Luke 14

Yɛsu osoolola mondo lusu lwe sabatɔ

1Lɔmɔ lusu lwe sabatɔ, Yɛsu na kwitaniwa kwalye ko ndabo yee ɔmɔchi mokoo we Bafalisayɔ. Baa babɛchaya naakɛ mo kolya amɔɔsa, bamɔkɛngɛaya. 2Kombaa kwa Yɛsu kwabɛchaya molwachi we koemba lɔkɔba lɔsɛ. 3Yɛsu na kobocha baeyechi be Salia ne Bafalisayɔ itɛ: «Bie bwaachi koolola lusu lwe sabatɔ aɔ ndɛɛkɔ?» 4Abɔ na konyamea nyaa. Yɛsu kubunda molwachi na komoolola na komosaolea oyake byakɛ. 5Kɔmɔngɔ Yɛsu na kobabocha: «Naani asambea banu, ingɛ oe ne mwaana waakɛ ɔbɛɛ ngɔmbɛ yaakɛ, ingɛ esokeela mu kiina, otaasi ndatoketa chaa chaa komeocha lusu lwe sabatɔ?» 6Abɔ ndebaɔsɔna kɔɔcha kendo.

Kwikobecha ɔbɛɛ kwiiyikya

7Amɔa Yɛsu baitaniwa bae mɔ kɔsɔbɔa byɛnɔ bye kombaa, awɛ na kɔɔcha keke kisimo: 8«Ingɛ mondo osukwitana ko ketokoyoo kye ilangya, ndekuchikaa ko kɛɛnɔ kye kombaa, kɔ bɔɔba itɛ, kenda koe ko baa baitaniwee mondo we boombe kokoeta, 9na olya omwitanee banu babee, ndabechaya kwakosaolee: ‹Mwesoa ona mondo mɔ kɛɛnɔ.› Alya, otayachikaa kɔ kɛɛnɔ kyɛ kɔmɔngɔ na masɔni. 10Awɛ, ingɛ basukwitana, yaaka kwachikanee kɔ kɛɛnɔ kyɛ kɔmɔngɔ, ataolee olya ukuitanee, okosaolee: ‹Ee munjinanɛ, yaaka kwachikane kɔ kɛɛnɔ kye kombaa.› Alya, otanyemiwe ne bando basɛ bae nao mo kolya. 11Kɔ bɔbɔ, olya otoiyenda otaikyiwe, na olya utaiyikye otaendwe.»

12Kɔ mɔngɔ Yɛsu na kosaolea olya umwitanee: «Ingɛ utwitana mondo ko byekolya bye chooba ɔbɛɛ byɛ kyɔlwa, ndekwitana biɛmba byao, ɔbɛɛ babotwa nao, ɔbɛɛ bando be ibota lyao ɔbɛɛ ngonji chaelana nao. Kɔmɔa itɛ, ko mbanga yaabɔ banakwitana nabɔ, nɛ kɔkɔɔtɔsɛa byabaɛcha awɛ. 13Ingɛ osokamba biebwa bye ketokoyoo, itana bakɛna, nɛ bɛ ɛlɛɛlɛ, biloko, mbufu. 14Ko boa otaongwe waenoka kɔ kɔmɔa baa bando baakakonje byɛ kɔkɔɔtɔsɛa! Kɔmɔa otaɔtɔsiwee a kuubuka kwe bando be kiinɛkinɛ.»

Kisimo kye bando baitaniwa ko ketokoyoo

(Mat 22:1-10)

