16Na ona mwamokachi, we ibota lya Abulaamu, ɔbɛɛ bokakiwe ne Isombo meaka ikumi na kinaanɛ. Ko leno, biisi bwaachi komosoola mo mɔyɔɔ waakɛ, kɔ kɔmɔa lolo ne lusu lwe sabatɔ?» 17Asia Yɛsu kɔɔcha maa makomo, basɛ baangechanaya naakɛ na kɔmɔa masɔni, bando bakinɛ basɛ na kɔmɛma ko bikete bye boombe byaketaya awɛ.Kisimo kye simuka sye alalali
(Mat 13:31-32; Mali 4:30-32)
18Yɛsu na kɔɔcha kabee: «Boombe bwa Kakua botoeyana ne eke? Ndaboeyaneke ne eke? 19Botoeyana ne simuka sye alalali syaenda ɔmɔ mondo ne kobyaa mu isio lyaakɛ. Simuka na kokoa na koolea koongwa mote ne nyɔnyi che kwiyoo na kota makɛɛsa asambea metabe yaakɛ.»Kisimo kye bisunga bye koembya mikati
(Mat 13:33)
20Yɛsu na kɔɔcha kabee: «Ndaeyanekye boombe bwa Kakua ne eke? 21Botoeyana ne bisunga bye koembya mikati byatomba ɔmɔ mwamokachi ne kosambya ne bonga bwabua. Kubɔngɛɛ boa bonga bɔɔsɛ na koemba.»Mbanga bataingee mo boombe bwe mwiyoo?
(Mat 7:13-14,21-23)
22Yɛsu na koeta boa, koetea tolya tokoo ne tɔkɛɛkɛ, mo koeyecha, basɛ mo koya ko Yɛlusalɛma. 23Ɔmɔ mondo na komobocha: «Mwaame, kɔtabɛ ne bando bachiinini bataoloke?» Na kobasaolea baa basɛ babɛchaya alya: 24«Mokete bɔkɛtɛ bwiinu bɔɔsɛ, kukwingea ku mukinda wa kungunyaa, kɔ kɔmɔa babua bataenge kwingea bɔbɔ ne bakaɔsɔnɛ. 25Alya atataoke mwɛɛnɛ we ndabo ne kuchiba mukinda ne motandelwa, banu motaungwe mososaa anjɛ ne kobangoa kende osaechi anjɛ, kolonda londa ku kibi mɔ kɔɔcha: ‹Mwaame, Mwaame, tuchiboela!› Otamosaolee: ‹Sicheba kototoka baanu.› 26Alya motabangoe komosaolea: ‹Bae twabɛchaya amɔsa nao mo kolya nɛ kɔsɔa, kabee waeyechaya mo njea chiito.› 27Otabasaolee kabee: ‹Natɔɔtɔsɛa, sicheba kototoka baanu. Moya binu, baanu batoketa bwabea!› 28Koa motalele ne kwinya ngyɛɛkɛtɔ, alya atamɔɛ banu, Abulaamu, na Isaka, na Yakɔbɔ nɛ ndɛnda cha Kakua chee mo boombe bwakɛ. Naanga ne baanu bɛɛnɛ mɔtabɛ mosokosolwa anjɛ. 29Bando bataabe kototoka chooba ne kotoya chooba, konganda ne kose, ne bachikane mo kolya naakɛ amɔsa mo boombe bwa Kakua. 30Ko bobo, bae kɔmɔngɔ bataungwe kombaa ne be kombaa bataungwe kɔmɔngɔ.»Yɛsu na kolelea Yɛlusalɛma
(Mat 23:37-39)
31Mo kyanya bamɔ Bafalisayɔ na kumwisɛnɛnɛa Yɛsu ne komosaolea: «Nombe Ɛlɔlɛ otoenga kukuchia, ungyatatoka mo keno kekaakanda nɛ kwisɛɛna a likinɛ iboa.» 32Yɛsu na kobasaolea: «Moyasaolea olya mɔɛla itɛ: ‹Leno nɛ ngɛcha, nae mu kwikita masombo ne koolosa balwachi; kaete, ndaongwe nausiecha meemo yaanɛ.› 33Bitokoka na mee kulikitea lwɛndɔ lwaanɛ leno, ngɛcha ne kaete, kɔmɔa biitokoka ndɛnda ya Kakua kuchiiwa anjɛ yee Yɛlusalɛma! 34«Ee bando be Yɛlusalɛma! Bando be Yɛlusalɛma! Banu mutuchia ndɛnda cha Kakua. Ne bando batomotomea Kakua, mutubachia ne mabwɛ! Ngongobwa chinga chikondee mee komokongoseka botokongoseka ngɔkɔ baana bakɛ mose mwe biwawa, ndwakonda! 35Ano ano, maabo miinu mangasaa bilyalya. Kiinɛkinɛ natokosaolea: kobangoa leno mookambɔɛ kabee ɛka ataɔchɛ banu: ‹Oelelekiwe olya otobaaka ku chiina le Mwaame!›»
Copyright information for
ZmbSC