Luk 18 | ZmbSC | STEP | Kusia Yɛsu na kosaolea baeyechwa bakɛ kisimo keke ko kobaangoecha biengye kwiyaya lusu ku lusu kotasi kɔkɔɛka.

Luke 18

Kisimu kye mwalyango ne nganya

1 Kusia Yɛsu na kosaolea baeyechwa bakɛ kisimo keke ko kobaangoecha biengye kwiyaya lusu ku lusu kotasi kɔkɔɛka. 2 Awɛ na kɔɔcha: «Mɔ ɔmɔ mosomba, kwabɛchaya ɛmɔchi nganya etaasi ndeyatenaya Kakua ɔbɛɛ kɔnyɛmya mondo. 3 Kwabɛchaya kabee mo ɔyɔ mosomba ɔmɔchi mwalyango wayeaya ena nganya na kɔɔcha: ‹Bɛmba bwaachi lee ikomo asambea mee ne moangani naanɛ.› 4 Elya nganya na kɔkɔna kɔbɛmba lea ikomo masu mabua. Kɔmɔngɔ, awɛ na kwiɔchɛa: ‹Ɔna ne mee sitotena Kakua ɔbɛɛ kobaeka mondo. 5 Kɔmɔa ona mwalyango usunguula, ndamɔɛchɛ sambo yaakɛ, ndabechaya kwa mbomye motwe.›» 6 Ko boa Mwaame na kɔɔcha: «Muungwe bitɔɔcha elya nganya ya bea. 7 Na awɛ Kakua ndakaɛchɛ sambo ko baa bando basɔbɔa awɛ, batomolelea butu ne chooba? Ɔbɛɛ otaimokee ko kobakwasa? 8 Mee natobasaolea itɛ ndakalɛyɛ kobaabea chaa chaa sambo yaabɔ. Ataɔtɔkɛ mee Mwaana we Mondo, ndabange bando be iekekeo mɔ mɔsɛngɛ?»

Kisimu kye Mufalisayɔ ne otolambwesa molambo

9 Bwakaɛ bwakaɛ Yɛsu na kobasaolea keke kisimo ko mbanga yee bando baibanda kuungwa bando be kiinɛkinɛ nɛ kɔnyɛka makinɛ. 10 «Lɔmɔ lusu bando babee banena ko Ɛkalu kwaiyaye. Ɔmɔchi waba ne Mufalisayɔ ne ukinɛ walambwesaya molambo. 11 Olya Mufalisayɔ koemaa, na kwiyaya bobo monda mwe motema waakɛ: ‹Ee Kakua, nasɔɔcha mosao kwao, kɔmɔa mee siisi boe bando bakinɛ, ngiba ne maɔkwa, babea miila, be bwambya. Nasɔkɔɛcha kabee mosao, siisi boe olya otolambwesa molambo. 12 Masu mabee ko yenga, natwiyaya ne kwiyenya koya, natoochaya keba kɛmɔɔsa kye ikumi ku biisɛ bitokonja mee.› 13 Awɛ, olya otolambwesa molambo, na kwimana njɔɔ, ndaɛlɛka naa ne kɔlɔla mwiyoo, awɛ na kwitotoa mo kyaale ne bosongo mɔ kɔɔcha: ‹Ee Kakua kaanɛ, ngwea lokwa mee mondo wa bea.› 14 Natobasaolea, olya molambwisi we molambo otaɔtɔkɛ ko ndabo yaakɛ ookwelwa lokwa, ndɛɛkɔ olya Mufalisayɔ. Kɔmɔa, mondo ɔɔsɛ utuikobecha utuikkyewe nɛ ɔɔsɛ utuiyikya otokobechiwa.»

Yɛsu ɔsɔtɛchɛa baana kaowe

(Mat 19:13-15; Mali 10:13-16)

15 Bando na komobea Yɛsu ne baana bakɛɛkɛ itɛ ɔbakɔbɔchɛ; amɔa baeyechwa bakɛ boa, abɔ na kobakandokea. 16 Yɛsu na kɔɛngɛa bamobee ne baana, awɛ na kɔɔcha: «Mɔlɛkɛɛ baana bakɛɛkɛ baabe kwanɛ, ndekobakandea, kɔmɔa boombe bwa Kakua boe ne bwe bando batoeyana nabɔ. 17 Kiinɛkinɛ natobasaolea, ingɛ mondo ndaimenya boombe bwa Kakua boe mwaana mɔkɛɛkɛ, ndatokoka kwingea amɔ.»