15Ɔmɔ mondo ko baa babɛchaya mo kolya na Yɛsu, aungwa awɛ maa makomo na kɔɔcha: «Waenoka ɔbɛɛ mondo otalye byekolya bye ketokoyoo mo boombe bwa Kakua!» 16Yɛsu na kɔɔcha: «Ɔmɔ mondo wakamba biewa bye ketokoyoo mwingya chooba, awɛ na kwitana bando babua. 17Aolea kyanya kye kolya, awɛ na kotoma mokambi waakɛ kwasaole baitaniwa itɛ: ‹Mobake, biisɛ bitaɛlɔ.› 18Abɔ basɛ, ɔmɔ ɔmɔ na kosaola bibachibee koolea. We kombaa na kɔɔcha: ‹Naolee isio, sikaene koya kwalɛlɔlɛ; natwiyaya kwao ngwea lokwa.› 19Ukinɛ na kɔɔcha: ‹Naolee ngɔmbɛ ikumi che kubuula matɛkɛ, nae mo koya kwachiɛlɛkɛ ko meemo; ngwea lokwa.› 20Ukinɛ na kɔɔcha: ‹Nakee ne botombe, kɔ bɔbɔ sikaɔsɔnɛ kobaka.› 21Akɔɔtɔka kwe mokambi, awɛ na kosaolea mokoo waakɛ maɔ masɛ makomo. Ne moemo, mwɛɛnɛ we ndabo aungwa awɛ bɔbɔ, awɛ na koemoka, na kosaolea mokambi waakɛ: ‹Yaaka chaa chaa mo metanga mekoo nɛ mɛkɛɛkɛ yee mesomba, baaka ne bakɛna, nɛ bɛ ɛlɛɛlɛ, mbufu ne bioko.› 22Kusia bɔbɔ, olya mokambi na kɔɔcha: ‹Ee mokoo, biɔchɛɛ awɛ, nasubiketa, kokee kabee iboa.› 23Na awɛ mokoo na kosaolea mokambi: ‹Yaaka mo machea me tolya, ne mɔsɛɛsɛ mwe masio, ne basɛ batamɔɛ awɛ mobaingeche kɔ bɔkɛtɛ, kɔmɔa ndabo yaanɛ echae.› 24Kɔ bɔbɔ natobasaolea, naa nɛ ɔmɔɔsa ko baa baitaniwee ndakasɛngɛ byekolya bye ketokoyoo kyanɛ.»

Koyea Yɛsu nɛ kɔlɛkɛa biisɛ

(Mat 10:37-38)

25Lɔmɔ lusu bando babua babɛchaya mo koyee Yɛsu, awɛ ko bakɛbɔka na kobasaolea: 26«Ingɛ mondo osokonda koba kwanɛ, na awɛ ndangonda mee koeta isakɛ, na inakɛ, ne mokachi waakɛ, ne baana bakɛ, ne babotwa naakɛ, ne metamba yaakɛ, ne kwikɔna awɛ mwɛɛnɛ, olya ndatowaena kuungwa mweyechwa waanɛ.» 27Olya mondo otaasi ndatochaa mote we maakanu waakɛ, ne kombyea, ndatowaena koongwa mweyechwa waanɛ. 28Naani asambea banu, ingɛ otokonda koaboka ndabo yee konangamaa, ndatochikaa ase, na kobaeka byɛndɔ bie naakɛ, na kɔmɔna ingɛ bitakoke ku kusia meemo? 29Kɔ kɔmɔa, ingɛ osoaboka musingi, na koomaa kusieecha koaboka ndabo elya ya nangamaa, bando batamɔɛ bia, batamɔkyɛtɛ 30na kɔɔcha: «Mɔlɔlɛ mondo wabangeka koaboka osoomaa kusia!» 31Ɔbɛɛ kabee, meke nombe ee ne bakɔlɔbɔyɔ tununu ikumi ee mo kosangya kuchiana ne ikinɛ nombe ee ne bakɔlɔbɔyɔ tununu makumi mabee? Ena nombe etatachikae ase ne kwibocha kende bɔkɛtɛ bwe bakɔlɔbɔyɔ bakɛ bataɔsɔnɛ kobakoela bita. 32Ingɛ ɔsɔmɔa ndakaɔsɔnɛ, okee njɔɔ, otatome mondo kwasaole elya ikinɛ nombe baungwane. 33Bie bobo kwinu, mondo otaasi ndakalɛkɛɛ biisɛ bie naakɛ, ndatowaena koongwa mweyechwa waanɛ.

Musiki ɔsɔɔnɛka

(Mat 5:13; Mali 9:50)

34«Musiki wee ne keemo kyaachi, ingɛ usuchimbecha itɛɛtɛ lyaakɛ, otatebwe eke kɔ kɔɔtɔsa itɛɛtɛ lyaakɛ? 35Bikaɔsɔnɛkɛ kokamba nao kabee, ɔbɛɛ ko matɛkɛ, ɔbɛɛ ko kokocha mebyao, bando batamokosoe. Olya oe ne matwe me kuungwa uungwe.»