Luk 17 | ZmbSC | STEP | Yɛsu na kosaolea baeyechwa bakɛ: «Bie byakoba bando koena bye kobakecha, mayombe ko olya otobibesa.

Luke 17

Bwabea ne lokwa

(Mat 18:6-7,21-22; Mali 9:42)

1 Yɛsu na kosaolea baeyechwa bakɛ: «Bie byakoba bando koena bye kobakecha, mayombe ko olya otobibesa. 2 Bingaba bwaachi ko olya mondo komokaka iwɛ lekatala mu ngingo ne komokosoa mu kichibachiba, kotasi awɛ kokecha ɔmɔ ko baa bakɛɛkɛ. 3 Mwilɔlɛ bwaachi baanu bɛɛnɛ! Kende mobotwa nao osoketa bwabea, mwaana, kende usu tuuluka mokwea lokwa. 4 Ingɛ osokoketea bwabea ngongobwa mosambo ku lusu lɔmɔsa nɛ kɔɔtɔka koba kwa kɔɛngɛɛ lokwa ngongobwa mosambo, nɛ kɔɔcha: ‹Nasutuuluka, ngwea lokwa›, mokwea lokwa.»

Bɔkɛtɛ bye kuimenya Kakua

5 Ndomwa na kosaolea Mwaame: «Tubuchea iekekeo.»

6 Mwaame na kobasaolea: «Kende mungaba ne iekekeo naa ne lɛkɛɛkɛ boe kamuka ke alalali, mungasaolea ona mote itɛ, ichoola ana, yaikosoa mo lwalaba, unga ungamoeleleka.»

Meemo yee mokambi

7 «Tɔɔchɛ boe: naani asambea banu oe ne ngambi mɔtɛmi ɔbɛɛ otosanga bifukwa byakɛ, otamosaolee atɔɔtɔka awɛ ko masio itɛ: ‹Baka mbeo kwalye?› 8 Kuusi! Otasaolee mokambi: ‹Sangya biebwa byaanɛ, kusia, ibweka ngubɔ chaani kɔmɔa ongambee atabɛ mee mo kolya nɛ kɔsɔa.› 9 Mutuninga itɛ mokoo wa olya mokambi otamoseke, kɔmɔa osoketa biisɛ bitokonda mokoo waakɛ? Kuusi! 10 Bwakaɛ bwakaɛ kwinu. Atakete banu biisɛ bitomosalea Kakua koketa, mɔɔchɛ: ‹Toe ne ngambi bokata, toketee ne biitowaena bae koketa.› »

Yɛsu osoolosa bando ikumi be baacha

11 Ayechaya Yɛsu ko Yɛlusalɛma, awɛ na koeta asambea mɔsɛngɛ we Samalia ne Kalilaya. 12 Abɛa awɛ ungaingea mo kamɔ kalya, bando ikumi be baacha, na koba kwakumbakane naakɛ abɔ na koemaa kwe njɔɔ. 13 Na kobangoa konangameka mauki mabɔ mukwiyaya: «Ɛɛ Yɛsu, Mwaame, tokwea lokwa!» 14 Abamɔa Yɛsu, na kobasaolea: «Moye ko basia kwaiangoeche! ^{▼▼Yɔɔla Law 14:2-3.}» Abɔ mo koya koa, na kooloka.

15 Ɔmɔ waabɔ, aimɔa awɛ osooloka, na kɔɔtɔka mo koseka Kakua ne chuuki lya yanaka. 16 Awɛ na kokea bingukumanya ko meende ya Yɛsu na koocha mosao. Na olya mondo waba ne Musamalia. 17 Ko boa, Yɛsu na komobocha: «Koe bando ikumi baolokee nde bɔbɔ? Baa kɛtɛma bakinɛ bae koni?» 18 Yɛsu na kobocha: «Kuusi naa ne mondo ɔmɔɔsa we kobaocha mosao kwa Kakua, ne awɛ ikɛɛsa we kɛbɛɔ?» 19 Kusia na otosaolea olya Musamalia: «Tamaoka, yaaka, iekekeo lyao lesokoolola.»

Koba kwe boombe bwa Kakua

(Mat 24:23-28,37-41)

20 Bafalisayɔ na kobocha Yɛsu: «Boombe bwa Kakua botabe ani?»

Yɛsu na kobasaolea: «Boombe bwa Kakua bokabake mɔ kɔmɔɛka. 21 Bakaɔchɛ: ‹Mobee oe ana!›, ɔbɛɛ ‹Oe koa!›, kɔ kɔmɔa bye kiinɛkinɛ boombe bwa Kakua botae mwingya mwiinu.»

22 Kusia na otosaolea baeyechwa bakɛ: «Keeko ketabake ketakonde kɔmbɔa mee Mwaana we Mondo naanga ne lusu lɔmɔɔsa, bikaɔsɔnɛkɛ. 23 Batamosaolee: ‹Yɛsu oe ana!›, ɔbɛɛ ‹Yɛsu oe alya!› Mweyechaya mo kulikitea koa! 24 Bɔtɔkɛnya mɔkɛɛli mbanga chisɛ che iyoo, bwakaɛ boa ne bwakaongwa lusu lwe koba kwe mee Mwaana we Mondo. 25 Bitokoka kombaa mee nakonje manɛnɛ mabua nɛ kɔkɔniwa ne bando be ibota lya leno. 26 Lusu lwe koba kwe mee Mwaana we Mondo, lwakaongwa na boa bwaketeka abyo mo keeko kya Nɔa. 27 Mamɔ masu, bando babɛchaya mo kolya ne kɔsɔa, ne kotombana ɛka alya aingea Nɔa mo bwato. Kusia ne bwaɔka muumbe we mbua wasia bando kaboko. 28 Bwakaɛ bwakaɛ ne bwaeteka mo keeko kya Loti. Bando balechaya mo kolya nɛ kɔsɔa, baolaya ne koolekya, babyaaya ne koaboka maabo. 29 Lusu lwaola Loti mo kalya kɛ Sɔlɔma, toya na kwika bwe mbua yɛ kɛwɛ na kotoka kwiyoo na kobasia njɛngɔ. 30 Bwakaɛ boa ne bokaongwa lusu lwe koba kwa mee Mwaana we Mondo.

31 «Loa lusu, kende mondo wee mo nganda mwe lotanda lwakɛ, ndaikaya kwaende biemo byakɛ bisaɛchi monda mwe ndabo; bwakaɛ, olya otaongwe ko masio, ndakaɔsɔnɛ kɔɔtɔka ko ndabo. 32 Mwitunduche bia byaolelea mokachi Loti. 33 Olya otaenge kɔɔnga mwɛchɔ waakɛ otamuchimbeche; olya otamuchimbeche ɔtamɔɔngɛ. 34 Natomosaolea banu: boa butu, bando babee batabɛ mwitakaa lɛmɔɔsa: ɔmɔ otaendwe, ne ukinɛ ososaa. 35 Baa bakachi babee batabɛ mu kwikinya nganɔ kɔmɔɔsa, ɔmɔ otaendwe, ne ukinɛ ososaa. [ 36 Bando babee batabɛ mwisio lɛmɔɔsa; ɔmɔ otaendwe, ne ukinɛ ososaa.»]

37 Baeyechwa na kobocha Yɛsu: «Mwaame, bia bitaeteke koni?»

Awɛ na kobasaolea: «Alya atabe bitomba; akaɛ alya ne atukumbakanea iinjɔ.»