Ngunji

(Mat 19:16-30; Mali 10:17-31)

18 Kɛmɔchi kenombe na kobocha Yɛsu: «Ee Mweyechi mwaachi, nakete booni ko kokonja mwɛchɔ we meombo?»

19 Yɛsu na komobocha: «Ko eke kutumbitana awɛ mwaachi? Kuusi oe mwaachi ataasi Kakua ikɛɛsa. 20 Mbaya otocheba bɔtɔɔcha salia: ‹Ndekoketaya bwambya, ndekuchiaya, ndekwibaya, ndɛkɔɔchaya manu, nyɛmya isao na inao.›» ^{▼▼Yɔɔla Kot 20:12-16; Koe 5:16-20.}

21 Olya mondo na komosaolea: «Biisɛ bia naanga kubiketa kobangoa bwabɔtɔ bwaanɛ.»

22 Akuungwa Yɛsu bɔbɔ, awɛ na kɔɔcha: «Okeena kikinɛ ketaasi ndonaketa: Biemo biisɛ bie nao, biolekya na bia byɛndɔ abanyea bakɛna; alya ɔtabɛ ne byɛndɔ byabua mwiyoo; kɔmɔngɔ baka kwambyee.»

23 Aungwa olya mondo bɔbɔ, awɛ na koemoka, kɔmɔa wabɛchaya ngunji mekoo.

24 Amɔa Yɛsu itɛ osoemoka, awɛ na kɔɔcha: «Kiinɛkinɛ bie ne kokoba ko ngunji kwingea mo boombe bwa Kakua. 25 Bie byalɛnga ko ngamia kwingea mo saka yee motoboo, koe ngunji kwingea mo boombe bwa Kakua.»

26 Baa baungwa maa makomo na kɔɔcha: «Ne naani nabo otaɔsɔnɛ kooloka?»

27 Yɛsu na kɔɔcha: «Bitaasi bitɔɔsɔnɛka ko bando, bitɔɔsɔnɛka na Kakua.»

28 Ko boa Pɛtɛlɔ na kɔɔcha: «Lɔla tɔsɔlɛkɛa biemo biito biisɛ bibɛɛ niito ne kokoyea awɛ.» 29 Yɛsu na kobasaolea: «Kiinɛkinɛ natobasaolea: ingɛ mondo ususia ndabo yaakɛ, ɔbɛɛ mokachi waakɛ, ɔbɛɛ babotwa naakɛ, ɔbɛɛ baboti bakɛ, ɔbɛɛ baana bakɛ ko kokonja boombe bwa Kakua, 30 otakonje byabua mo keno keeko ke okee mo ona mɔsɛngɛ mwɛchɔ, ne otakonje mwɛchɔ we meombo mo keeko kee mokoba.»

Yɛsu ososaola lwa sato ko mbanga kwe kokwa ne kuubuka kwakɛ

(Mat 20:17-19; Mali 10:32-34)

31 Yɛsu na kubunda ndomwa chaakɛ ikumi ne babee mɔsɛɛsɛ na kobasaolea: «Mɔlɔlɛ toe mo konena Yɛlusalɛma, biisɛ byakunyiwa ne ndɛnda cha Kakua ko mee Mwaana we Mondo bitaketeke. 32 Ndaochiwe ko bando be bibɛɔ, nɛ batangyɛtɛ, nɛ kɔmbɛngɛa, ne kunduela masɔki. 33 Batangomoe myɛɛsu, kɔmɔngɔ na kunjia. Lusu lwa sato, ndaubuke!»

34 Ndomwa chaakɛ ndechacheba byaɔcha awɛ kɔmɔa mɔɔcha waakɛ waba ne boe kisimo, na abɔ ndebacheba Yɛsu ɔtɔɔchɛa ko eke.

Yɛsu osoolola mbufu

(Mat 20:29-34; Mali 10:46-52)

35 Abɛchaya Yɛsu ungaolea mo kalya ke Yɛlikɔ, mbufu ɔmɔ yabɛchaya ase mɔsɛɛsɛ mwe njea mɔ kɔɛngɛaya. 36 Aungwa awɛ moocho we ndongo yee bando baeta, awɛ na kobocha ingɛ koe eke. 37 Na komosaolea itɛ, Yɛsu we Nasalɛti ne oe mo koeta. 38 Awɛ na kɔta mbela: «Ee Yɛsu Mwaana wa Lauli, ngwea lokwa.» 39 Bando babɛchaya kombaa kwa Yɛsu mo ndongo na komokandokea ɔlɛkɛɛ moocho. Awɛ na kokandoka bokoo bokoo: «Mwaana wa Lauli, ngwea lokwa.» 40 Yɛsu na kwimana na kobasaolea bamobesee elya mbufu. Aolea mbufu mɔsɛɛsɛ mwa Yɛsu, Yɛsu na komobocha: 41 «Nakoketee eke?» Mbufu na kɔɔcha: «Ee Mwaame, natokonda kɔmɔa kabee.» 42 Yɛsu na kɔɔcha: «Baanamɔa kabee, iekekeo lyao lɛɔkɔmɔnya mwɛchɔ.» 43 Akaɛ alya, awɛ na kɔmɔa, awɛ na koyea Yɛsu mo komotombeka Kakua. Amɔa bando basɛ lee ikomo, bando basɛ kotombeka Kakua.